Economist Intelligence Unit (EIU) ꓡꓰ ꓧꓪ ꓟꓰꓹ ꓓꓳ ꓩꓴ ꓡ ꓟ ꓡꓳ ꓚ ꓐꓯˍ ꓠꓬ꓾ 2021 ꓘꓳꓼ ꓗꓪ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓟꓽ ꓙꓳ ꓡꓳꓹ ꓬꓰˍ ꓟ ꓗꓴꓷꓼ ꓐꓴ ꓠꓯꓸꓼ ꓗꓪ ꓟꓬ-ꓟ ꓕꓱꓹ ꓓꓵꓽ ꓡꓰꓳ꓿
ꓟꓲ ꓠꓯ ꓗꓴꓷꓼ 167 ꓗꓴꓷꓼ ꓔꓯ ꓧꓪ ꓟꓰꓹ ꓔꓸ ꓟ ꓥ ꓢꓲ꓾ ꓟꓬ-ꓟ ꓠꓬ ꓡꓳꓽ ꓘꓰꓽ ꓠ ꓐꓼ 2 ꓥ ꓡꓳ꓿ ꓡꓳꓽ ꓘꓰꓽ ꓕꓲ ꓔꓳꓸ ꓗꓪ ꓡꓳ ꓪꓴꓸ ꓗꓳ-ꓣꓲ-ꓬ꓾ ꓟꓬ-ꓟ ꓐꓰ ꓮ-ꓩ-ꓖ-ꓠꓯ-ꓢꓲ-ꓔ ꓝꓯꓸ ꓔꓬ ꓡꓳ꓿
EIU ꓡꓰ ꓟꓲ ꓠꓯ ꓗꓴꓷꓼ ꓐꓴ ꓔꓯ ꓧꓪ ꓟꓰꓹ ꓟ ꓗꓪ ꓬꓲꓸ ꓝꓻ (5) ꓘꓶꓽ ꓠꓬ꓾ ꓟꓯꓹ ꓢꓲꓻ ꓡꓯ ꓘꓳ ꓚꓱꓹ꓾ ꓗꓴꓷꓼ ꓙꓵ ꓚꓱꓹ ꓟꓴ ꓚꓱꓹ꓾ ꓗꓴꓷꓼ ꓟꓬꓱꓽ ꓚꓱꓹ ꓗꓪ ꓑ ꓫꓬ ꓐꓴ ꓔꓺ ꓓ ꓟ ꓙ ꓖꓴ꓾ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓡꓲꓽ ꓒꓰꓼ ꓐꓰ꓾ ꓑ ꓫꓬ ꓐꓴ ꓩꓴ ꓗꓷ ꓟꓶˍ ꓟ ꓙꓵꓽ ꓪ ꓮ ꓡꓲ ꓙꓳˍ ꓟ ꓕꓱ ꓟꓬ ꓫꓵꓽ ꓥ ꓡꓳ꓿
ꓕꓲ ꓟꓲ ꓠꓯ ꓪꓴꓸ ꓗꓪ꓾ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓗꓪ ꓮ ꓘꓶꓸ ꓜꓯꓻ ꓜꓳꓽ ꓡꓰˍ ꓟ ꓗꓴꓷꓼ 10 ꓗꓴꓷꓼ ꓠꓬ꓾ ꓠꓳ-ꓪꓯꓹ꓾ ꓠꓰ-ꓬꓴ-ꓜꓰ-ꓡ꓾ ꓒꓲ-ꓡ꓾ ꓢꓪꓲ-ꓓꓲ꓾ ꓮꓲꓼ-ꓢꓲ-ꓡ꓾ ꓓꓲꓹ-ꓟꓼ꓾ ꓮꓲ-ꓬ-ꓡ꓾ ꓳ-ꓢꓲ-ꓔꓯ-ꓡꓲꓮꓼ ꓐꓰ꓾ ꓢꓲ-ꓪꓰꓼ-ꓜꓲ-ꓡ ꓗꓴꓷꓼ ꓐꓴ ꓥ ꓡꓳ꓿
ꓧꓶꓸ ꓕꓯ ꓟꓬ-ꓟ ꓗꓴꓷꓼ ꓠꓬ ꓓꓰ-ꓟꓳ-ꓗꓯ-ꓢꓰ ꓮ ꓘꓶꓸ ꓟꓽ ꓙꓳ ꓢꓰꓽ ꓥ ꓟꓲ꓾ ꓕꓲ ꓟꓲ ꓠꓯ ꓗꓪ ꓐꓰ 135 ꓠ ꓐꓼ ꓗꓪ ꓦꓰꓼ ꓔꓬ ꓡꓳ꓿ ꓮ ꓟꓶ 2021 ꓘꓳꓼ ꓗꓪ ꓠꓬ꓾ 166 ꓠ ꓐꓼ ꓗꓪ ꓞꓰ ꓬꓯꓼ ꓡꓰˍ ꓟ ꓥ ꓡꓳ꓿
ꓗꓴꓷꓼ ꓙꓵꓽ ꓪ ꓣꓴ ꓔꓸ ꓟ ꓟꓬ-ꓟ ꓟꓯꓼ ꓐꓴ ꓠꓬ ꓗꓴꓷꓼ ꓔꓯ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓗꓪ ꓐꓰ ꓧꓳꓽ ꓔꓬ ꓡꓳ ꓐꓰ ꓟꓷ ꓠꓷꓹ ꓡꓰ ꓫꓸ ꓕꓱ ꓔꓬ ꓢꓲ꓾ ꓬꓰ ꓓꓳ ꓡ ꓟ ꓠꓬ꓾ ꓡ ꓞꓳ 15000 ꓣꓳ ꓟꓽ ꓞꓲ ꓢꓰꓼ꓾ 2000 ꓣꓳ ꓟꓽ ꓞꓲ ꓐꓱ ꓓꓴꓽ ꓗꓪ ꓣꓴ ꓡꓴꓽ ꓔ ꓢꓰꓽ ꓡꓳ꓿
