ꓡ ꓞꓳ ꓬꓲꓸ ꓜꓴ ꓡꓰ ꓖꓪ ꓙꓱ ꓖꓪ ꓟꓴ ꓢꓲꓸ ꓧꓳꓽ ꓪꓴꓸ ꓟꓴˍ ꓟ ꓗꓴꓷꓼ ꓙꓵꓽ ꓚꓱꓹ ꓔꓯ ꓓꓰ-ꓟꓳ-ꓗꓯ-ꓢꓰ ꓐꓯ ꓡꓳ= ꓖꓳ ꓡꓱ ꓮ ꓟꓬꓹ ꓪꓽ ꓡ ꓗꓪ ꓛꓲ ꓖꓪ ꓙꓱ ꓠ ꓔꓸ ꓠꓬꓲ꓾ ꓬꓲꓸ ꓙꓵꓹ ꓮ ꓘꓶꓸ ꓪꓽ ꓐꓶ ꓡꓳ꓿ ꓒꓶꓻ ꓟꓸ ꓖꓶ ꓠꓹ ꓟ ꓢꓯꓼ ꓪ ꓮ ꓘꓶꓸ꓾ ꓗꓸ ꓚꓵ ꓮ ꓘꓶꓸ ꓣꓱꓽ ꓬꓯꓼ ꓡꓳ꓿ ꓕꓲ ꓣꓳ꓾ ꓕꓲ ꓜꓴ ꓬꓰ ꓠꓲꓹ ꓫꓵ ꓟ ꓔꓯ ꓠꓲꓹ ꓞ ꓠꓲꓹ ꓧꓳꓽ ꓬꓰ ꓟꓽ ꓐ ꓡ= ꓕꓱ ꓟ ꓠꓬ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓗꓪ ꓟꓽ ꓙꓲ_ ꓟ ꓕꓲ ꓒꓳꓹ (ꓢꓯꓼ ꓐꓽ ꓓꓴ) ꓥ ꓡꓳ= ꓖꓳ ꓡꓱ ꓥ ꓟꓲ ꓟꓲ ꓠꓯ ꓗꓪ ꓡ ꓞꓳ ꓐꓴ ꓡꓰꓽ ꓚꓰꓼ ꓓꓳ ꓡ ꓗꓷ ꓟ ꓙꓵꓽ ꓚꓱꓹ ꓟꓴ ꓚꓱꓹ ꓮ ꓟꓬꓹ ꓫꓵꓽ ꓗꓪ ꓐꓰ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓠꓬ ꓡ ꓞꓳ ꓮ ꓟꓬꓹ ꓠꓲꓹ ꓘꓪ ꓫꓵ ꓡꓰ ꓝꓲ ꓐ ꓡˍ ꓟ ꓙꓵꓽ ꓚꓱꓹ ꓕꓲ ꓟ ꓥ ꓡꓳ= ꓖꓪ ꓙꓱ ꓐ ꓡˍ ꓟ ꓙꓵꓽ ꓚꓱꓹ ꓥ ꓡꓳ꓿
ꓝꓮꓲ ꓕꓲ ꓣꓳ꓾ ꓕꓲ ꓜꓴ_ ꓡꓰ ꓙꓵꓽ ꓢꓲꓸ ꓡ ꓞꓳ ꓮ ꓟꓬꓹ ꓔꓯ ꓛꓳ ꓝꓲ_ ꓟ ꓚꓱꓹ ꓠꓬ ꓬꓲꓸ ꓜꓲꓽ ꓬꓲꓸ ꓥꓳꓹ ꓙꓵꓽ ꓚꓱꓹ ꓥ ꓡꓳ= ꓕꓱ ꓡꓱ ꓬꓰ_ ꓟ ꓗꓪ ꓐꓰ ꓮ ꓟꓬꓹ ꓠꓬ ꓢꓲ ꓡꓲꓹ ꓟ ꓟꓽ ꓙꓳ꓾ ꓠꓲꓹ ꓘꓪꓽ ꓟꓽ ꓫꓵ꓾ ꓫꓸ ꓙꓵ ꓟꓷꓼ ꓙꓲ ꓡꓰ ꓝꓲ ꓡꓳ= ꓕꓱ ꓟ ꓠꓬ ꓕꓲ ꓣꓳ꓾ ꓕꓲ ꓜꓴ ꓗꓹ ꓛꓲ ꓛꓲ꓾ ꓧꓪꓸ ꓡꓲ ꓡꓲ ꓙꓵꓽ ꓢꓲꓸ ꓮ ꓟꓬꓹ ꓔꓯ ꓠꓲꓹ ꓟ ꓠꓻ ꓡꓰ ꓝꓲ_ ꓟ꓾ ꓫꓸ ꓙꓵ ꓝꓲ_ ꓟ ꓙꓵꓽ ꓚꓱꓹ ꓥ ꓡꓳ=
ꓟꓬ-ꓟ ꓗꓴꓷꓼ ꓠꓬ 2010 – 2020 ꓘꓳꓼ ꓗꓪ ꓛꓲ ꓮ ꓡꓻ 10 ꓘꓳꓼ ꓛꓲ ꓠꓬ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓔꓯꓸ ꓟꓳꓸ ꓙ ꓖꓴ ꓫꓱꓽ ꓗꓷꓳ=
ꓒ ꓛꓲ ꓒ ꓡꓳꓼ꓾ ꓐꓲ ꓜꓲꓼ ꓜꓲꓼ ꓠꓽ ꓟꓽ ꓥ= ꓖꓳ ꓡꓱ ꓥ ꓟꓲ 2021 ꓘꓳꓼ 2 ꓦ 1 ꓠꓬꓲ ꓗꓪ ꓐꓰ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓗꓪ ꓐꓰ ꓧꓹ ꓗꓷ ꓢꓲ꓾ ꓟꓯꓼ ꓜꓲꓽ ꓓꓽ ꓐꓰ ꓬꓲꓸ ꓛꓳ ꓒꓯꓹ ꓕꓲ ꓜꓴ ꓠꓲꓹ ꓡꓶꓽ ꓗꓪ ꓐꓰ ꓗꓴꓷꓼ ꓔꓯ ꓙꓵꓽ ꓩꓴ ꓡ ꓡꓳ=
ꓬꓲꓸ ꓪꓴꓸ ꓕꓯꓽ ꓠꓬ ꓮ ꓙꓵꓽ ꓟ ꓕꓯ ꓢꓲ ꓔꓱꓹ ꓜꓳꓽ ꓡꓰ ꓠ ꓙꓵꓽ ꓓꓴ꓾ ꓮ ꓕꓯꓽ ꓟꓽ ꓙꓳ ꓠꓬꓲꓳ ꓫꓵꓽ ꓮ ꓔꓳꓸ ꓙꓼ ꓟꓯꓹ ꓕꓸ ꓙꓳ ꓡꓰ ꓝꓲ ꓓꓴ꓾ ꓗꓳ-ꓪꓰꓼ ꓠꓻ ꓫꓬꓹ ꓠꓯ ꓞꓲꓼ ꓙꓳ ꓡ ꓝꓲ ꓓꓴ ꓕꓱ ꓡꓱ ꓮ ꓘꓶꓸ ꓐꓯ ꓢꓲꓸ 2021 ꓘꓳꓼ ꓗꓪ ꓐꓰ ꓟꓯꓼ ꓡꓰꓽ ꓙꓵꓽ ꓪꓴꓸ ꓔꓴ ꓡ ꓡꓳ=
ꓠꓬꓲꓸ ꓠꓬꓲ ꓕꓲ ꓘꓳꓼ ꓐꓲ ꓡ ꓗꓸ ꓠꓯꓸ ꓪꓴꓽ ꓟꓴ ꓡ_ ꓡ? ꓪꓴꓸ ꓔꓲꓸ ꓞꓰ ꓡꓰ_ ꓡ?
ꓟꓯꓼ ꓡꓰ ꓙꓵꓽ ꓡ ꓟ ꓔꓯ ꓔꓳꓹ ꓢꓴ ꓢꓷ ꓠꓲꓹ ꓢꓷ ꓒꓽ ꓮ ꓙꓵꓽ ꓔꓯ ꓝꓴꓲꓸ ꓧꓪ ꓔꓬ ꓡꓳ꓿ ꓟꓬꓱ ꓓꓳꓽ ꓙꓳ ꓢꓴ ꓮ ꓙꓵꓽ ꓔꓯ ꓐꓯ ꓟꓴ ꓩꓴ ꓔꓸ ꓡꓳ꓿ ꓦꓲ ꓮ ꓙꓵꓽ ꓑꓲꓸ ꓞꓲꓽ ꓔ ꓡꓳ꓿ ꓮ ꓟꓶ ꓠꓬ ꓟꓯꓼ ꓔꓯ ꓔꓳꓹ ꓢꓴ ꓕꓳ ꓶ ꓐꓳ ꓒꓽ ꓐꓴ ꓕꓳ ꓶ ꓑꓷꓠ ꓪꓴꓽ ꓟꓽ ꓓ ꓐꓰ 2022 ꓘꓳꓼ 3 ꓦ ꓬꓲꓸ ꓪꓴꓸ ꓕꓲ ꓠꓽ ꓗꓪ ꓕꓵꓼ ꓪ ꓓꓳ ꓡ ꓡꓳ꓿
ꓠꓬꓲꓸ ꓠꓬꓲ 2022 ꓘꓳꓼ 3 ꓦ 3 ꓠꓬꓲ ꓗꓪ ꓛꓲ ꓡ ꓠꓬ꓾ ꓬꓥ-ꓖꓳ ꓕꓲ ꓟꓵꓽ ꓗꓪ ꓙꓼ ꓮ ꓔꓳꓸ ꓖꓶꓽ ꓟꓽ ꓐ ꓡꓻꓳ= ꓕꓲ ꓠꓬꓲ ꓗꓪ 12 ꓙꓵꓹ ꓕꓯ ꓢꓲ ꓠꓯ ꓞꓲꓹ ꓠꓯ ꓕꓳꓽ ꓗꓷ ꓡꓰꓳ= ꓟꓬꓱꓽ ꓬꓰ ꓢꓴ ꓮ ꓡꓲ ꓡꓲꓸ ꓬꓰ ꓟꓽ ꓙꓲ ꓡꓰꓳ=
ꓶ ꓡꓯꓼ ꓜꓴ ꓐꓴ ꓮ ꓟꓬꓹ ꓛꓰꓹ ꓡꓽ ꓙꓰꓳ= ꓑ ꓫꓬ ꓐꓴ ꓠꓬ ꓟꓬꓱꓽ ꓟꓽ ꓙꓳ ꓢꓴ ꓙꓳꓸ ꓙꓳꓽ ꓗ ꓡ ꓔꓬꓳ=
ꓲꓠꓔꓰꓣꓠꓰꓔ ꓒꓵꓽ ꓠꓬ 2 ꓝꓸ ꓓꓯꓻ ꓙꓰꓳ=
ꓟꓳ-ꓓꓳ ꓙꓼ ꓞꓶ ꓒꓵꓽ ꓠꓬ 3 ꓝꓸ ꓓꓯꓻ ꓙꓰꓳ=
ꓗꓴꓷꓼ ꓫꓵꓽ ꓪꓴ ꓟꓸ ꓟꓲꓽ ꓔꓯ ꓒꓴ ꓒꓴ ꓡꓯꓽ ꓡꓯꓽ ꓖꓪ ꓙꓱ ꓑꓶꓸ ꓢꓴ ꓟꓽ ꓙꓳ ꓡꓰꓳ=
ꓙ ꓖꓴ ꓓꓵ ꓓꓳ ꓚꓳ ꓥ ꓟꓲ꓾ ꓚꓲ ꓚꓬ ꓩꓴꓸ ꓔꓯ ꓒꓴ ꓒꓴ ꓡꓯꓽ ꓡꓯꓽ ꓟꓸ ꓟꓽ ꓑꓶꓸ꓾ ꓚꓬ ꓠ ꓗꓷ ꓡꓰꓳ=
ꓗꓳꓸ ꓗꓷ ꓟ 10 ꓘꓳꓼ ꓗꓪ ꓙꓳ ꓗꓷ ꓟ ꓮ ꓙꓵꓽ ꓪꓴꓸ ꓔꓲꓸ ꓑ ꓬꓰꓳ=
ꓬꓲꓸ ꓐꓶꓹ ꓜꓳꓽ ꓡ꓾ ꓙꓲ ꓡ꓾ ꓪꓴꓽ ꓟꓴ ꓡ ꓚꓱꓹ ꓠꓬ ꓠꓯ ꓞꓲꓹ ꓞꓲꓹ ꓗꓷ ꓡꓰꓳ=
ꓮ ꓟꓶ ꓮ ꓔꓳꓸ ꓙꓼ ꓙꓼ ꓪꓴ ꓓꓴ ꓥꓳ ꓐꓰ ꓗꓴꓷꓼ ꓙꓵ ꓜꓴ ꓡꓰ ꓘꓴ ꓔꓬꓳ= ꓮ ꓔꓳꓸ ꓙꓼ ꓟꓯꓹ ꓕꓸ ꓠꓬ ꓮ ꓡꓲ ꓗꓪ ꓙꓰ ꓡꓲꓸ ꓟꓽ ꓢꓷꓸꓳ=
ꓟꓯꓼ ꓙꓵꓽ ꓚꓱꓹ ꓗꓪ꓾ ꓮ ꓡꓲ ꓗꓶꓸ ꓐ ꓡ ꓗꓶꓸ꓾ ꓮ ꓡꓲ ꓒꓯꓸ ꓐ ꓡ ꓒꓯꓸ꓾ ꓮ ꓡꓲ ꓥꓰꓸ ꓐ ꓡ ꓥꓰꓸ …. ꓖꓳ ꓡꓱ ꓥ ꓟꓲ ꓫꓸ ꓕꓱ ꓘꓶꓽ ꓗꓪ ꓠꓽ ꓪꓴ-ꓢ ꓒ ꓕꓲ ꓗꓪ ꓕꓲ ꓣꓳ ꓟ ꓡꓰ ꓐꓰ ꓔꓱꓹ ꓜꓳꓽ ꓢꓴ꓾ ꓠꓲꓹ ꓟ ꓙꓲ ꓢꓴ꓾ ꓙꓲˍ ꓟ ꓬꓰ ꓢꓴ ꓿꓿꓿꓿꓿
ꓳꓸ ꓔꓲꓸ ꓑ ꓬꓰꓳ꓿
