2022 ꓘꓳꓼ 10 ꓦ 1 ꓠꓬꓲ ꓕꓯꓽ꓾ ꓩꓽ ꓗꓴꓷꓼ ꓡ ꓞꓳ ꓬꓲꓸ ꓞꓲꓼ (60) ꓘꓳꓼ ꓡꓳꓼˍ ꓟ ꓠꓬꓹ ꓟ ꓪꓳ ꓛꓲ ꓡ ꓞꓳ (Spider Man) ꓐꓯ ꓢꓲꓸ ꓟꓬꓱ ꓓꓳꓽ ꓙꓳ ꓢꓴ꓾ Alain Rober ꓐꓰ ꓬꓲꓸ ꓤꓽ Julien ꓐꓴ ꓠꓬꓲꓽ ꓑꓸ ꓡꓼ ꓢꓴ ꓠꓬ꓾ ꓢꓲ-ꓑꓲ ꓗꓴꓷꓼ꓾ ꓐ-ꓢꓰ-ꓡꓴ-ꓠ ꓡꓳ ꓒꓱ ꓗꓪ ꓟꓲꓼ ꓪꓳꓼ ꓢꓯꓼ ꓡꓯꓼ ꓟꓴˍ ꓟ ꓦꓲ ꓔꓯ ꓡꓯꓽ ꓖꓳꓽ ꓔꓳꓹ ꓛꓵꓽ ꓓꓯꓺ ꓢꓲꓸ ꓦꓲ ꓪꓴꓸ ꓓꓵ ꓗꓪ ꓓꓯꓺ ꓑꓰ ꓬꓰꓳ꓿
ꓬꓲꓸ ꓠꓬꓲꓽ ꓑꓸ ꓡꓼ ꓓꓯꓺ ꓗꓷ ꓟ ꓦꓲ ꓖꓳ ꓟ ꓠꓬ 472 ꓑꓯꓸ ꓟꓴˍ ꓟ Torre Glories ꓦꓲ ꓥ ꓡꓳ꓿
“ꓕꓲ ꓧꓪꓹ ꓠꓽ ꓧꓶꓸ ꓕꓯˍ ꓡꓰ ꓟꓽ ꓥ꓿ ꓥ ꓤꓽ ꓟ ꓠꓽ ꓕꓲ ꓡꓲ ꓓꓯꓺ ꓢꓴ ꓟꓽ ꓥ꓿ ꓬꓲꓸ ꓔꓯ ꓕꓲ ꓫꓵꓽ ꓫꓵꓽ ꓗ ꓬꓰ ꓡ ꓐꓯ ꓠꓽ ꓥꓪ ꓖꓶ ꓙꓲ ꓙꓳ ꓥ ꓐꓰ ꓓꓵꓽ ꓙ ꓡ ꓡꓳ” ꓐꓰ ꓠꓬꓹ ꓟ ꓪꓳ ꓛꓲ ꓡ ꓞꓳ ꓣꓳ-ꓐꓰ ꓡꓰ Reuters ꓓꓳꓽ ꓗꓪ ꓐꓯ ꓔꓸ ꓡꓳ꓿
“ꓥ ꓤꓽ ꓟ 34 ꓘꓳꓼ ꓡꓳꓼ ꓢꓴ ꓥ ꓠꓰ ꓬꓲꓸ ꓔꓱꓹ ꓬꓲꓸ ꓓꓵꓽ ꓙ ꓞꓷꓹ ꓩꓴ ꓡ ꓟ ꓥꓳ꓿ ꓳꓸ ꓐꓯ ꓖꓶ ꓠꓰ ꓥ ꓠꓽ ꓬꓲꓸ ꓒꓽ ꓔꓲꓸ ꓥꓳ ꓢꓯꓸ꓿ ꓕꓲ ꓫꓵꓽ ꓫꓵꓽ ꓗ ꓬꓰ ꓡ ꓐꓯ ꓠꓽ ꓥ ꓙꓲ ꓖꓶ ꓙꓳ ꓠꓯꓸ” ꓐꓰ ꓣꓳ-ꓐꓰ ꓡꓰ ꓐꓯˍ ꓢꓰꓽ ꓡꓳ꓿
“ꓥ ꓞꓲꓼ ꓗꓪ ꓙꓴꓺ ꓠ ꓔꓸꓳ ꓫꓵꓽ ꓮ ꓟꓯꓹ ꓬꓰ ꓠꓬꓲꓳ꓿ ꓳꓸ ꓐꓯ ꓖꓶ ꓕꓲ ꓠꓬ ꓠꓽ ꓟꓽ ꓙꓴꓺ ꓠꓬꓲ꓿ ꓜꓳˍ ꓢꓲꓽ ꓓꓴ ꓟ ꓠꓽ ꓠꓰ ꓥ ꓔꓯ ꓚꓱꓹ ꓧꓳꓽ ꓢꓯꓼ ꓖꓶ ꓐ ꓡ ꓢꓴ ꓮꓽ ꓐ ꓒ ꓕꓲ ꓗꓪ ꓠꓬꓹ ꓓꓴ ꓟ ꓥꓳ” ꓐꓰ ꓠꓬꓹ ꓟ ꓪꓑ ꓛꓲ ꓡ ꓞꓳ ꓬꓲꓸ ꓤꓽ Julien ꓡꓰ ꓐꓯ ꓡꓳ꓿ ꓬꓲꓸ ꓠꓬ 34 ꓘꓳꓼ ꓡꓳꓼ ꓢꓴ꓾ ꓟꓯꓼ (8) ꓘꓳꓼ ꓗꓶ ꓠꓬꓲ ꓢꓴ ꓕꓲ ꓣꓳ ꓥꓳ꓿
ꓠꓬꓹ ꓟ ꓪꓳ ꓛꓲ ꓡ ꓞꓳ ꓣꓳ-ꓐꓰ ꓠꓬ 1977 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓮ ꓘꓶꓸ ꓟꓴˍ ꓟ ꓐꓰ ꓟꓬꓱ ꓓꓳꓽ ꓙꓳˍ ꓟ ꓦꓲ (150) ꓟ ꓕꓯꓽ ꓢꓲ ꓔꓯ ꓔꓳꓹ ꓛꓲꓽ ꓓꓯꓺ ꓗꓷ ꓢꓴ ꓥ ꓡꓳ꓿ ꓬꓲꓸ ꓞꓲꓼ (60) ꓘꓳꓼ ꓐꓲ ꓡꓰ ꓟ 9 ꓦ 17 ꓠꓬꓲ ꓕꓯꓽ ꓺꓽ ꓗꓴꓷꓼ꓾ ꓑ-ꓣꓲ ꓡꓳ ꓒꓱ ꓗꓪ (48) ꓝꓸ ꓟꓴˍ ꓟ ꓦꓲ ꓕꓲꓽ ꓦꓲ ꓔꓯ ꓮ ꓫꓵꓽ ꓚꓲꓺ ꓚ ꓟꓽ ꓣꓱꓽ ꓣꓱꓽ ꓡꓯꓽ ꓖꓳꓽ ꓓꓯꓺ ꓟꓸ ꓖꓶ ꓗꓷ ꓡꓳ꓿
“60 ꓘꓳꓼ ꓐꓯꓸꓳ ꓫꓵꓽ ꓠꓽ ꓠ ꓐꓼ ꓕꓲꓽ ꓟˍ ꓓꓰꓼ ꓥꓳ꓿ ꓢꓯꓼ ꓙꓳ ꓪꓽ ꓠꓬꓲ ꓐ ꓡ꓾ ꓓꓵꓽ ꓙ ꓟꓶ ꓓꓴ ꓬꓰ ꓐ ꓡ ꓢꓰꓽ ꓥ ꓐꓯ ꓓꓴ ꓟ ꓟꓸ ꓖꓶ ꓠꓲꓹ ꓫꓵˍ ꓠꓬꓲ ꓕꓱ ꓡꓱ ꓓꓯꓺ ꓟꓸ ꓔꓬ ꓥꓳ” ꓐꓰ ꓣꓳ-ꓐꓰ ꓡꓰ Reuters ꓗꓪ ꓫꓸ ꓕꓱ ꓔꓸ ꓡꓳ꓿
ꓓꓳꓽ ꓬꓲꓸ ꓚꓰ꓾ Reuters
ꓐꓬꓱꓽ꓾ REUTERS/Albert Gea, AFP, AFP via Getty Images
