2021 ꓘꓳꓼ 12 ꓦ 19 ꓠꓬꓲ ꓕꓯꓽ ꓒ-ꓗ ꓟꓵꓽ꓾ ꓢꓰꓼ-ꓟꓴ ꓘꓹ ꓒꓱ꓾ ꓒꓸ-ꓑꓲ ꓘꓹ ꓒ ꓕꓲ ꓗꓪ ꓮ ꓙꓬ ꓟꓽ ꓞꓲꓽ ꓪꓰꓸ ꓚꓴꓸ ꓢꓴ ꓐꓴ ꓚꓴꓸ ꓟꓶ ꓔꓸ ꓟ ꓪꓰꓸ ꓕꓲ ꓢꓶꓽ ꓔꓯ ꓗꓲꓮ ꓟꓯꓼ 2 ꓣꓳ ꓡꓰ ꓡꓽ ꓛꓴꓸ ꓟꓳꓸ ꓢꓲꓸ ꓜꓲ ꓜꓲ ꓑꓰꓹ ꓑꓰꓹ ꓦꓴ ꓡ ꓠꓬꓲ꓾ ꓖꓳ ꓗꓪ ꓪꓰꓸ ꓚꓴꓸ ꓢꓴ ꓐꓴ ꓜꓲꓽ ꓟꓽ ꓘꓴ ꓢꓲꓸ ꓗꓲꓮ ꓟꓯꓼ 2 ꓣꓳ ꓔꓯ ꓗꓽ ꓚꓳꓸ ꓗꓷ ꓠꓬ 1 ꓣꓳ ꓔꓶꓹ ꓡꓲꓹ ꓬꓰ ꓢꓲꓸ 1 ꓣꓳ ꓣꓴ ꓟꓶ ꓡꓰ꓾ ꓗꓲꓮ ꓒꓽ ꓟꓳ ꓓꓳ 2 ꓦꓲ ꓔꓯ ꓮ ꓔꓳꓸ ꓛꓴ ꓗꓷꓳ ꓐꓯ ꓡꓳ꓿
ꓮ ꓔꓳꓸ ꓛꓴ ꓟꓶ ꓡꓰ ꓟ ꓠꓬ ꓗꓲꓮ ꓟꓯꓼ ꓒꓽ ꓐꓴ ꓜꓶꓽ ꓡ ꓟ ꓟꓲꓢꓴꓐꓲꓢꓧꓲ ꓕꓲ ꓢꓶꓽ ꓐꓰ꓾ ꓑꓮꓙꓰꓣꓳ 1 ꓢꓶꓽ ꓥ ꓡꓳ ꓐꓯ ꓡꓳ꓿
ꓣꓴ ꓟꓶ ꓔꓸ ꓟ ꓗꓲꓮ ꓟꓯꓼ ꓔꓯ ꓢꓰꓼ ꓓꓴ ꓥꓳ ꓐꓯ ꓢꓲꓸ ꓪꓰꓸ ꓚꓴꓸ ꓒꓽ ꓐꓴ ꓠꓲꓹ ꓢꓲꓼ ꓔꓬ ꓥ ꓟꓲ ꓗꓽ ꓟꓶ ꓡꓰꓳ ꓐꓯ ꓡꓳ꓿
“ꓢꓴ ꓟꓶ ꓫꓸ ꓟꓶ ꓫꓸ ꓧꓪ ꓪ ꓓꓴ ꓟ ꓔꓯ ꓡ ꓛꓴꓸ ꓟꓳꓸ ꓢꓲꓸ ꓣꓴ ꓜꓽ ꓓꓰꓼ ꓖꓼ ꓬꓰ ꓡ ꓕꓽ ꓠꓽ ꓜꓳꓽ ꓟꓽ ꓘꓴ ꓢꓲꓸ ꓫꓵ ꓘꓵ ꓑꓵꓻ ꓡ ꓡꓻꓳ ꓫꓵꓽ ꓥ ꓠꓯꓸ꓿ ꓡ ꓛꓴꓸ ꓔꓯꓹ ꓢꓴ ꓠꓽ ꓑ ꓫꓬ ꓐꓱ ꓶ ꓙꓲ ꓠ ꓬꓰ ꓢꓴ ꓧꓪ ꓫꓸ ꓥ ꓓꓯ” ꓐꓰ ꓬꓯ-ꓟ-ꓢꓯꓸ ꓪꓰꓸ ꓧꓪ ꓒꓽ 1 ꓣꓳ ꓡꓰ ꓐꓯ ꓡꓳ꓿ ꓫꓵꓽ ꓪꓴ ꓔꓯ ꓡꓲꓽ ꓒꓰꓼ ꓜꓴ ꓗꓪ ꓐꓰ ꓖꓪ ꓙꓱ ꓙ ꓔꓬ ꓡꓳ ꓐꓰ ꓐꓯ ꓡꓳ꓿
ꓮ ꓟꓶ ꓥ ꓟꓲ ꓗꓲꓮ ꓐꓰ ꓟꓬ-ꓟ ꓟꓯꓼ ꓐꓴ ꓡꓰ ꓪꓰꓸ ꓚꓴꓸ ꓜꓴ ꓐꓴ ꓔꓯ ꓬꓲꓸ ꓫꓴꓸ ꓖꓼ ꓢꓲꓸ ꓚꓴꓸ ꓜꓽ ꓔꓬ ꓝꓲ ꓟ ꓠꓬꓹ ꓔꓲ ꓠꓬꓹ ꓡꓵ ꓮ ꓙꓵꓽ ꓢꓷꓸ ꓟ ꓥ ꓡꓳ꓿ 2021 ꓘꓳꓼ ꓟꓯꓼ ꓙꓵꓽ ꓪ ꓣꓴ ꓗꓷ ꓕꓲ ꓠꓬꓲ ꓗꓪ ꓐꓰ ꓙꓼ ꓓꓽ ꓟ ꓗꓪ ꓐꓰ ꓚꓹ ꓠ ꓠ ꓪꓰꓸ ꓚꓴꓸ ꓘꓴꓽ ꓢꓴ ꓐꓯ ꓖꓴ ꓟꓽ ꓓ ꓙꓳ ꓡꓳ꓿
ꓫꓵꓽ ꓪꓴ ꓒꓬꓱꓼ ꓡ ꓟ ꓙ ꓖꓴ ꓔꓯ ꓟꓳꓸ ꓠꓬ ꓗꓲꓮ ꓟꓯꓼ ꓘꓰꓹ ꓢꓴ ꓣꓴ ꓡ ꓟ ꓗꓪ ꓐꓰ ꓪꓴꓸ ꓔꓴ ꓡꓳ ꓐꓯˍ ꓟ ꓐꓰ꓾ ꓫꓵꓽ ꓪꓴ ꓔꓯ ꓟꓳꓸ ꓕꓯꓽ ꓢꓲ ꓗꓪ ꓟ ꓗꓲꓮ ꓗꓪꓽ ꓫꓵꓽ ꓢꓴ ꓐꓴ ꓜꓲ ꓜꓲ ꓟꓴ ꓟꓴ ꓟꓽ ꓢꓷꓸ ꓢꓰꓽ ꓐꓰ 74 ꓟꓰꓓꓲꓮ ꓗꓪ ꓐꓳ ꓔꓸ ꓡꓳ꓿
ꓖꓳ ꓡꓱ ꓥ ꓟꓲ ꓢꓴꓺ ꓡꓯ ꓘꓳ ꓟ ꓗꓪ ꓐꓰ ꓟꓳ ꓓꓳ 2 ꓦꓲ ꓮ ꓔꓳꓸ ꓛꓴ ꓗꓷ ꓟ ꓠꓬ ꓚꓽ ꓡꓰꓳ꓿
ꓬꓲ ꓚꓰ꓾ ꓟꓲꓜꓜꓲꓟꓮ, BBC, 74 media
