ꓗꓴꓷꓼ ꓟꓬꓱꓽ ꓬꓰ ꓢꓴ ꓮ ꓟ ꓥ ꓡ?
ꓡ ꓞꓳ ꓕꓲ ꓣꓳ꓾ ꓦꓲ ꓘꓴ ꓕꓲ ꓟ ꓜꓽ ꓚꓱꓹ꓾ ꓓꓳ ꓚꓱꓹ꓾ ꓔꓬ ꓖꓴ ꓐꓰ ꓖꓪ ꓓꓴ ꓐꓱ ꓶ ꓟꓬꓱꓽ ꓬꓰ ꓛꓲ ꓟ ꓥꓳ= ꓖꓳ ꓟ ꓡꓰ ꓐꓰ ꓡ ꓞꓳ ꓮ ꓟꓬꓹ ꓔꓬ ꓟ ꓕꓲ ꓟꓵꓽ꓾ ꓕꓲ ꓗꓴꓷꓼ ꓐꓱ ꓶ ꓥ ꓟꓲ ꓓꓵꓽ ꓙ ꓛꓲ꓾ ꓟꓬꓱꓽ ꓬꓰ ꓛꓲ ꓡꓳ=
ꓟꓵꓽ ꓕꓲ ꓟꓵꓽ꓾ ꓥ ꓠꓬ ꓗꓴꓷꓼ ꓕꓲ ꓟ ꓐꓱ ꓶ ꓓꓵꓽ ꓙ ꓞꓷꓹ ꓟ꓾ ꓔꓶ ꓙꓱꓼ ꓟꓳꓸ ꓖꓶ ꓟ ꓐꓰ꓾ ꓟꓬꓱꓽ ꓬꓰ ꓟ ꓮ ꓙꓵꓽ ꓠꓬ ꓗꓴꓷꓼ ꓫꓵꓽ ꓪꓴ ꓟꓬꓱꓽ ꓥ ꓡꓳ= ꓕꓱ ꓡꓱꓳ ꓫꓵꓽ ꓔꓯ ꓟꓳꓸ ꓓꓵꓽ ꓙ ꓔꓬ ꓢꓴ꓾ ꓡ ꓞꓳ ꓮ ꓟꓬꓹ ꓐꓱ ꓶ ꓮ ꓡꓲ ꓬꓰ ꓠꓬ ꓠꓲꓹ ꓘꓪ ꓫꓵ ꓡ꓾ ꓪꓴꓽ ꓡ ꓟꓴ ꓡ ꓟ ꓔꓯ ꓢꓪꓼ ꓔꓬ ꓢꓴ ꓐꓴ ꓠꓬ ꓗꓴꓷꓼ ꓫꓵꓽ ꓪꓴ ꓟꓬꓱꓽ ꓬꓰ ꓢꓴ ꓐꓴ ꓥ ꓡꓳ= ꓬꓲ ꓪ ꓠꓬ ꓕꓲ ꓣꓳ꓾ ꓕꓲ ꓦꓲ ꓐꓱ ꓶ ꓡꓰ ꓟꓽ ꓞꓲ ꓡ ꓞꓳ ꓮ ꓟꓬꓹ ꓟ ꓔꓬ ꓢ ꓙꓳ ꓢ ꓡ ꓚꓱꓹ ꓔꓯ ꓓꓵꓽ ꓙ ꓢꓪꓼ ꓠꓬꓲ ꓔꓬ ꓟ꓾ ꓡ ꓞꓳ ꓮ ꓟꓬꓹ ꓟ ꓠꓲꓹ ꓘꓪ ꓫꓵ ꓡꓰ ꓚꓱꓹ ꓔꓯ ꓧꓪ ꓔꓬ ꓢꓴ ꓐꓴ ꓥ ꓡꓳ=
ꓕꓱ ꓗꓪ ꓗꓴꓷꓼ ꓟꓬꓱꓽ ꓬꓰ ꓡꓳ ꓐꓯ ꓢꓲ ꓕꓲ ꓣꓳ ꓐꓱ ꓶ꓾ ꓕꓲ ꓦꓲ ꓐꓱ ꓶ ꓙꓲ ꓖꓴ ꓧꓪ ꓔꓬ ꓠꓬ ꓕꓲ ꓣꓳ ꓕꓲ ꓦꓲ ꓙꓲ ꓖꓴ ꓧꓪ ꓢꓴ ꓡꓰ ꓐꓯ ꓓ ꓡꓳ= ꓗꓴꓷꓼ ꓟꓬꓱꓽ ꓬꓰ ꓢꓴ ꓐꓯ ꓟꓽ ꓓ= ꓗꓴꓷꓼ ꓟꓬꓱꓽ ꓬꓰ ꓢꓴ ꓠꓬ ꓕꓲ ꓟꓵꓽ ꓕꓲ ꓡꓳ꓾ ꓕꓲ ꓫꓴ ꓕꓲ ꓗꓴꓷꓼ ꓐꓱ ꓶ ꓙꓲ ꓖꓴ ꓧꓪ ꓢꓴ ꓔꓯ ꓐꓯ ꓬꓯꓼ ꓡꓳ= ꓠꓬꓲꓸ ꓠꓬꓲ ꓟ ꓗꓴꓷꓼ ꓟꓬꓱꓽ ꓬꓰ ꓢꓴ ꓐꓯ ꓔꓬ ꓢꓴ ꓔꓯ ꓡꓳꓸ ꓠꓬꓲ ꓮ ꓟ ꓠꓬ ꓗꓴꓷꓼ ꓟꓬꓱꓽ ꓬꓰ ꓢꓴ ꓚꓵ ꓚꓵ ꓥ ꓡ? ꓬꓲꓸ ꓬꓰ ꓟꓬꓱꓽ ꓠꓬ ꓕꓲ ꓣꓳ ꓐꓱ ꓶ꓾ ꓕꓲ ꓦꓲ ꓐꓱ ꓶ ꓡꓰ ꓥ ꓠꓬ ꓚꓲ ꓛꓬ ꓙꓲ ꓖꓴ ꓧꓪ ꓢꓴ ꓥ ꓡꓳ ꓐꓰ ꓕꓳ ꓶ ꓵꓺ ꓢꓴ ꓐꓴ ꓢꓷꓸ ꓡꓰ ꓥꓳ=
ꓡ ꓞꓳ ꓮ ꓟꓬꓹ ꓐꓱ ꓶ ꓓꓵꓽ ꓙ ꓙ ꓢꓴ꓾ ꓫꓸ ꓕꓱ ꓢꓴ꓾ ꓚꓱꓹ ꓟꓳꓸ ꓖꓶ ꓢꓴ꓾ ꓖꓪ ꓙꓱ ꓢꓴ ꓠꓬ ꓚꓵ ꓚꓵ ꓗꓴꓷꓼ ꓟꓬꓱꓽ ꓬꓰ ꓢꓴ ꓥ ꓡꓳ= ꓕꓲ ꓐꓱ ꓠꓽ ꓕꓲ ꓫꓵꓽ ꓕꓲ ꓪꓳꓼ ꓐꓱ ꓶ ꓡꓰ ꓟꓬꓱꓽ ꓬꓰ ꓠꓬ꓾ ꓫꓸ ꓕꓱ ꓠꓬ ꓫꓵꓽ ꓟꓬꓱꓽ ꓬꓰ ꓢꓴ ꓐꓯ ꓓ ꓥꓳ= ꓗꓴꓷꓼ ꓐꓯ ꓠꓬ ꓞꓳ ꓫꓵꓽ ꓕꓲ ꓫꓵꓽ ꓡꓰ ꓔꓬ ꓟ꓾ ꓦ ꓡꓱ ꓚꓱꓹ ꓕꓲ ꓟ ꓡꓰ ꓙꓳ ꓟ ꓟꓽ ꓥ ꓠꓬꓲ꓾ ꓗꓴꓷꓼ ꓗꓪ ꓔꓬ ꓢꓴ ꓡ ꓞꓳ ꓮ ꓙꓵꓽ ꓐꓱ ꓶ (ꓔꓳꓹ ꓢꓴ꓾ ꓪꓽ ꓢꓴ) ꓙꓲ ꓖꓴ ꓙꓳ ꓟ ꓟꓬꓱꓽ ꓚꓱꓹ ꓖꓴ ꓟꓸ ꓖꓶ ꓐ ꓡ ꓢꓴ ꓔꓯ ꓗꓴꓷꓼ ꓟꓬꓱꓽ ꓬꓰ ꓢꓴ ꓐꓯ ꓓ ꓡꓳ=
ꓗꓴꓷꓼ ꓟꓬꓱꓽ ꓬꓰ ꓢꓴ ꓐꓰ꓾ ꓡꓲ-ꓢꓴ
ꓡꓲ-ꓢꓴ ꓠꓬ ꓚꓲ ꓛꓬ ꓐꓱ ꓶ ꓡꓰ ꓓꓵ ꓙ ꓢꓴ ꓟꓬꓽ ꓔꓬ ꓢꓰ ꓟ ꓦꓬꓼ ꓠꓬꓲ ꓕꓲ ꓔꓳꓸ ꓗꓪ ꓛꓲ ꓔꓬ ꓡꓳ= ꓗꓴꓷꓼ ꓫꓵ ꓪꓴ ꓐꓰ ꓗꓴꓷꓼ ꓟꓬꓱꓽ ꓔꓯ ꓓꓵ ꓙ ꓖꓪ ꓠꓬꓲ ꓢꓴ꓾ ꓡꓯꓼ ꓕꓲ ꓟꓬꓱꓽ ꓬꓰ ꓢꓴ ꓟꓽ ꓟꓬ= ꓚꓵ ꓚꓵ ꓐꓯ ꓠꓬ ꓕꓲ ꓘꓹ ꓡ ꓞꓳ ꓐꓱ ꓶ ꓢꓯꓼ ꓕꓵꓼ ꓢꓴ ꓡꓲꓸ ꓟꓽ ꓟꓬ= ꓞꓳ ꓫꓵꓽ ꓕꓲ ꓫꓵꓽ ꓐꓱ ꓶ ꓓꓵ ꓙ ꓖꓪꓽ ꓠꓬꓲ ꓢꓴ ꓟꓽ ꓟꓬ= ꓗꓴꓷꓼ ꓫꓴ꓾ ꓗꓴꓷꓼ ꓟꓬꓱꓽ ꓚꓱꓹ ꓗꓪ ꓡ ꓞꓳ ꓮ ꓟꓬꓹ ꓐꓱ ꓶ ꓓꓵꓽ ꓙ ꓞꓷꓹ ꓢꓴ꓾ ꓚꓴ ꓬꓲꓹ ꓓꓶꓽ ꓢꓴ ꓠꓬꓲꓸ ꓠꓬꓲ ꓗꓪ ꓛꓲ ꓮ ꓟꓬꓹ ꓟꓽ ꓙꓳ ꓢꓰ= ꓚꓲ ꓛꓬ ꓟꓬꓱꓽ ꓔꓯ ꓡꓰ ꓝꓴꓸ ꓔꓬ ꓢꓴ ꓟꓬꓽ ꓡꓳ=
ꓑꓴ-ꓔ-ꓳ ꓟꓵꓽ ꓗꓪ ꓠꓬ ꓦꓲ ꓔꓯꓹ ꓛꓲꓽ ꓚꓲꓸ ꓟ ꓬꓰ ꓝꓳ ꓡꓳ= ꓖꓳ ꓗꓪ ꓦꓲ ꓕꓲ ꓟ ꓔꓯꓹ ꓡꓵ ꓡ ꓠꓹ ꓟ ꓠꓬ ꓮ ꓙꓵꓽ ꓢꓴ ꓕꓲ ꓣꓳ ꓕꓲ ꓡꓯꓼ ꓣꓱꓽ ꓢꓲ ꓔꓯꓹ ꓛꓵꓽ ꓚꓰꓼ ꓡꓳ= ꓖꓳ ꓟ ꓡꓰ ꓐꓰ ꓘꓹ ꓟꓬꓱꓽ꓾ ꓫꓵꓽ ꓟꓬꓱꓽ ꓐꓰ꓾ ꓗꓴꓷꓼ ꓟꓬꓱꓽ ꓗꓪ ꓕꓲ ꓣꓳ ꓕꓲ ꓡꓯꓼ ꓢꓯꓼ ꓩꓴ ꓠ ꓗ ꓟ ꓢꓳ ꓟꓶ ꓓ ꓡꓳ=
ꓮ ꓡꓲꓳ ꓐꓯ ꓠꓬ꓾ ꓗꓴꓷꓼ ꓫꓵꓽ ꓪꓴ ꓟꓽ ꓙꓲ ꓡ ꓠꓬ ꓮ ꓡꓲ ꓕꓲ ꓣꓳ ꓥ ꓟꓲ ꓟꓽ ꓡꓲꓹ ꓙꓰ ꓪ= ꓣꓳ ꓚꓲ ꓛꓬ ꓟꓬꓱꓽ ꓔꓯ ꓡꓰ ꓝꓴꓸ ꓠꓬꓹ ꓢꓲꓸ ꓗꓴꓷꓼ ꓫꓵꓽ ꓪꓴ ꓐꓬ ꓡꓰ ꓠꓬ ꓣꓳ ꓟꓬꓱꓽ ꓥ ꓟꓲ ꓫꓴꓸ ꓡꓰ ꓐꓬ ꓡꓰ ꓡ ꓗꓴ ꓡꓳ= ꓖꓳ ꓟ ꓑꓶꓸ ꓓꓴ ꓗꓴꓷꓼ ꓟꓬꓱꓽ ꓬꓰ ꓐ ꓡ ꓢꓴ ꓔꓯ ꓔꓳꓹ ꓙ ꓟ ꓐꓰ꓾ ꓚꓲ ꓛꓬ ꓐ ꓡ ꓟ ꓕꓲ ꓒꓳꓹ ꓗꓪ ꓐꓰ ꓕꓲ ꓣꓳ ꓕꓲ ꓡꓯꓼ ꓣꓱꓽ ꓙ ꓟ ꓠꓬ ꓗꓴꓷꓼ ꓫꓵ ꓪꓴ ꓠꓬ ꓚꓲ ꓛꓬ ꓟꓬꓱꓽ ꓗꓪ ꓛꓲ ꓝꓸ ꓬꓯꓼ ꓔꓬ ꓟ ꓔꓯ ꓢꓷꓸ ꓟ ꓥ ꓡꓳ= ꓦ ꓡꓱ ꓢꓴ ꓐꓴ ꓔꓯ ꓢꓲꓺ ꓒ ꓬꓰ-ꓢꓴ ꓡꓰ ꓟꓸ ꓖꓶ ꓔꓸ ꓟ ꓪ ꓘꓴ ꓚꓱꓹ ꓗꓪ ꓗꓴꓷꓼ ꓟꓬꓱꓽ ꓬꓰ ꓢꓴ ꓐꓴ ꓐꓱ ꓶ ꓪ ꓘꓴ ꓝꓲ ꓡꓳ= ꓖꓳ ꓟ ꓠꓬ “ꓠꓬꓲꓸ ꓠꓬꓲ ꓜ ꓠꓹ ꓟ ꓐꓱ ꓶ ꓜ ꓓꓴ ꓖꓶ ꓡꓯ” ꓐꓯ ꓟ ꓪ ꓘꓴ ꓘꓶꓽ ꓠꓬ ꓗꓴꓷꓼ ꓫꓵꓽ ꓪꓴ ꓙꓲ ꓟ ꓦꓬꓼ ꓠꓬꓲ ꓗꓳꓸ ꓪ ꓠꓹ ꓟ ꓶꓼ ꓓꓰ ꓘꓶꓽ ꓥ ꓡꓳ= ꓗꓴꓷꓼ ꓫꓵ ꓪꓴ ꓟꓽ ꓙꓲ ꓠꓬ ꓜꓽ ꓓꓴ ꓪ ꓜꓽ ꓟꓽ ꓓ= ꓫꓸ ꓙꓵ ꓟꓷꓼ ꓙꓲ ꓟ ꓐꓰ꓾ ꓫ ꓟꓴ ꓫ ꓚꓬ ꓞꓳ ꓢꓰꓼ ꓪ ꓢꓰꓼ ꓟ ꓔꓳꓹ ꓜꓳ ꓡ ꓥꓳ=
ꓗꓴꓷꓼ ꓙꓵꓽ ꓗ ꓙꓲ ꓠꓬ ꓑ ꓫꓬ ꓐꓴ ꓠꓲꓹ ꓢ ꓢꓲꓸ ꓗꓴꓷꓼ ꓪꓴꓽ ꓡ ꓡꓳ= ꓗꓴꓷꓼ ꓙꓵꓽ ꓗ ꓐꓰ ꓙꓵꓽ ꓢꓴ ꓟꓽ ꓙꓲ ꓠꓬ ꓑ ꓫꓬ ꓐꓴ ꓔꓬ ꓫꓸ ꓙꓳ ꓫꓸ ꓢꓲꓸ ꓮ ꓙꓵꓽ ꓢꓴ ꓧꓪ ꓜ ꓬꓰ ꓜ ꓚꓱꓹ ꓮ ꓙꓵꓽ ꓐꓬ ꓡꓰ ꓡ ꓡꓳ= ꓖꓳ ꓟ ꓑꓶꓸ ꓓꓴ ꓚꓲ ꓛꓬ ꓕꓲ ꓣꓳ ꓔꓵꓸꓼ ꓐꓱ ꓶ ꓡꓰ ꓟꓽ ꓥ ꓥ꓾ ꓡ ꓞꓳ ꓮ ꓟꓬꓹ ꓟ ꓔꓬ ꓢ ꓙꓳ ꓢ ꓡ ꓚꓱꓹ ꓔꓯ ꓓꓵꓽ ꓙ ꓢꓴ ꓡꓲ-ꓢꓴ ꓐꓴ ꓓꓳ ꓡ ꓠꓬ ꓜꓳꓽ ꓥꓳ= ꓟꓬ ꓠꓬꓲ ꓠꓬ ꓢꓷꓸ ꓠꓲꓹ ꓢꓷꓸ ꓢꓴ꓾ ꓑꓶꓸ ꓠꓲꓹ ꓙꓳ ꓢꓴ ꓓꓳ ꓡ ꓢꓲ꓾ ꓗꓴꓷꓼ ꓫꓴ ꓐꓱ ꓶ꓾ ꓗꓴꓷꓼ ꓕꓲ ꓟ ꓡꓱꓸꓼ ꓐꓱ ꓶ ꓓꓵꓽ ꓙ ꓖꓪꓽ ꓠꓬꓲ ꓢꓲꓸ ꓚꓱꓹ ꓧꓳꓽ ꓐ ꓡ ꓢꓴ꓾ ꓮ ꓟꓬꓹ ꓙꓲ ꓖꓴ ꓙꓳ ꓟ ꓚꓱꓹ ꓔꓯ ꓓꓵꓽ ꓙ ꓞꓷꓹ ꓐ ꓡ ꓢꓴ ꓓꓳ ꓡ ꓠꓯ ꓡꓳ= ꓕꓱ ꓟ ꓐꓱ ꓶ ꓦꓲ ꓘꓴ ꓕꓲ ꓟ ꓡꓲ ꓕꓲ ꓟ ꓗꓪ ꓞꓲꓼ ꓣꓳ ꓟ ꓤ ꓠꓱ ꓐꓴ ꓔꓯ ꓟꓸ ꓖꓶ ꓠꓯ ꓡꓳ= ꓡ ꓞꓳ ꓮ ꓟꓬꓹ ꓐꓱ ꓶ ꓧꓳꓽ ꓢꓴ ꓟꓴ ꓢꓴ꓾ ꓓꓵꓽ ꓙ ꓗꓴꓸ ꓢꓴ ꓐꓰ꓾ ꓑꓶꓸ ꓢꓴ ꓒꓬꓱꓼ ꓡ ꓠꓹ ꓟ ꓖꓴ ꓟꓳꓸ ꓖꓶ ꓠꓯ ꓡꓳ= ꓗꓴꓷꓼ ꓟꓬꓱꓽ ꓗꓪ ꓙꓲ ꓟ ꓡ ꓞꓳ ꓐꓴ ꓓꓵꓽ ꓢꓲ ꓬꓰ ꓠꓲꓹ ꓟꓽ ꓫꓵ ꓠꓬ ꓥꓶꓸ ꓟ ꓡ ꓞꓳ ꓡꓰ ꓫꓸ ꓟꓴ ꓫ ꓚꓬ ꓬꓰ ꓖꓶ ꓡ ꓕꓯ ꓢꓲꓸ ꓠꓬ ꓖꓼ ꓟꓽ ꓟꓶꓳ= ꓥꓶꓸ ꓟ ꓡ ꓞꓳ ꓐꓴ ꓙꓵꓽ ꓪ ꓟꓶ ꓡꓰ ꓠꓬ꓾ ꓑ ꓫꓬ ꓐꓴ ꓔꓬ ꓫꓸ ꓙꓳ ꓫꓸ ꓡ ꓥꓳ= ꓙꓲ ꓟ ꓐꓰ ꓑꓶꓸ ꓟ ꓡ ꓞꓳ ꓐꓴ ꓗꓴꓷꓼ ꓫꓵꓽ ꓪꓴ ꓚꓱꓹ ꓗꓪ ꓓꓵꓽ ꓙ ꓞꓷꓹꓢꓴ꓾ ꓧꓳꓽ ꓪꓴꓸ ꓟꓴ ꓢꓴ ꓬꓰ ꓡ ꓠꓹ ꓟ ꓢꓯꓼ ꓖꓶ ꓡꓯ ꓘꓳ ꓡꓯ= ꓕꓱ ꓟ ꓠꓬ ꓕꓲ ꓣꓳ꓾ ꓕꓲ ꓘꓹ ꓐꓱ ꓶ ꓟꓽ ꓥ= ꓕꓲ ꓟꓵꓽ ꓕꓲ ꓡꓳ꓾ ꓕꓲ ꓗꓴꓷꓼ ꓔꓬ ꓢ ꓙꓳ ꓢ ꓡ ꓚꓱꓹ ꓥ ꓡꓳ=
ꓗꓴꓷꓼ ꓟꓬꓱꓽ ꓬꓰ ꓢꓴ ꓠꓬ ꓬꓳꓹ ꓚꓲ ꓡ?
ꓗꓴꓷꓼ ꓟꓬꓱꓽ ꓬꓰ ꓢꓴ ꓠꓬ ꓙꓵ ꓚꓱꓹ ꓕꓲ ꓟ ꓗꓪ ꓦ ꓡꓱ ꓢꓴ꓾ ꓟꓽ ꓦ ꓡꓱ ꓢꓴ꓾ ꓢꓷꓸ ꓠꓲꓹ ꓙꓳ ꓢꓴ꓾ ꓟꓽ ꓙꓳ ꓢꓴ ꓮ ꓙꓵꓽ ꓐꓱ ꓶ ꓓꓵꓽ ꓙ ꓟꓬꓱꓽ ꓬꓰ ꓢꓴ ꓥ ꓡꓳ= ꓠꓯ ꓞꓲꓼ ꓟꓸ ꓒ ꓕꓲ ꓣꓳ ꓓꓵꓽ ꓙ ꓥꓳꓽ ꓡꓰ ꓠꓬ ꓞꓳ ꓠ ꓕꓲ ꓣꓳ ꓢꓯꓼ ꓟꓬ ꓙꓲ ꓣꓴ ꓓꓴ ꓙꓳ ꓡ ꓡꓳ= ꓖꓳ ꓟ ꓑꓡꓰ ꓐꓰ ꓟꓳ ꓓꓳ ꓫꓵꓸ ꓒꓽ ꓕꓲ ꓣꓳ ꓫꓵꓸ ꓥꓳꓽ ꓡꓰ ꓠꓬ ꓟꓳ ꓓꓳ ꓗꓪ ꓜꓶ ꓔꓬ ꓢꓴ ꓮ ꓙꓵꓽ ꓐꓱ ꓶ ꓙꓲ ꓣꓴ ꓓꓴ ꓙꓳ ꓡ ꓡꓳ= ꓟꓸ ꓟ ꓚ ꓒꓽ ꓕꓲ ꓣꓳ ꓚ ꓥꓳꓽ ꓡꓰ ꓠꓬ ꓦ ꓡꓱ ꓚꓱꓹ ꓖꓳ ꓟ ꓗꓪ ꓟ ꓡ ꓞꓳ ꓐꓴ ꓐꓱ ꓶ ꓙꓲ ꓣꓴ ꓓꓴ ꓒꓬꓱꓼ ꓡ ꓡꓳ= ꓖꓳ ꓡꓱ ꓥ ꓟꓲ ꓗꓴꓷꓼ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓓꓵꓽ ꓙ ꓥꓳꓽ ꓡꓰ (ꓬꓰ ꓥꓳꓽ ꓡꓰ ꓠꓬ) ꓡ ꓞꓳ ꓮ ꓟꓬꓹ ꓔꓯ ꓙꓲ ꓣꓴ ꓓꓴ ꓒꓬꓱꓼ ꓡ ꓡꓳ= ꓖꓳ ꓟ ꓡꓰ ꓐꓰ ꓡꓯ ꓟꓰꓹ ꓕꓲ ꓒꓳꓹ ꓗꓪ ꓐꓯ ꓠꓬ꓾ ꓗꓴꓷꓼ ꓟꓬꓱꓽ ꓬꓰ ꓢꓴ ꓬꓰ ꓜꓳꓽ ꓡꓰ ꓠꓬ ꓡ ꓞꓳ ꓮ ꓟꓬꓹ ꓗꓹ ꓛꓲ ꓗ ꓢ ꓔꓬ ꓪ ꓥꓳ=
ꓝꓯ-ꓓ-ꓬꓯ ꓓꓰ-ꓟꓳ-ꓗꓯ-ꓢꓰ (Federal Democracy)
ꓝꓯ-ꓓ-ꓬꓯ ꓠꓬ ꓕꓲ ꓟꓵꓽ (ꓥ ꓠꓬ) ꓕꓲ ꓫꓵꓽ ꓕꓲ ꓪꓳꓼ ꓐꓱ ꓶ ꓩꓴ ꓗꓷ ꓟ ꓙꓵꓽ ꓪ (ꓚꓲ ꓛꓬ ꓔꓱꓹ ꓚꓲ ꓛꓬ ꓙꓵꓽ ꓠꓹ ꓟ ꓙꓵꓽ ꓪ) ꓥ ꓢꓲ꓾ ꓓꓰ-ꓟꓳ-ꓗꓯ-ꓢꓰ ꓠꓬ ꓡ ꓞꓳ ꓮ ꓟꓬꓹ ꓠꓲꓹ ꓠꓵ ꓟ ꓚꓱꓹ ꓗꓪ ꓐꓰ ꓙꓵꓽˍ ꓟ ꓥ ꓡꓳ= ꓕꓱ ꓡꓱ ꓐꓯ ꓠꓬ ꓝꓯ-ꓓ-ꓬꓯ ꓠꓬ ꓕꓲ ꓫꓵꓽ (ꓥ ꓠꓬ) ꓕꓲ ꓟꓵꓽ ꓐꓱ ꓶ ꓩꓴ ꓗꓷ ꓟ ꓙꓵꓽ ꓪ ꓟꓶ ꓟ ꓥ ꓢꓲ꓾ ꓓꓰ-ꓟꓳ-ꓗꓯ-ꓢꓰ ꓠꓬ ꓕꓲ ꓣꓳ ꓡꓲ ꓕꓲ ꓣꓳ ꓐꓱ ꓶ ꓪ ꓙꓲꓽ ꓙꓳ ꓟ ꓩꓴ ꓗꓷ ꓟ ꓙꓵꓽ ꓪ ꓟꓶ ꓟ ꓥ ꓡꓳ= ꓜꓴ ꓐꓰ꓾ ꓚꓲ ꓛꓬ ꓕꓲ ꓣꓳ ꓩꓴ ꓗꓷ ꓟ ꓙꓵꓽ ꓪ ꓟꓶ ꓟ ꓐꓯ ꓓ ꓡꓳ= ꓕꓱ ꓠꓬꓲꓽ ꓟ ꓫꓳꓹ ꓩꓴ ꓗꓷ ꓠꓬ꓾ ꓜꓴ ꓥ ꓟꓲ꓾ ꓝꓮꓲ ꓖꓳ ꓗꓪ ꓔꓺ ꓞꓹ ꓢꓴ ꓕꓲ ꓣꓳ ꓡꓲ ꓕꓲ ꓣꓳ ꓥ ꓟꓲ ꓩꓴ ꓗꓷ ꓟ ꓙꓵꓽ ꓪ ꓟꓶ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓟꓬ-ꓟ ꓗꓴꓷꓼ ꓗꓪ ꓠꓬ꓾ ꓮ ꓟꓶ ꓗꓪ ꓛꓲ ꓞꓳ ꓫꓵꓽ ꓐꓴ ꓗꓳ ꓡꓳ ꓗꓪ ꓫꓵꓽ ꓠꓲꓹ ꓟ ꓟꓽ ꓫꓬ ꓡꓰ ꓢꓰ= ꓚꓲ ꓛꓬ ꓔꓬ ꓟꓵꓽ ꓔꓯ ꓠꓲꓹ ꓠꓵ ꓟ ꓠꓲꓹ ꓟ ꓥ ꓟꓲ ꓒ ꓐꓲ ꓙꓳ ꓔꓬ ꓢꓰꓽ ꓡꓳ=
ꓝꓮꓲ ꓕꓲ ꓣꓳ ꓡꓲ ꓕꓲ ꓣꓳ ꓥ ꓟꓲ ꓩꓴ ꓗꓷ ꓟ ꓙꓵꓽ ꓪ ꓟꓶ ꓠꓲꓹ ꓫꓵ ꓡꓳ= ꓕꓱ ꓟ ꓚꓵ ꓚꓵ ꓬꓰ ꓒꓬꓱꓼ ꓡ ꓠꓹ ꓟ ꓠꓬ ꓝꓯ-ꓓ-ꓬꓯ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓗꓪ ꓐꓰ ꓒꓬꓱꓼ ꓡ ꓓ ꓡꓳ ꓐꓰ ꓓꓵꓽ ꓙ ꓟ ꓥ ꓡꓳ= ꓮ ꓡꓲ ꓕꓲ ꓫꓵꓽ ꓙꓵꓽ ꓚꓱꓹ ꓗꓪ ꓥ ꓟꓲ꓾ ꓕꓲ ꓣꓳ ꓡꓲ ꓕꓲ ꓣꓳ ꓠꓬ ꓢꓷꓸ ꓠꓲꓹ ꓙꓳ ꓢꓴ꓾ ꓙꓵꓽ ꓗ ꓛꓳ ꓗꓴꓸ ꓢꓴ ꓒꓬꓱꓼ ꓡ ꓠꓯ ꓡꓳ= ꓟꓽ ꓥ ꓠꓬ ꓚꓲ ꓛꓬ ꓞꓳ ꓫꓵꓽ (ꓥ ꓠꓬ) ꓚꓲ ꓛꓬ ꓟꓵꓽ (ꓥ ꓠꓬ) ꓚꓲ ꓛꓬ ꓕꓲ ꓣꓳ ꓠꓽ ꓩꓴ ꓗꓷ ꓟ ꓟꓶ ꓢꓴ ꓥꓳ ꓐꓯ ꓢꓲꓸ ꓠꓱꓸ ꓐꓯꓼ ꓕꓲ ꓟꓵꓽ ꓢꓴ (ꓥ ꓠꓬ) ꓕꓲ ꓫꓵꓽ ꓢꓴ꓾ (ꓥ ꓠꓬ) ꓠꓱꓸ ꓐꓯꓼ ꓕꓲ ꓣꓳ ꓣꓳ ꓩꓴ ꓗꓷ ꓟ ꓙꓵꓽ ꓪ (rights and freedom) ꓔꓯ ꓘꓶ ꓡꓶꓽ ꓬꓰ ꓠꓬ ꓟꓽ ꓜꓳ= ꓕꓱ ꓟ ꓠꓬ ꓝꓯ-ꓓ-ꓬꓯ ꓐꓰ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓟꓴ ꓚꓱꓹ ꓔꓶ ꓙꓱꓼ ꓟꓽ ꓥ= ꓙꓵꓽ ꓚꓱꓹ ꓕꓱ ꓟ ꓠꓬ ꓡ ꓞꓳ ꓐꓴ ꓔꓯ ꓠꓲꓹ ꓘꓪ ꓫꓵ ꓡꓰ ꓝꓲ ꓢꓲ꓾ ꓢꓴ ꓓꓴ ꓙꓴꓽ ꓓꓴ ꓔꓯ ꓢꓲ ꓡꓲꓹ ꓡꓰ ꓝꓲ ꓐ ꓡ ꓟ ꓙꓵꓽ ꓚꓱꓹ ꓟꓴ ꓚꓱꓹ ꓥ ꓡꓳ=
ꓟꓬ-ꓟ ꓗꓴꓷꓼ ꓐꓱ ꓶ ꓮ ꓡꓲ ꓬꓰ ꓙꓰ ꓓꓴ ꓥ ꓡ?
ꓟꓬ-ꓟ ꓗꓴꓷꓼ ꓗꓪ ꓞꓳ ꓫꓵꓽ ꓡꓳ ꓚ ꓒꓬꓱꓼ ꓔꓬ ꓟ ꓠꓲꓹ ꓘꓪ ꓟꓽ ꓫꓵ ꓓꓴ ꓠꓬ ꓠꓬꓲꓸ ꓠꓬꓲ ꓗꓪ ꓛꓲ 72 ꓘꓳꓼ ꓡꓳꓼ ꓬꓰꓳ= ꓬꓲꓸ ꓪꓴꓸ ꓟ ꓗꓴꓷꓼ ꓔꓶ ꓢꓴ ꓐꓴ (ꓐꓣꓲꓔꓲꓢꓧ ꓡꓯ ꓒꓯꓹ ꓗꓪ ꓐꓰ ꓗꓴꓷꓼ ꓡꓲꓸ ꓢꓴ ꓐꓴ) ꓠꓬ ꓗꓴꓷꓼ ꓔꓯ ꓞꓳ ꓫꓵꓽ ꓡꓳ ꓚ ꓔꓶ ꓥꓳ ꓪ? ꓥ ꓠꓬ ꓕꓲ ꓗꓴꓷꓼ ꓕꓲ ꓫꓵꓽ ꓙꓵꓽ ꓚꓱꓹ ꓬꓰ ꓥꓳ ꓪ ꓐꓯ ꓟ ꓔꓯ ꓜꓲ ꓜꓲ ꓟꓴ ꓟꓴ ꓟꓽ ꓚꓹ ꓪ= ꓗꓴꓷꓼ ꓫꓬꓹ ꓜꓶ ꓟ ꓦꓬꓼ ꓠꓬꓲ ꓗꓪ ꓞꓳ ꓫꓵꓽ ꓡꓳ ꓚ ꓟꓽ ꓓꓵꓽ ꓙ ꓔꓸ ꓐꓯ ꓥ ꓟꓲ ꓐꓯ ꓙꓲ ꓟ ꓗꓸ ꓚꓵ ꓙꓳ ꓡꓳ= ꓮ ꓡꓲꓳ ꓐꓯ ꓠꓬ ꓖꓳ ꓕꓲ ꓦꓬꓼ ꓠꓬꓲ ꓗꓪ ꓟꓳꓠ꓾ ꓗ-ꓬꓲ꓾ ꓣ-ꓘꓮꓲ ꓞꓳ ꓫꓵꓽ ꓓꓽ ꓟ ꓔꓯ ꓟꓬ-ꓟ (ꓐ-ꓟ) ꓘꓴꓽ ꓗꓪ ꓔꓺ ꓫꓳꓹ ꓔꓸ ꓡꓳ= ꓑꓲ-ꓡꓳ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓗꓪ ꓬꓲꓸ ꓪ ꓔꓯ ꓟꓽ ꓘꓴ ꓖꓶ= ꓮ ꓡꓲꓳ ꓐꓯ ꓠꓬ ꓐꓴꓣꓟꓮ ꓑꓣꓳꓑꓰꓣ (ꓐ-ꓟ ꓟꓵꓽ ꓓꓽ ꓟ) ꓗꓪ ꓬꓲꓸ ꓪ ꓠꓬ ꓔꓺ ꓔꓬ ꓠꓬꓲ ꓟꓽ ꓘꓴ ꓐꓶ= ꓕꓱ ꓟ ꓔꓯ ꓡꓳꓸ ꓠꓬꓲ ꓠꓬ ꓬꓲꓸ ꓪꓴꓸ ꓟ ꓗꓴꓷꓼ ꓣꓴ ꓡꓲꓸ ꓢꓴ ꓐꓴ ꓓꓵꓽ ꓙ ꓟ ꓠꓬ ꓗꓴꓷꓼ ꓔꓯ ꓫꓬꓹ ꓜꓶ ꓟ ꓗꓪ ꓫꓵꓽ ꓔꓯ ꓛꓳ ꓢꓲꓸ ꓫꓬꓹ ꓜꓶ ꓟ ꓟꓽ ꓥ=
ꓖꓳ ꓡꓱ ꓥ ꓟꓲ ꓝꓮꓲ ꓕꓲ ꓒꓳꓹ ꓗꓪ ꓐꓯ ꓠꓬ꓾ ꓬꓲꓸ ꓪꓴꓸ ꓟ ꓗꓴꓷꓼ ꓔꓶ ꓢꓴ ꓐꓴ ꓠꓬ ꓮ ꓙꓵꓽ ꓐꓴ ꓐꓱ ꓶ ꓔꓱꓹ ꓜꓳ ꓜꓳ ꓡꓰ꓾ ꓫꓵꓽ ꓡꓳ ꓚ ꓠꓲꓹ ꓘꓪ ꓫꓵ ꓡꓰ ꓠ ꓟꓽ ꓬꓰ ꓖꓶ ꓐꓶ ꓐꓰ ꓢꓪꓼ ꓓ ꓢꓰ ꓡꓳ= ꓬꓲꓸ ꓦ ꓢꓲ ꓟ ꓫꓵꓽ ꓔꓯ ꓥ ꓟꓲ ꓟꓽ ꓓꓵ ꓙ ꓙ ꓐꓶ ꓐꓰ ꓟꓯꓼ ꓢꓲꓽ ꓒ ꓓꓽ ꓟ ꓮꓳ-ꓢꓮꓠ ꓔꓯ ꓐꓯ ꓓꓴ ꓙꓳ ꓡꓳ= ꓖꓳ ꓡꓱ ꓥ ꓟꓲ ꓬꓲꓸ ꓪ ꓗꓴꓷꓼ ꓫꓬꓹ ꓜꓶ ꓟ ꓗꓪ ꓞꓳ ꓫꓵꓽ ꓓꓽ ꓟ (8) ꓫꓵꓽ ꓡꓳ ꓚ ꓫꓬꓹ ꓜꓶ ꓡ? ꓥ ꓠꓬ ꓬꓲꓸ ꓪ ꓡꓯꓼ ꓛꓲ ꓗꓪ ꓟꓽ ꓙꓳ ꓟ ꓞꓳ ꓫꓵꓽ ꓐꓴ ꓔꓯ ꓡꓰ ꓬꓲꓸ ꓪ ꓔꓯ ꓪꓽ ꓡ ꓠꓹ ꓟ ꓖꓪ ꓙꓱ ꓢꓲ꓾ ꓬꓲꓸ ꓪ ꓡꓯꓼ ꓛꓲ ꓗꓪ ꓔꓺ ꓫꓳꓹ ꓔꓬ ꓟ ꓞꓳ ꓫꓵꓽ ꓐꓴ ꓔꓯ ꓠꓬ ꓬꓲꓸ ꓖꓳ ꓡꓱ ꓔꓺ ꓫꓳꓹ ꓔꓬ ꓝꓲ ꓠꓲꓹ ꓫꓵ ꓡ ꓐꓯ ꓟ ꓠꓬ ꓮ ꓟ ꓥ ꓟꓲ ꓟꓽ ꓢꓷꓸ= ꓗꓴꓷꓼ ꓔꓶ ꓢꓴ ꓒꓵꓽ ꓒ ꓐꓴ ꓢꓷꓸ ꓐꓶ ꓥꓳ=
ꓖꓳ ꓕꓲ ꓦꓬꓼ ꓠꓬꓲ ꓗꓪ ꓗ-ꓬꓲ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓠꓬ꓾ ꓐ-ꓟ ꓞꓳ ꓫꓵꓽ ꓔꓯ ꓡꓰ ꓔꓺ ꓔꓬ ꓠꓬ ꓬꓲꓸ ꓪ ꓚꓲ ꓛꓬ ꓔꓱꓹ ꓚꓲ ꓛꓬ ꓙꓵꓽ ꓪ ꓟꓽ ꓓ ꓐꓰ ꓢꓷꓸ ꓔꓬ ꓠꓬꓲ ꓚꓲ ꓛꓬ ꓟꓵꓽ ꓔꓯ ꓓꓰꓽ ꓗꓷꓳ= 40 ꓫꓬꓹ ꓟꓽ ꓞꓲ ꓟ ꓗ-ꓣꓲ ꓞꓳ ꓫꓵꓽ ꓐꓴ ꓚꓲ ꓛꓬ ꓟꓵꓽ ꓐꓱ ꓶ ꓡ ꓠꓹ ꓟ ꓓꓰꓽ ꓟ ꓗꓪ ꓡ ꓞꓳ ꓮ ꓟꓬꓹ ꓫꓵꓳ= ꓝꓮꓲ ꓮ-ꓢ ꓒꓽ ꓐꓴ ꓡꓰ ꓐ-ꓟ ꓐꓴ ꓥ ꓟꓲ ꓟꓵꓽ ꓣꓳ ꓣꓳ ꓪꓴꓽ ꓪꓴꓽ ꓕꓲ ꓟ ꓠꓬ ꓙꓳ ꓝꓲ= ꓟꓵꓽ ꓫꓴ ꓓꓽ ꓟ 8 ꓫꓴ ꓬꓰ ꓢꓲ ꓟꓬ-ꓟ ꓗꓴꓷꓼ ꓔꓯ ꓬꓲ ꓖ ꓙꓳ ꓙꓳ ꓫꓬꓹ ꓜꓶ ꓡꓯ ꓐꓰ ꓚꓱꓹ ꓧꓳꓽ ꓟꓳꓸ ꓥ ꓟꓲ ꓐ-ꓟ ꓟꓯꓼ ꓜꓲꓽ ꓐꓴ ꓠ ꓠꓹ ꓟꓽ ꓫꓳ= ꓬꓲꓸ ꓪ ꓠꓬ ꓗꓳꓸ ꓗꓷ ꓟ 200 ꓘꓳꓼ ꓟꓽ ꓞꓲ ꓗꓪ ꓟ ꓬꓲꓸ ꓪ ꓒꓵꓽ ꓒ ꓟꓵꓽ ꓕꓯ ꓢꓲ ꓪꓴꓽ ꓟ ꓟꓵꓽ꓾ ꓬꓲꓸ ꓪ ꓪ ꓔꓲꓸ ꓐꓴ ꓡꓯꓼ ꓛꓲ ꓗꓷ ꓟ ꓟꓵꓽ ꓕꓯ ꓢꓲ ꓪꓴꓽ ꓟ ꓗꓴꓷꓼ ꓔꓯ ꓞꓳ ꓪꓳꓼ ꓕꓲ ꓪꓳꓼ꓾ ꓟꓵꓽ ꓕꓲ ꓟꓵꓽ ꓡꓰ ꓒꓬꓱꓼ ꓡ ꓗꓪ ꓛꓲ ꓫꓬꓹ ꓜꓶ ꓠꓲꓹ ꓫꓵ ꓟ ꓔꓶ ꓙꓱꓼ ꓙꓳ ꓡꓰ ꓐꓶ= ꓖꓳ ꓟ ꓑꓶꓸ ꓓꓴ ꓠꓱꓸ ꓐꓯꓼ ꓫꓵꓽ ꓐꓴ ꓔꓯ ꓠꓬ ꓬꓲꓸ ꓪ ꓔꓯ ꓔꓺ ꓔꓬ ꓟ ꓡꓰ ꓟꓽ ꓥ ꓠꓬ꓾ ꓮ ꓙꓵꓽ ꓢꓴ ꓔꓯ ꓛꓴꓽ ꓙꓳ ꓢꓴ꓾ ꓗꓴꓷꓼ ꓔꓯ ꓒꓬꓹ ꓡꓰ ꓐꓰ ꓢꓪꓼ ꓢꓲꓸ ꓢꓰꓼ ꓔꓬ ꓟ ꓠꓬꓲꓸ ꓠꓬꓲ ꓗꓪ ꓛꓲ ꓥ ꓡꓳ= ꓗꓴꓷꓼ ꓧꓳꓽ ꓢꓴ ꓐꓴ ꓔꓱꓹ ꓜꓳ ꓟ ꓔꓯ ꓟꓽ ꓬꓰ꓾ ꓦꓯꓸ ꓠꓲꓹ ꓙꓲꓽ ꓔꓴ ꓡ ꓠꓬ ꓡ ꓞꓳ ꓮ ꓟꓬꓹ ꓔꓬ ꓫꓸ ꓙꓳ ꓫꓸ ꓡꓰ ꓟ ꓠꓬ ꓟꓬ-ꓟ ꓗꓴꓷꓼ ꓚ ꓟꓲꓽ ꓗꓪ ꓐꓰ ꓢꓳ ꓟꓶ ꓓ ꓡꓳ= ꓚꓵ ꓚꓵ ꓟꓬ-ꓟ ꓗꓴꓷꓼ ꓠꓬ ꓞꓳ ꓫꓵꓽ ꓓꓽ ꓟ ꓬꓲ ꓚꓰ 8 ꓫꓵꓽ ꓗꓪ ꓐꓰ ꓕꓲ ꓠꓲꓹ ꓕꓲ ꓪ ꓜꓲꓼ ꓡꓯ ꓘꓳ ꓢꓲꓸ ꓒꓬꓱꓼ ꓡ ꓟ ꓗꓴꓷꓼ ꓡꓰ ꓐꓰ ꓫꓬꓹ ꓜꓶ ꓪ ꓡꓰ ꓠꓬ ꓪꓴꓽ ꓡ ꓓ ꓟ ꓥ ꓡꓳ= ꓖꓳ ꓡꓱ ꓟꓽ ꓥ ꓢꓲ꓾ ꓞꓳ ꓫꓵꓽ ꓕꓲ ꓫꓵ ꓔꓯ ꓓꓽ ꓪꓴꓸ ꓗꓶ ꓔ꓾ ꓦ ꓡꓱ ꓚꓱꓹ ꓕꓲ ꓫꓵꓽ ꓔꓯ ꓓꓽ ꓪꓴꓸ ꓢꓪꓼ ꓗꓷ ꓠꓬ ꓠꓱꓸ ꓐꓯꓼ ꓢꓴ ꓠꓲꓹ ꓘꓪ ꓟꓽ ꓫꓵ ꓟ ꓙꓳ ꓡ ꓢꓲ꓾ ꓗꓴꓷꓼ ꓢꓲ ꓡꓲꓹ ꓓꓴ ꓟꓽ ꓙꓳ=
ꓮ ꓟꓶ ꓟꓬ-ꓟ ꓗꓴꓷꓼ ꓐꓱ ꓶ ꓓꓰ-ꓟꓳ-ꓗꓯ-ꓢꓰ ꓥ ꓟꓲ ꓬꓳꓹ ꓚꓲ ꓡꓳ= ꓑ ꓫꓬ ꓡꓰ ꓢꓲ ꓔꓸ ꓟ ꓙꓵꓽ ꓢꓴ ꓗꓪꓼ ꓢꓴ ꓐꓰ ꓙꓵꓼ ꓚꓱꓹ ꓗꓪꓼ ꓚꓱꓹ ꓓꓳ ꓡ ꓠꓹ ꓟ ꓥ ꓡꓳ= ꓗꓴꓷꓼ ꓡ ꓞꓳ ꓕꓲ ꓣꓳ ꓡꓲ ꓕꓲ ꓣꓳ ꓠꓬ ꓞꓳꓹ ꓔꓸ ꓠꓬꓲꓸ ꓤꓲ ꓔꓸ ꓟ ꓟꓽ ꓙꓳ ꓙꓳ꓾ ꓡ ꓞꓳ ꓕꓲ ꓣꓳ ꓪ ꓙꓲ ꓙꓳˍ ꓟ ꓮ ꓙꓵꓽ ꓪ ꓠꓹ ꓟ ꓥꓳ= ꓕꓱ ꓡꓱ ꓬꓰ ꓠꓬ ꓗꓴꓷꓼ ꓡ ꓞꓳ ꓐꓴ ꓮ ꓙꓵꓽ ꓗꓹ ꓛꓲ ꓓꓴ ꓙꓳ ꓥꓳ= ꓕꓱ ꓟ ꓠꓬ ꓲꓠꓓꓲꓦꓲꓓꓴꓮꓡ ꓣꓲꓖꓧꓔꓢ ꓐꓯ ꓓ ꓥꓳ=
ꓝꓮꓲ ꓝꓯ-ꓓ-ꓬꓯ ꓥ ꓟꓲ ꓬꓳꓹ ꓚꓲ ꓡꓳ= ꓮ ꓡꓲꓳ ꓐꓯ ꓠꓬ ꓞꓳ ꓫꓵꓽ ꓔꓯ ꓖꓼ ꓢꓲ꓾ ꓬꓲ ꓪ ꓚꓲ ꓛꓬ ꓔꓱꓹ ꓚꓲ ꓛꓬ ꓙꓵꓽ ꓠꓹ ꓟ ꓙꓵꓽ ꓪ ꓐꓱ ꓶ ꓥ ꓡꓳ= ꓮ ꓙꓵꓽ ꓠꓬ ꓞꓳ ꓫꓵꓽ ꓓꓽ ꓟ 8 ꓫꓵꓽ ꓥ ꓠꓬꓲ꓾ ꓬꓲꓸ ꓪ ꓟꓵꓽ ꓬꓲꓸ ꓪ ꓔꓬ ꓖꓴ ꓗꓪ ꓬꓲꓸ ꓪ ꓚꓲ ꓛꓬ ꓙꓲ ꓖꓴ ꓙꓳ ꓟ ꓙꓵꓽ ꓗ ꓐꓰ꓾ ꓙꓵꓽ ꓢꓴ꓾ ꓐꓯ ꓟꓴ ꓘꓶꓽ ꓢꓴ ꓙꓳ ꓝꓲ ꓠꓹ ꓟ ꓥ ꓡꓳ= ꓕꓱ ꓡꓱ ꓒꓬꓱꓼ ꓡ ꓠꓹ ꓟ ꓐꓱ ꓶ ꓠꓬ꓾ ꓐ-ꓟ ꓞꓳ ꓫꓵꓽ ꓥ ꓟꓲ ꓬꓲꓸ ꓪ ꓬꓲꓸ ꓚꓰꓺ ꓔ ꓟꓵꓽ ꓕꓲ ꓫꓴ ꓔꓯ ꓬꓲꓸ ꓟꓬꓱ ꓟꓬꓱ ꓠꓯ ꓟ ꓥꓳ= ꓖꓳ ꓡꓱ ꓥ ꓟꓲ ꓗꓴꓷꓼ ꓚꓰꓺ ꓙꓵꓽ ꓚꓱꓹ ꓗꓪ ꓐꓰ ꓧꓶꓸ ꓡꓰ ꓖꓳꓼ ꓡꓰ ꓝꓲ ꓟꓽ ꓓ= ꓕꓱ ꓟ ꓠꓬ ꓚꓳꓡꓡꓰꓚꓔꓲꓦꓰ ꓣꓲꓖꓧꓔꓢ ꓐꓯ ꓠ ꓗ ꓥꓳ= ꓖꓳ ꓕꓯ ꓕꓲ ꓫꓵꓽ ꓕꓲ ꓟꓵꓽ ꓔꓯ ꓢꓲ ꓡꓲꓹ ꓐꓰ ꓗꓷ ꓡꓰ ꓝꓲ ꓐ ꓡ꓾ ꓠꓲꓹ ꓘꓪ ꓫꓵ ꓡꓰ ꓝꓲ ꓐ ꓡ ꓡꓳ=
Individual Rights Vs Collective Rights ꓕꓲ ꓣꓳ/ ꓕꓲ ꓜꓴ ꓐꓱ ꓶ ꓪ ꓙꓲꓽ ꓙꓳ ꓟ ꓶꓽ
ꓕꓱ ꓠꓬꓲꓽ ꓩꓴꓸ ꓟ ꓠꓬ ꓮ ꓡꓲ ꓕꓲ ꓩꓴꓸ ꓟ ꓥ ꓟꓲ 100% ꓐꓲ ꓜꓲꓼ ꓡꓳ ꓐꓰ ꓐꓯ ꓟꓽ ꓙꓲ= ꓖꓳ ꓟ ꓑꓶꓸ ꓓꓴ ꓠꓬꓲꓽ ꓟ ꓡꓱꓸ ꓙꓳ ꓝꓲ ꓢꓲ꓾ ꓪ ꓙꓲꓽ ꓙꓳ ꓟ ꓙꓵꓽ ꓪ ꓔꓯ ꓞꓳ ꓣꓳ ꓗꓪ ꓐꓰ ꓥ ꓟꓲ꓾ ꓬꓲꓸ ꓜꓴ ꓗꓪ ꓐꓰ ꓥ ꓟꓲ ꓪ ꓠꓹ ꓟ ꓙꓽ ꓖꓶ ꓟ ꓥ ꓡꓳ= ꓮ ꓡꓲ ꓕꓲ ꓫꓵꓽ ꓔꓯ ꓟꓲ ꓕꓯ ꓢꓯꓼ ꓖꓶ ꓠꓯ ꓟ ꓔꓯ ꓟꓳꓸ ꓠꓬ ꓠꓬꓲꓸ ꓠꓬꓲ ꓟ ꓧꓳꓽ ꓢꓴ ꓟꓴ ꓢꓴ ꓐꓴ ꓥ ꓟꓲ ꓓꓵꓽ ꓙ ꓫꓵꓽ ꓠꓬꓲ ꓔꓬ ꓟ ꓙꓵꓹ ꓥ ꓡꓳ= ꓮꓳ-ꓢꓸ-ꓢꓴ-ꓚꓲꓽ ꓡꓰ Democracy Federal ꓐꓯ ꓕꓯ Individual Rights first, then Collective Rights ꓐꓯ ꓠꓲꓹ ꓫꓵ ꓟ ꓥ ꓡꓳ ꓐꓰ ꓥꓪ ꓢꓪꓼ ꓔꓬ ꓡꓳ= ꓝꓮꓲ ꓔꓳꓹ ꓒꓽ ꓜꓴ ꓗꓪ ꓐꓰ Federal Democracy ꓐꓯ ꓕꓯ Collective Rights first, then Individual Rights ꓐꓯ ꓠꓲꓹ ꓫꓵ ꓟ ꓥ ꓡꓳ ꓐꓰ ꓢꓪꓼ ꓓꓳ ꓡ ꓡꓳ= ꓮ ꓡꓲ ꓕꓲ ꓟ ꓧꓶꓸ ꓕꓯ ꓢꓯꓼ ꓕꓵꓼ ꓥ ꓟꓲ꓾ ꓠꓬꓲꓽ ꓟ ꓡꓱꓸꓼ ꓕꓯ ꓢꓲ ꓟꓬ-ꓟ ꓗꓴꓷꓼ ꓠꓬ ꓩꓴ ꓗꓷ ꓟꓶ ꓟ ꓐꓰ꓾ ꓢꓲ ꓡꓲꓹ ꓟ ꓗꓴꓷꓼ ꓒꓬꓱꓼ ꓡ ꓓ ꓥꓳ ꓐꓯ ꓟ ꓗꓪ ꓫꓸ ꓪ ꓚꓱꓹ ꓜꓳꓺ ꓡꓰꓳ= ꓕꓲ ꓣꓳ ꓡꓲ ꓕꓲ ꓣꓳ ꓩꓴ ꓗꓷ ꓟꓶ ꓟ ꓙꓵꓽ ꓪ ꓣꓱꓽ ꓬꓯꓼ ꓟ ꓡꓰ ꓐꓰ꓾ ꓞꓳ ꓫꓵꓽ ꓕꓲ ꓫꓵ ꓡꓲ ꓕꓲ ꓫꓵ ꓥ ꓟꓲ ꓩꓴ ꓗꓷ ꓟꓶ ꓟ ꓙꓵꓽ ꓪ ꓔꓯ ꓬꓲꓸ ꓜꓴ ꓡꓳ ꓚ ꓚ ꓟꓶ ꓙꓲꓽ ꓙꓳ ꓡꓳ=
