2022 ꓘꓳ; 2 ꓦ 24 ꓠꓬꓲ ꓢ ꓘꓪ ꓕꓯꓽ ꓚꓮꓳꓼ-ꓒ-ꓬꓹ ꓠꓯ ꓬꓲꓻ ꓗꓪ ꓟꓳ-ꓓꓳ ꓡꓲꓺ ꓜꓶꓽ ꓢꓲꓸ ꓞꓰ ꓟꓶꓽ ꓡꓰ ꓢꓴ꓾ ꓕꓮꓲ ꓟꓵꓽ ꓗꓪ ꓟꓬꓱ ꓓꓳꓽ ꓙꓳˍ ꓟ ꓐꓲ ꓜꓳꓽ ꓠꓴꓽ ꓢꓯꓼ ꓢꓷ ꓠꓲꓹ ꓙꓳ ꓟ ꓔ-ꓟꓳ (Tangmo) ꓫꓵꓻ ꓟꓳ ꓔꓯ 2 ꓦ 26 ꓠꓬꓲ ꓕꓯꓽ ꓧꓪ ꓟꓶꓳ꓿
37 ꓘꓳꓼ ꓙꓳˍ ꓟ ꓔ-ꓟꓳ ꓠꓬ ꓬꓲꓸ ꓛꓳ ꓒꓯꓹ 5 ꓣꓳ ꓔꓺ ꓔꓲ ꓟꓳ-ꓓꓳ ꓡꓲꓺ ꓜꓶꓽ ꓙꓰ ꓟ ꓗꓪ ꓕꓱ ꓡꓱ ꓬꓲ ꓙꓬ ꓔꓲꓹ ꓫꓵꓻ ꓟ ꓥ ꓡꓳ꓿ ꓬꓲꓸ ꓫꓵꓻ ꓗꓸ ꓠꓯꓸ 2 ꓠꓬꓲ ꓡꓳꓼ ꓕꓯꓽ ꓢꓲꓸ ꓫꓵꓻ ꓟꓳ ꓧꓪ ꓟꓶˍ ꓟ ꓥ ꓡꓳ꓿
ꓬꓲ ꓙꓬ ꓔꓲꓹ ꓫꓵꓻ ꓟ ꓬꓲꓸ ꓑꓶꓸ ꓔꓯ ꓚꓲꓸ ꓚ ꓠꓬꓲ ꓠꓬ꓾ ꓡꓲꓺ ꓘꓴꓽ ꓗꓪ ꓙꓳˍ ꓟ ꓟꓲ ꓠꓯ ꓙꓰ ꓦꓲ (toilet) ꓟꓽ ꓙꓲˍ ꓠꓬꓲ꓾ ꓡꓲꓺ ꓟꓶꓸ ꓗꓪ ꓐꓰ ꓙꓰ ꓠꓹ ꓟ ꓢꓯꓼ ꓕꓵꓼ ꓕꓯꓽ ꓬꓲ ꓙꓬ ꓗꓪ ꓞꓰꓻ ꓔꓵꓸ ꓡꓰˍ ꓟ ꓥꓳ ꓐꓰ ꓕꓮꓲ ꓫꓵꓽ ꓓꓳ ꓐꓳ ꓢꓴ ꓐꓴ ꓡꓰ ꓐꓳ ꓔꓬ ꓡꓳ꓿
ꓖꓳ ꓡꓱ ꓥ ꓟꓲ ꓫꓵꓻ ꓟꓳ ꓔꓯ ꓠꓯ ꓞꓲꓼ ꓢꓲ ꓒꓽ ꓐꓴ ꓡꓰ ꓚꓹ ꓠꓬꓲ ꓕꓯꓽ ꓐꓵꓼ ꓟꓵ ꓗꓪ ꓧꓶꓽ ꓛꓲ ꓓꓵꓽ ꓡꓰ ꓔꓸ ꓡꓳꓸ ꓟꓳˍ ꓡꓳ꓿ ꓝꓮꓲ ꓒꓬꓱꓽ ꓟꓬ ꓐꓰ ꓛꓲ ꓒꓯꓹ ꓗꓪ ꓠꓻ ꓓꓴ ꓥ ꓟꓲ ꓡꓳꓸ ꓟꓳˍ ꓡꓳ꓿
“ꓥꓪ ꓤ ꓟꓶꓼ ꓮ ꓡꓲ ꓐꓰ ꓫꓵꓻ ꓟ ꓔꓯꓸ ꓟꓳ ꓢꓷꓸ ꓠꓲꓹ ꓫꓵ ꓥ꓿ ꓬꓲ ꓛꓳ ꓒꓯꓹ 5 ꓣꓳ ꓗꓪ ꓐꓰ 1 ꓣꓳ ꓔꓯ ꓓꓰꓼ ꓥꓪ ꓢꓷꓸ ꓥ꓿ ꓬꓲꓸ ꓬꓲ ꓙꓬ ꓗꓪ ꓞꓰ ꓬꓰ ꓟꓶ ꓕꓱꓼ ꓬꓲꓸ ꓓꓳꓽ ꓟ ꓠꓲꓹ ꓞ ꓟꓽ ꓟꓸ ꓖꓶ ꓡ꓾ ꓖꓶ ꓬꓲꓽ ꓘꓶꓽ ꓟꓽ ꓕꓱ ꓡ ꓠꓰ ꓬꓲꓸ ꓛꓳ ꓒꓯꓹ ꓕꓲ ꓜꓴ ꓔꓯ ꓥꓪ ꓠꓲꓹ ꓟ ꓟꓽ ꓢ” ꓐꓰ ꓔ-ꓟꓳ ꓬꓲꓸ ꓟꓹ ꓟ ꓡꓰ ꓐꓯˍ ꓡꓳ꓿
ꓟꓯꓼ ꓑꓳꓡꓲꓚꓰ ꓐꓴ ꓡꓰ ꓔ-ꓟꓳ ꓬꓲ ꓛꓳ ꓒꓯꓹ ꓐꓴ ꓔꓯ ꓚꓲꓸ ꓚ ꓔꓬ ꓡꓳ꓿
