2022 ꓘꓳꓼ 12 ꓦ 28 ꓠꓬꓲ ꓕꓯꓽ꓾ ꓟꓬꓱ ꓓꓳꓽ ꓙꓳˍ ꓟ ꓟꓬ-ꓟ ꓕꓳ ꓶ ꓐꓳ ꓟ ꓑ-ꓢꓯ-ꓡꓳ ꓠꓬ ꓖꓴ ꓟꓶꓸ ꓗꓳ-ꓣꓲꓸ-ꓬ ꓗꓪ ꓐꓰ 2022 ꓘꓳꓼ ꓐꓱ ꓶ ꓓꓰ-ꓟꓳ-ꓗꓯ-ꓢꓰ ꓢꓯꓼ ꓕꓵꓼ ꓢꓴ ꓔꓯ ꓖꓶˍ ꓟ ꓡꓯꓼ ꓫꓴ (Kim Geun Tae Award) ꓪ ꓡꓰꓳ꓿
“ꓕꓱ ꓟ ꓠꓬ ꓥꓪ ꓕꓲ ꓣꓳ ꓔꓯꓸˍ ꓡꓰ ꓖꓶ ꓡ ꓟ ꓟꓽ ꓥ ꓥ꓾ 2 ꓘꓳꓼ ꓟ ꓘꓴꓽ ꓗꓪ ꓟꓯꓼ ꓠꓰ ꓙꓵꓽˍ ꓟ ꓔꓯ ꓒꓳꓹ ꓔꓳꓹ ꓢꓴ ꓮ ꓙꓵꓽ ꓐꓱ ꓶ ꓥꓳ ꓐꓰ ꓘꓳ ꓣꓴ ꓡꓳ꓿ ꓸꓸꓸ ꓖꓴ ꓟꓶꓸ ꓗꓳ-ꓣꓲ-ꓬꓸ ꓗꓳꓸ ꓡ ꓟ ꓦꓬꓼ ꓠꓬꓲ ꓠꓬ ꓠꓬꓲꓸ ꓠꓬꓲ ꓟ ꓟꓬ-ꓟ ꓡꓰ ꓐꓰ ꓥꓳ꓿ (ꓜꓲꓽ ꓜꓲ ꓑꓰꓹ ꓑꓰꓹ ꓙꓵꓽˍ ꓟ ꓟꓯꓼ ꓙꓵꓽ ꓪ ꓔꓯ ꓒꓳꓹ ꓔꓳꓹ ꓗꓷꓳ)꓿ ꓖꓳ ꓟ ꓑꓶꓸ ꓓꓴ ꓖꓴ ꓟꓶꓸ ꓗꓳ-ꓣꓲ-ꓬ ꓑ ꓫꓬ ꓐꓰ ꓗꓴꓷꓼ ꓟꓬꓱꓽ ꓬꓰ ꓢꓴ ꓐꓴ ꓠꓬ ꓟꓬ-ꓟ ꓑ ꓫꓬ ꓒꓬꓱꓼ ꓠꓲꓹ ꓫꓵˍ ꓟ ꓐꓰ ꓠꓲꓹ ꓥꓴ ꓟꓬ ꓥꓴ ꓔꓬ ꓟ ꓔꓯ ꓙ ꓜꓲꓼ ꓡꓳ꓿ … ꓡꓯꓼ ꓫꓴ ꓒꓴ ꓪꓽ 100 ꓢꓯꓹ ꓕꓱ ꓟ ꓮ ꓙꓵꓽ ꓟꓬ-ꓟ ꓗꓴꓷꓼ ꓗꓪ ꓟꓯꓼ ꓙꓵꓽˍ ꓟ ꓔꓯ ꓔꓳꓹ ꓢꓴ ꓐꓴ ꓔꓯ ꓔꓲꓺ ꓖꓶ ꓓꓴ ꓥꓳ꓿” ꓐꓰ ꓑ-ꓢꓯ-ꓡꓳ ꓡꓰ ꓐꓳ ꓔꓸ ꓡꓳ꓿
ꓡꓯꓼ ꓫꓴ ꓕꓱ ꓟ ꓠꓬ ꓗꓴꓷꓼ ꓡ ꓨꓑ ꓔꓯˍ ꓡꓰꓽ ꓖꓶ ꓔꓬ ꓟ ꓥ ꓢꓲꓸ ꓕꓱ ꓡꓱ ꓐꓶꓽ ꓗꓴꓷꓼ ꓡ ꓞꓳ ꓔꓯ ꓖꓶˍ ꓟ ꓠꓬ ꓬꓲꓸ ꓪꓴꓸ ꓕꓲꓽ ꓧꓪꓹ ꓥ ꓡꓳ꓿ ꓑ-ꓢꓯ-ꓡꓳ ꓡꓰ ꓐꓳ ꓔꓸ ꓟ “ꓠꓯꓺ ꓞꓲꓹ ꓠꓯ ꓕꓳꓽ ꓟ ꓗꓪ 100 ꓠꓬꓲ (Hundred Days in Darkness)” ꓕꓳ ꓶ ꓑꓶꓸ ꓓꓴ ꓥ ꓡꓳ꓿
ꓕꓳ ꓶ ꓕꓱ ꓕꓲꓽ ꓑꓷꓠ ꓔꓯ ꓟꓬ-ꓟ ꓥꓳꓽ ꓗꓪ ꓐꓰ ꓗꓳ-ꓣꓲ-ꓬ ꓥꓳꓽ ꓗꓪ ꓡꓶꓸ ꓢꓲꓸ ꓪꓴꓽ ꓪˍ ꓟ ꓒꓴ ꓮ ꓙꓵꓽ ꓥ ꓟꓲ ꓟꓬ-ꓟ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓐꓱ ꓶ ꓔꓲꓺ ꓖꓶ ꓔꓸ ꓡꓳ꓾ ꓐꓰ ꓑ-ꓢꓯ-ꓡꓳ ꓡꓰ ꓐꓯ ꓡꓳ꓿ ꓖꓴ ꓟꓶꓸ ꓗꓳ-ꓣꓲꓸ-ꓬ ꓗꓪ ꓑ-ꓢꓯ-ꓡꓳ ꓕꓳ ꓶ ꓔꓯ ꓪꓴꓻ ꓵꓺ ꓢꓴ ꓮ ꓟꓬꓹ ꓙꓳ ꓢꓲ꓾ ꓮ ꓘꓶꓸ ꓪꓴꓽ ꓪ ꓟ ꓕꓳ ꓶ ꓕꓲꓽ ꓑꓷꓠ ꓒꓬꓱꓼ ꓡ ꓔꓬ ꓡꓳ꓿
ꓑ-ꓢꓯ-ꓡꓳ ꓠꓬ ꓟꓬ-ꓟ ꓑ ꓫꓬ ꓕꓲꓽ ꓛꓱꓽ ꓗꓪ ꓦꓰꓼ ꓢꓲ꓾ ꓟꓯꓼ ꓡꓰ ꓙꓵꓽ ꓪ ꓣꓱꓽ ꓔꓬ ꓟ ꓔꓯ ꓕꓳꓽ ꓶ ꓐꓳ ꓢꓲꓸ ꓔꓳꓹ ꓔꓬ ꓢꓴ꓾ ꓔꓲꓺ ꓒꓴ ꓧꓪ ꓢꓲꓸ ꓑ ꓫꓬ ꓙꓵꓽ ꓪ ꓡꓲꓸ ꓟꓶ ꓠꓹ ꓟ ꓚꓱꓹ ꓢꓯꓼ ꓕꓵꓼ ꓔꓬ ꓢꓴ ꓕꓲꓽ ꓣꓳ ꓥ ꓡꓳ꓿
