2020 ꓘꓳꓼ ꓟꓯꓹ ꓢꓲꓻ ꓡꓯ ꓘꓳ ꓑꓮꓲ ꓗꓪ ꓟꓯꓹ ꓬꓲꓸ ꓥꓳꓽ ꓟꓽ ꓜꓯꓼ ꓞꓳꓸ ꓡꓰ ꓟ ꓑ-ꓔꓲ ꓐꓴ ꓠꓬ꓾ Proportional Representation ꓔꓯ ꓟꓳꓸ ꓠꓬꓲꓸ ꓠꓬꓲ 2021 ꓘꓳꓼ 11 ꓦ 5 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓬꓥ-ꓖꓳꓥ ꓗꓪ 3 ꓠꓬꓲ ꓖꓪ ꓙꓱ ꓡꓯ ꓘꓳ ꓓꓴ ꓥꓳ=
“first-past-the-post (ꓢꓲꓻ ꓣꓴ ꓛꓬꓽ ꓮ ꓟꓯꓹ ꓪ ꓢꓴ ꓧꓪꓸ ꓡꓰ ꓟ) ꓚꓱꓹ ꓗꓪ ꓐꓰ Proportional Representation (ꓟꓵꓽ/ ꓞꓳ ꓫꓵꓽ/ ꓬꓲꓸ ꓜꓴ ꓬꓲꓸ ꓛꓲ ꓓꓯ ꓡ ꓝꓲ ꓟ ꓚꓱꓹ) ꓗꓪ ꓡꓶꓸ ꓑ ꓩꓴ ꓠꓹ ꓟ ꓢꓯꓼ ꓕꓵꓼ ꓡ ꓟ ꓠꓬ꓾ ꓟꓯꓼ ꓔꓯ ꓔꓺ ꓢꓴ ꓑ-ꓔꓲ ꓐꓴ ꓗꓴꓷꓼ ꓖꓪ ꓙꓱ ꓜꓲꓼ ꓓꓴ ꓗꓪ ꓓꓯ ꓛꓲ ꓡ ꓥꓳꓽ ꓟ ꓪꓴꓸ ꓠꓷꓸ ꓚꓳ ꓔꓬ ꓟ ꓥ ꓡꓳ= ꓟꓯꓼ ꓠꓬ ꓮ ꓟꓶ 1-2 ꓘꓳꓼ ꓗꓪ ꓗꓴꓷꓼ ꓙꓵꓽ ꓪ ꓡꓲꓸ ꓖꓶ ꓓꓴ ꓟꓽ ꓓꓵ ꓙ= ꓬꓲꓸ ꓪ ꓔꓯ ꓔꓺ ꓢꓴ ꓑ-ꓔꓲ ꓐꓴ ꓗꓪ ꓐꓰ ꓕꓲ ꓝꓸ ꓗꓴꓷꓼ ꓔꓯ ꓙꓵꓽ ꓠꓹ ꓟ ꓢꓯꓼ ꓩꓴ ꓡ ꓟ ꓥꓳ=” ꓐꓰ ꓗꓴꓷꓼ ꓟꓸ ꓟꓲꓽ ꓢꓷ ꓢꓴ ꓕꓲ ꓣꓳ ꓡꓰ ꓐꓯ ꓡꓳ=
ꓟꓯꓼ ꓡꓰ 20 ꓘꓳꓼ ꓐꓳ ꓔꓸ ꓟ 2008 ꓗꓴꓷꓼ ꓙꓵꓽ ꓗ ꓡꓳ ꓚ ꓢꓲꓻ ꓣꓴ ꓑꓮꓲ 3 ꓧꓪꓸ- 2010꓾ 2015꓾ 2020 ꓬꓰ ꓩꓴ ꓡ ꓟ ꓠꓬ first-past-the-post (ꓢꓲꓻ ꓣꓴ ꓛꓬꓽ ꓮ ꓟꓯꓹ ꓪ ꓢꓴ ꓟ ꓧꓪꓸ ꓡꓰ ꓟ) ꓚꓱꓹ ꓥ ꓡꓳ= ꓖꓳ ꓡꓱ ꓥ ꓟꓲ ꓑ ꓫꓬ ꓠꓲꓹ ꓟ ꓔꓯ ꓢꓲꓻ ꓣꓴ ꓑꓮꓲ ꓗꓪ ꓟꓳꓸ ꓖꓶ ꓡ ꓕꓯ꓾ ꓮ ꓕꓯ ꓥ ꓟꓲ꓾ ꓮ ꓡꓲ ꓢꓲꓻ ꓥ ꓟꓲ꓾ ꓟꓯꓼ ꓐꓰ ꓟꓯꓼ ꓔꓯ ꓔ ꓔꓬ ꓟ ꓑ-ꓔꓲ ꓐꓴ ꓠꓬ ꓞꓳꓸ ꓡꓰ ꓡꓳ=
ꓟꓯꓼ ꓡꓰ ꓟꓬ-ꓟ ꓗꓴꓷꓼ ꓙꓵꓽ ꓗ ꓬꓲꓸ ꓚꓰꓺ ꓕꓳ ꓶ (ꓠꓲꓹ ꓛꓵꓼ ꓛꓵꓼ ꓕꓳ ꓶ ꓐꓯ ꓡꓳ) ꓔꓯ 2008 ꓘꓳꓼ ꓕꓯ ꓔꓶ ꓚꓰꓸ ꓗꓷ ꓡꓳ= ꓝꓮꓲ 2010 ꓘꓳꓼ ꓕꓯ ꓢꓲꓻ ꓣꓴ ꓑꓮꓲ ꓬꓰ ꓡꓳ= ꓖꓳ ꓗꓪ ꓠꓬ ꓠꓡꓓ ꓟꓽ ꓔ= ꓖꓳ ꓟ ꓑꓶꓸ ꓓꓴ ꓴꓢꓓꓑ ꓑ-ꓔꓲ ꓧꓪꓸ ꓡꓰ ꓢ꓾ ꓗꓴꓷꓼ ꓙꓵꓽ ꓜꓴ ꓒꓬꓱꓼ ꓡ ꓡꓳ= 2012 ꓘꓳꓼ ꓬꓲꓸ ꓔꓱꓹ ꓫꓵꓺ ꓢꓲꓻ ꓣꓴ ꓑꓮꓲ ꓗꓪ ꓠꓡꓓ ꓔꓺ ꓡ ꓕꓯ ꓧꓪꓸ ꓡꓰꓳ= 2015 ꓘꓳꓼ ꓢꓲꓻ ꓣꓴ ꓑꓮꓲ ꓗꓪ ꓠꓬ 86% ꓧꓪꓸ ꓡꓰ ꓢꓲ꓾ ꓠꓡꓓ ꓠꓬ ꓗꓴꓷꓼ ꓙꓵꓽ ꓜꓴ ꓒꓬꓱꓼ ꓡ ꓡꓳ= 2020 ꓗꓪ ꓥ ꓟꓲ ꓧꓪꓸ ꓡꓰ ꓡꓳ= ꓖꓳ ꓡꓱ ꓥ ꓟꓲ 2021 ꓘꓳꓼ 2 ꓦ 1 ꓠꓬꓲ ꓕꓯꓽ ꓗꓴꓷꓼ ꓪ ꓔꓲꓸ ꓪꓰꓹ-ꓟꓲꓼ ꓕꓵꓼ ꓪ ꓟꓽ ꓙꓳ ꓙꓳ꓾ ꓟꓯꓼ ꓡꓰ ꓗꓴꓷꓼ ꓙꓵꓽ ꓪ ꓦꓴ ꓙꓰ ꓟ ꓥꓳ=
