အမေရိကန်ပြည်ထောင်စုမှာ ကိုရိုနာဗိုင်းရပ်စ် ကပ်ရောဂါဆိုင်ရာ အရေးပေါ်အကူအညီ နောက်တကြိမ် ထပ်ပေးရေးကိစ္စ လွှတ်တော်တွင်း လအတော်ကြာ ဆွေးနွေးနေရာကနေ သဘောတူညီချက်တခု ရတော့မယ့် အလားအလာရှိလာတဲ့အကြောင်း ပါတီနှစ်ရပ်လုံးရဲ့ ခေါင်းဆောင်တွေက အင်္ဂါနေ့နှောင်းပိုင်းမှာပြောပါတယ်။
အောက်လွှတ်တော် လူနည်းစုခေါင်းဆောင် Kevin McCarthy က “လမ်းကြောင်းမှန်ပေါ် ရောက်နေပြီလို့ ကျနော်ယူဆပါတယ်၊ သဘောတူညီချက် ရနိုင်ခြေရှိလာပြီလို့ ယူဆပါတယ်။” ဆိုပြီး ဆွေးနွေးပွဲ နှစ်အကြိမ်အပြီးမှာ ပြောခဲ့ပါတယ်။
ဆွေးနွေးပွဲမှာ အောက်လွှတ်တော်ဥက္ကဋ္ဌ Nancy Pelosi ၊ အထက်လွှတ်တော် လူနည်းစုခေါင်းဆောင် Chuck Schumer နဲ့ လူများစုခေါင်းဆောင် Mitch McConnell တို့လည်း ပါဝင်ပါတယ်။
မစ္စတာ Schumer က “တိုးတက်မှုရနေပြီး မကြာခင်မှာ သဘောတူညီချက်ရလာဖို့ မေ ျှာ်လင့်ပါတယ်။ သဘောတူညီချက်တခုရဖို့ စစ်မှန်တဲ့ ဆန္ဒတခုရှိနေတယ်လို့ ကျနော်ယူဆပါတယ်။” ဆိုပြီး ပြောပါတယ်။
သဘောတူညီချက်တခုသာ မရဘူးဆိုရင် အရေးပေါ် အကူအညီပေးထားတဲ့ အဓိက အစီအစဉ် အများအပြားဟာ ဒီလကုန်မှာ သက်တမ်းကုန်သွားမှာဖြစ်ပါတယ်။
ဒီထဲမှာ အလုပ်လက်မဲ့ဖြစ်နေသူ အမေရိကန် ၁၂ သန်းကို ပေးနေတဲ့ အလုပ်လက်မဲ့ထောက်ပံ့ကြေး အစီအစဉ်နဲ့ အိမ်ငှားခမပေးနိုင်တဲ့ ခန့်မှန်းခြေ အမေရိကန် သန်း ၄၀ ဆောင်းရာသီကာလအတွင်း နေအိမ်တွေကနေ နှင်ချမခံရအောင် ဆိုင်းထားပေးတဲ့ အစီအစဉ်တွေလည်း ပါဝင်ပါတယ်။
