ꓡꓲ-ꓐꓶ-ꓬꓯ ꓐꓰ꓾ ꓗꓳ-ꓢ-ꓪꓯ-ꓔꓲ (Liberals Vs Conservatives)
ꓙꓵꓽ ꓚꓱꓹ ꓮ ꓡꓲ ꓕꓲ ꓫꓵꓽ ꓗꓪ ꓥ ꓟꓲ ꓕꓱ ꓡꓱ ꓠꓬꓲꓽ ꓩꓴꓸ ꓓꓳ ꓡ ꓚꓰꓼ ꓡꓳ= ꓬꓲꓸ ꓪꓴꓸ ꓕꓲ ꓩꓴꓸ ꓠꓬ ꓙꓳ ꓔꓬ ꓟ ꓔꓯ ꓡꓶꓸ ꓑ ꓙꓰ ꓝꓲ ꓠꓲꓹ ꓫꓵꓽ ꓢꓴ꓾ ꓚꓱꓹ ꓬꓲꓸ ꓫꓵꓼ ꓔꓯ ꓟꓶꓼ ꓢꓲꓼ ꓢꓴ ꓥ ꓡꓳ= ꓕꓱ ꓕꓲ ꓜꓴ ꓠꓬ ꓬꓰ ꓚꓽ ꓡꓰ ꓟ ꓮ ꓡꓲꓳ ꓫꓵꓽ ꓔꓯ ꓥ ꓟꓲ ꓡꓶꓸ ꓑ ꓩꓴ ꓗꓷ ꓠꓹ ꓟ ꓠꓬꓲꓽ ꓧꓪꓸ ꓟꓽ ꓓꓵꓽ ꓙ= ꓙꓲ ꓡꓳ ꓐꓰ ꓢꓪꓼ ꓪ ꓠꓬ ꓡꓶꓸ ꓑ ꓠꓲꓹ ꓫꓵ ꓡꓳ= ꓑꓶꓸ ꓠꓲꓹ ꓙꓳ ꓡꓳ= ꓡꓲꓹ ꓗꓷ ꓟ ꓠꓲꓹ ꓟ ꓙꓳ ꓡꓳ= ꓞꓳꓹ ꓔꓸ ꓟ ꓠꓲꓹ ꓟ ꓟꓽ ꓙꓳ= ꓧꓶꓸ ꓕꓯ ꓟꓽ ꓙꓳ ꓠꓬꓲ ꓟ ꓕꓲ ꓫꓵꓽ ꓫꓵ꓾ ꓧꓶꓸ ꓕꓯ ꓟꓽ ꓬꓰ ꓠꓬꓲ ꓟ ꓕꓲ ꓫꓵ ꓫꓵ ꓔꓯ ꓬꓰ ꓤꓹ ꓠꓬꓲ ꓠꓲꓹ ꓫꓵ ꓢꓴ ꓐꓴ ꓥ ꓡꓳ= ꓙꓵꓽ ꓗ ꓔꓯ ꓡꓶꓸ ꓠꓲꓹ ꓫꓵ ꓢꓴ ꓥ ꓡꓳ= ꓕꓱ ꓕꓲ ꓜꓴ ꓔꓯ ꓠꓬ ꓧꓪ ꓒꓴ ꓥꓳꓽ ꓗꓪ ꓐꓰ ꓡꓲ-ꓐꓶ-ꓬꓯ Liberals ꓐꓯ ꓡꓳ= ꓬꓲꓸ ꓪ ꓠꓬ ꓬꓲꓸ ꓔꓱꓹ ꓬꓲꓸ ꓓꓵꓽ ꓙ ꓚꓱꓹ ꓬꓲꓸ ꓫꓵꓼ ꓕꓲ ꓟ ꓚꓰꓼ ꓓꓳ ꓩꓴ ꓡ ꓟ ꓟꓽ ꓙꓳ= ꓕꓱ ꓕꓲ ꓜꓴ ꓠꓬ ꓚꓲ ꓛꓬ ꓔꓯ ꓟꓽ ꓪꓽ ꓟ ꓓꓵꓽ ꓙ ꓚꓱꓹ ꓬꓲꓸ ꓫꓵꓼ ꓔꓯ ꓥ ꓟꓲ ꓤꓹ ꓠꓬꓲ ꓠꓲꓹ ꓫꓵ ꓢꓴ꓾ ꓜꓲꓽ ꓘꓴ ꓟ Tolerence ꓙꓳ ꓢꓴ ꓥ ꓡꓳ= ꓚ ꓟꓲꓽ ꓔꓯ ꓖꓼ ꓠꓬꓲ ꓠꓬ꓾ 17 ꓦ ꓜꓴ ꓘꓳꓼ ꓗꓪ Europe ꓟꓵꓽ ꓗꓪ ꓓꓵꓽ ꓙ ꓚꓱꓹ ꓟꓬ ꓢꓶꓽ ꓒꓴ ꓡ ꓟ ꓦꓬꓼ ꓠꓬꓲ ꓗꓪ ꓐꓰ ꓪꓴꓸ ꓔꓴ ꓡꓳ= ꓬꓰ ꓫꓱꓹ ꓚꓽ ꓡꓰ ꓟ ꓦ ꓡꓱ ꓚꓱꓹ ꓐꓰ ꓡꓲ ꓒꓲꓼ ꓔꓯ ꓠꓺ ꓠꓬꓲ ꓘꓶꓽ ꓮ ꓟꓬꓹ ꓙꓳ ꓡ ꓢꓲ꓾ ꓠꓱꓸ ꓐꓯꓼ ꓬꓲꓸ ꓫꓵꓼ ꓥ ꓟꓲ ꓮ ꓟꓬꓹ ꓬꓰ ꓙꓲ ꓥ ꓐꓰ ꓓꓵꓽ ꓙ ꓩꓴ ꓡ ꓟ ꓗꓪ ꓐꓰ ꓪꓴꓸ ꓔꓴ ꓡ ꓟ ꓥ ꓡꓳ= 1781 ꓘꓳꓼ ꓗꓪ ꓗꓮꓼ ꓡꓰ ꓐꓳ ꓓꓳ ꓩꓴ ꓡ ꓟ Critique of Pure Reason ꓠꓬ ꓦ ꓡꓱ ꓚꓱꓹ ꓗꓪ ꓐꓰ ꓡ ꓟ ꓡꓲ ꓒꓲꓼ ꓐꓰ ꓓꓵꓽ ꓙ ꓚꓱꓹ ꓔꓯ ꓡꓯꓽ ꓔꓯꓽ ꓘꓶꓽ ꓕꓱ ꓩꓴ ꓡ ꓡꓳ=
ꓝꓮꓲ ꓕꓲ ꓜꓴ ꓠꓬ ꓬꓰ ꓫꓱꓹ ꓬꓰ ꓡꓲꓽ ꓚꓽ ꓡꓰ ꓟ ꓔꓯ ꓡꓳ ꓗꓷ ꓠꓲꓹ ꓟꓽ ꓫꓵ ꓢꓴ ꓕꓲ ꓜꓴ ꓥ ꓡꓳ= ꓬꓲꓸ ꓫꓵꓼ ꓕꓲ ꓫꓵꓽ ꓓꓵ ꓙ ꓓꓳ ꓡ ꓠꓬ ꓠꓲꓹ ꓞ ꓘꓳ ꓣꓴ ꓟꓽ ꓐ ꓡ= ꓡꓲ ꓒꓲꓼ ꓡꓳ ꓚ ꓛꓳ ꓢꓲ ꓢꓲ ꓡꓲꓹ ꓟ ꓧꓪ ꓢꓴ ꓥ ꓡꓳ= ꓧꓶꓸ ꓕꓯ ꓟꓽ ꓬꓰ ꓠꓬꓲ ꓟ꓾ ꓧꓶꓸ ꓕꓯ ꓟꓽ ꓙꓳ ꓠꓬꓲ ꓟ ꓕꓲ ꓫꓵ ꓫꓵ ꓔꓯ ꓤꓹ ꓠꓬꓲ ꓠꓲꓹ ꓟꓽ ꓫꓵ= ꓕꓱ ꓕꓲ ꓜꓴ ꓔꓯ ꓠꓬ ꓡꓲ ꓒꓲꓼ ꓡꓲ ꓐꓰꓽ ꓛꓳ ꓢꓴ ꓐꓯ ꓓ ꓡꓳ= ꓧꓪ ꓒꓴ ꓥꓳꓽ ꓗꓪ ꓬꓲꓸ ꓪ ꓔꓯ ꓗꓳ-ꓢ-ꓪꓯ-ꓔꓲ Conservatives ꓐꓯ ꓡꓳ= ꓖꓳ ꓡꓱ ꓥ ꓟꓲ ꓬꓰ ꓫꓱꓹ ꓚꓽ ꓡꓰ ꓟ ꓡꓲ ꓒꓰꓼ tradition ꓔꓯ ꓒꓵꓽ ꓟ ꓐꓰ꓾ ꓧꓹ ꓟꓼ ꓬꓯꓼ ꓟ ꓥ ꓡꓳ= ꓚ ꓟꓲꓽ ꓬꓲꓸ ꓧꓶꓹ ꓚ ꓐꓯ ꓠꓬ꓾ ꓰ-ꓓꓲ-ꓟꓳ ꓐ-ꓗꓶ (1729-1797) ꓡꓰ Reflection on the Revolution in France ꓕꓳ ꓶ ꓐꓳ ꓩꓴ ꓡ ꓟ ꓗꓪ ꓐꓰ ꓗꓳ-ꓢ-ꓪꓯ-ꓔꓲ ꓓꓵꓽ ꓙ ꓚꓱꓹ ꓔꓯ ꓡ ꓞꓳ ꓮ ꓟꓬꓹ ꓢꓷꓸ ꓡ ꓡꓳ= ꓮ ꓟꓶ Britian ꓐꓰ꓾ USA ꓗꓴꓷꓼ ꓪꓴꓸ ꓔꓴ ꓟ ꓗꓪ ꓗꓳ-ꓢ-ꓪꓯ-ꓔꓲ ꓐꓴ ꓡꓰ ꓪꓴꓸ ꓔꓴ ꓗꓷ ꓟ ꓥ ꓡꓳ= ꓦ ꓡꓱ ꓚꓱꓹ ꓐꓰ꓾ ꓞꓳ ꓙꓳ ꓚꓱꓹ ꓬꓲ ꓡꓲꓽ ꓛꓳ ꓢꓴ ꓥ ꓡꓳ=
ꓬꓲ ꓟꓶꓽ ꓗꓪ ꓓꓵꓽ ꓙ ꓔꓸ ꓓꓴ ꓠꓬ꓾ ꓡꓲ-ꓐꓶ-ꓬꓯ ꓠꓬ ꓟꓳ ꓓꓳ ꓕꓲ ꓦꓲ ꓙꓰ ꓢꓯꓼ (Level) ꓡꓰ ꓐꓰ ꓥ ꓢꓲ꓾ ꓗꓳ-ꓢ-ꓪꓯ-ꓔꓲ ꓠꓬ ꓟꓳ ꓓꓳ ꓕꓲ ꓦꓲ ꓠꓽ ꓢꓯꓼ (Break) ꓡꓰ ꓐꓰ ꓥ ꓡꓳ= ꓕꓲ ꓙꓵꓹ ꓡꓱꓸꓼ ꓙꓰ ꓢꓯꓼ ꓗꓪ ꓐꓰ ꓡꓰ ꓙꓰ ꓔꓬ ꓥ ꓟꓲ ꓙꓲ ꓣꓴ ꓓꓴ ꓙꓳ ꓡ ꓥꓳ= ꓕꓯꓼ ꓡꓰ ꓠ ꓟꓽ ꓔꓸ ꓗꓪ ꓕꓯꓼ ꓡꓰ ꓡ ꓥꓳ= ꓕꓲ ꓙꓵꓹ ꓡꓱꓼ ꓠꓽ ꓢꓯꓼ ꓡꓰ ꓬꓰ ꓔꓬ ꓠꓬ ꓮ ꓗꓪ ꓡꓲꓸ ꓙꓰ ꓛꓲ ꓬꓰ ꓟꓽ ꓐ ꓡ= ꓬꓲꓸ ꓫꓵꓼ ꓕꓲ ꓖ ꓮ ꓡꓲ ꓕꓲ ꓟꓵꓽ ꓗꓪ ꓟꓲ ꓛꓲ ꓬꓰ ꓟꓽ ꓐ ꓡ= ꓖꓳ ꓟ ꓑꓶꓸ ꓓꓴ ꓡꓲ-ꓐꓶ-ꓬꓯ ꓐꓰ꓾ ꓗꓳ-ꓢ-ꓪꓯ-ꓔꓲ ꓠꓬ ꓮ ꓟ ꓟꓬꓽ ꓠꓬꓲ ꓜꓳꓽ ꓡꓳ ꓐꓯ ꓟ ꓟꓽ ꓙꓳ= ꓬꓲꓸ ꓙꓵꓹ ꓬꓲꓸ ꓔꓶꓸ ꓬꓲꓸ ꓖ ꓔꓯ ꓛꓳ ꓢꓲ꓾ ꓕꓲ ꓜꓴ ꓕꓲ ꓧꓪꓹ ꓜꓳꓽ ꓡꓳ= ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓬꓰ ꓟ ꓗꓴꓷꓼ ꓗꓪ ꓥ ꓟꓲ꓾ ꓝꓮꓲ ꓠꓱꓸ ꓐꓯꓼ ꓙꓵꓽ ꓚꓱꓹ ꓙꓳ ꓟ ꓗꓴꓷꓼ ꓗꓪ ꓥ ꓟꓲ ꓕꓱ ꓡꓱꓳ ꓫꓵꓽ ꓠꓬꓲꓽ ꓩꓴꓸ ꓠꓬ ꓮ ꓕꓯ ꓥ ꓟꓲ ꓢꓯꓼ ꓔꓳꓹ ꓡꓯ ꓘꓳ ꓔꓬ ꓡꓳ=
