ꓴꓢꓮ ꓗꓴꓷꓼ ꓗꓪ ꓙꓼ ꓞꓶ ꓐꓰ ꓶ ꓤ ꓶ ꓟꓲ ꓒꓵꓽ ꓠꓯꓸ ꓡ ꓔꓬ ꓟ ꓑꓶꓸ ꓓꓴ꓾ ꓙꓼ ꓞꓶ ꓬꓲꓸ ꓫꓴꓸ ꓟꓽ ꓖꓼ ꓓꓴˍ ꓐꓰ꓾ ꓧꓶꓽ ꓶ ꓤ ꓶ ꓟꓲ ꓓꓵꓽ ꓡ ꓟ ꓔꓯ ꓬꓲꓸ ꓫꓴꓸ ꓞꓰ ꓢꓲꓸ ꓖꓼ ꓓꓴ ꓴꓢꓮ ꓓꓵꓽ ꓙ ꓔꓬ ꓡꓳ꓾ ꓐꓰ 2022 ꓘꓳꓼ 6 ꓦ 19 ꓠꓬꓲ ꓕꓯꓽ ꓴꓢꓮ ꓗꓴꓷꓼ ꓶ ꓡꓯꓼ ꓚꓱꓹ ꓢꓲꓽ ꓟ ꓓꓽ ꓟ ꓬꓯ-ꓡꓯ (Janet Yellen) ꓡꓰ ꓐꓯ ꓡꓳ꓿
ꓙꓳꓹ-ꓐ-ꓓꓲ ꓧꓳꓽ ꓪꓴꓸ ꓟꓴˍ ꓟ ꓴꓢꓮ ꓗꓴꓷꓼ ꓙꓵꓽ ꓜꓴ ꓠꓬ ꓑ ꓫꓬ ꓐꓴ ꓐꓱ ꓶꓽ ꓶꓻ ꓡꓲꓽ ꓓꓽ ꓟ ꓒꓬꓱꓼ ꓡ ꓔꓬ ꓟ ꓕꓱ ꓟ ꓔꓯ ꓕꓲꓽ ꓚꓱꓹ ꓚꓱꓹ ꓗꓪ ꓐꓰ ꓡꓳꓻ ꓡꓰ ꓝꓲ ꓠꓹ ꓟ ꓢꓯꓼ ꓕꓵꓼ ꓓꓴ ꓥꓳ꓾ ꓐꓯ ꓡꓳ꓿
ꓴꓢꓮ ꓗꓴꓷꓼ ꓗꓪ 5 ꓦ ꓟ ꓘꓴꓽ ꓗꓪ꓾ ꓜꓽ ꓫꓵꓽ ꓜꓽ ꓙꓰ꓾ ꓬꓲꓻ ꓙꓬ ꓡ꓾ ꓮ ꓔꓳꓸ ꓒꓵꓽ꓾ ꓙꓼ ꓞꓶ ꓐꓰ ꓶ ꓤ ꓶ ꓟꓲ ꓒꓵꓽ 8.5% ꓓꓯꓻ ꓡ ꓢꓲ꓾ ꓕꓱ ꓠꓬ ꓗꓳꓸ ꓗꓷ ꓟ 40 ꓘꓳꓼ ꓟ ꓘꓴꓽ ꓗꓪ ꓶ ꓤ ꓶ ꓟꓲ ꓒꓵꓽ ꓟꓴ ꓡꓳꓹ ꓬꓰˍ ꓟ ꓬꓲꓸ ꓙꓶ ꓗꓪ ꓛꓲ ꓬꓰˍ ꓟ ꓥ ꓡꓳ꓿
ꓴꓢꓮ ꓗꓴꓷꓼ ꓙꓵꓽ ꓜꓴ ꓧꓳꓽ ꓢꓴ ꓬꓲꓸ ꓡꓵꓺ ꓓꓳ-ꓠꓯ ꓕ-ꓣꓼ (Donald Trump) ꓡꓰ꓾ ꓙꓳꓹ-ꓐ-ꓓꓲ (Joe Biden) ꓐꓴ ꓕꓲ ꓜꓴ ꓗꓴꓷꓼ ꓙꓵꓽ ꓢꓴ ꓒꓬꓱꓼ ꓡ ꓠꓬ꓾ ꓑ ꓫꓬ ꓐꓴ ꓧꓶꓽ ꓒꓽ ꓫꓸ ꓪ ꓢꓳ ꓠ ꓗ ꓡ ꓥꓳ꓾ ꓐꓰ ꓐꓯ ꓔꓸ ꓟ ꓙꓳˍ ꓡꓳ꓿
“ꓴꓢꓮ ꓠꓬ ꓶ ꓡꓯꓼ ꓚꓱꓹ ꓐꓰ ꓞꓳ ꓙꓳ ꓚꓱꓹ ꓮ ꓒꓳ ꓒꓳ ꓗꓪ recession ꓞꓳꓸ ꓡꓰ ꓚꓱꓹ ꓗꓪ ꓡꓱꓼ ꓙꓰ ꓡ ꓔꓬꓳ꓿” ꓐꓰ Lisu Prince ꓡꓰ Facebook Live ꓗꓪ ꓐꓯ ꓟꓳꓸ ꓖꓶ ꓡˍ ꓡꓳ꓿
ꓧꓶꓽ ꓒꓽ ꓟꓵꓽ ꓗꓪ ꓐꓰ ꓡˍ ꓟ ꓶ ꓤ ꓶ ꓟꓲ ꓔꓯ ꓬꓲꓸ ꓫꓴꓸ ꓖꓼ ꓠꓽ ꓗꓷ (ꓥ ꓠꓬ) ꓧꓶꓸ ꓕꓯꓽ ꓖꓳꓻ ꓔꓬ ꓟ ꓙꓱ ꓘꓪ ꓞꓰꓻ ꓩꓴ ꓡ ꓠꓬ꓾ ꓧꓶꓽ ꓗꓴꓷꓼ ꓠꓬ ꓶ ꓡꓯꓼ ꓚꓱꓹ ꓗꓪ ꓧꓪꓸ ꓡꓰ ꓢꓴ ꓒꓬꓱꓼ ꓡ ꓥꓳ꓾ ꓐꓰ ꓢꓪꓼ ꓢꓴ ꓐꓴ ꓡꓰ ꓢꓪꓼ ꓔꓬ ꓡꓳ꓿
