2024 ꓘꓳꓼ 6 ꓦ ꓘꓴꓽ ꓟ ꓗꓪ ꓡꓲ-ꓢꓴ ꓒꓵꓽ ꓒ ꓐꓴ ꓕꓱ ꓚꓽ ꓟ ꓥꓳ ꓜꓱ 199 ꓘꓶꓽ ꓔꓯ ꓥꓳꓽ ꓫꓵꓽ 3 ꓫꓵꓽ꓾ ꓬꓲꓸ ꓐꓬꓱꓽ color ꓗꓪ ꓐꓰ ꓡꓳꓸ ꓐꓲ ꓐꓲ ꓠꓬꓲꓸ ꓓꓳ ꓩꓴ ꓡ ꓡꓳ=
ꓕꓱ ꓕꓲ ꓤꓶ ꓟ ꓡꓲ-ꓢꓴ ꓐꓴ ꓟꓲꓺ ꓡꓰ ꓔꓳꓼ꓾ ꓟꓽ ꓢꓷꓸ ꓬꓰ ꓖꓴ ꓟ ꓡꓲ-ꓢꓴ ꓒꓵꓽ ꓒ ꓥꓳꓽ ꓜꓱ ꓢꓳ ꓣꓴ ꓓꓴ ꓕꓳ ꓶ ꓕꓲ ꓑꓷꓠ ꓓꓳ ꓡꓻꓳ= ꓕꓳ ꓶ ꓐꓳ ꓢꓴ ꓠꓬ Ko Jay꓾ ꓕꓳ ꓶ ꓬꓲꓸ ꓟꓬꓱꓺ ꓠꓬ꓾ “ꓠꓲꓹ ꓟ ꓘꓴꓽ ꓗꓪ ꓟ ꓡꓲ-ꓢꓴ ꓥꓳ ꓜꓱ” ꓐꓯ ꓔꓸ ꓡꓳ= ꓡꓲ-ꓢꓴ ꓥꓳꓽ ꓐꓰ ꓲꓑꓮ ꓢꓯꓼ ꓝꓳꓹ ꓥ ꓟꓲ ꓐꓳ ꓔꓺ ꓖꓶ ꓔꓸ ꓡꓳ= ꓝꓮꓲ ꓟꓬ-ꓟ ꓥꓳꓽ ꓐꓰ ꓰ-ꓖꓶ-ꓡꓲꓼ ꓥꓳꓽ ꓗꓪ ꓥ ꓟꓲ ꓡꓶꓸ ꓖꓶ ꓔꓸ ꓡꓳ= Color Print ꓗꓪ ꓐꓰ ꓡꓳꓸ ꓐꓲˍ ꓟ ꓬꓲꓸ ꓐꓬꓱꓽ ꓥ ꓟꓲ ꓐꓳ ꓔꓸ ꓟ ꓕꓳ ꓶ ꓑꓷꓠ ꓥ ꓡꓳ= ꓟꓬ-ꓟ ꓗꓴꓷꓼ꓾ ꓴꓢꓮ ꓐꓰ ꓮꓢꓔꓣꓮꓡꓲꓮ ꓗꓪ ꓟ ꓡꓲ-ꓢꓴ ꓐꓴ ꓧꓪ ꓣꓴ ꓓˍ ꓡꓳ=
“ꓠꓲꓹ ꓟ ꓘꓴꓽ ꓗꓪ ꓟ ꓡꓲ-ꓢꓴ ꓥꓳ ꓜꓱ” ꓠꓬ ꓠꓵ ꓠꓲꓹ ꓗꓪ ꓐꓰ ꓬꓰ ꓓꓳ ꓡ ꓟ ꓦ ꓢꓲ꓾ ꓟꓶꓽ ꓡ ꓔꓳꓼ ꓟ ꓒꓵꓽ ꓒ ꓓꓵꓽ ꓙ ꓚꓱꓹ ꓔꓯ ꓧꓪ ꓟꓰꓹ ꓫꓺ ꓒꓵꓽ ꓔꓸ ꓟ ꓥ ꓡꓳ- ꓡꓲ-ꓢꓴ ꓕꓳ ꓶ ꓢꓳ ꓔꓶꓸ ꓐ ꓥꓳꓽ ꓫꓵꓽ ꓢꓳ ꓔꓶꓸ ꓗꓪ ꓵꓺ ꓓꓴ꓾ ꓡ-ꓢꓴ ꓓꓵꓽ ꓙ ꓚꓹ ꓔꓯ ꓢꓰꓸ ꓮ ꓢꓸ ꓢꓴ꓾ ꓚꓲꓸ ꓛꓬ ꓤꓶ ꓗꓪ ꓣꓽ ꓠꓲꓹ ꓫꓵ ꓢꓴ ꓮ ꓙꓵꓽ ꓐꓱ ꓶ ꓙꓲ ꓖꓴ ꓒꓬꓼ ꓡ ꓠꓹ ꓟ ꓥꓳꓺ ꓡꓳꓸ ꓔꓸ ꓡꓳ=” ꓐꓰ ꓘꓶꓽ ꓒꓴ ꓘꓶꓽ ꓗꓪ ꓐꓳ ꓔꓸ ꓡꓳ=
“ꓥꓳ ꓜꓱ ꓠꓬ ꓞꓳ ꓫꓵꓽ ꓕꓲꓽ ꓫꓵꓽ ꓔꓳꓹ ꓜꓳ ꓗꓷ ꓟ ꓐꓰ꓾ ꓓꓵꓽ ꓙ ꓚꓱꓹ ꓔꓯ ꓟꓳꓸ ꓖꓶ ꓔꓬ ꓟ ꓬꓲꓸ ꓚꓰꓺ ꓕꓲ ꓫꓵꓽ ꓥꓳ= ꓣꓳ ꓡꓲ-ꓢꓴ ꓤ ꓠꓱ ꓐꓴ ꓮ ꓙꓵꓽ ꓒꓵꓽ ꓒ ꓥꓳꓽ ꓜꓱ ꓢꓳ ꓣꓴ ꓓꓴ ꓬꓰ ꓡꓯ= ꓕꓲ ꓟꓵꓽ ꓕꓲ ꓗꓴꓷꓼ ꓗꓪ ꓟ Library ꓮ ꓟꓬꓹ ꓗꓪ ꓥ ꓟꓲ ꓣꓳ ꓟꓸ ꓟꓲꓽ꓾ ꓣꓳ ꓓꓵꓽ ꓙ ꓚꓱꓹ ꓙꓳ ꓝꓲ ꓡꓯ= ꓕꓲ ꓦꓲ ꓡꓰꓸ ꓕꓲ ꓦꓲ ꓗꓪ ꓥ ꓟꓲ꓾ ꓡꓲ-ꓢꓴ ꓕꓳ ꓶ ꓢꓳ ꓔꓶꓸ ꓗꓪ ꓥ ꓟꓲ ꓕꓱ ꓟ ꓙꓳ ꓝꓲ ꓡꓯ= ꓕꓲ ꓠꓬꓲ ꓠꓬ ꓬꓲꓸ ꓒꓵꓽ ꓬꓲꓸ ꓙꓲ ꓖꓴ ꓔꓯ ꓠꓴ ꓪ ꓢꓷꓸ ꓡ ꓥꓳ= ꓕꓲꓽ ꓑꓷꓠ 10000 ꓒꓯꓼ ꓪꓴꓻ ꓖꓶ ꓔꓬ ꓥꓳ= ꓥꓪ ꓬꓰ ꓟ ꓔꓯ ꓦ ꓡꓱ ꓐꓳ ꓢꓲꓸ ꓕꓳ ꓶ ꓥꓰꓸ ꓒꓵꓽ ꓖꓶ ꓡ ꓢꓴ Ahdee Jay ꓔꓯ ꓥ ꓟꓲ ꓮ ꓘꓶꓸ ꓫꓸ ꓟꓳ ꓐꓯ ꓔꓬ ꓥꓳ=” ꓐꓰ ꓕꓳ ꓶ ꓐꓳ ꓢꓴ ꓡꓰ ꓐꓯ ꓡꓳ=
ꓟꓬ-ꓟ ꓗꓴꓷꓼ ꓗꓪ ꓠꓬ Ko Jay ꓔꓯ ꓙ ꓡꓯ ꓘꓳ ꓡꓯ꓾ ꓴꓢꓮ ꓗꓪ ꓠꓬ Ahdee Jay ꓐꓰ ꓮꓢꓔꓣꓮꓡꓲꓮ ꓗꓪ Ahkhi Ngwa ꓐꓴ ꓔꓯ ꓙ ꓡꓯ ꓘꓳ ꓢꓲꓸ ꓪꓴꓻ ꓪ ꓓ ꓡꓳ=
