6 ꓦ 22 ꓠꓬꓲ ꓠꓯꓼ 8 ꓙꓵꓹ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓟ-ꓓꓲ-ꓡꓲ ꓟꓵꓽ꓾ ꓛꓸ-ꓟꓬꓮꓼ-ꓔ-ꓢꓰ ꓡꓳ ꓒꓱ ꓗꓪ ꓠ ꓡꓲ 4 ꓙꓵꓹ ꓑꓳ ꓐꓶ ꓡꓯ ꓘꓳ ꓡ ꓢꓲ꓾ ꓑ ꓫꓬ ꓟꓯꓼ (ꓑꓓꓝ) 2 ꓣꓳ ꓫꓵꓻ꓾ 6 ꓣꓳ ꓣꓴ ꓟꓶ ꓡꓰꓳ=
” ꓠꓬꓲꓸ ꓠꓬꓲ ꓢꓰꓼ ꓡꓯ ꓘꓳ ꓠ ꓗꓷ ꓡꓰ ꓟ ꓠꓬ ꓬꓲꓸ ꓪ ꓡꓰ ꓪꓴꓸ ꓔꓴ ꓡ ꓢꓲ ꓔꓳꓹ ꓡꓯ ꓘꓳ ꓠ ꓗꓷ ꓡꓰ ꓟ ꓥꓳ= ꓥꓪ ꓠꓴ ꓟꓬꓱꓽ ꓬꓰ ꓖꓴ ꓗꓪ ꓬꓲꓸ ꓪ ꓚꓳꓸ ꓡ ꓟ ꓑꓶꓸ ꓓꓴ ꓐꓶ ꓡꓯ ꓘꓳ ꓠ ꓗꓷ ꓡꓰꓳ= ꓥꓪ ꓠꓴ ꓟꓯꓼ 2 ꓣꓳ ꓢꓯꓼ ꓟꓬ ꓖꓴ ꓡꓰꓳ= 6 ꓣꓳ ꓠꓬ ꓣꓴ ꓟꓶ ꓡꓰ ꓢꓲ꓾ ꓡꓽ ꓛꓴꓸ ꓤꓽ 2 ꓗꓸ ꓐ ꓬꓰꓳ” ꓐꓰ꓾ ꓑ ꓫꓬ ꓟꓯꓼ (ꓑꓓꓝ) ꓧꓳꓽ ꓪꓴꓸ ꓟꓴ ꓢꓴ ꓐꓳ-ꓕꓴꓸ-ꓔꓮꓳꓼ-ꓠꓮꓲꓽ ꓡꓰ ꓐꓯ ꓡꓳ=
ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓕꓲ ꓛꓱꓽ ꓗꓪ ꓥ ꓟꓲ ꓬꓲꓸ ꓜꓲꓽ 1 ꓣꓳ ꓐꓰ ꓠꓱꓸ ꓐꓯꓼ 2 ꓣꓳ ꓫꓵꓻꓳ ꓐꓰ ꓐꓯ ꓔꓬ ꓥ ꓟꓲ꓾ ꓮ ꓟꓶ ꓗꓪ ꓛꓲ ꓓꓳꓽ ꓔꓱꓹ ꓔꓱꓹ ꓟꓽ ꓐꓯ ꓓꓳ ꓡ ꓢꓰ=
ꓑ ꓫꓬ ꓟꓯꓼ (ꓑꓓꓝ) ꓔꓯ ꓢꓯꓼ ꓖꓶꓽ ꓔꓬ ꓟ ꓟ-ꓓꓲ-ꓡꓲ ꓑ ꓫꓬ ꓐꓴ (22/ 6/ 2021)
” ꓑ ꓫꓬ ꓟꓯꓼ ꓐꓴ ꓟꓬꓱꓽ ꓬꓰ ꓟ ꓔꓯ ꓟꓳꓸ ꓬꓲꓸ ꓐꓬꓱꓽ ꓐꓰ ꓬꓲꓸ ꓓꓳꓽ ꓔꓯ ꓮ ꓘꓶꓸ ꓤ ꓟꓳ ꓙ ꓡꓯ= ꓑ ꓫꓬ ꓐꓴ ꓮ ꓙꓵꓽ ꓮ ꓡꓲ ꓐ ꓡ ꓖꓳ ꓡꓱ ꓔꓺ ꓙ ꓡꓯ” ꓐꓰ ꓑ ꓫꓬ ꓟꓯꓼ ꓐꓴ ꓡꓰ ꓐꓯ ꓩꓴ ꓡ ꓡꓳ= ꓕꓱ ꓕꓲ ꓧꓪꓹ ꓑ ꓫꓬ ꓟꓯꓼ ꓔꓬ ꓟ ꓦꓲ ꓘꓴ ꓗꓪ ꓑ ꓫꓬ ꓙꓵꓽ ꓪ ꓦꓴ ꓢꓴ ꓐꓴ ꓚꓳꓸ ꓡ ꓟ ꓠꓬ꓾ ꓬꓲꓸ ꓐꓬꓱꓽ ꓕꓲ ꓟ ꓑꓶꓸ ꓓꓴ ꓥ ꓡꓳ ꓐꓰ ꓢꓷꓸ ꓪ ꓡꓳ= ꓬꓲꓸ ꓐꓬꓱꓽ ꓖꓳ ꓟ ꓝꓮꓚꓰꓐꓳꓳꓗ ꓗꓪ ꓓꓳ ꓡ ꓗꓸ ꓠꓯꓸ ꓠ ꓡꓲ 15 ꓧꓶ ꓛꓲ ꓕꓯ ꓦꓲ ꓖꓳ ꓟ ꓗꓪ ꓚꓳꓸ ꓕꓲ ꓡ ꓢꓲ꓾ ꓡ ꓛꓴꓸ ꓤꓹ ꓤꓼ ꓐꓰ꓾ ꓡ ꓛꓴꓸ ꓒꓽ ꓡꓰ ꓐꓶ ꓡ ꓠꓬꓲ ꓑ ꓫꓬ ꓟꓯꓼ 2 ꓣꓳ ꓫꓵꓻ ꓢꓲ꓾ ꓠꓱꓸ ꓐꓯꓼ 6 ꓣꓳ ꓥ ꓟꓲ ꓣꓴ ꓟꓶ ꓡꓰ ꓟ ꓥꓳ=
ꓑ ꓫꓬ ꓐꓴ ꓔꓯ ꓠꓬꓲꓸ ꓤꓲ ꓟ ꓟꓬꓽ ꓡꓰ ꓟ ꓑꓶꓸ ꓓꓴ ꓑ ꓫꓬ ꓐꓴ ꓜꓲꓽ ꓟꓽ ꓘꓴ ꓢꓲ꓾ ꓡ ꓛꓴꓸ ꓣꓱꓽ ꓢꓲꓸ ꓔꓳꓹ ꓡꓯ ꓘꓳ ꓡ ꓟ ꓥ ꓡꓳ= ꓕꓱ ꓟ ꓠꓬ ꓟ-ꓓꓲ-ꓡꓲ ꓟꓵꓽ ꓗꓪ ꓬꓲꓸ ꓪꓴꓸ ꓕꓲ ꓧꓪꓹ ꓟ ꓡꓳ ꓒꓱ ꓟꓯꓼ ꓘꓶꓽ ꓕꓲ ꓟ ꓥ ꓡꓳ=
