ꓟꓲ ꓠꓯ ꓗꓴꓷꓼ ꓜꓴ꓾ ꓡꓳꓸ ꓙ ꓗꓽ ꓙ ꓟꓬꓱꓽ ꓬꓰ ꓜꓴ (Security Council ꓗꓪ) ꓗꓪ ꓙꓻꓽ ꓪ ꓓꓽ ꓟ ꓪ ꓔꓸ ꓢꓴ 5 ꓗꓴꓷꓼ ꓔꓯ ꓙꓵꓽ ꓪ ꓮ ꓔꓲꓸ ꓣꓴ ꓞꓰ ꓠꓹ ꓟ ꓡꓲ-ꓛꓲ-ꓢꓲ-ꓔꓮꓲꓹ (Liechtenstein) ꓗꓴꓷꓼ ꓡꓰ ꓙꓵꓽ ꓗ ꓫꓵꓼ ꓕꓲ ꓟ ꓖꓪ ꓙꓱ ꓪꓴꓸ ꓔꓴ ꓩꓴ ꓡ ꓡꓳ꓿
“ꓢꓯꓼ ꓙꓳˍ ꓟ ꓗꓴꓷꓼ ꓓꓽ ꓟ 5 ꓗꓴꓷꓼ ꓠꓬ꓾ ꓬꓲꓸ ꓪ ꓮ ꓡꓲ ꓜꓳꓽ ꓮ ꓡꓲ ꓬꓰ ꓢꓲꓸ ꓟꓲ ꓠꓯ ꓗꓪ ꓡ ꓞꓳ ꓮ ꓟꓬꓹ ꓫꓸ ꓡꓰ꓾ ꓫꓵꓻ ꓡꓰ ꓝꓲˍ ꓠꓬꓲ꓾ ꓬꓲꓸ ꓪ ꓙꓵꓽ ꓪ ꓔꓯ ꓗꓽ ꓓꓴ ꓙꓳ ꓠ ꓗ ꓡꓳ” ꓐꓯ ꓢꓲꓸ ꓗꓴꓷꓼ 30 ꓡꓯꓼ ꓓꓴ ꓢꓽ ꓢꓲꓸ ꓗꓴꓷꓼ ꓓꓽ ꓟ 5 ꓗꓴꓷꓼ ꓛꓳ ꓚꓱꓹ ꓬꓲ ꓫꓵꓼ ꓔꓶ ꓠꓹ ꓟ ꓡꓲ-ꓛꓲ-ꓢꓲ-ꓔꓮꓲꓹ (Liechtenstein) ꓗꓴꓷꓼ ꓡꓰ ꓕꓳ ꓶ ꓔꓲꓺ ꓩꓴ ꓡ ꓟ ꓥ ꓡꓳ꓿
ꓡꓳꓸ ꓙ ꓗꓽ ꓙ ꓜꓴ [security council] ꓗꓪ ꓗꓴꓷꓼ ꓓꓽ ꓟ 5 ꓗꓴꓷꓼ ꓡꓰ ꓠꓱꓸ ꓐꓯꓼ ꓗꓴꓷꓼ ꓐꓴ ꓠꓲꓹ ꓧꓳꓹ ꓔꓸ ꓟ ꓖꓪ ꓙꓱ ꓘꓶꓽ ꓔꓯ ꓒꓳꓹ ꓐ ꓡ ꓟ ꓙꓵꓽ ꓪ (Veto) ꓙꓳˍ ꓠꓬꓲ ꓖꓳ ꓟ ꓔꓯ ꓮ ꓔꓲꓸ ꓡꓶꓸ ꓗꓷ ꓠꓹ ꓟ꓾ ꓛꓳ ꓚꓱꓹ ꓬꓲꓸ ꓫꓵꓼ ꓔꓶ ꓠꓹ ꓟ ꓢꓯꓼ ꓕꓵꓼ ꓔꓬ ꓟ ꓥ ꓡꓳ꓿
“ꓢꓴ ꓮ ꓟꓬꓹ ꓪꓽ ꓔꓸ ꓟ ꓔꓯ ꓡꓯꓽ ꓟꓰꓹ ꓒꓳꓹ ꓓꓴ (Veto) ꓙꓵꓽ ꓪ ꓣꓱꓽ ꓗꓷˍ ꓠꓬ꓾ ꓖꓳ ꓕꓲ ꓠꓬꓲ ꓗꓪ ꓐꓰ 10 ꓠꓬꓲ ꓘꓴꓽ ꓗꓪ ꓜꓲꓼ ꓓꓴ ꓘꓴ ꓠ ꓔꓸ ꓡꓳ꓿ ꓖꓳ ꓗꓪ ꓖꓪ ꓙꓱ ꓪꓽ ꓔꓸ ꓟ ꓔꓯ ꓮ ꓫꓵꓽ ꓑꓶꓸ ꓓꓴ ꓒꓳꓹ ꓡ ꓟ ꓙ ꓖꓴ ꓔꓯ ꓦꓰꓔꓳ ꓙꓵꓽ ꓪ ꓜꓱꓽ ꓢꓴ ꓗꓴꓷꓼ ꓡꓰ ꓬꓲꓸ ꓑꓶꓸ ꓙꓳ ꓙꓳ ꓒꓶꓻ ꓟꓸ ꓖꓶ ꓛꓲ ꓡꓳ” ꓐꓰ ꓔꓶ ꓔꓳꓼ ꓟ ꓙꓵꓽ ꓗ ꓫꓵꓼ ꓗꓪ ꓐꓳ ꓔ ꓡꓳ꓿
ꓟꓲ ꓠꓯ ꓗꓴꓷꓼ ꓜꓴ꓾ ꓡꓳꓸ ꓙ ꓗꓽ ꓙ ꓜꓴ ꓗꓪ ꓮ ꓕꓯˍ ꓟꓲ ꓐ ꓔꓬ ꓢꓲꓸ ꓾ꓦꓰꓔꓳ ꓙꓵꓽ ꓪ ꓙꓳˍ ꓟ 5 ꓗꓴꓷꓼ ꓠꓬ꓾ ꓧꓶꓽ ꓗꓴꓷꓼ꓾ ꓩꓽ ꓗꓴꓷꓼ꓾ ꓣ-ꓫꓸ ꓗꓴꓷꓼ꓾ ꓴꓗ ꓗꓴꓷꓼ꓾ ꓴꓢꓮ ꓗꓴꓷꓼ (China, France, Russia, the United Kingdom, and the United States) ꓐꓴ ꓥ ꓡꓳ꓿ ꓠꓱꓸ ꓐꓯꓼ ꓗꓴꓷꓼ ꓐꓴ ꓠꓬ ꓚꓳꓻ ꓡꓯ ꓘꓳ ꓢꓲꓸ ꓜꓲꓼ ꓓꓴ ꓖꓳ ꓟ ꓗꓪ ꓔꓺ ꓔꓬ ꓟꓲ ꓖꓳ 5 ꓗꓴꓷꓼ ꓡꓰ ꓐꓰ Veto ꓙꓵꓽ ꓪ ꓟꓽ ꓙꓳ꓿
ꓮ ꓟꓶ ꓗꓪ ꓛꓲ ꓠꓬ꓾ Security Council ꓗꓪ ꓗꓺ ꓘꓶꓽ ꓝꓲꓸ ꓢꓲꓸ ꓮ ꓡꓲ ꓖꓪ ꓙꓱ ꓡꓯ ꓘꓳˍ ꓟ ꓠꓱꓸ ꓐꓯꓼ ꓢꓴ ꓟꓽ ꓢꓷꓸ ꓡ꓿ ꓝꓮꓲ ꓦꓰꓔꓳ ꓙꓵꓽ ꓪ ꓣꓱꓽ ꓢꓲꓸ ꓢꓴ ꓗꓴꓷꓼ ꓮ ꓟꓬꓹ ꓪꓽ ꓔꓸ ꓟ ꓔꓯ ꓗꓴꓷꓼ ꓓꓽ ꓐꓴ ꓠꓲꓹ ꓡꓶꓽ ꓒꓳꓹ ꓡꓶꓸ ꓗꓷ ꓥ ꓟꓲ ꓮ ꓫꓵꓽ ꓒꓶꓻ ꓘꓶꓽ ꓟ ꓖꓶ ꓖꓶꓽ ꓔꓬ ꓟ ꓥ ꓡꓳ꓿
ꓮ ꓟꓶ ꓡꓲ-ꓛꓲ-ꓢꓲ-ꓔꓮꓲꓹ (Liechtenstein) ꓗꓴꓷꓼ ꓡꓰ ꓡꓳꓸ ꓙ ꓗꓽ ꓙ ꓜꓴ (Security Council) ꓗꓪ ꓟ ꓗꓴꓷꓼ ꓓꓽ ꓟ 5 ꓗꓴꓷꓼ ꓛꓳ ꓚꓱꓹ ꓙꓵꓽ ꓗ ꓬꓲꓸ ꓫꓵꓼ ꓔꓯ ꓟꓳꓸ ꓡ ꓠꓹ ꓟ ꓕꓲ ꓫꓵꓽ ꓠꓽ ꓗꓪ ꓐꓰ ꓖꓪ ꓙꓱ ꓙꓰ ꓓꓴ ꓥꓳ ꓐꓯ ꓡꓳ꓿
