ꓗ-ꓬꓲ-ꓠꓲ ꓟꓵꓽ꓾ ꓒ-ꓣꓴ-ꓢꓳ ꓡꓳ ꓒꓱ ꓗꓪ 2020 ꓘꓳꓼ 12 ꓦ 24 ꓠꓬꓲ ꓕꓯꓽ ꓟꓬ-ꓟ ꓟꓯꓼ ꓐꓴ ꓡꓰ ꓑ ꓫꓬ 35 ꓣꓳ ꓕꓯꓽ ꓢꓲ ꓮ ꓔꓳꓸ ꓛꓴ ꓢꓰꓼ ꓡ ꓟ ꓔꓯ ꓟꓵꓽ ꓗꓳ ꓓꓵ ꓓꓵ ꓝꓴꓲꓸ ꓬꓰ ꓢꓴ ꓐꓯ ꓟꓴ ꓘꓶꓽ ꓔꓶꓸ (International Criminal Court- ICC) ꓗꓪ ꓗꓳꓹ ꓓꓴ ꓥꓳ ꓐꓰ ꓠꓴꓖ ꓗꓴꓷꓼ ꓙꓵꓽ ꓜꓴ ꓞꓳ ꓤ ꓶꓽ ꓔꓯ ꓟꓳꓸ ꓟꓬꓱꓽ ꓢꓲꓽ ꓒꓽ ꓓꓽ ꓟ ꓳꓸ-ꓮꓳ-ꓟꓲꓳꓹ-ꓟꓰꓹ ꓡꓰꓽ 2022 ꓘꓳꓼ 1 ꓦ 3 ꓠꓬꓲ ꓕꓯꓽ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
“ꓠꓴꓖ ꓠꓬ ꓕꓱ ꓡꓱꓳ ꓫꓵꓽ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓝꓴꓲꓸ ꓪꓽ ꓒꓵꓽ ꓟꓶ ꓡꓰ ꓗꓪ ꓛꓲ ꓟꓵꓽ ꓗꓳ ꓓꓵ ꓓꓵ ꓫꓵꓽ ꓘꓶꓽ ꓔꓶꓸ ꓗꓪ ꓗꓳꓹ ꓓꓴ ꓥꓳ꓿” ꓐꓰ ꓠꓴꓖ ꓐꓰ ꓗꓢꓚꓚ ꓐꓴ ꓔꓺ ꓡꓯ ꓘꓳ ꓢꓲꓸ ꓓꓳꓽ ꓐꓯ ꓑꓶꓺ ꓔꓶꓸ ꓗꓪ ꓟꓬꓱꓽ ꓢꓲꓽ ꓒꓽ ꓓꓽ ꓟ ꓳꓸ-ꓮꓳ-ꓟꓲꓳꓹ-ꓟꓰꓹ ꓡꓰꓽ ꓐꓯˍ ꓡꓳ꓿
ꓞꓳ ꓡꓱ ꓬꓲꓸ ꓡꓲꓽ ꓟꓽ ꓛꓳ ꓞꓳ ꓢꓰꓼ ꓪ ꓢꓰꓼ ꓮ ꓔꓳꓸ ꓛꓴ ꓠꓰ ꓬꓰ ꓓꓴ ꓠꓬ ꓟꓬ-ꓟ ꓟꓯꓼ ꓓꓼ 66 ꓡꓯꓼ ꓛꓲ ꓗꓪ ꓟ ꓟꓯꓼ ꓐꓴ ꓐꓰ꓾ ꓘꓼ-ꓟꓼ-ꓬꓼ 531 ꓟꓯꓼ ꓐꓴ ꓥ ꓡꓳ ꓐꓰ ꓑ ꓫꓬ ꓕꓲ ꓒꓳꓹ ꓗꓰ ꓦꓰꓼ ꓔꓬ ꓟ ꓗ-ꓬꓲ-ꓠꓰ ꓟꓯꓼ ꓑꓡꓳꓚꓰ ꓐꓱ ꓶ ꓫꓸ ꓕꓱ ꓢꓴ ꓗꓳ-ꓐꓳ-ꓐꓳ ꓡꓰ ꓐꓯˍ ꓡꓳ꓿
ꓟꓬ-ꓟ ꓟꓯꓼ ꓐꓴ ꓡꓰ ꓖꓳ ꓗꓪ ꓫꓵꓻ ꓢꓴ ꓐꓴ ꓠꓬ ꓟꓯꓼ ꓔꓯ ꓔꓳꓹ ꓢꓴ ꓑꓓꓝ ꓐꓴ ꓥ ꓡꓳ ꓐꓰ ꓐꓯ ꓔꓸ ꓥ ꓟꓲ ꓕꓱ ꓟ ꓮ ꓔꓳ ꓔꓳ ꓐꓯ ꓔꓬˍ ꓟ ꓔꓯ ꓫꓵꓻ ꓓꓴ ꓕꓲ ꓠꓱ ꓕꓲ ꓤ꓾ ꓫꓵꓽ ꓪꓳꓼ ꓐꓴ ꓡꓰ ꓢꓸ-ꓢꓯ ꓦꓰꓼ ꓔꓬ ꓡꓳ꓿
ꓡꓯꓽ ꓒꓯꓹ ꓡꓯꓽ ꓟꓰꓹ ꓞꓳꓹ ꓔꓸ ꓢꓴ ꓮ ꓟꓬꓹ ꓣꓳ ꓥ ꓟꓲ ꓮ ꓔꓳꓸ ꓛꓴ ꓢꓰꓼ ꓪ ꓡꓰˍ ꓟ ꓬꓲꓸ ꓢ-ꓢꓯ ꓗꓸ ꓚꓵꓺ ꓒ ꓐꓲ ꓟꓳꓸ ꓖꓶ ꓔꓸ ꓡꓳ꓿
ꓮ ꓔꓳꓸ ꓟꓽ ꓛꓴ ꓔꓸ ꓟ ꓞꓳ ꓫꓵꓻ ꓟꓳ 4 ꓟꓳ꓾ ꓮ ꓔꓳꓸ ꓛꓴ ꓔꓸ ꓢꓲ ꓕꓲ ꓐꓶꓽ ꓙꓬ ꓡꓰˍ ꓟ 31 ꓟꓳ꓾ ꓬꓲꓸ ꓟꓳꓻ ꓚꓹ ꓟꓽ ꓙꓲ ꓡꓰˍ ꓟ ꓮ ꓘꓶꓸ ꓧꓪ ꓟꓳˍ ꓡꓳ ꓐꓰ ꓐꓯ ꓔ ꓡꓳ꓿
