(1) ꓟꓬ-ꓟ ꓗꓴꓷꓼ ꓟꓯꓼ ꓦꓬꓼ ꓠꓬꓲ ꓣꓱꓽ ꓬꓰ ꓡꓳ= ꓣ-ꓫꓸ ꓗꓴꓷꓼ ꓗꓪ ꓐꓰ ꓟꓯꓼ ꓜꓲꓽ ꓕꓲ ꓣꓳ ꓪꓰ ꓤ ꓗꓹ ꓡ ꓡꓳ= ꓖꓳ ꓡꓱ ꓥ ꓟꓲ ꓟꓵ ꓗꓳ ꓓꓵ ꓓꓵ ꓗꓪ ꓐꓰ ꓗꓴꓷꓼ ꓝꓲ ꓓꓴ ꓐꓴ ꓕꓲ ꓣꓳ ꓥ ꓟꓲ ꓟꓽ ꓔꓺ ꓡ= ꓝꓮꓲ ꓗꓴꓷꓼ ꓚꓰ ꓡ ꓞꓳ ꓑꓳꓺ ꓔꓯꓹ ꓢꓴ ꓕꓲ ꓜꓴ ꓥ ꓟꓲ ꓟꓽ ꓔꓺ ꓡ= ꓖꓳ ꓟ ꓑꓶꓸ ꓓꓴ ꓟꓬ-ꓟ ꓗꓷꓴꓼ ꓟꓯꓼ ꓐꓴ ꓠꓬ ꓕꓲ ꓜꓴ ꓔꓱꓸꓼ ꓓꓲꓹ ꓓꓲꓹ ꓤꓼ ꓗꓷ ꓡꓰ ꓟ ꓗꓴꓷꓼ ꓚ ꓟꓲꓽ ꓗꓪ ꓬꓲꓸ ꓪꓴꓸ ꓕꓲ ꓧꓪꓹ ꓔꓳꓹ ꓜꓳ ꓟ ꓦꓬꓼ ꓠꓬꓲ ꓥ ꓡꓳ= ꓚꓵ ꓚꓵ ꓐꓯ ꓠꓬ ꓟꓬ-ꓟ ꓗꓴꓷꓼ ꓦꓬꓼ ꓠꓬꓲ ꓠꓬ꓾ ꓜꓲꓽ ꓜꓲꓽ ꓑꓰꓹ ꓑꓰꓹ ꓙꓵꓽ ꓡ ꓢꓴ ꓐꓴ ꓙ-ꓑ ꓟꓯꓼ ꓐꓴ ꓔꓯ ꓬꓲꓸ ꓪꓴꓸ ꓔꓳꓹ ꓢꓰꓼ ꓡꓯ ꓘꓳ ꓪꓴꓸ ꓔꓴ ꓟ ꓦꓬꓼ ꓠꓬꓲ ꓥ ꓡꓳ= ꓒꓳꓹ ꓔꓳꓹ ꓟ ꓦꓬꓼ ꓠꓬꓲ ꓥ ꓡꓳ= ꓖꓳ ꓡꓱ ꓥ ꓟꓲ ꓗꓸ ꓠꓯꓸ ꓟꓯꓼ ꓜꓲꓽ ꓓꓽ ꓟ ꓐꓴ ꓡꓰ꓾ ꓑ ꓫꓬ ꓐꓴ ꓒꓳꓹ ꓔꓳꓹ ꓟ ꓠꓲꓹ ꓟ ꓬꓲꓸ ꓛꓲ꓾ ꓗꓴꓷꓼ ꓟꓯꓼ ꓦꓬꓼ ꓠꓬꓲ ꓡꓶꓸ ꓗꓷ ꓟ ꓥ ꓡꓳ=
(2) ꓟꓬ-ꓟ ꓗꓴꓷꓼ ꓟꓯꓼ ꓦꓬꓼ ꓠꓬꓲ ꓗꓪ ꓕꓲ ꓗꓴꓷꓼ ꓡꓱꓸꓼ ꓗꓪ ꓟꓯꓼ ꓡꓰ ꓙꓵꓽ ꓡ ꓟ ꓔꓯ ꓟꓽ ꓠꓵ ꓢꓴ ꓐꓴ ꓒꓳꓹ ꓔꓳꓹ ꓟ ꓬꓰ ꓓꓳ ꓡ ꓡꓳ= ꓖꓳ ꓗꓪ ꓟꓯꓼ ꓤ ꓐꓴ ꓡꓰ ꓜꓲꓽ ꓜꓲꓽ ꓑꓰꓹ ꓑꓰꓹ ꓢꓰꓼ ꓗꓷ ꓢꓲ꓾ ꓫꓵꓻ ꓢꓴ 91 ꓣꓳ꓾ ꓝꓮꓲ ꓠꓻ ꓓꓴ ꓡꓰ ꓐꓰ꓾ ꓕꓳ ꓦꓲ ꓗꓪ ꓣꓴ ꓡꓵꓽ ꓟꓶ ꓡꓰ ꓢꓴ ꓮ ꓟꓬꓹ ꓙꓳ ꓡꓳ= ꓖꓳ ꓟ ꓑꓶꓸ ꓓꓴ ꓕꓲ ꓟꓵꓽ ꓕꓲ ꓟꓵꓽ ꓗꓴꓷꓼ ꓝꓲ ꓓꓴ ꓐꓴ ꓗꓪ ꓐꓰ ꓥ ꓟꓲ꓾ ꓝꓮꓲ ꓐꓣꓲꓔꓲꓢꓧ ꓗꓴꓷꓼ ꓗꓪ ꓐꓰ ꓥ ꓟꓲ꓾ ” ꓟꓬ-ꓟ ꓗꓴꓷꓼ ꓟꓯꓼ ꓦꓬꓼ ꓠꓬꓲ ꓕꓱ ꓟ ꓠꓬ ꓟꓬꓱ ꓓꓳꓽ ꓞꓼ ꓓꓳꓽ ꓟꓽ ꓙꓳ ꓟ ꓦꓬꓼ ꓠꓬꓲ꓾ ꓚꓲ ꓛꓬ ꓑ ꓫꓬ ꓔꓯ ꓢꓰꓼ ꓦꓬꓼ ꓠꓬꓲ꓾ ꓥꓶꓸˍ ꓟ ꓦꓬꓼ ꓠꓬꓲ ꓗꓷ ꓡꓰꓳ” ꓐꓰ ꓐꓯ ꓓꓳ ꓡ ꓡꓳ=
(3) ꓒ-ꓑꓳ ꓟꓵꓽ ꓫꓴ꓾ ꓔꓰꓸ-ꓟꓴ-ꓕ ꓗꓪ ꓟꓬ-ꓟ ꓗꓴꓷꓼ ꓟꓯꓼ ꓒꓱ ꓔꓯ ꓗꓠꓴ/ꓗꓠꓡꓮ ꓡꓰ ꓢꓰꓼ ꓧꓪꓸ ꓡꓰꓳ= ꓫꓵꓻ ꓢꓴ ꓮ ꓟꓬꓹ ꓣꓳ꓾ ꓢꓯꓸ ꓢꓯꓸ ꓣꓴ ꓟꓶ ꓢꓴ 13 ꓣꓳ ꓙꓳ ꓡꓳ=
(4) ꓟꓶꓼ ꓘꓶꓼ ꓠ ꓡꓲ 2ꓽ26 ꓧꓶ ꓗꓪ ꓴꓢ ꓚꓰꓠꓔꓰꓣ ꓔꓯ ꓑꓳꓺ 4 ꓢꓶꓽ ꓐꓶ ꓡ ꓡꓳ= ꓖꓳ ꓡꓱ ꓥ ꓟꓲ ꓠꓻ ꓓꓴ ꓡꓰ ꓢꓴ ꓟꓽ ꓙꓳ= ꓕꓱ ꓟ ꓔꓯ ꓚꓲꓸ ꓚ ꓔꓬ ꓡꓳ ꓐꓰ ꓴꓢꓮ ꓰꓟꓐꓮꓢꓢꓬ ꓗꓪꓽ ꓫꓵꓽ ꓢꓴ ꓐꓴ ꓡꓰ ꓐꓯ ꓡꓳ=
(5) ꓒꓳꓹ ꓔꓳꓹ ꓦꓬꓼ ꓠꓬꓲ 3 ꓦ 27 ꓠꓬꓲ ꓗꓪ ꓐꓶꓽ ꓒꓽ ꓟꓵꓽ ꓗꓪ ꓛꓲ ꓬꓰ ꓢꓴ ꓡꓲ-ꓢꓴ ꓐꓴ ꓥ ꓟꓲ ꓟꓬ-ꓟ ꓗꓴꓷꓼ ꓗꓪ ꓟꓯꓼ ꓙꓵꓽ ꓟ ꓔꓯ ꓒꓳꓹ ꓔꓳꓹ ꓟ ꓮ ꓟꓬꓹ ꓬꓰ ꓓꓳ ꓡ ꓡꓳ=
The 3 finger salute protest sign behind barbed wire on red background vector illustration. Protest against violence, injustice and dictatorship. Fight for democracy 
