ꓟꓶ-ꓡꓯ-ꓫ ꓡꓲ-ꓢꓴ ꓐꓴ ꓗꓳ ꓡꓳ ꓗꓪ ꓕꓱ ꓕꓲ ꓝꓲꓸ ꓠꓬ ꓗꓳ-ꓒꓲ ꓟꓸ ꓟꓲꓽ ꓮ ꓟꓬꓹ ꓕꓱ ꓓꓳ ꓡ ꓔꓬ ꓠꓬꓲ꓾ ꓡꓔ ꓥ ꓟꓲ ꓢꓰꓸ ꓮ ꓢꓸ ꓢꓲꓸ ꓠꓻ ꓠꓬꓲ ꓕꓻ ꓠꓬꓲ ꓗꓷꓳ꓿
ꓢꓷꓸ ꓢꓴ ꓔꓯ ꓠꓻ ꓠꓬꓲ ꓗꓷ ꓠꓬ ꓠꓲꓹ ꓟ ꓪꓴꓽ ꓧꓶ ꓗꓹ ꓓꓴ꓾ ꓠꓲꓹ ꓢꓲꓼ ꓗꓹ ꓓꓴ꓾ ꓠꓲꓹ ꓟ ꓠꓻ ꓗꓹ ꓓꓴ ꓓꓳꓽ ꓥ ꓐꓶ꓿
“ꓮ ꓙꓵꓽ ꓞꓳꓸ ꓬꓰꓳ ꓐꓯ ꓥꓳ꓿ ꓕꓵꓼ ꓟꓽ ꓙꓲ ꓬꓰꓳ꓿ ꓕꓱ ꓡꓲꓸ ꓕꓱ ꓗꓹ ꓟꓴ ꓟꓽ ꓢꓱ꓿ ꓥꓴ ꓡꓲꓸ ꓠꓬ ꓐꓲ ꓟꓽ ꓓꓳ ꓡ ꓗ ꓬꓰꓳ ꓟꓽ꓿” ꓐꓰ Cafe Bustelo ꓗꓪ ꓶ ꓡꓯꓼ ꓓꓵꓽ ꓔꓸ ꓢꓴ ꓕꓲ ꓣꓳ ꓡꓰ ꓐꓯ ꓟꓸ ꓖꓶ ꓡ ꓡꓳ꓿
ꓶ ꓡꓯꓼ software ꓐꓬꓱꓽ
Cafe Bustelo ꓠꓬ ꓶ ꓡꓯꓼ ꓟꓴ ꓚꓱꓹ App/website ꓕꓲ ꓟ ꓥ ꓡꓳ ꓐꓯ ꓢꓲ꓾ ꓖꓳ ꓗꓪ ꓒꓴ ꓗꓶ ꓠꓸ ꓢꓴ ꓡ ꓞꓳ ꓬꓲꓸ ꓫꓵꓼ ꓮ ꓟꓬꓹ ꓧꓪ ꓓꓵꓽ ꓡ ꓠꓬ꓾ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓬꓲꓸ ꓐꓵꓽ ꓮ ꓟꓬꓹ ꓢꓪꓼ ꓖꓶ ꓡ ꓟ ꓕꓲꓽ ꓫꓵꓽ ꓥ ꓡꓳ꓿ ꓗꓳꓸ ꓗꓷ ꓟ 2025 ꓘꓳꓼ 6 ꓦ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓣꓟ 60 ꓗꓶ ꓔꓸ ꓠꓬ ꓕꓲꓽ ꓠꓬꓲ ꓘꓴꓽ ꓗꓪ ꓣꓟ 3 ꓬꓲꓸ ꓐꓵꓽ ꓖꓶ ꓡ ꓢꓲ꓾ 36 ꓠꓬꓲ ꓕꓯꓽ 108 ꓣꓟ ꓟꓶ ꓓꓴ ꓥꓳ꓾ ꓐꓯ ꓡꓳ꓿
“ꓬꓲꓸ ꓪꓴꓸ ꓕꓯ ꓠꓽ ꓖꓶ ꓡꓻꓳ꓿ ꓮ ꓟꓶ ꓠꓬ ꓣꓳ ꓒꓴ ꓟ ꓣꓴ ꓠꓹ ꓟ ꓐꓱ ꓶ ꓒꓴ ꓗꓶ ꓡꓯ ꓢꓰꓽ ꓐꓯ ꓡꓻꓳ” ꓐꓰ ꓖꓳ ꓗꓪ ꓒꓴ ꓮ ꓟꓬꓹ ꓗꓶ ꓔꓸ ꓢꓴ ꓡꓰ ꓐꓯ ꓟꓸ ꓖꓶ ꓡ ꓡꓳ꓿
ꓕꓱ ꓟ ꓠꓬ ꓒꓴ ꓩꓹ ꓜꓽ ꓜꓴ (ကျားဖြန့်) ꓕꓲꓽ ꓫꓵꓽ ꓥ ꓡꓳ꓾ ꓐꓰ ꓮ ꓟꓶ ꓖꓳ ꓗꓪ ꓒꓴ ꓗꓶ ꓔꓸꓢꓴ ꓐꓴ ꓚꓹ ꓪ ꓡ ꓢꓲ꓾ ꓮ ꓡꓲ ꓬꓰ ꓬꓰ ꓟꓽ ꓥ ꓔꓳꓹ ꓜꓳꓽ ꓔꓬ ꓟ ꓦꓬꓼ ꓠꓬꓲ ꓥ ꓡꓳ꓿
ꓖꓳ ꓡꓱ ꓥ ꓟꓲ 10 ꓦ 4 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓒꓴ ꓕꓵꓼ ꓜꓽ ꓟꓽ ꓙꓲ ꓗꓷ ꓬꓰꓳ꓿
ꓕꓱ ꓟ ꓠꓬ ꓟꓬ-ꓟ ꓗꓴꓷꓼ ꓗꓪ ꓐꓰ ꓡ ꓢꓴ ꓬꓯꓽ ꓐꓯꓽ ꓔꓯ ꓔꓳꓼ ꓔꓳꓼ ꓠꓰ WhatsApp, Telegram ꓗꓪ ꓐꓰ ꓠꓶꓽ ꓝꓸ ꓢꓲꓸ ꓗꓶꓸ ꓩꓴ ꓡ ꓟ ꓥ ꓡꓳ꓿
ꓡꓲ-ꓢꓴ ꓐꓴ ꓐꓰ ꓒꓴ ꓩꓹ ꓜꓽ ꓜꓴ ꓔꓯ ꓟꓳꓸ ꓐꓯˍ ꓠꓬ꓾ ꓧꓶꓸ ꓕꓯ ꓖ-ꓟꓶ-ꓓꓰ ꓗꓪ ꓮ ꓟꓬꓹ ꓔꓳꓹ ꓜꓳꓽ ꓢꓴ ꓙꓳˍ ꓡꓳ꓿ ꓒꓴ ꓜꓲꓼ ꓡ ꓢꓴ ꓔꓯ ꓬꓲꓸ ꓐꓵꓽ ꓮ ꓟꓬꓹ ꓖꓶ ꓓꓴ ꓥꓳ ꓐꓯ ꓢꓲ꓾ ꓑꓴ-ꓔ-ꓳ ꓗꓪ ꓙꓵꓽ ꓦꓲ ꓒꓴ ꓢꓲ꓾ ꓒꓴ ꓘꓳ ꓣꓴ ꓢꓴ/ ꓒꓴ ꓬꓲꓸ ꓐꓵꓽ ꓖꓶ ꓢꓴ ꓕꓲ ꓜꓴ ꓙꓳ ꓡ ꓡꓳ꓿ ꓖꓳ ꓟ ꓔꓯ ꓞꓳ ꓘꓹ ꓗꓪ ꓛꓲ ꓒꓴ ꓖꓼ ꓫꓺ ꓙ ꓢꓴ ꓕꓲꓽ ꓧꓳꓽ ꓓꓳ ꓡ ꓡꓳ꓿ ꓖꓳ ꓕꓲ ꓧꓳꓽ ꓠꓬ ꓡꓲ-ꓢꓴ ꓮ ꓟꓬꓹ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓒꓴ ꓬꓲꓸ ꓟꓶꓽ ꓢꓯꓹ ꓖꓼ ꓜꓲꓼ ꓪ ꓡꓰ ꓠꓬ ꓬꓲꓸ ꓪ ꓙꓵꓽ ꓦꓲ ꓥ ꓟꓲ ꓟꓽ ꓙꓳ ꓡꓰꓳ꓿ ꓑꓶ ꓢꓲ ꓡꓲꓹ ꓗꓷ ꓡꓰꓳ꓿ ꓔꓷꓹ ꓛꓰꓹ ꓙꓰꓳ꓿ ꓖꓳ ꓗꓪ ꓠꓲꓹ ꓟ ꓫꓸ ꓡꓰ ꓢꓴ ꓮ ꓟꓬꓹ ꓙꓳ ꓡꓳ꓿ ꓒꓴ ꓝꓱꓹ ꓟꓽ ꓐ ꓡ ꓠꓬꓲ ꓢꓴ ꓟꓵꓽ ꓢꓴ ꓡꓳ ꓗꓪ ꓔꓷꓹ ꓛꓰꓹ ꓙꓰ ꓢꓴ ꓙꓳˍ ꓡꓳ꓿
ꓮ ꓟꓶ ꓥ ꓟꓲ ꓟꓶ-ꓡꓯ-ꓫꓸ ꓗꓪ ꓛꓲ ꓢꓴ ꓡꓲ-ꓢꓴ ꓐꓴ ꓮ ꓟꓬꓹ ꓠꓬ ꓒꓴ ꓩꓹ ꓜꓽ ꓜꓴ ꓟꓬꓱꓽ ꓬꓰˍ ꓟ ꓪꓻ ꓗꓪ ꓪꓴꓻ ꓡꓰꓳ ꓐꓰ ꓑ ꓙ ꓡꓳ꓿ ꓕꓲꓽ ꓐꓱ ꓠꓬ ꓒꓴ ꓒꓴ ꓡꓯꓽ ꓡꓯꓽ ꓠꓻ ꓪꓴꓽ ꓢꓯꓼ ꓓꓳ ꓡ ꓥꓲ꓾ ꓕꓲ ꓐꓱ ꓠꓬ ꓟꓽ ꓪꓳꓹ ꓔꓬ ꓡꓳ꓿
“ꓟꓬ-ꓟ ꓗꓴꓷꓼ ꓗꓪ ꓔꓳꓹ ꓜꓳꓽ ꓓꓳ ꓡꓰꓳ ꓐꓯ ꓢꓲꓸ ꓟꓶ-ꓡꓯ-ꓫ ꓗꓪ ꓡ ꓥ ꓟꓲ꓾ ꓕꓱ ꓗꓪ ꓖꓶ ꓡꓰꓼ ꓡꓰꓼ ꓔꓳꓹ ꓜꓳ ꓡ ꓐꓶ” ꓐꓯ ꓢꓲꓸ ꓠꓲꓹ ꓟ ꓟꓽ ꓢ ꓘꓶꓽ ꓐꓳ ꓔꓸ ꓢꓴ ꓙꓳ ꓡꓳ꓿
ꓒꓴ ꓗꓶꓸ ꓩꓹ ꓜꓽ ꓜꓴ ꓠꓬ ꓮ ꓟꓬꓹ ꓫꓵꓽ ꓮ ꓟꓬꓹ ꓔꓱꓹ ꓗꓪ ꓐꓰ ꓢꓴ ꓒꓴ ꓣꓳ ꓒꓴ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼ ꓔꓬ ꓡꓳ꓿ ꓕꓱ ꓟ ꓔꓯ ꓟꓲ ꓠꓯ ꓗꓴꓷꓼ ꓓꓽ ꓐꓴ ꓮ ꓘꓶꓸ ꓢꓯꓼ ꓕꓵꓼ ꓢꓲꓸ ꓗꓽ ꓔꓬ ꓥ ꓟꓲ꓾ ꓡ ꓞꓳ ꓐꓴ ꓦ ꓡꓱ ꓐꓳˍ ꓟ ꓔꓯ ꓛꓳ ꓢꓲꓸ ꓗꓶꓸ ꓔꓬ ꓠꓬꓲ ꓠꓽ ꓟꓽ ꓫꓳ꓿
“ꓥꓪ ꓔꓯ ꓠꓶꓽ ꓝꓸ ꓖꓶ ꓡ ꓢꓴ ꓟ ꓔꓯ ꓦ ꓡꓱ ꓐꓳ ꓟꓬꓽ ꓜꓲ ꓠꓰ ꓗ ꓬꓰ ꓠꓯꓸ꓿ ꓕꓱ ꓟ ꓠꓽ ꓗꓶꓸ ꓔꓸꓳ ꓫꓵꓽ ꓟꓽ ꓥ꓾ ꓐꓯ ꓢꓲꓽ ꓘꓽ ꓟꓴꓽ ꓡ ꓟ ꓑꓶꓸ ꓓꓴ ꓦ ꓙꓳˍ ꓟ ꓗꓶ ꓩꓴꓳ ꓠꓯꓸ ꓖꓯꓽ” ꓐꓰ ꓒꓴ ꓟꓽ ꓡꓲꓸ ꓪ ꓢꓴ ꓡꓰ ꓐꓯ ꓡꓳ꓿
ꓕꓱ ꓡꓱꓳ ꓫꓵꓽ ꓠꓬ ꓴꓢꓮ ꓗꓪ ꓥ ꓟꓲ ꓙꓳˍ ꓡꓳ꓾ ꓐꓯ ꓡꓳ꓿
“ꓥꓪ ꓠꓴ ꓖ ꓙꓬ ꓗꓪ ꓦꓲ ꓮ ꓔꓳꓸ ꓒꓵꓽ ꓡꓲꓸ ꓐꓶ ꓟꓽ ꓖꓰꓼ ꓬꓰ ꓢꓴ꓾ ꓦꓲ ꓑꓳꓺ ꓢꓲꓸ ꓶ ꓡꓯꓼ ꓝꓱꓹ ꓠ ꓗꓷ ꓡꓰ ꓢꓴ ꓙꓳˍ ꓥ” ꓐꓰ ꓴꓢꓮ ꓗꓪ ꓕꓱ ꓡꓱꓳ ꓫꓵꓽ ꓟꓸ ꓟꓲꓽ ꓢꓷꓸ ꓢꓴ ꓡꓰ ꓐꓯ ꓡꓳ꓿
ꓳ-ꓡꓮꓲꓹ ꓶ ꓡꓯꓼ ꓚꓱꓹ ꓐꓯ ꓢꓲ account ꓗꓪ ꓪ ꓗꓶ ꓪ ꓗꓶ ꓬꓲꓸ ꓐꓶꓹ ꓗꓶ ꓡꓴꓽ ꓝꓲ ꓡ ꓢꓲꓸ ꓬꓲꓸ ꓟꓶ ꓗꓪ ꓓꓴꓽ ꓟꓶꓽ ꓬꓰ ꓢꓲꓸ ꓮ ꓗꓪ ꓖꓼ ꓧꓪ ꓟꓽ ꓙꓲ ꓗꓷ ꓡꓰ ꓢꓴ ꓐꓯ ꓖꓴ ꓟꓽ ꓓ ꓙꓳ ꓡꓳ꓿
“ꓠꓴ ꓪ ꓖꓶ ꓟꓳˍ ꓓꓴ ꓥ꓿ online business ꓐꓯ ꓢꓲꓸ social platform ꓗꓪ ꓣꓳ ꓡꓲ-ꓢꓴ ꓐꓴ ꓖꓶ ꓕꓲ ꓐꓱ ꓬꓰ ꓢꓴ ꓙꓳˍ ꓡꓳ꓿ ꓖꓳ ꓟ ꓠꓽ ꓣꓳ ꓚꓲꓸ ꓛꓬ ꓒꓴ ꓟꓶꓸ ꓕꓯꓽ ꓗꓶ ꓢꓲꓸ ꓖꓳ ꓡꓱ ꓬꓰ ꓡ ꓢꓴ ꓧꓪ ꓝꓲˍ ꓟ ꓕꓲꓽ ꓫꓵꓽ ꓥꓳ꓿ ꓮ ꓟꓬꓹ ꓣꓳ ꓧꓪ ꓪ ꓬꓰ ꓠꓬ ꓣꓳ ꓗꓶ ꓔꓸ ꓟ ꓡꓲꓸ ꓖꓶ ꓡ ꓥꓳ꓿ ꓖꓳ ꓡꓱ ꓥ ꓟꓲ ꓠꓱꓸ ꓐꓯꓼ ꓮ ꓟꓬꓹ ꓞꓳꓸ ꓡꓰ ꓢꓲꓸ ꓕꓯꓽ ꓢꓲ ꓗꓪ ꓔꓬ ꓢꓴ ꓕꓲ ꓐꓱ ꓤꓼ ꓡꓰ ꓚꓳꓹ ꓜꓽ ꓓꓴ ꓚꓴ ꓬꓳꓹ ꓓꓶꓽ ꓔꓸ ꓟ ponzi scheme ꓥ ꓡꓳ꓿
ꓑꓴ-ꓔ-ꓳ꓾ ꓟꓶ-ꓡꓯ-ꓫ꓾ ꓴꓢꓮ ꓮ ꓡꓲ ꓗꓪ ꓛꓲ ꓥ ꓟꓲ ꓡꓲ-ꓢꓴ ꓕꓲ ꓐꓱ ꓠꓬ ꓦꓯꓸ ꓠꓲꓹ ꓑꓶꓸ ꓓꓴ ꓗꓶꓸ ꓜꓽ ꓩꓹ ꓜꓽ ꓢꓴ ꓡꓯ ꓒꓯꓹ ꓗꓪ ꓠꓲꓹ ꓟ ꓠꓻ ꓞꓲꓼ ꓗꓷ ꓡꓰ ꓔꓬ ꓟ ꓓꓳꓽ ꓑ ꓙ ꓔꓬ ꓡꓳ꓿
ꓜꓲꓽ ꓟꓽ ꓓ ꓠꓬꓲ꓾ “RIP Cafe Bustelo” ꓐꓳ ꓔꓬ ꓢꓴ ꓥ ꓟꓲ ꓙꓳ ꓡꓳ꓿
ꓗꓶꓸ ꓢꓴ ꓠꓬ꓾ ꓶ ꓤ ꓒꓵꓽ ꓟꓶ ꓠꓯꓸ ꓟꓶ ꓠꓯꓸ ꓪꓴꓽ ꓢꓲꓸ Multi level marketing ꓗꓪ ꓐꓰ ꓥ ꓟꓲ꓾ ꓒꓴ ꓗꓶ ꓝꓲ ꓢꓲꓸ ꓬꓲꓸ ꓐꓵꓽ ꓖꓶ ꓥꓳ ꓐꓯ ꓢꓲꓸ ꓥ ꓟꓲ꓾ ꓝꓮꓲ phishing link ꓗꓪ ꓐꓰ ꓩꓴꓸ/ꓗꓳ-ꓑꓴ-ꓔ ꓗꓪ ꓐꓰ data ꓣꓴ ꓢꓲꓸ ꓥ ꓟꓲ꓾ account ꓘꓴꓽ ꓢꓲꓸ ꓢꓷꓸ ꓢꓴ ꓔꓯ ꓒꓴ ꓓꓰꓽ ꓢꓲꓸ ꓥ ꓟꓲ꓾ ꓝꓮꓲ ꓖꓳ ꓪꓴꓽ ꓟ ꓗꓪ ꓐꓰ ꓕꓲꓽ ꓝꓸ ꓩꓹ ꓜꓽ ꓟ ꓥ ꓟꓲ꓾ ꓮꓲ ꓗꓪ ꓐꓰ ꓬꓲꓸ ꓢꓯꓼ ꓬꓲꓸ ꓐꓬꓱꓽ ꓚꓬꓼ ꓬꓰ ꓢꓲꓸ ꓥ ꓟꓲ ꓩꓹ ꓜꓽ ꓗꓶꓸ ꓜꓽ ꓚꓱꓹ ꓕꓱ ꓡꓱ ꓮ ꓟꓬꓹ ꓫꓵꓽ ꓬꓰ ꓔꓬ ꓟ ꓦꓬꓼ ꓠꓬꓲ ꓥ ꓡꓳ꓿
ꓣꓳ ꓬꓰ ꓐ ꓡ ꓟ ꓠꓬ ꓩꓹ ꓜꓽ ꓜꓴ ꓔꓯ ꓢꓷꓸ ꓢꓲꓸ ꓤ ꓟꓳ ꓟ ꓥ ꓡꓳ꓿ ꓣꓳ ꓡꓲ-ꓢꓴ ꓒꓵꓽ ꓒ ꓡꓰ꓾ “ꓤ ꓟꓳ ꓓꓴ ꓟ ꓠꓽ ꓠꓯ ꓞꓲꓼ ꓥꓳ” ꓐꓯˍ ꓟ ꓔꓯ ꓠꓲꓹ ꓟ ꓗꓪ ꓗꓶ ꓔꓸ ꓢꓲ꓾ ꓦꓯꓸ ꓠꓲꓹ ꓙꓲꓽ ꓡ ꓝꓲ ꓢꓴ꓾ ꓙꓳꓺ ꓦꓰꓸ ꓡꓰ ꓝꓲ ꓢꓴ꓾ ꓗꓶꓸ ꓜꓽ ꓢꓴ ꓔꓯ ꓤ ꓟꓳ ꓟꓹ ꓟ ꓦꓬꓼ ꓠꓬꓲ ꓥ ꓡꓳ꓿ ꓠꓲꓹ ꓟ ꓠꓻ ꓞꓲꓼ ꓦꓬꓼ ꓠꓬꓲ ꓗꓪ ꓕꓽ ꓓꓵꓽ ꓙꓰ ꓝꓲ꓿
