ꓟꓲ-ꓪ ꓗꓪ ꓐꓰ ꓪꓰ-ꓙꓬ-ꓠ-ꓖ (ꓫꓵ-ꓓꓰ) ꓘꓹ ꓗꓪ ꓛꓲ ꓙ ꓖꓴ ꓫꓬꓹ ꓔꓬ ꓢꓴ ꓐꓴ ꓗꓸ ꓘꓳꓽ ꓘꓳꓽ ꓟꓬꓱꓽ ꓬꓰ ꓙꓲ ꓠꓹ ꓟ ꓐꓱ ꓶ ꓙꓐꓖꓴ ꓖꓳ ꓕꓲ ꓚꓱꓹ ꓗꓪ ꓟꓳ-ꓓꓳ ꓙꓰ ꓙꓰ ꓡꓽ ꓡ ꓬꓰ ꓟꓽ ꓓ (30) ꓠꓬꓲ ꓑꓲꓸ ꓩꓴ ꓡ ꓡꓳ꓿
ꓕꓱ ꓟ ꓠꓬ ꓪꓰ-ꓙꓬ-ꓠ-ꓖ ꓟꓵꓽ ꓙꓵꓽ ꓢꓴ ꓗꓪ ꓐꓰ ꓞꓰꓻ ꓩꓴ ꓡ ꓟ ꓕꓵꓼ ꓪ ꓥ ꓢꓲꓸ ꓟꓽ ꓛꓳ ꓢꓴ ꓔꓯ ꓙꓵꓽ ꓗ 188 ꓲꓑꓚ ꓡꓳ ꓚ ꓝꓴꓲꓸ ꓓꓰꓺ ꓓꓴ ꓥꓳ ꓐꓯ ꓔ ꓡꓳ꓿
ꓑ ꓫꓬ ꓐꓴ ꓓꓵꓽ ꓓꓳ ꓔꓬ ꓟ
ꓕꓱ ꓡꓱ ꓑꓲꓸ ꓠꓹ ꓟ ꓔꓯ 7 ꓠꓬꓲ ꓟꓲꓸ ꓕꓯꓽ ꓢꓲ ꓗꓪ ꓢꓷ ꓙ ꓟꓴ ꓙ ꓔꓸ ꓢꓲꓸ ꓔꓳꓹ ꓢꓴ ꓟꓽ ꓙꓳ ꓟ ꓗꓪ ꓐꓰ 12 ꓦ 23 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲꓸ 30 ꓠꓬꓲ ꓐꓲ ꓡꓰ ꓗꓪ ꓛꓲ ꓑꓲꓸ ꓔꓸ ꓓꓴ ꓥ ꓡꓳ꓿
“ꓥꓪ ꓠꓴ ꓙꓰ ꓙꓰ ꓡꓽ ꓡ ꓫꓸ ꓬꓰ ꓖꓶ ꓮ ꓟˍ ꓡꓰꓸ ꓟꓽ ꓵꓽ ꓠꓱ꓿ ꓙ ꓖꓴ ꓫꓬꓹ ꓓꓳ ꓡ ꓠꓹ ꓟ ꓠꓬ ꓓꓽ ꓪꓴꓸ ꓬꓳꓹ ꓚꓲˍ ꓟ ꓑꓶꓸ ꓓꓴ ꓥꓳ” ꓐꓰ ꓟꓸ ꓒ ꓡꓲ-ꓮ-ꓦꓯꓼ ꓡꓰ Facebook ꓗꓪ ꓐꓳ ꓟꓸ ꓖꓶ ꓔ ꓡꓳ꓿
ꓖꓳ ꓡꓱ ꓑꓲꓸ ꓔꓸ ꓥ ꓟꓲ ꓥ ꓟꓲ ꓙ ꓖꓴ ꓫꓬꓹ ꓟꓬꓱꓽ ꓬꓰ ꓢꓴ꓾ ꓠꓯ ꓞꓲꓼ ꓟꓬꓱꓽ ꓬꓰ ꓢꓴ ꓐꓴ ꓐꓰ꓾ ꓟꓵꓽ ꓚꓳ ꓜꓴ ꓐꓴ ꓐꓱ ꓶ ꓠꓬ ꓟꓳ-ꓓꓳ ꓙꓰ ꓚꓳ ꓓˍ ꓡꓳ ꓐꓯ ꓔ ꓡꓳ꓿ ꓠꓯꓸ ꓐꓯꓼ ꓑ ꓫꓬ ꓟꓳ-ꓓꓳ ꓠꓬ ꓮ ꓡꓲꓳ ꓫꓵꓽ ꓥ ꓟꓲ ꓙꓰ ꓚꓳ ꓟꓽ ꓓ ꓐꓰ ꓗꓽ ꓔˍ ꓡꓳ꓿
