- 2021 ꓘꓳꓼ ꓗꓪ ꓕꓲ ꓟꓲ ꓠꓯ ꓗꓪ ꓜꓲ ꓜꓲ ꓑꓰꓹ ꓑꓰꓹ ꓞꓳ ꓢꓰꓼ ꓪ ꓢꓰꓼ ꓡꓳꓹ ꓬꓰ ꓟ 10 ꓗꓴꓷꓼ ꓘꓴꓽ ꓗꓪ ꓟꓬ-ꓟ ꓓꓵꓽ ꓡꓰꓳ ꓐꓰ꓾ Global terrorism Index ꓡꓰ 2022 ꓘꓳꓼ 3 ꓦ 2 ꓠꓬꓲ ꓕꓯꓽ ꓢꓷ ꓙ ꓟꓴ ꓙ ꓔ ꓡꓳ꓿
2021 ꓘꓳꓼ ꓗꓪ ꓕꓲ ꓟꓲ ꓠꓯ ꓗꓪ ꓜꓲ ꓜꓲ ꓑꓰꓹ ꓑꓰꓹ ꓞꓳ ꓢꓰꓼ ꓪ ꓢꓰꓼ ꓡꓳꓹ ꓬꓰ ꓟ 10 ꓗꓴꓷꓼ ꓘꓴꓽ ꓗꓪ ꓟꓬ-ꓟ ꓓꓵꓽ ꓡꓰꓳ ꓐꓰ꓾ Global terrorism Index ꓡꓰ 2022 ꓘꓳꓼ 3 ꓦ 2 ꓠꓬꓲ ꓕꓯꓽ ꓢꓷ ꓙ ꓟꓴ ꓙ ꓔ ꓡꓳ꓿
ꓟꓬ-ꓟ ꓠꓬ 2021 ꓘꓳꓼ ꓟ ꓘꓴꓽ ꓗꓪ ꓜꓲ ꓑꓰꓹ ꓑꓰꓹ ꓞꓳ ꓢꓰꓼ ꓪ ꓢꓰꓼ ꓡꓳꓹ ꓬꓰ ꓟ ꓗꓴꓷꓼ ꓐꓴ ꓗꓪ ꓠ ꓐꓼ 9 ꓗꓪ ꓦꓰꓼ ꓔꓬ ꓡꓳ꓿ 2022 ꓕꓲ ꓘꓳꓼ ꓡꓱꓸꓼ ꓗꓪ ꓜꓲ ꓜꓲ ꓑꓰꓹ ꓑꓰꓹ ꓬꓰ ꓪ ꓡꓰ ꓢꓴ 750 ꓣꓳ ꓛꓲ ꓙꓳ ꓢꓲ꓾ ꓖꓳ ꓗꓪ ꓐꓰ ꓫꓵꓻ ꓓꓴ 521 ꓣꓳ꓾ ꓠꓻ ꓓꓴ ꓡꓰ ꓢꓴ 351 ꓣꓳ ꓙꓳˍ ꓡꓳ ꓐꓰ ꓐꓯ ꓔꓸ ꓡꓳ꓿ 2022 ꓘꓳꓼ ꓗꓪ ꓠꓬ ꓜꓲ ꓜꓲ ꓑꓰꓹ ꓑꓰꓹ ꓢꓰꓼ ꓡꓯ ꓘꓳ ꓟ ꓟꓬꓽ ꓡ ꓐꓶꓹ ꓡ ꓓꓴ ꓥꓳ ꓐꓰ ꓢꓪꓼ ꓔꓸ ꓡꓳ꓿
ꓑ ꓫꓬ ꓡꓰ ꓢꓲꓻ ꓔꓸ ꓟ ꓗꓴꓷꓼ ꓙꓵꓽ ꓜꓴ ꓦꓬꓼ ꓠꓬꓲ ꓗꓪ 2020 ꓕꓲ ꓘꓳꓼ ꓡꓱꓸꓼ ꓗꓪ ꓜꓲ ꓜꓲ ꓑꓰꓹ ꓑꓰꓹ ꓢꓰꓼ ꓡ ꓟ ꓔꓳꓹ ꓜꓳ ꓢꓴ 24 ꓣꓳˍ ꓡꓰꓽ ꓙꓳ ꓥ ꓟꓲ꓾ ꓮ ꓟꓶ ꓟꓯꓼ ꓜꓲꓽ ꓡꓰ ꓙꓵˍ ꓟ ꓦꓬꓼ ꓠꓬꓲ ꓗꓪ 750 ꓛꓲ ꓓꓯꓻ ꓡˍ ꓠꓬꓲ ꓕꓲ ꓟꓲ ꓠꓯ ꓗꓪ ꓠ ꓐꓼ 9 ꓗꓷ ꓡꓰˍ ꓟ ꓥꓳ ꓐꓰ ꓐꓯ ꓔꓸ ꓡꓳ꓿
ꓮ-ꓩ-ꓖ-ꓠꓯ-ꓢꓲ-ꓔ꓾ ꓲ-ꓣ꓾ ꓢꓳ-ꓟ-ꓡ-ꓬ ꓐꓴ ꓠꓬ ꓠ ꓐꓼ 1 2 3 ꓝꓯꓸ ꓔꓬ ꓡꓳ꓿ Global terrorism Index ꓠꓬ ꓟꓲ ꓠꓯ ꓗꓪ ꓜꓲ ꓜꓲ ꓑꓰꓹ ꓑꓰꓹ ꓢꓰꓼ ꓡꓯ ꓘꓳˍ ꓟ ꓮ ꓡꓲ ꓒꓬꓱꓼ ꓔꓬ ꓟ ꓚꓲꓸ ꓚ ꓢꓲꓸ ꓕꓲ ꓘꓳꓼ ꓕꓲ ꓧꓪꓹ ꓟꓳꓸ ꓖꓶ ꓔꓬ ꓜꓴ ꓕꓲ ꓟ ꓥ ꓡꓳ꓿
(2) ꓢꓲ-ꓑꓲ-ꓬ ꓗꓪ ꓝꓮꓲ ꓕꓲ ꓧꓪꓹ ꓟꓯꓼ ꓓꓶꓽ ꓡꓯ ꓘꓳ ꓔꓬ
ꓑꓓꓝ ꓐꓰ ꓗꓲꓮ ꓡꓰ 2022 ꓘꓳꓼ 2 ꓦ 1 ꓠꓬꓲ ꓕꓯꓽ ꓓꓶꓽ ꓧꓪꓸ ꓡꓰ ꓟ ꓢꓲ-ꓑꓲ-ꓬ ꓘꓹ ꓟꓯꓼ ꓦ ꓖꓴꓽ ꓓꓴꓽ ꓔꓯ ꓟꓬ-ꓟ ꓟꓯꓼ ꓐꓴ ꓡꓰ 2022 ꓘꓳꓼ 3 ꓦ 3 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓕꓲ ꓧꓪꓹ ꓓꓶꓽ ꓪꓴꓸ ꓔꓴ ꓡ ꓔꓬ ꓡꓳ꓿
“ꓮ ꓟꓲ ꓕꓲ ꓟꓳꓼ ꓡꓳ꓾ ꓟꓲꓸ ꓟꓲ ꓖꓶ ꓕꓲ ꓑꓹ ꓐꓶ ꓡꓯ ꓘꓳˍ ꓟ ꓢꓯꓼ ꓑ ꓙ ꓥ꓿ ꓢꓲ-ꓑꓲ-ꓬ ꓗꓪ ꓟꓯꓼ ꓮ ꓟꓬꓹ ꓓꓵꓽ ꓡꓻꓳ꓿ ꓞꓳ ꓘꓹ ꓗꓪ ꓦꓲ ꓖꓶ ꓕꓲ ꓐꓱ ꓛꓴ ꓩꓴ ꓐꓶ꓿ ꓶ ꓤ ꓗꓪ ꓚꓳꓸ ꓮ ꓔꓳꓸ ꓟꓴ ꓘꓴꓽ ꓟꓳˍ ꓥ꓿ ꓥꓪ ꓠꓴ ꓠꓬ ꓟꓵꓽ ꓗꓪ ꓛꓰꓹ ꓑꓬ ꓔꓬ ꓥ꓿” ꓐꓰ ꓘꓹ ꓡ ꓞꓳ ꓕꓲ ꓣꓳ ꓡꓰ ꓩꓴꓸ ꓕꓱ ꓩꓴ ꓡ ꓡꓳ꓿
ꓮ ꓟꓶ ꓠꓬ ꓢꓲ-ꓑꓲ-ꓬ ꓘꓹ ꓗꓪ ꓠꓬꓲꓽ ꓛꓱꓽ ꓗꓪ ꓟ ꓟꓯꓼ ꓐꓴ ꓓꓵꓽ ꓡ ꓢꓲꓸ ꓢꓰꓼ ꓡꓯ ꓘꓳ ꓡ ꓠꓬꓲ꓾ ꓑ ꓫꓬ ꓔꓬꓹ ꓟꓽ ꓑꓶꓸ ꓢꓲꓸ ꓞꓳ ꓘꓹ ꓡ ꓞꓳ ꓐꓴ ꓠꓬ ꓟꓶ-ꓚꓲ-ꓠ ꓟꓵꓽ ꓗꓪ꓾ ꓢꓲꓹ ꓠꓯ ꓮ ꓖ ꓟꓲ ꓗꓪ꓾ ꓑꓴ-ꓔ-ꓳ ꓫꓵꓽ ꓤ ꓪꓳꓼ ꓤ ꓔꓬ ꓗꓪ ꓟꓯꓼ ꓛꓰꓹ ꓙꓰ ꓖꓴꓳ ꓐꓰ ꓓꓳꓽ ꓜꓳ ꓡ ꓡꓳ꓿
(3)ꓗꓳ-ꓪꓰꓼ ꓚꓹ ꓓꓴ ꓶ ꓤꓼ (covid test kit) 3 ꓫꓵꓽ ꓔꓯ ꓴꓢ ꓝꓓꓮ ꓗꓽ ꓔꓸ
ꓮ ꓟꓶ ꓕꓲ ꓟꓲ ꓠꓯ ꓣꓱꓽ ꓔꓬ ꓟ ꓗꓳ-ꓪꓰꓼ ꓚꓹ ꓶ ꓤꓼ (3) ꓫꓵꓽ ꓔꓯ ꓴꓢ ꓗꓴꓷꓼ ꓜꓽ ꓓꓴ ꓐꓰ ꓠꓯ ꓞꓲꓼ ꓗꓪꓽ ꓫꓵꓽ ꓜꓴ ꓡꓰ ꓣꓱꓽ ꓟꓽ ꓓ ꓟ ꓶ ꓤ ꓥ ꓡꓳ ꓐꓰ 2022 ꓘꓳꓼ 3 ꓦ 1 ꓠꓬꓲ ꓕꓯꓽ ꓢꓷ ꓙ ꓟꓴ ꓙ ꓔ ꓡꓳ꓿
ꓟꓽ ꓣꓱꓽ ꓠꓹ ꓟ ꓗꓽ ꓔꓸ ꓩꓴ ꓡ ꓟ ꓗꓳ-ꓪꓰꓼ ꓠꓻ ꓚꓹ ꓓꓴ (3) ꓫꓵꓽ ꓠꓬ꓾
(1) SD Biosensor Standard Q COVID-19 Ag Home Test
(2) ACON Flowflex SARS-CoV-2 Antigen Rapid Test (Self-Testing)
(3) Celltrion USA’s DiaTrust COVID-19 Ag Rapid Test
ꓚꓹ ꓓꓴ ꓶ ꓤ ꓕꓱ (3) ꓫꓵꓽ ꓠꓬ ꓟꓽ ꓜꓳˍ ꓟ ꓒꓳꓹ ꓖꓶꓽ ꓘꓶꓽ ꓖꓶ ꓡ ꓗꓴˍ ꓠꓬꓲ ꓣꓱꓽ ꓟꓽ ꓓ꓾ ꓙꓲ ꓔꓲ ꓗꓪ ꓪꓴꓽ ꓟꓽ ꓓ ꓐꓯ ꓡꓳ꓿
