ꓪꓴꓸ ꓠꓷꓸ ꓠꓬ ꓙ ꓜꓲꓼ ꓫꓸ ꓗꓪ ꓛꓲ ꓬꓲꓸ ꓘꓶꓻ ꓡꓶꓽ ꓗꓹ ꓟ ꓗꓳ-ꓑꓴ-ꓔ ꓙꓼ ꓕꓲꓽ ꓟ ꓡꓰ ꓐꓰ ꓗꓹ ꓡꓳ= ꓗꓳ-ꓑꓴ-ꓔ ꓐꓰ ꓪꓴꓸ ꓠꓷꓸ ꓢꓯꓼ ꓙꓳ ꓟꓬꓱꓽ ꓬꓰ ꓡ ꓠꓹ ꓟ ꓜꓽ ꓫꓵꓽ ꓟꓽ ꓫꓱꓸ ꓡꓯ ꓘꓳ ꓥ ꓟꓲ꓾ ꓬꓲꓸ ꓘꓴꓽ ꓗꓪ ꓮ ꓔꓳꓸ ꓢꓯꓼ ꓢꓷꓸ ꓡꓰ ꓓꓴ (electrical signals) ꓗꓪ ꓐꓰ ꓖꓳ ꓑꓳꓸ ꓕ ꓑꓳꓸ ꓓꓳꓽ ꓦꓻ/ꓜꓳꓻ ꓡꓯ ꓘꓳ ꓟ ꓔꓯ ꓟꓳꓸ ꓠꓬ ꓫꓱꓸ ꓡꓯ ꓘꓳ ꓡꓳ= ꓗꓳ-ꓑꓴ-ꓔ ꓠꓬ ꓙꓲꓽ ꓚꓶꓹ ꓗꓪ ꓐꓰ ꓮ ꓔꓳꓸ ꓢꓯꓼ ꓢꓷꓸ ꓡꓰ ꓓꓴ ꓓꓳꓽ ꓦ ꓢꓲꓸ ꓙꓼ ꓶ ꓤ ꓐꓴ ꓔꓯ ꓟꓬꓱꓽ ꓬꓰ ꓝꓲ ꓡꓳ= ꓖꓳ ꓟ ꓡꓰ ꓐꓰ ꓠꓴ ꓪꓴꓸ ꓠꓷꓸ ꓥ ꓟꓲ ꓫꓬꓹ ꓫꓬꓹ ꓪꓹ ꓪꓹ ꓙꓳ ꓟ ꓠꓴ-ꓣꓳ ꓗꓪ ꓐꓰ ꓮ ꓔꓳꓸ ꓢꓯꓼ ꓢꓷꓸ ꓡꓰ ꓓꓴ ꓦ/ꓜꓳ ꓡꓯ ꓘꓳ ꓢꓲ꓾ ꓖꓳ ꓓꓱꓽ ꓡꓯꓼ ꓗꓸ ꓡꓯꓼ ꓟꓲ ꓔꓯ ꓟꓬꓱꓽ ꓬꓰ ꓝꓲ ꓡꓳ= ꓠꓴ-ꓣꓳ ꓙꓴꓽ ꓐꓴ ꓠꓬ ꓕꓲ ꓖꓳ ꓓꓱ ꓡꓯꓼ ꓗꓸ ꓮ ꓙꓵꓽ ꓗꓪ ꓕꓲꓽ ꓟ ꓐꓰ ꓕꓲ ꓟ ꓝꓸ ꓡꓯ ꓘꓳ ꓔꓬ ꓢꓲ꓾ ꓪꓴꓸ ꓠꓷꓸ ꓗꓪ ꓛꓲ ꓝꓸ ꓠꓳꓽ ꓛꓲ ꓬꓰ ꓡꓳ= ꓣꓳ ꓧꓪꓽ ꓖꓳ ꓓꓱ ꓟꓬꓱꓽ ꓮ ꓡꓲ ꓬꓰ ꓠꓹ ꓟ ꓐꓱ ꓶ ꓠꓴ-ꓣꓳ ꓮ ꓙꓵꓽ ꓖꓳ ꓑꓳꓸ ꓕ ꓑꓳꓸ ꓙ ꓡꓯ ꓘꓳ ꓡꓳ= ꓕꓱ ꓡꓱ ꓙ ꓡꓯ ꓘꓳ꓾ ꓝꓸ ꓡꓯ ꓘꓳ ꓟ ꓙ ꓖꓴ ꓔꓯ “ꓪꓴꓸ ꓠꓷꓸ ꓝꓸ ꓟ (brain wiring)” ꓐꓰ ꓘꓴˍ ꓡꓳ=
#ꓣꓳ ꓪꓴꓸ ꓠꓷꓸ ꓔꓯ ꓬꓲꓸ ꓫꓵꓼ ꓑꓶꓸ ꓡꓰ ꓝꓲ ꓐ ꓡ ꓡꓳ!
ꓟꓬꓱꓽ ꓕꓲꓽ ꓫꓵꓽ ꓔꓯ ꓮ ꓟꓬꓹ ꓧꓪꓸ ꓬꓰ ꓕꓯꓽ ꓠꓴ-ꓣꓳ ꓝꓸ ꓡꓯ ꓘꓳ ꓚꓱꓹ ꓢꓯꓼ ꓙꓳ ꓡ ꓡꓳ= ꓠꓴ-ꓣꓳ ꓚꓰ ꓙꓴꓽ ꓗꓪ ꓐꓰ ꓗꓯ-ꓟꓲ-ꓗꓯ ꓓꓳꓽ (chemical message) ꓮ ꓟꓬꓹ ꓦ ꓩꓴ ꓡ ꓟ ꓡꓰ ꓐꓰ꓾ ꓘꓴ ꓣꓴ ꓟ ꓕꓲꓽ ꓛꓱꓽ ꓗꓪ ꓥ ꓟꓲ ꓠꓴ-ꓣꓳ ꓡꓯꓼ ꓗꓸ ꓠꓬ ꓬꓲꓸ ꓐꓶꓹ ꓮ ꓟꓬꓹ ꓬꓲꓸ ꓗꓯꓺ ꓡꓯ ꓗꓷ ꓡ ꓡꓳ= ꓠꓴ-ꓣꓳ ꓡꓯꓼ ꓗꓸ ꓡꓯꓼ ꓟꓲ ꓠꓬ ꓢꓲꓹ ꓜꓲ ꓡꓯꓼ ꓗꓸ ꓢꓲꓹ ꓑꓴ ꓒꓽ ꓡꓰ ꓐꓰ ꓒꓬꓱꓼ ꓡ ꓕꓯꓽ ꓣꓳ ꓥ ꓟꓲ ꓟꓬꓱꓽ ꓖꓳ ꓕꓲ ꓫꓵꓽ ꓗꓪ ꓮ ꓘꓶꓸ ꓡ ꓔꓲꓺ ꓬꓰ ꓗꓴꓸ ꓡ ꓡꓳ=! (ꓟꓬꓱꓽ ꓖꓳ ꓕꓲ ꓫꓵꓽ ꓔꓯ ꓬꓰ ꓟꓽ ꓪ ꓟ ꓟꓶ ꓤ ꓗꓷ ꓡꓰ ꓠꓬ꓾ ꓢꓲꓹ ꓜꓲ ꓡꓰ ꓐꓰ ꓗꓹ ꓟ ꓠꓴ-ꓣꓳ ꓡꓯꓼ ꓗꓸ ꓑꓴ ꓡꓴ ꓥ ꓟꓲ ꓣꓳ ꓡꓰ꓾ ꓟꓶꓽ ꓡꓰˍ ꓡꓳ=)
ꓣꓳ ꓢꓳ ꓣꓴ ꓟ꓾ ꓬꓰ ꓟ꓾ ꓫꓸ ꓕꓱ ꓟ ꓠꓬ ꓣꓳ ꓪꓴꓸ ꓠꓷꓸ ꓘꓴꓽ ꓗꓪ ꓠꓴ-ꓣꓳ ꓝꓸ ꓚꓱꓹ ꓬꓲꓸ ꓫꓵꓼ ꓒꓬꓱꓼ ꓡ ꓡꓳ=! ꓟꓬꓽ ꓠꓬꓲ ꓢꓳ ꓠꓬ ꓣꓳ ꓪꓴꓸ ꓠꓷꓸ ꓟꓬꓽ ꓠꓬꓲ ꓢꓯꓼ ꓙꓳ ꓡ ꓡꓳ= ꓕꓲꓽ ꓚꓱꓹ ꓗꓪˍ ꓡꓰꓽ ꓟꓽ ꓥ꓾ ꓮ ꓟꓬꓹ ꓚꓱꓹ ꓗꓪ ꓢꓷꓸ ꓡ ꓡꓳ= ꓙꓲˍ ꓟ ꓟꓬꓱꓽ ꓕꓲꓽ ꓫꓵꓽ ꓫꓵꓽ ꓬꓲꓸ ꓫꓵꓼ ꓬꓰ ꓢꓳ ꓟ ꓗꓪ ꓐꓰ ꓣꓳ ꓪꓴꓸ ꓠꓷꓸ ꓟꓬꓱꓽ ꓬꓰ ꓚꓱꓹ ꓡꓶꓸ ꓑ ꓪꓴꓽ ꓟꓴ ꓙꓰ ꓢꓲ꓾ ꓣꓳ ꓫꓱꓹ ꓣꓳ ꓡꓲꓽ ꓥ ꓟꓲ ꓬꓲꓸ ꓫꓵꓼ ꓑꓶꓸ ꓡꓰ ꓐ ꓡ ꓡꓳ= ꓣꓳ ꓤꓶ ꓥ ꓟꓲ ꓪꓴꓽ ꓟꓴ ꓡ ꓡꓳ=
ꓣꓳ ꓕꓲꓽ ꓫꓵꓽ ꓫꓵꓽ ꓓꓵꓽ ꓙ꓾ ꓠꓲꓹ ꓟ ꓗꓪ ꓔꓳꓹ ꓫꓳꓽ꓾ ꓥ ꓠꓬ ꓟꓬꓱꓽ ꓬꓰ ꓠꓬ ꓖꓳ ꓠꓴ-ꓣꓳ ꓙ ꓖꓴ ꓕꓲꓽ ꓚꓱꓹ ꓔꓯ ꓟꓬꓽ ꓠꓬꓲ ꓪꓴꓽ ꓡ꓾ ꓢꓯꓼ ꓙꓳ ꓡ ꓝꓲ ꓡꓳ= ꓖꓳ ꓟ ꓑꓶꓸ ꓓꓴ ꓞꓳ ꓤ ꓬꓲꓸ ꓫꓱꓹ ꓐꓯ ꓟ ꓠꓬ ꓮ ꓕꓯ ꓕꓯ ꓙꓰ ꓝꓳ ꓟ ꓪꓴꓸ ꓠꓷꓸ ꓠꓴ-ꓣꓳ ꓙ ꓖꓴ ꓚꓱꓹ ꓔꓯ ꓖꓴ ꓡꓳ= ꓮ ꓕꓯ ꓕꓯ ꓙꓰ ꓝꓳ ꓟ ꓑꓶꓸ ꓓꓴ ꓣꓳ ꓪꓴꓸ ꓠꓷꓸ ꓠꓬ ꓕꓱ ꓕꓲꓽ ꓚꓱꓹ ꓗꓪ ꓙꓰˍ ꓕꓯ ꓮ ꓫꓵꓽ ꓫꓸ ꓓꓴ ꓟꓽ ꓙꓳ= ꓕꓱ ꓟ ꓡꓰ ꓐꓰ ꓕꓲꓽ ꓫꓵꓽ ꓫꓵꓽ ꓔꓯ ꓡꓰꓼ ꓡꓰꓼ ꓬꓰ ꓐꓭ ꓠꓬ ꓣꓳ ꓪꓴꓸ ꓠꓷꓸ ꓠꓴ-ꓣꓳ ꓙ ꓡꓯ ꓘꓳ ꓚꓱꓹ ꓙ ꓖꓴ ꓬꓲꓸ ꓫꓵꓼ ꓝꓰꓸ ꓟꓶ ꓡꓰ ꓢꓲ꓾ ꓟꓶ ꓤ ꓖꓳ ꓡꓱ ꓬꓰ ꓗꓷ ꓠꓬ ꓣꓳ ꓫꓱꓹ ꓣꓳ ꓡꓲꓽ ꓒꓬꓱꓼ ꓡ ꓥꓳ= ꓣꓳ ꓮ ꓙꓵꓽ ꓠꓬ ꓣꓳ ꓪꓴꓸ ꓠꓷꓸ ꓙ ꓖꓴ ꓫꓬꓹ ꓔꓱꓹ ꓐ ꓡ ꓟ (ꓠꓴ-ꓣꓳ ꓙ ꓖꓴ ꓚꓱꓹ ꓬꓲꓸ ꓫꓵꓼ ꓝꓰꓸ ꓐ ꓡ ꓟ) ꓑꓶꓸ ꓓꓴ꓾ ꓣꓳ ꓠꓲꓹ ꓟ ꓓꓵꓽ ꓙ ꓚꓱꓹ ꓐꓰ ꓟꓬꓱꓽ ꓬꓰ ꓚꓱꓹ ꓥ ꓟꓲ ꓡꓶꓸ ꓑ ꓐ ꓡ ꓡꓳ=
ꓕꓱ ꓡꓱ ꓬꓲꓸ ꓫꓱꓹ ꓡꓶꓸ ꓑ ꓗꓷ ꓟ ꓔꓯ ꓡꓳ ꓘꓳꓽ ꓕꓲ ꓟ ꓗꓪ ꓓꓽ ꓖꓴ ꓝꓸ ꓟ ꓡꓰ ꓐꓰ ꓢꓪꓼ ꓓ ꓡꓳ= ꓬꓲꓸ ꓪꓴꓸ ꓕꓲ ꓧꓪꓸ ꓡꓳ ꓘꓳꓽ ꓔꓯ ꓫꓱꓽ ꓗꓳꓸ ꓙꓰ ꓠꓹ ꓟ ꓮ ꓘꓶꓸ ꓫꓸ ꓢꓲ꓾ ꓬꓲꓸ ꓙꓵꓹ ꓥ ꓟꓲ ꓟꓶ ꓫꓵ ꓡꓳ= ꓡꓳ ꓘꓳꓽ ꓔꓯ ꓠꓴ ꓕꓲꓽ ꓧꓪꓸ ꓘꓱꓻ ꓙꓰ ꓠꓬ ꓓꓽ ꓖꓴ ꓗꓳ ꓪꓴꓸ ꓔꓴ ꓟ ꓡꓰ ꓐꓰ ꓥꓳ꓾ ꓐꓰ ꓓꓵꓽ ꓙ ꓠꓬꓲ ꓡꓯ= ꓮ ꓟꓬꓹ ꓧꓪꓸ ꓘꓱꓻ ꓙꓰ ꓠꓬ ꓓꓽ ꓖꓴ ꓠꓬ ꓮ ꓟꓬꓹ ꓗꓳ ꓞꓲꓺ ꓡꓰ ꓥꓳ= ꓮ ꓤ ꓤ ꓠꓬ ꓠꓴ ꓪꓴꓸ ꓠꓷꓸ ꓗꓪ ꓠꓴ-ꓣꓴ ꓓꓽ ꓖꓴ ꓚꓱꓹ ꓫꓬꓹ ꓓꓳ ꓡꓰ ꓢꓲ꓾ ꓡꓳ ꓘꓳꓽ ꓔꓯ ꓓꓽ ꓖꓴꓽ ꓗꓳ ꓔꓸ ꓟ ꓡꓰ ꓐꓰ ꓠꓲꓹ ꓞ ꓘꓱꓻ ꓙꓰ ꓐ ꓡ ꓥꓳ=
#ꓪꓴꓸ ꓠꓷꓸ ꓠꓬ ꓪꓴ-ꓢ ꓡꓯꓼ ꓫꓴ
ꓪꓴ-ꓢ ꓔꓯ ꓢꓷꓸ ꓢꓲꓸ ꓦ ꓡꓱ ꓢꓴ ꓐꓴ ꓓꓵꓽ ꓙ ꓚꓱꓹ ꓗꓪ ꓠꓬ ꓪꓴꓸ ꓠꓷꓸ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓖꓶꓽ ꓡ ꓟ ꓡꓯꓼ ꓫꓴ ꓮ ꓟꓬꓹ ꓫꓵꓽ ꓗꓪ ꓐꓰ ꓪꓴꓽ ꓡꓳꓹ ꓬꓰ ꓟ ꓡꓯꓼ ꓫꓴ ꓕꓲꓽ ꓫꓵꓽ ꓥꓳ꓾ ꓐꓰ ꓙꓵꓻ ꓡꓳ= ꓖꓳ ꓟ ꓑꓶꓸ ꓓꓴ ꓪꓴꓸ ꓠꓷꓸ ꓔꓯ ꓮ ꓡꓲ ꓫꓺ ꓒꓵꓽ ꓠꓯˍ ꓟ ꓮ ꓘꓶꓸ ꓢꓳꓻ ꓢꓲ꓾ ꓪꓴꓸ ꓠꓷꓸ ꓙꓲ ꓡ ꓠꓹ ꓟ ꓢꓯꓼ ꓕꓵꓼ ꓫꓺ ꓒꓵꓽ ꓡꓳ=
ꓠꓴ ꓪꓴꓸ ꓠꓷꓸ ꓠꓬ ꓕꓲꓽ ꓖꓳ ꓓꓱꓽ ꓗꓪ ꓬꓳꓹ ꓚꓵ ꓡꓳꓹ ꓬꓰ ꓟ ꓕꓲꓽ ꓫꓵꓽ ꓥ ꓢꓲ꓾ ꓠꓴ ꓓꓵꓽ ꓙ ꓟ꓾ ꓫꓸ ꓕꓱ ꓟ ꓐꓰ ꓬꓰ ꓟ ꓔꓯ ꓙꓵꓽ ꓔꓬ ꓟ ꓥ ꓡꓳ= ꓗꓹ ꓛꓲ ꓟ꓾ ꓙꓲ ꓟ ꓪꓴꓸ ꓠꓷꓸ ꓒꓬꓱꓼ ꓡ ꓠꓹ ꓟ ꓙꓱ ꓘꓪ ꓗꓪ ꓟ ꓢꓯꓼ ꓖꓶ ꓘꓶꓽ ꓔꓯ ꓛꓳ ꓫꓱꓽ ꓓꓴ ꓬꓰ=
- ꓠꓴ ꓪꓴꓸ ꓠꓷꓸ ꓔꓯ ꓬꓯ꓾ ꓙꓲ ꓒꓶꓽ ꓐꓰ ꓠꓱꓸ ꓐꓯꓼ ꓬꓲꓼ ꓡ ꓩꓽ ꓡ ꓟ ꓜꓽ ꓫꓵꓽ ꓓꓳ ꓫꓵꓽ ꓗꓪ ꓐꓰ ꓗꓽ ꓙ= ꓓꓳꓼ ꓟꓴ ꓘꓴꓽ ꓛꓵꓼ ꓥ ꓟꓲ ꓪꓴꓸ ꓠꓷꓸ ꓐꓬ ꓡꓰ ꓝꓲ ꓐ ꓡ ꓡꓳ=
- ꓠꓴ ꓪꓴꓸ ꓓꓵ ꓔꓯ ꓟꓽ ꓜꓱ꓾ ꓟꓽ ꓲꓼ ꓡꓰ ꓠꓹ ꓟ ꓤ ꓟꓳ= ꓟꓳ ꓓꓳ ꓜꓶ ꓕꓯ ꓟꓳ ꓓꓳ ꓙꓴ ꓧꓶꓹ ꓧꓶꓹ= ꓧꓳ ꓛꓬ ꓡꓯꓼ꓾ ꓢꓲ-ꓗꓲꓼ ꓐꓰ꓾ ꓟꓳ ꓓꓳ ꓢ-ꓗꓯ ꓜꓶꓽ ꓕꓯ ꓪꓴꓸ ꓓꓵ ꓗꓽ ꓓꓴ ꓞꓴꓸ= ꓠꓴ ꓪꓴꓸ ꓠꓷꓸ ꓠꓬ ꓠꓸ ꓠꓴꓹ ꓤꓼ ꓗꓹ ꓟ ꓮ ꓠꓳꓸ ꓓꓰꓽ ꓙꓴ ꓡꓰ ꓐꓰ ꓗꓹ ꓡꓳ= ꓠꓴ ꓪꓴꓸ ꓗꓼ ꓠꓬ ꓩꓴˍ ꓡꓳ=
- ꓪꓴꓸ ꓠꓷꓸ ꓔꓯ ꓢꓯꓼ ꓖꓶ ꓟ ꓜꓽ ꓓꓴ ꓜꓻ꓾ ꓢꓲꓹ ꓢꓶ ꓡꓳ ꓢꓶ꓾ ꓳ ꓒꓬ ꓳ ꓟꓲ꓾ ꓮ ꓭꓸ ꓩꓴ꓾ ꓥꓪꓸ ꓐꓰ ꓮ ꓭꓸ ꓧꓪꓽ ꓜꓽ= ꓠꓯꓼ ꓠꓯꓼ ꓔꓴ ꓡ ꓕꓯꓽ ꓬꓲ ꓙꓬ ꓕꓲꓽ ꓗꓶꓸ ꓓꓽ ꓟ ꓓꓳ ꓢꓲꓸ ꓪꓴꓸ ꓔꓴ= ꓠꓯꓼ ꓠꓯꓼ ꓜꓽ ꓓꓴ ꓔꓯ ꓙꓲ ꓙꓲ ꓜꓽ= ꓧꓪ ꓟꓰꓹ ꓠꓬꓲ ꓢꓴ ꓐꓴ ꓡꓰ꓾ ꓤ ꓠꓱ ꓐꓴ ꓜꓽ ꓓꓴ ꓙꓲ ꓙꓲ ꓜꓽ ꓪ ꓢꓴ ꓐꓴ ꓠꓬ ꓢꓳ ꓣꓴ ꓟ ꓗꓪ ꓮ ꓘꓶꓸ ꓓ ꓢꓴ ꓒꓬꓱꓼ ꓡ ꓡꓳ꓾ ꓐꓯ ꓡꓳ=
- ꓟꓽ ꓙꓲ ꓟ ꓧꓪ ꓞꓶ ꓡꓰ ꓡꓱ ꓔꓸ ꓟ ꓜꓽ ꓓꓴ꓾ ꓞꓼ ꓛꓵ ꓟꓬꓽ ꓟ ꓜꓽ ꓓꓴ꓾ ꓫ ꓙꓬꓽ ꓐꓰ ꓗ-ꓩꓰꓸ ꓢꓯꓼ ꓙꓳ ꓟ ꓜꓽ ꓓꓴ ꓕꓽ ꓜꓽ= ꓫꓬꓹ ꓔꓱꓹ ꓫꓬꓹ ꓑꓱ ꓔꓸ ꓟ ꓜꓽ ꓓꓴ ꓓꓳ ꓓꓴ ꓠꓬ ꓧꓪ ꓖꓳ ꓓꓱꓽ ꓐꓱ ꓶ ꓙꓲ ꓖꓴ ꓟꓽ ꓙꓳ= ꓪꓴ-ꓢ ꓡꓰ ꓮ ꓡꓲ ꓚꓰꓼ ꓔꓸ ꓟ ꓖꓳ ꓡꓱ ꓔꓶ ꓜꓽ ꓔꓶ ꓓꓳ ꓟ ꓠꓬ ꓖꓳ ꓓꓱ ꓐꓱ ꓶ ꓙꓲ ꓖꓴ ꓙꓳ ꓡꓳ=
- ꓕꓲꓽ ꓦꓬ ꓡꓰꓸ ꓕꓲ ꓦꓬꓼ ꓒ ꓐꓳ ꓬꓲꓼ ꓟꓶ ꓪ ꓝꓲ= ꓕꓲ ꓢ ꓘꓪ ꓗꓪ 7 ꓙꓵꓹ ꓙꓱ ꓘꓪ ꓬꓲꓼ ꓟꓶ ꓪ ꓢꓴ ꓠꓬ ꓪꓴꓸ ꓠꓷꓸ ꓗꓪ ꓫꓵꓽ ꓚꓳ ꓟ ꓠꓲꓸ ꓡꓰ ꓡꓳ= ꓬꓲꓼ ꓟꓶ ꓟꓽ ꓐꓳ ꓢꓴ ꓠꓬ ꓠꓲꓹ ꓢꓲꓼ ꓢꓻ ꓡꓳ= ꓙꓲ ꓙꓲ ꓟꓽ ꓬꓲꓼ ꓟꓶ ꓪ ꓢꓴ ꓠꓬ ꓠꓲꓹ ꓟ ꓓꓵꓽ ꓙ ꓪꓴꓽ ꓧꓶ ꓫꓸ ꓢꓴ꓾ ꓠꓲꓹ ꓟ ꓙꓬ ꓢꓻ ꓢꓴ ꓒꓬꓱꓼ ꓡ ꓡꓳ=
- ꓕꓲꓽ ꓫꓵꓽ ꓠꓽ ꓗꓪ 5 ꓧꓪꓸ ꓛꓲ ꓖꓳ ꓓꓱꓽ ꓢꓯꓼ ꓠꓵꓹ/ ꓛꓲ ꓡꓵ ꓡꓯꓼ ꓡꓵ ꓟꓽ ꓪ ꓟꓽ ꓢ ꓬꓰ ꓪ ꓝꓲ= ꓖꓳ ꓡꓱ ꓬꓰ ꓠꓬ ꓠꓲꓹ ꓟ ꓔꓶꓹ ꓡ ꓝꓲ ꓡꓳ= ꓧꓪ ꓖꓳ ꓓꓱ ꓕꓲ ꓟ ꓡꓱꓸꓼ ꓗꓪ ꓫꓵꓽ ꓙꓲ ꓙꓲ ꓚꓳ ꓝꓲ ꓡꓳ (ꓖꓳ ꓓꓱꓽ ꓠꓵꓹ ꓡꓳ ꓖꓪ ꓓꓴ ꓬꓲꓸ ꓫꓵꓽ ꓬꓲ ꓙꓰ꓾ ꓛꓬꓸ ꓥꓳꓽ ꓛꓬꓸ ꓟ ꓐꓰ꓾ ꓞꓽ ꓞꓽ ꓙ ꓖꓴ ꓫꓱꓽ ꓟ ꓕꓱ ꓡꓱꓳ ꓫꓵꓽ)= ꓕꓱ ꓡꓱ ꓖꓳ ꓓꓵꓽ ꓠꓵꓹ ꓟ ꓗꓪ ꓐꓰ ꓪꓴꓸ ꓠꓷꓸ ꓗꓪ ꓫꓵꓽ ꓚꓳ ꓚꓱꓹ ꓙꓲ ꓡ ꓢꓲꓸ ꓙ ꓜꓲꓼ ꓠꓲꓹ ꓥ ꓟꓲ ꓙꓲ ꓡ ꓝꓲ ꓡꓳ= ꓠꓴ-ꓣꓳ ꓙ ꓖꓴ ꓬꓲꓸ ꓫꓵꓼ ꓥ ꓟꓲ ꓢꓻ ꓢꓹ ꓙꓳ ꓡ ꓝꓲ ꓡꓳ= ꓠꓲꓹ ꓟ ꓪꓴꓽ ꓧꓶ ꓓꓴ ꓒꓬꓱꓼ ꓡ ꓝꓲ ꓟ ꓔꓯ ꓗꓽ ꓔꓸ ꓢꓲ꓾ ꓗꓹ ꓛꓲ ꓠꓲꓹ ꓓꓳ ꓡ ꓝꓲ ꓡꓳ= ꓠꓴ ꓮ ꓘꓶꓸ ꓪꓴꓽ ꓧꓶ ꓪꓴꓽ ꓡꓲꓽ ꓗꓹ ꓕꓯ꓾ ꓪꓴꓸ ꓠꓷꓸ ꓢꓯꓼ ꓙꓳ ꓡ ꓠꓹ ꓟ ꓚꓱꓹ ꓕꓲꓽ ꓟ ꓠꓬ꓾ ꓛꓲ ꓝꓳꓹ ꓝꓳꓹ ꓔꓸ ꓢꓲꓸ ꓠꓬꓹ ꓠꓬꓲ ꓦꓰꓼ ꓠꓬꓲ 20 ꓧꓪꓸ ꓛꓲ ꓬꓰ ꓛꓵ ꓡꓳ=
- ꓠꓴ ꓪꓴꓸ ꓠꓷꓸ ꓔꓯ ꓪꓴꓽ ꓧꓶ ꓓꓴ ꓟꓽ ꓗꓷ ꓡꓰ ꓝꓲ ꓠꓹ ꓟ ꓗꓹ ꓛꓲ ꓟ ꓓꓵꓽ ꓙ ꓚꓱꓹ ꓓꓵꓽ ꓙ= ꓟꓶ ꓤ ꓠꓲꓹ ꓟ ꓪꓴꓽ ꓧꓶ ꓔꓬ ꓠꓬ ꓙ ꓜꓲꓼ ꓠꓲꓹ ꓐꓰ ꓗꓹ ꓛꓲ ꓠꓲꓹ ꓠꓲꓸ ꓡꓰ ꓗꓴꓸ ꓡꓳ= ꓕꓲꓽ ꓠꓬꓲ ꓗꓪ ꓟꓬꓱꓽ ꓬꓰ ꓤꓽ ꓟꓶ ꓠꓬꓲꓽ ꓗꓪ ꓐꓰ ꓕꓲꓽ ꓑꓹ ꓤꓼ ꓠꓽ ꓢꓲ꓾ ꓠꓻ ꓘꓴ ꓗꓪ ꓐꓰ ꓢꓯꓼ ꓒ ꓐꓳ ꓦ= ꓠꓴ ꓛꓲ ꓙꓴꓽ ꓡꓯꓼ ꓙꓴ꓾ ꓞꓳ ꓧꓪ ꓐꓴ ꓔꓯ ꓢꓯꓼ ꓩꓴ ꓠꓬꓲ꓾ ꓢꓯꓼ ꓙꓬꓽ ꓩꓴ= ꓗꓹ ꓛꓲ ꓟ ꓓꓵꓽ ꓙ ꓚꓱꓹ ꓓꓵꓽ ꓙ ꓢꓲꓸ ꓠꓲꓹ ꓟ ꓢꓲꓽ ꓫꓬ ꓡꓰ ꓝꓲ= (ꓕꓲ ꓛꓳ ꓬꓰ ꓤꓹ ꓠꓬꓲ ꓡꓯ – 5 ꓢꓯꓸ-ꓗꓼ ꓬꓲꓸ ꓙꓵꓹ ꓣꓴ ꓢꓲꓸ ꓠꓴ ꓠꓻ ꓘꓴ ꓗꓪ ꓐꓰ ꓢꓯꓼ ꓒ ꓐꓲ ꓦ ꓧꓳꓽ꓾ ꓝꓮꓲ ꓕꓲꓽ ꓑꓹ ꓤꓼ ꓢꓯꓼ ꓝꓲꓺ ꓔꓸ꓾ ꓝꓮꓲ ꓢꓯ-ꓗꓸ 5 ꓧꓶ ꓬꓲꓸ ꓙꓵꓹ ꓣꓴ ꓢꓲꓸ ꓠꓻ ꓘꓴ ꓗꓪ ꓐꓰ ꓢꓯꓼ ꓦ ꓓꓳ ꓩꓴ=)
- ꓠꓴ ꓠꓲꓹ ꓟ ꓗꓪ ꓓꓵꓽ ꓡ ꓟ ꓟꓽ ꓙꓲ ꓟꓽ ꓜꓳ ꓟ ꓓꓵꓽ ꓙ ꓚꓱꓹ ꓔꓯ ꓢꓷꓸ ꓢꓲꓸ ꓠꓽ ꓩꓴ/ ꓗꓽ ꓔꓸ ꓩꓴ= ꓖꓳ ꓡꓱꓳ ꓫꓵꓽ ꓡꓰ ꓠꓴ ꓪꓴꓸ ꓠꓷꓸ ꓔꓯ ꓓꓵꓽ ꓙ ꓫꓸ ꓡꓰ ꓝꓲ꓾ ꓪꓴꓽ ꓧꓶ ꓡꓰ ꓝꓲ ꓢꓲ꓾ ꓙ ꓡꓯ ꓘꓳ ꓚꓱꓹ ꓗꓪ ꓘꓶꓻ ꓡꓶꓽ ꓓꓴ ꓒꓬꓱꓼ ꓡ ꓝꓲ ꓡꓳ= ꓠꓴ ꓠꓲꓹ ꓢꓲꓼ꓾ ꓠꓲꓹ ꓟ ꓫꓸ꓾ ꓠꓲꓹ ꓟ ꓢꓲ ꓡꓲꓹ ꓟ ꓟꓽ ꓙꓳ ꓕꓯ ꓠꓴ ꓪꓴꓸ ꓠꓷꓸ ꓗꓪ ꓓꓵꓽ ꓙ ꓛꓲ ꓡ ꓟ ꓮ ꓙꓵꓽ ꓕꓳ ꓶ ꓗꓪ ꓐꓳ ꓚꓵꓸ= ꓟꓽ ꓙꓲ ꓟ ꓥ ꓐꓭ ꓠꓬ ꓙꓲˍ ꓟ ꓓꓵꓽ ꓙ ꓚꓱꓹ ꓗꓪ ꓐꓰ ꓑꓺ ꓩꓴ=
- “ꓩꓴꓸ/ ꓗꓳ-ꓑꓴ-ꓔ ꓠꓬ ꓐ ꓛꓳꓽ ꓙꓵꓹ” ꓮ ꓟꓬꓹ ꓕꓽ ꓣꓱꓽ= ꓙꓳꓺ ꓩꓴ/ꓗꓳ-ꓑꓴ-ꓔ ꓗꓪ ꓦꓰꓸ ꓓꓴ ꓙꓳ ꓟ ꓡꓳ ꓖꓪ ꓓꓴ ꓡꓳ ꓖꓪ ꓚꓽ ꓢꓴ ꓤ ꓠꓱ ꓐꓰ ꓞꓳ ꓡꓯꓸ ꓐꓴ ꓠꓬ ꓠꓲꓹ ꓟ ꓔꓳꓹ ꓜꓳꓽ ꓟ ꓕꓲꓽ ꓒꓳꓹ ꓔꓯ ꓗꓪꓽ ꓫꓵꓽ ꓟ ꓪꓴꓸ ꓠꓷꓸ ꓟꓬꓱꓽ ꓮ ꓘꓶꓸ ꓬꓰ ꓢꓲ꓾ ꓚꓵꓸ ꓛꓬ ꓖꓳ ꓓꓱꓽ ꓔꓯ ꓙꓵꓽ ꓟꓽ ꓗꓴꓸ ꓒꓬꓱꓼ ꓡ ꓡꓳ= ꓕꓲꓽ ꓠꓬꓲ 10 ꓙꓵꓹ ꓛꓲ 0-ꓡꓮꓲꓹ ꓣꓱꓽ ꓢꓴ ꓞꓳ ꓡꓯꓸ ꓐꓴ ꓠꓬ ꓕꓲ ꓠꓬꓲ 2 ꓙꓵꓹ ꓙꓱ ꓘꓪ ꓣꓱꓽ ꓢꓴ ꓕꓯꓽ ꓢꓲ ꓓꓵꓽ ꓙ ꓒꓯꓽ ꓦꓰꓽ ꓗꓴꓸ ꓟ ꓔꓯ ꓟꓳꓸ ꓟꓬꓱꓽ ꓬꓰ ꓟ ꓪꓴꓸ ꓠꓷꓸ ꓕꓲ ꓘꓴꓸ ꓗꓪ ꓟꓴꓽ ꓘꓴꓽ ꓠꓯꓺ ꓠꓯꓺ ꓡꓰ ꓐꓰ ꓗꓹ ꓟ ꓡꓳꓸ ꓟꓳ ꓡꓳ= (ꓟꓴꓽ ꓘꓴꓽ ꓠꓯꓺ ꓠꓯꓺ ꓠꓬ ꓠꓴ-ꓣꓳ ꓔꓯ ꓖꓴ ꓡꓳ!)
- ꓧꓪ ꓟꓰꓹ ꓠꓬꓲ꓾ ꓕꓳ ꓶ ꓵꓺ꓾ ꓢꓳ ꓣꓴ= ꓠꓴ ꓪꓴꓸ ꓠꓷꓸ ꓠꓬ ꓞꓳ ꓧꓪꓽ ꓐꓴ ꓡꓰ ꓐꓰ ꓥꓳ= ꓟꓬꓽ ꓠꓬꓲ ꓣꓱꓽ ꓠꓬ ꓟꓬꓽ ꓠꓬꓲ ꓢꓯꓼ ꓙꓳ ꓡ ꓡꓳ=
(Strengthening Christian Family Program International by Leslie Wannemacher, SIL International ꓗꓪ ꓐꓰ ꓐꓳ ꓡꓶꓸ ꓔꓸ ꓟ ꓥ ꓡꓳ=)
