ꓑꓴ-ꓔ-ꓳ ꓕꓲ ꓟꓵꓽ ꓡꓱꓸꓼ ꓗꓪ ꓬꓯꓻ ꓗꓸ ꓔꓬ ꓢꓴ 4099 ꓣꓳ ꓛꓲ ꓙꓳˍ ꓡꓳ ꓐꓰ ꓩꓽ ꓡ ꓟ ꓠꓯ ꓞꓲꓼ ꓣꓱꓽ ꓢꓴ ꓔꓯ ꓟꓳꓸ ꓧꓪ ꓟꓰꓹ ꓜꓴ (ꓢꓮꓣꓮ) ꓡꓰ ꓧꓪ ꓟꓰꓹ ꓓꓳ ꓩꓴ ꓡ ꓡꓳ=
ꓢꓮꓣꓮ ꓜꓴ ꓡꓰ 2021 ꓘꓳꓼ ꓬꓲꓸ ꓪꓴꓸ ꓦ ꓐ ꓢꓽ ꓟ ꓘꓴꓽ ꓗꓪ ꓑꓴ-ꓔ-ꓳ ꓟꓵꓽ ꓗꓪ ꓞꓳ ꓘꓹ (13) ꓘꓹ ꓐꓰ꓾ ꓡꓳ ꓒꓱ ꓗꓪ ꓟ ꓘꓹ ꓒꓱꓻ (3) ꓟ ꓗꓪ ꓟ ꓡ ꓞꓳ ꓐꓴ ꓔꓯ ꓠꓻ ꓠꓬꓲ ꓧꓪ ꓟꓰꓹ ꓗꓷ ꓟ ꓥ ꓡꓳ ꓐꓯ_ ꓡꓳ=
ꓘꓹ ꓤ ꓡꓳ ꓤ ꓗꓪ ꓐꓰ ꓐꓯ ꓠꓬ ꓟ-ꓜꓯꓽ ꓘꓹ ꓠꓬ ꓬꓯ ꓜꓱꓽ ꓢꓴ ꓮ ꓟꓬꓹ ꓙꓳ_ ꓟ ꓘꓹ ꓕꓲ ꓟ ꓥ ꓢꓲ꓾ ꓖꓳ ꓟ ꓗꓸ ꓠꓯꓸ ꓢꓲ ꓗꓪ ꓡꓴ-ꓫ-ꓬ꓾ ꓡ-ꓓꓳꓹ꓾ ꓟꓶ-ꓡ-ꓫꓵ-ꓓꓰ ꓐꓴ ꓖꓼ ꓔꓬ ꓡꓳ= ꓧꓪ ꓟꓰꓹ ꓠꓬꓲ ꓗꓪ ꓟ ꓘꓹ ꓐꓴ ꓗꓪ ꓐꓰ ꓬꓯ ꓜꓱꓽ ꓢꓴ ꓮ ꓘꓶꓸ ꓠꓲꓸ_ ꓟ ꓘꓹ ꓠꓬ ꓠꓟ-ꓕꓶ-ꓘꓴꓸ ꓐꓰ ꓑ-ꓟꓶ-ꓓꓰ ꓘꓹ ꓐꓴ ꓥ ꓡꓳ=
ꓵꓺ ꓟꓬꓱꓺ ꓟꓳꓸ ꓖꓶ ꓡ ꓟ
ꓜꓴ ꓕꓱ ꓟ ꓡꓰ ꓧꓪ ꓟꓰꓹ ꓩꓴ ꓡ ꓟ ꓡꓳ ꓚꓺ ꓐꓯ ꓠꓬ ꓑꓴ-ꓔ-ꓳ ꓟꓵꓽ ꓗꓪ 15 ꓘꓳꓼ – 39 ꓘꓳꓼ ꓗꓪ ꓛꓲ ꓟ ꓞꓳ ꓡꓱ ꓐꓴ 30% ꓠꓬ ꓩꓽ ꓡ_ ꓟ ꓬꓯ ꓒꓲꓸ ꓣꓱꓽ ꓔꓬ ꓟ_ ꓢꓪꓼ ꓓꓳ ꓩꓴ ꓔꓸ ꓡꓳ=
ꓪꓴ-ꓢ ꓔꓯ ꓦ ꓡꓱ ꓢꓴ ꓘꓴ ꓜꓲꓼ ꓞꓳ ꓐꓴ꓾ ꓗꓴꓷꓼ ꓙꓵꓽ ꓢꓴ ꓡꓳꓸ ꓢꓴ ꓐꓴ꓾ ꓞꓳ ꓘꓹ ꓡ ꓞꓳ ꓮ ꓙꓵꓽ ꓡꓯ ꓒꓯꓹ ꓣꓱꓽ ꓡꓯ ꓘꓳ ꓢꓲꓸ ꓩꓽ ꓡ_ ꓟ ꓬꓯ ꓣꓱꓽ ꓔꓬ ꓟ ꓚꓱꓹ ꓕꓱ ꓟ ꓠꓽ ꓡꓰ ꓠꓹ ꓟ ꓬꓲꓸ ꓚꓱꓹ ꓧꓪ ꓠꓯ_ ꓡꓳ ꓐꓰ ꓢꓮꓣꓮ ꓡꓰ ꓬꓲꓼ ꓠꓬꓲꓸ ꓢꓯꓼ ꓖꓶꓽ ꓔꓸ ꓡꓳ=
ꓑꓴ-ꓔ-ꓳ ꓗꓪ ꓟ ꓡ ꓞꓳ ꓵꓺ ꓟꓬꓱꓺ ꓠꓬ 61075 ꓣꓳ ꓙꓳ ꓢꓲ꓾ 4774 ꓣꓳ ꓠꓬ ꓬꓯ ꓜꓱꓽ ꓢꓴ ꓥ ꓡꓳ꓿ ꓖꓳ ꓟ ꓗꓪ ꓐꓰ ꓫꓵꓽ ꓙꓴꓽ ꓗꓪ ꓬꓯꓺ ꓗꓸ ꓔꓬ ꓢꓴ 4099 ꓣꓳ ꓙꓳˍ ꓡꓳ ꓐꓰ ꓢꓮꓣꓮ ꓡꓰ ꓧꓪ ꓟꓰꓹ ꓔꓸ ꓟ ꓥ ꓡꓳ=
