2023 ꓘꓳꓼ 2 ꓦ 4 ꓠꓬꓲ ꓕꓯꓽ ꓴꓢꓮ ꓟꓴ ꓪꓴꓽ ꓗꓪ ꓮ’ ꓔꓬ ꓟ ꓧꓶꓽ ꓒꓽ ꓛꓽ ꓓꓴ ꓒꓴꓽ ꓡꓴꓸ ꓕꓲꓽ ꓢꓶ ꓔꓯ ꓴꓢꓮ ꓟꓯꓼ ꓡꓰ ꓬꓲꓻ ꓡꓴꓽ ꓐꓱ ꓗꓪ ꓐꓶ ꓞꓰ ꓩꓴꓳ꓿
“ꓠꓲꓹ ꓞ ꓐꓶ ꓞꓰ ꓩꓴ ꓓꓴ ꓥ ꓠꓰ ꓕꓵꓼ ꓪ ꓖꓶ ꓔꓸꓳ ꓫꓵꓽ ꓥꓳ” ꓐꓰ ꓴꓢꓮ ꓗꓴꓷꓼ ꓙꓵꓽ ꓢꓴ ꓙꓳꓹ-ꓐ-ꓓꓲ ꓡꓰ ꓐꓯ ꓡꓳ꓿
“ꓣꓳ ꓟꓵꓽ ꓔꓯ ꓧꓶꓽ ꓒ ꓠꓰ ꓟꓽ ꓒꓵꓽ ꓟꓽ ꓚ ꓬꓰ ꓝꓲ ꓟꓽ ꓓ (We should not have let the People’s Republic of China make a mockery of our airspace)” ꓐꓰ ꓴꓢꓮ ꓑ ꓫꓬ ꓝꓲ ꓓꓴ ꓟꓲꓼ-ꓛꓲ ꓟꓯꓼ-ꓚꓳ-ꓠꓯ (Mitch McConnell) ꓡꓰ ꓐꓯ ꓡꓳ꓿
ꓒꓴ ꓡꓴꓸ ꓕꓱ ꓟ ꓑꓶꓸ ꓓꓴ ꓴꓢꓮ ꓐꓶ ꓗꓴꓷꓼ ꓔꓯ ꓟꓳꓸ ꓙ ꓡꓯ ꓘꓳ ꓢꓲꓽ ꓒ ꓐꓶ-ꓡꓲ-ꓗꓲ ꓠꓬ ꓧꓶꓽ ꓗꓴꓷꓼ ꓗꓪ ꓙꓰ ꓓꓴ ꓝꓰꓹ ꓔꓸ ꓟ ꓚꓱꓹ ꓔꓯ ꓒꓬꓹ ꓩꓴ ꓗꓷ ꓡꓳ꓿
ꓕꓱ ꓟ ꓑꓶꓸ ꓓꓴ ꓧꓶꓽ ꓒ ꓗꓴꓷꓼ ꓠꓬ ꓠꓲꓹ ꓢꓲꓼ ꓠꓲꓹ ꓞꓰꓹ ꓘꓶꓽ ꓕꓱ ꓡ ꓩꓴ ꓡ ꓡꓳ꓿ “ꓟꓯꓼ ꓐꓱ ꓶ ꓛꓽ ꓓꓴ ꓟꓽ ꓥ꓾ ꓟꓲꓽ ꓦꓲ ꓟꓶ ꓦ ꓚꓱꓹ ꓢꓪꓼ ꓟꓰꓹ ꓠꓬꓲ ꓓꓴ ꓥꓳ= ꓕꓱ ꓡꓱ ꓐꓶ ꓞꓰ ꓩꓴ ꓡ ꓟ ꓠꓬ ꓬꓰ ꓙꓲꓽ ꓟꓽ ꓙꓳ” ꓐꓰ ꓧꓶꓽ ꓗꓴꓷꓼ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓐꓯ ꓔꓬ ꓡꓳ꓿
ꓮ ꓟꓶ ꓠꓱꓸ ꓐꓯꓼ ꓒꓴꓽ ꓡꓴꓸ ꓕꓲꓽ ꓢꓶ ꓥ ꓟꓲ ꓡꓯ-ꓔꓲ ꓮ-ꓟꓯ-ꓣꓲ-ꓗ ꓟꓵꓽ ꓕꓯꓽ ꓢꓲ ꓮ’ ꓔꓬ ꓡꓳ꓿ ꓖꓳ ꓟ ꓥ ꓟꓲ ꓧꓶꓽ ꓒꓽ ꓡꓰ ꓶ ꓤꓼ ꓥꓳ ꓐꓯ ꓡꓳ꓿
“ꓟꓲꓽ ꓦꓲ ꓚꓱꓹ ꓑꓶꓸ ꓓꓴ ꓧꓶꓸ ꓙꓰ ꓟ ꓥꓳ꓿ ꓮ ꓡꓲ ꓕꓲ ꓗꓴꓷꓼ ꓐꓱ ꓶ ꓥ ꓟꓲ ꓙꓲ ꓣꓴꓽ ꓓꓴ ꓟꓽ ꓙꓳ” ꓐꓰ ꓧꓶꓽ ꓒ ꓗꓴꓷꓼ ꓗꓪ ꓐꓰ ꓫꓸ ꓕꓱ ꓢꓴ ꓟꓮꓳ-ꓠꓰꓹ (Mao Ning) ꓡꓰ ꓐꓯ ꓡꓳ꓿
ꓒꓴꓽ ꓡꓴꓸ ꓕꓱ ꓕꓲ ꓩꓴꓸ ꓠꓬ ꓙꓱ ꓦꓲ ꓙꓱˍ ꓟ ꓚꓱꓹ ꓔꓯ ꓙꓻ ꓙꓰ ꓢꓲꓸ ꓮ ꓟꓴꓹ ꓟꓴ ꓗꓪ ꓮ’ ꓚꓳ ꓔꓬ ꓟ ꓥ ꓡꓳ꓿
ꓟꓲ ꓠꓯ ꓚꓺ ꓟꓲꓽ ꓗꓪ꓾ 2 ꓧꓪꓹ ꓕꓲ ꓧꓪꓮꓜ ꓟꓲ ꓠꓯ ꓟꓯꓼ ꓘꓶꓽ ꓗꓪ ꓴꓢꓮ ꓡꓰ ꓛꓽ ꓓꓴ ꓒꓴꓽ ꓡꓴꓸ ꓣꓱꓽ ꓝꓳ ꓡꓳ꓿
