ꓟꓬ-ꓟ ꓟꓯꓼ ꓗꓳ-ꓢꓰ ꓡꓰ ꓠꓴꓽ ꓢꓯꓼ ꓙꓳ ꓢꓴ ꓔꓲ-ꓜ-ꓪꓰꓼ-ꓚꓳ ꓐꓰ꓾ ꓠꓹ-ꓟꓪꓯꓼ-ꓢꓽ ꓐꓴ ꓠꓬꓲꓽ ꓣꓳ ꓠꓬ ꓟꓬ-ꓟ ꓡꓲꓽ ꓒꓰꓼ ꓡꓲꓽ ꓚꓱꓹ ꓔꓯ ꓟꓽ ꓧꓳꓹ ꓟ ꓖꓳ ꓓꓱ ꓙꓬꓽ ꓡꓯꓽ ꓐꓬꓱꓽ ꓔꓯ ꓳ-ꓡꓮꓲꓹ ꓗꓪ ꓪꓴꓽ ꓔꓬ ꓠꓬꓲ ꓐꓯ ꓟꓴ ꓩꓴ ꓔꓸ ꓡꓳ ꓐꓰ ꓟꓣꓔꓦ ꓗꓪ ꓠꓬꓲꓸ ꓠꓬꓲ 2022 ꓘꓳꓼ 8 ꓦ 5 ꓠꓬꓲ ꓕꓯꓽ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
ꓬꓲꓸ ꓪ ꓠꓬꓲꓽ ꓫꓵꓸ ꓠꓬ Exantria ꓐꓯˍ ꓟ ꓪꓯꓼ-ꓢꓮꓲꓼ ꓗꓪ ꓖꓳ ꓡꓱꓳ ꓫꓵꓽ ꓖꓳ ꓓꓱ ꓙꓬꓽ ꓡꓯꓽ ꓟꓴ ꓐꓬꓱꓽ ꓪꓴꓽ ꓔꓬ ꓡꓳ ꓐꓰ ꓐꓯ ꓡꓳ꓿
ꓬꓲꓸ ꓪ ꓠꓬꓲꓽ ꓫꓵꓸ ꓔꓯ ꓰ-ꓡꓯ-ꓕ-ꓣꓳ-ꓠꓰꓼ ꓙꓵꓽ ꓗ 33 (ꓗꓼ) ꓗꓪ ꓐꓰ ꓐꓯ ꓟꓴ ꓩꓴ ꓔꓸ ꓢꓲ꓾ ꓝꓴꓲꓸ ꓙꓳˍ ꓟ ꓧꓪ ꓡꓳꓸ ꓓꓳ ꓡ ꓠꓬ 5-7 ꓘꓳꓼ ꓗꓪ ꓛꓲ ꓡꓴꓽ ꓙꓰ ꓓˍ ꓟ ꓙꓵꓽ ꓗ ꓥ ꓡꓳ꓿
ꓔꓲ-ꓜ-ꓪꓰꓼ-ꓚꓳ ꓠꓬ 7 ꓦ ꓟ ꓘꓴꓽ ꓗꓪ ꓮ-ꓢ ꓟꓯꓼ (SSPP/SSA) ꓒꓱ ꓗꓪ ꓐꓬꓱꓽ ꓢꓯꓸ ꓓꓱꓽ ꓚꓳ ꓙꓰˍ ꓠꓬꓲ ꓟꓬ-ꓟ ꓟꓯꓼ ꓡꓰ ꓕꓲ ꓧꓪꓹ ꓣꓴ ꓟꓶ ꓚꓲꓸ ꓚ ꓪ ꓡꓰ ꓢꓴ ꓥ ꓡꓳ꓿
ꓠꓹ-ꓟꓪꓯꓼ-ꓢꓽ ꓥ ꓟꓲ ꓗꓳꓸ ꓗꓷ ꓟ 3 ꓦ ꓕꓯꓽ ꓬꓲꓸ ꓑꓮꓢꓢꓑꓳꓣꓔ ꓔꓯ ꓟꓬ-ꓟ ꓟꓯꓼ ꓗꓳ-ꓢꓰ ꓡꓰ ꓫꓺ ꓔꓯꓹ ꓙꓰ ꓠꓬꓲ꓾ ꓐꓶ ꓗꓴꓷꓼ ꓗꓪ ꓓꓳ ꓙꓰ ꓟꓽ ꓙꓲ ꓡꓰ ꓢꓴ ꓕꓲ ꓣꓳ ꓥ ꓡꓳ꓿
ꓟꓬ-ꓟ ꓟꓯꓼ ꓠꓬ ꓦ ꓡꓱ ꓚꓱꓹ꓾ ꓡꓲꓽ ꓒꓱꓼ ꓐꓰ꓾ ꓞꓳ ꓫꓵꓽ ꓔꓯ ꓢꓴ ꓠꓲꓹ ꓠꓵˍ ꓟ ꓢꓷꓸ ꓟꓽ ꓞꓲ ꓮ ꓘꓶꓸ ꓠꓲꓹ ꓠꓵ ꓗꓴꓸ ꓢꓴ ꓥ ꓡꓳ꓾ ꓐꓰ ꓮ ꓕꓯꓽ ꓕꓯꓽ ꓐꓯ ꓟꓳꓸ ꓖꓶꓽ ꓔꓬ ꓟ꓾ ꓝꓮꓲ ꓑ ꓫꓬ ꓔꓯ ꓡꓳꓸ ꓙ ꓗꓽ ꓙ ꓢꓴ ꓥ ꓡꓳ ꓐꓰ ꓮ ꓕꓯ ꓕꓯꓽ ꓢꓷ ꓙ ꓟꓴ ꓙ ꓔꓬ ꓟ ꓜꓴ ꓥ ꓡꓳ꓿
