2023 ꓘꓳꓼ꓾ 11 ꓦ 29 ꓠꓬꓲ ꓕꓯ ꓗꓣꓚ ꓡꓰ ꓡꓣꓚ ꓔꓯ ꓡꓲ-ꓢꓴ ꓞꓳ ꓫꓵꓽ ꓜꓴ ꓕꓲꓽ ꓟ ꓟꓽ ꓢꓪꓼ꓾ ꓟꓡꓚꓚ ꓔꓯˍ ꓡꓰꓽ ꓢꓪꓼ ꓓꓴ ꓥꓳ꓾ ꓐꓰ ꓢꓷ ꓙ ꓟꓳ ꓙ ꓘꓶꓽ ꓔꓯ ꓟꓳꓸ ꓡꓲ-ꓢꓴ ꓐꓴ ꓕꓱ ꓓꓵꓽ ꓙ ꓓꓳ ꓡ ꓟ ꓫꓸ ꓪ ꓓꓳꓽ ꓔꓯ ꓖꓼ ꓜꓲꓼ ꓔꓸ ꓟ ꓥ ꓡꓳ=
ꓕꓱ ꓗꓪ ꓧꓪ ꓜꓲꓼ ꓔꓸ ꓟ ꓫꓸ ꓪ ꓝꓲꓸ ꓓꓽ ꓟ ꓠꓬ social media Facebook live ꓗꓪ ꓐꓰ ꓥ ꓡꓳ= ꓫꓵꓽ ꓪꓴ ꓕꓱ ꓟ ꓔꓯ ꓮ ꓟꓬꓹ ꓣꓳ ꓗꓪ ꓐꓰ ꓓꓵ ꓙ ꓔꓸ ꓟ ꓫꓸ ꓪ ꓘꓶꓽ Opinion talk ꓥ ꓡꓳ꓿ ꓔꓳꓼ ꓟꓽ ꓥ ꓥ ꓟꓲ ꓬꓲꓸ ꓪ ꓐꓯ ꓠꓲꓹ ꓫꓵ ꓟ ꓐꓯ ꓜꓯꓼ ꓠ ꓥꓳꓽ ꓡꓶꓸ ꓔꓸ ꓟ꓾ ꓢꓲꓻ ꓣꓴ ꓔꓸ ꓟ ꓥ ꓡꓳ꓿
“ꓥꓪ ꓠꓬ ꓖꓪ ꓙꓱ ꓜꓲꓼ ꓓꓴ ꓮ ꓟꓬꓹ ꓗꓪ ꓓꓯꓻ ꓠꓬꓲꓳ= ꓖꓳ ꓗꓪ ꓡꓲ-ꓢꓴ ꓐꓴ ꓟꓽ ꓟꓳꓻ ꓠꓬꓲ= ꓡꓲ-ꓢꓴ ꓠꓬ ꓢꓷꓸ ꓢꓴ ꓙꓳ ꓥ ꓟꓲ ꓠꓖꓳ ꓗꓪ ꓟꓬꓱꓽ ꓬꓰ ꓢꓴ ꓟꓽ ꓙꓳ= ꓮ ꓘꓶꓸ ꓢꓯꓼ ꓐꓽ ꓡꓳ= ꓗꓣꓚ ꓠꓬ 20 ꓘꓳꓼ ꓙꓳ ꓟ ꓜꓴ ꓥ ꓡꓳ= … ꓟꓡꓚꓚ ꓠꓬ ꓗꓣꓚ ꓗꓪ ꓐꓰ ꓪꓴꓸ ꓔꓴ ꓔꓸ ꓟ ꓥ ꓡꓳ” -ꓟꓸ ꓒ ꓙꓳꓢꓰꓑꓧ꓾ ꓟꓶ-ꓡꓯ-ꓫ
ꓡꓲ-ꓢꓴ ꓐꓴ ꓚꓲꓸ ꓛꓬ ꓔꓱꓹ ꓚꓲ ꓛꓬ ꓜꓴ ꓬꓰ ꓟ ꓔꓯ ꓛꓬꓽ ꓟꓵꓽ ꓗꓪ ꓓꓵꓽ ꓙꓰ ꓟ ꓡꓰ ꓐꓰ ꓗꓹ ꓡꓳ ꓐꓰ ꓫꓸ ꓕꓱ ꓢꓲꓸ ꓗꓣꓚ ꓔꓯ ꓪꓽ ꓠꓹ ꓟ ꓢꓯꓼ ꓖꓶ ꓘꓶꓽ ꓕꓱˍ ꓡꓳ= “KRC ꓠꓬ ꓠꓲꓹ ꓟ ꓮ ꓘꓶꓸ ꓙꓲ ꓧꓪꓽ ꓠꓰ ꓥ= ꓕꓱ ꓕꓲ ꓑꓹ ꓟꓯꓼ ꓟ ꓔꓯ ꓗꓳꓹ ꓢꓲꓸ ꓬꓳꓹ ꓦꓲ ꓟ ꓔꓲꓸ ꓩꓴ (သိမ်းပစ် -ꓟꓯꓼ ꓡꓰ ꓣꓴ ꓑꓲꓸ ꓩꓴ ꓟ) ꓓꓰꓼ ꓖꓼ ꓔꓸ ꓥ= ꓗꓣꓚ ꓔꓯ ꓟꓽ ꓪ ꓠꓬ ꓮ ꓘꓶꓸ ꓫꓸ ꓓꓴ ꓙꓳ ꓡ ꓥ= ꓮ ꓟꓶ ꓴꓠ ꓚꓮꓣꓓ ꓪ ꓔꓸ ꓢꓴ ꓥ ꓟꓲ ꓕꓽ ꓖꓶ ꓘꓹ=” -ꓟꓸ ꓒ ꓠꓳꓸ-ꓓ-ꓪꓵ꓾ ꓴꓢꓮ
lbcigc Holy Land Facebook page. (Live video deleted later.)
“ꓢꓴ ꓫꓵꓽ ꓔꓯ ꓗꓺ ꓠꓯ ꓔꓶ ꓡꓯ ꓘꓳ ꓢꓲꓸ ꓬꓳꓥꓹ ꓦꓲ ꓒꓴ ꓔꓸ ꓡꓳ ꓐꓰ ꓕꓽ ꓓꓵꓽ ꓙ= ꓬꓲꓸ ꓪ ꓠꓰ ꓕꓳ ꓶ ꓓꓳ ꓩꓴ ꓡ ꓟ ꓖꓶ ꓮ ꓫꓵꓽ ꓕꓽ ꓐꓯ ꓧꓳꓺ ꓡꓯ ꓘꓳ= ꓣꓳ ꓬꓳꓹ ꓦꓲ ꓙꓳ ꓟ ꓑꓶꓸ ꓓꓴ ꓣꓳ ꓡꓲ-ꓢꓴ ꓐꓴ ꓴꓠ ꓚꓮꓣꓓ ꓠꓲꓹ ꓞ ꓪ ꓠꓹ ꓟ꓾ ꓐꓱ ꓓꓴꓽ ꓗꓪ ꓔꓬ ꓢꓴ ꓔꓯ ꓛꓳꓽ ꓙ ꓟ꓾ ꓠꓻ ꓡ ꓢꓴ ꓔꓯ ꓬꓰ ꓙ ꓐ ꓡ ꓡꓳ= ꓢꓴꓺ ꓡ ꓙꓴꓽ ꓡ ꓓꓴ ꓬꓰ ꓢꓴ ꓖꓶ ꓔꓬ ꓥ= ꓬꓲꓸ ꓪ ꓔꓯ ꓖꓶ ꓝꓴꓲꓸ ꓟꓽ ꓓꓰ= ꓟꓶ-ꓡꓯ-ꓫ ꓗꓪ ꓔꓬ ꓟ ꓬꓲꓼ ꓠꓬꓲ ꓐꓴ ꓣꓳ ꓬꓳꓹ ꓦꓲ ꓔꓯ ꓟꓽ ꓒꓵꓽ ꓟꓽ ꓚ ꓕꓽ ꓗꓷ ꓡꓰ ꓝꓲ= ꓢꓴ ꓫꓵꓽ ꓢꓴ ꓬꓳꓹ ꓦꓲ ꓮ ꓡꓲ ꓡꓲ ꓟꓽ ꓙꓲ ꓬꓰ ꓖꓶ ꓡ ꓡꓳ ꓐꓰ ꓕꓽ ꓐꓯ= ꓮ ꓡꓲ ꓕꓱ ꓠ ꓔꓸ ꓖꓶ ꓣꓳ ꓧꓳꓽ ꓪꓴꓸ ꓟꓴ ꓢꓴ ꓠꓰ ꓫꓸ ꓕꓱ ꓝꓲ= ꓣꓳ ꓠꓬ ꓡꓲ-ꓢꓴ ꓬꓳꓹ ꓦꓲ ꓙꓳ ꓡꓰ ꓟ ꓑꓶꓸ ꓓꓴ ꓠꓖꓳ ꓮ ꓟꓬꓹ ꓗꓪ ꓐꓰ ꓣꓳ ꓔꓯ ꓙ ꓡꓯ ꓘꓳ ꓡ ꓔꓬ ꓪ= ꓠꓲꓹ ꓟ ꓜꓲꓽ ꓢꓲꓸ ꓬꓰ ꓙꓲꓽ ꓙꓳ ꓟ ꓣꓳ ꓢꓯꓼ ꓕꓵꓼ ꓡꓯ=” -ꓟꓸ ꓒ ꓥꓪ-ꓢ-ꓓ꓾ ꓟꓶ-ꓡꓯ-ꓫ
“ꓥꓪ ꓠꓴ ꓟꓶ-ꓡꓯ-ꓫ ꓗꓪ ꓔꓬ ꓟ ꓦꓬꓼ ꓠꓬꓲ ꓗꓪ ꓴꓠꓧꓚꓣ ꓔꓯ ꓔꓺ ꓛꓲ ꓝꓸ ꓢꓲꓸ ꓡꓲ-ꓢꓴ ꓐꓴ ꓐꓱ ꓶ ꓖꓣꓮꓠꓔ 2 ꓟ ꓪ ꓠꓬꓲꓳ꓿ ꓢꓴ ꓫꓵꓽ ꓜꓴ ꓔꓯ ꓖꓶˍ ꓟ ꓕꓯ ꓢꓲ ꓬꓲꓸ ꓐꓶꓹ ꓖꓣꓮꓠꓔ ꓖꓶ ꓡ ꓟ ꓥꓳ꓿ ꓗꓣꓚ ꓟꓽ ꓙꓳ ꓟꓽ ꓓ꓾ ꓟꓽ ꓝꓸ ꓟꓽ ꓓ ꓐꓰ ꓐꓯˍ ꓠꓬ ꓟꓽ ꓜꓳ꓿ ꓣꓳ ꓡꓲ-ꓢꓴ ꓜꓴ ꓙꓳˍ ꓠꓬ ꓡꓲ-ꓢꓴ ꓐꓴ ꓐꓱ ꓶ ꓟꓬꓽ ꓠꓬꓲ ꓟꓬꓱꓽ ꓬꓰ ꓐ ꓡ ꓡꓳ꓿” -ꓮ-ꓓꓶꓸ-ꓙꓬ꓾ ꓴꓢꓮ
“ꓮ ꓙꓵꓽ ꓢꓴ ꓧꓪꓸ ꓧꓪꓸ= ꓣꓳ ꓡꓲ-ꓢꓴ ꓐꓴ ꓴꓠ ꓬꓳꓥꓹ ꓗꓪ ꓡꓲ-ꓢꓴ ꓚꓮꓣꓓ ꓣꓱꓽ ꓠꓬ ꓓꓵꓽ ꓪ ꓟꓽ ꓓ= ꓢꓴ ꓫꓵꓽ ꓚꓮꓣꓓ ꓧꓪ ꓬꓰ ꓓꓴ ꓬꓰ ꓡꓯ ꓐꓰ ꓐꓯ ꓢꓴ ꓙꓳˍ ꓠꓬꓲ ꓴꓠ ꓗꓪ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓔꓯ ꓔꓺ ꓛꓲ ꓠꓺ ꓠꓬꓲ ꓗꓷꓳ= ꓖꓳ ꓕꓯꓽ ꓬꓲꓸ ꓪ ꓡꓰ꓾ ‘ꓴꓠ ꓬꓳꓥꓹ ꓗꓺ ꓘꓶꓽ ꓓꓴꓽ ꓗꓪ꓾ ꓬꓳꓥꓹ ꓦꓲ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓖꓳ ꓡꓱ ꓟꓽ ꓬꓰ ꓝꓲ ꓔꓸ= ꓳꓸ ꓡꓰꓳ ꓫꓵꓽ ꓟꓽ ꓙꓳ= ꓕꓱ ꓡꓱ ꓒꓯꓽ ꓦꓰꓽ ꓟ ꓐꓰ ꓠꓬꓲꓸ ꓜꓲ ꓟ ꓟꓽ ꓙꓳ=’ ꓐꓰ ꓐꓯ ꓡꓽ ꓩꓴ ꓡ ꓡꓳ= ꓚꓵꓺ ꓚꓵ ꓡꓲ-ꓢꓴ ꓐꓴ ꓴꓠ ꓬꓳꓥꓹ ꓗꓪ ꓙꓰ ꓢꓲꓸ ꓬꓲꓸ ꓪ ꓬꓰ ꓙ ꓚꓱꓹ ꓔꓯ ꓓꓰꓽ ꓙꓰ ꓟ ꓗꓪ ꓕꓱ ꓡꓱꓳ ꓫꓵꓽ ꓘꓶ ꓡꓶꓽ ꓓꓴ ꓔꓳꓹ ꓜꓳ ꓡ ꓠꓬ꓾ ꓖꓳ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓟꓬꓱꓺ ꓐꓰ꓾ ꓬꓲꓸ ꓐꓬꓱꓽ ꓓꓱꓽ ꓔꓯꓹ ꓡꓯ= ꓡꓣꓚ ꓗꓪ ꓟꓸ ꓖꓶ ꓡꓯ = ꓕꓯ ꓢꓲ ꓗꓪ ꓕꓲꓽ ꓝꓸ ꓕꓲꓽ ꓝꓸ ꓕꓱ ꓡꓯ ꓘꓳ ꓓꓴ ꓥꓳ ꓐꓰ ꓟꓶ-ꓡꓯ-ꓫ ꓗꓪ ꓔꓬ ꓟ ꓡꓲ-ꓢꓴ ꓐꓴ ꓮ ꓙꓵꓽ ꓢꓴ ꓔꓯ ꓢꓷꓸ ꓡ ꓝꓲ ꓥꓳ=” – ꓡꓣꓚ ꓢꓽ ꓡ ꓙꓵꓽ (ꓒꓶꓻ ꓟꓸ ꓖꓶ ꓔꓸ ꓟ ꓟꓲꓽ ꓦꓲ ꓢꓯꓼ ꓗꓪ ꓐꓰ)
ꓕꓳ ꓶ ꓐꓳ ꓢꓲꓸ ꓒꓳꓹ ꓖꓶ ꓡ ꓟ
“ꓗꓣꓚ ꓠꓰ ꓕꓳ ꓶ ꓓꓳ ꓩꓴ ꓡ ꓟ ꓗꓪ comment ꓗꓪ ꓡꓣꓚ ꓡꓲ-ꓢꓴ ꓞꓳ ꓪꓴꓽ ꓐꓴ ꓮ-ꓒꓴꓸ ꓔꓯ ꓟꓽ ꓪ ꓠꓲꓹ ꓫꓵ ꓠꓰ ꓛꓰꓸ ꓡ ꓞꓳ ꓔꓯ ꓔꓺ ꓙꓰ ꓡꓳ ꓐꓰ꓾ ꓐꓲꓰ ꓐꓯ ꓔꓸ ꓡꓳ= ꓕꓱ ꓟ ꓠꓬ ꓟꓽ ꓚꓽ= ꓸꓸꓸ ꓥꓪ ꓠꓴ ꓪ ꓘꓴ ꓦꓲ 3 ꓟ ꓪꓽ ꓢꓲꓸ ꓬꓰ ꓩꓴ ꓡ ꓟ 1 ꓘꓳꓼ ꓐꓲ ꓡ ꓕꓯ ꓢꓲ ꓮ ꓫꓵꓽ ꓑꓶꓸ ꓓꓴ ꓕꓱ ꓡꓱ ꓕꓳ ꓶ ꓢꓷ ꓙ ꓟꓴ ꓙ ꓩꓴ ꓡ ꓟ ꓠꓬ ꓟꓽ ꓢꓷꓸ= Protection Letter ꓪ ꓠꓹ ꓟ ꓠꓬ ꓬꓲꓸ ꓪ ꓡꓰ ꓣꓳ ꓬꓰˍ ꓟ ꓟꓬꓱꓽ ꓔꓯ ꓛꓽ ꓔꓬ ꓢꓲꓸ ꓬꓲꓸ ꓝꓲꓸ ꓛꓲ ꓕꓯ ꓖꓶ ꓡ ꓓꓴ ꓥꓳ= ꓡꓣꓚ ꓚꓮꓣꓓ ꓔꓯꓹ ꓔꓸ ꓢꓲꓸ ꓴꓠ ꓚꓮꓣꓓ ꓪ ꓡꓰ ꓢꓴ 100 ꓕꓯꓽ ꓢꓲ ꓙꓳ ꓡꓰꓳ꓾ ꓐꓰ ꓡꓣꓚ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓡꓰ ꓐꓯ ꓡꓳ꓿ ꓡꓴ ꓡꓴꓹ ꓐꓯ ꓠꓬ ꓢꓴ ꓟꓵꓽ ꓢꓴ ꓗꓴꓷꓼ ꓗꓪ ꓮ ꓡꓲ ꓟ ꓡꓰꓸ တရား၀င် ꓬꓲꓸ ꓡꓲꓽ ꓙꓳ ꓙꓳ ꓔꓬ ꓟ ꓟꓽ ꓥ= ꓖꓳ ꓡꓱ ꓥ ꓟꓲ ꓴꓠꓧꓚꓣ ꓠꓬ ꓟꓶ-ꓡꓯ-ꓫ ꓗꓴꓷꓼ ꓗꓪ human right ꓑꓶꓸ ꓓꓴ ꓕꓱ ꓡꓱ ꓬꓰ ꓙ ꓔꓬ ꓟ ꓥꓳ= ꓬꓲꓸ ꓪ ꓔꓳꓹ ꓙ ꓥ ꓟꓲ꓾ ꓟꓽ ꓔꓳꓹ ꓙ ꓥ ꓟꓲ ꓣꓳ ꓞꓳ ꓤ ꓐꓱ ꓶ ꓣꓳ ꓴꓠꓧꓚꓣ ꓗꓪ ꓙ ꓡꓯ ꓘꓳ ꓙꓳ ꓥ= ꓢꓴ ꓠꓰ ꓖꓳ ꓡꓱ ꓕꓱ ꓡꓱ ꓐꓯ ꓟ ꓗꓪ ꓮ ꓫꓵꓽ ꓑꓶꓸ ꓓꓴ ꓶꓹ ꓡꓵ ꓡꓰ ꓔꓬ ꓥ= ꓓꓵꓽ ꓙ ꓓꓴ ꓬꓰ ꓡꓯ= ꓥꓪ ꓠꓴ ꓠꓬ ꓕꓱ ꓗꓪ ꓔꓬ ꓟ 13 ꓘꓳꓼ ꓡꓳꓼ ꓡꓻꓳ꓿ ꓥꓪ ꓠꓴ ꓐꓱꓶ ꓙ ꓫꓸ ꓟꓽ ꓛꓲ꓿ ꓖꓳ ꓡꓱ ꓟꓲ ꓡꓣꓚ ꓙꓳ ꓠꓬ ꓬꓲꓸ ꓫꓵꓼ ꓡ ꓢꓴ ꓐꓱ ꓶ ꓙꓲ ꓖꓴ ꓙꓳ ꓡꓳ꓿”-Aung Ko James
“ꓫꓵꓽ ꓪꓴ ꓕꓱ ꓟ ꓓꓳ ꓡ ꓟ ꓠꓬ ꓗꓣꓚ ꓑꓶꓸ ꓓꓴ ꓟꓽ ꓥ= ꓣꓳ ꓡꓲ-ꓢꓴ ꓐꓴ ꓪꓽ ꓡꓯ ꓘꓳ ꓠꓲꓹ ꓟ ꓟꓽ ꓙꓳ ꓟ ꓑꓶꓸ ꓓꓴ ꓥꓳ= ꓣꓳ ꓡꓣꓚ ꓬꓳꓥꓹ ꓒꓬꓱꓼ ꓡ ꓠꓹ ꓟ꓾ ꓣꓳ ꓮ ꓬꓲꓼ ꓠꓬꓲ ꓤ ꓣ-ꓪ ꓐꓴ ꓴꓠ ꓗꓪ ꓐꓰ Protection Letter ꓪ ꓔꓸ ꓟ ꓡꓰ ꓐꓰ ꓪ ꓡ ꓠꓹ ꓟ ꓬꓰ ꓡꓯ ꓐꓯ ꓢꓲꓸ ꓪꓽ ꓔꓸ ꓟ ꓫꓸ ꓪ ꓔꓯ ꓒꓳꓹ ꓢꓴ ꓙꓳˍ ꓟ ꓑꓶꓸ ꓓꓴ ꓥ ꓡꓳ= ꓝꓮꓲ ꓫꓵꓽ ꓐꓱ ꓶ ꓟꓬꓱꓽ ꓬꓰ ꓠꓹ ꓟ ꓠꓬ ꓘꓴ ꓜꓲꓼ ꓞꓳ ꓗꓪ ꓐꓰ ꓬꓰ ꓟꓽ ꓙꓲ= ꓖꓳ ꓟ ꓑꓶꓸ ꓓꓴ ꓗꓣꓚ ꓓꓳ ꓡ ꓟ ꓥ ꓡꓳ= ꓟꓶ-ꓡꓯ-ꓫ ꓗꓪ ꓔꓬ ꓟ ꓡꓲ-ꓢꓴ ꓐꓴꓳ꓾ ꓡꓣꓚ ꓚꓮꓣꓓ ꓐꓰ ꓗꓣꓚ ꓚꓮꓣꓓ ꓕꓲꓽ ꓟˍ ꓡꓰꓽ ꓫꓬꓹ ꓓꓴ ꓬꓰ ꓡꓯ= ꓠꓬꓲꓽ ꓟ ꓕꓽ ꓫꓬꓹ꓿ ꓞꓽ ꓒꓳꓽ ꓠꓬꓲꓽ ꓟ ꓜꓶꓽ ꓟꓽ ꓙꓲ= ꓫꓵꓽ ꓐꓱ ꓶ ꓟꓬꓱꓽ ꓬꓰ ꓓꓴ ꓙꓳ ꓟ ꓔꓯ ꓡꓣꓚ ꓗꓪ ꓐꓰ ꓬꓰ ꓡ ꓓꓴ ꓥꓳ=” -Maw Shae Jay, Malaysia
“ꓟꓶ-ꓡꓯ-ꓫ ꓗꓪ ꓛꓲ ꓡ ꓠꓬ ꓡꓲ-ꓢꓴ ꓞꓳ ꓫꓵꓽ ꓥ ꓠꓬ ꓡꓲ-ꓢꓴ ꓚꓮꓣꓓ ꓫꓬꓹ ꓠ ꓔꓸ ꓥꓳ꓿ ꓧꓶꓸ ꓕꓯ ꓣꓳ ꓫꓵꓽ ꓜꓴ ꓟꓽ ꓙꓳˍ ꓠꓬꓲ ꓢꓴ ꓫꓵꓽ ꓢꓴ ꓪꓳꓼ ꓜꓴ ꓮ ꓡꓲ ꓗꓪˍ ꓟꓲ ꓚꓮꓣꓓ ꓮ ꓡꓲ ꓐ ꓡ ꓖꓳ ꓡꓱ ꓫꓬꓹ ꓣꓱꓽ ꓗꓳꓸ ꓡ ꓟ ꓥ ꓡꓳ꓿ ꓮ ꓟꓶ ꓣꓳ ꓫꓵꓽ ꓜꓴ ꓙꓳ ꓡ ꓕꓯꓽ ꓡꓣꓚ ꓚꓮꓣꓓ ꓣꓱꓽ ꓠ ꓗ ꓡꓳ꓿ … ꓡꓣꓚ ꓬꓳꓥꓹ ꓗꓪ ꓐꓰ ꓥ ꓟꓲ ꓚꓮꓣꓓ ꓫꓬꓹ ꓔꓸ ꓢꓴ ꓐꓴ ꓥꓳ ꓡꓳꓸ ꓔꓬ ꓟ ꓴꓠ ꓚꓮꓣꓓ ꓠꓲꓹ ꓞ ꓪ ꓡ ꓚꓱꓹ ꓔꓯ ꓢꓷꓸ ꓠꓲꓹ ꓐꓰ ꓒꓴ ꓫꓵꓺ ꓣꓱꓽ ꓢꓲꓸ ꓒꓬꓱꓽ ꓟꓽ ꓢꓲꓻ ꓢꓲꓻ ꓢꓯꓼ ꓕꓵꓼ ꓙ ꓝꓲ ꓠꓲꓹ ꓫꓵ ꓡꓳ꓿ ꓣꓳ ꓫꓵꓽ ꓜꓴ ꓗꓪ ꓣꓳ ꓔꓬ ꓟ ꓠꓬ ꓙꓲ ꓡꓳꓹ ꓬꓰ ꓟ ꓥꓳ= ꓣꓳ ꓟꓹ ꓟ ꓔꓯ ꓠꓬꓲꓺ ꓘꓳꓻ ꓙꓻ ꓙꓰ ꓢꓲꓸ ꓮꓳꓼ ꓟ꓾ ꓟ ꓬꓳꓻ ꓔꓯ ꓕꓽ ꓥꓳꓻ ꓡꓳꓸ ꓡꓯ꓿” (ꓡꓳ-ꓟꓲꓽ ꓥꓳꓽ ꓗꓪ ꓐꓰ ꓡꓶꓸ ꓣꓴ ꓔꓸ ꓡꓳ) -Sue Lay, Malaysia
2023 ꓘꓳꓼ 12 ꓦ 1 ꓠꓬꓲ ꓗꓪ ꓠꓬ ꓡꓣꓚ ꓡꓰ ꓗꓣꓚ ꓢꓷ ꓙ ꓟꓴ ꓙ ꓕꓳ ꓶ ꓔꓯ ꓐꓳ ꓡꓽ ꓩꓴ ꓡ ꓡꓳ꓿
ꓬꓲꓸ ꓝꓲꓸ ꓓꓽ ꓟ ꓬꓲꓸ ꓟꓳ ꓡꓱꓽ ꓠꓬ꓾ ꓡꓣꓚ ꓠꓬ ꓡꓲ-ꓢꓴ ꓐꓴ ꓔꓺ ꓔꓬ ꓟ ꓪ ꓘꓴ ꓦꓲ (3) ꓟ ꓗꓪ ꓐꓰ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓡꓰ ꓪꓴꓸ ꓔꓴ ꓔꓸ ꓟ ꓥ ꓡꓳ꓿ ꓝꓮꓲ ꓗꓣꓚ ꓟꓽ ꓖꓪ ꓙꓱ ꓡ ꓐꓯˍ ꓟ ꓠꓬ ꓟꓽ ꓚꓽ꓿ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓔꓯ (3) ꓧꓪꓸ ꓜꓲ ꓡꓯ ꓘꓳ ꓗꓷꓳ꓿ ꓝꓮꓲ ꓛꓰꓸ ꓒꓽ ꓔꓯ ꓪꓽ ꓙꓰˍ ꓡꓳ꓾ ꓐꓯˍ ꓟ ꓥ ꓟꓲ ꓟꓽ ꓚ:꓿ ꓡꓣꓚ ꓠꓬ ꓬꓲꓸ ꓪꓴꓸ ꓔꓶ ꓙꓱꓼ ꓙꓳˍ ꓟ ꓡꓰ ꓐꓰ ꓟꓶ-ꓡꓯ-ꓫ ꓗꓪ ꓛꓲ ꓡ ꓟ ꓡꓲ-ꓢꓴ ꓐꓱ ꓶ ꓙꓳ ꓔꓬ꓾ ꓦꓰꓼ ꓔꓶ ꓔꓬ ꓓꓴ ꓥꓳ꓾ ꓐꓯ ꓔꓸ ꓡꓳ꓿
ꓢꓷꓸ ꓡꓰ ꓓꓴ꓾
“ꓢꓳꓽ ꓠꓬꓲ꓾ ꓟꓰꓹ ꓠꓬꓲ ꓢꓲꓸ ꓓꓵꓽ ꓙ ꓞꓷꓹ ꓠꓹ ꓟ ꓠꓬ ꓡꓔ ꓫꓵꓽ ꓓꓳꓽ ꓵꓺ ꓢꓴ ꓐꓴ ꓟꓬꓱꓽ ꓥ ꓡꓳ= ꓮ ꓟ ꓮ ꓡꓲ ꓐꓯ ꓟˍ ꓐꓰ ꓮ ꓗꓪ ꓮ ꓫꓵꓽ ꓒꓬꓱꓼ ꓔꓬ ꓟ ꓔꓯ ꓐꓳ ꓠꓹ ꓟ ꓠꓬ ꓡꓔ ꓟꓬꓱꓽ ꓐꓬꓱꓽ ꓘꓶꓽ ꓥ ꓡꓳ꓿”
