ꓧꓶꓸ ꓕꓯ ꓪ ꓚꓲ ꓪ ꓐꓽ ꓗꓪ ꓔꓬ ꓟ ꓦꓬꓼ ꓠꓬꓲ ꓗꓪ ꓡꓲ-ꓢꓴ ꓐꓴ ꓠꓯꓸꓼ ꓗꓪ ꓠꓲꓽ ꓟꓯꓹ ꓟꓯꓹ ꓡ ꓢꓴ ꓙꓳ ꓚꓰꓼ= ꓠꓲꓽ ꓠꓬ ꓗꓪ ꓛꓳꓽ ꓑ ꓓꓴ ꓥꓳ ꓐꓯ ꓢꓲ ꓶꓽ ꓤ ꓗꓪ ꓙꓰ ꓢꓲꓸ ꓡ ꓞꓳ ꓔꓯ ꓓꓵꓽ ꓡ ꓚꓰꓼ꓾ ꓫꓸ ꓕꓱ ꓡ ꓚꓰꓼ ꓥ= ꓟꓬ ꓢꓶꓽ ꓡꓰ ꓟꓽ ꓟꓳ ꓕꓲ ꓖꓼ ꓔꓲꓸ꓾ ꓠꓲꓽ ꓬꓲꓸ ꓫꓸ ꓕꓱ ꓠꓲꓹ ꓫꓵ ꓟ ꓮ ꓙꓵꓽ ꓡ ꓞꓳ ꓗꓪ ꓐꓰ ꓕꓲ ꓝꓸ ꓫꓸ ꓕꓱ ꓡ ꓡꓳ= “ ꓥꓪ ꓗ ꓛꓳꓽ ꓚꓸ ꓗꓹ ꓡꓻꓳ ꓫꓵꓽ ꓥ ꓐꓯ ꓢꓲ ꓫꓸ ꓕꓱ ꓡ ꓚꓰꓼ ꓥ” ꓐꓯ ꓢꓲ ꓡ ꓞꓳ ꓕꓲ ꓣꓳ ꓗꓪ ꓐꓰ ꓠꓲꓽ ꓫꓸ ꓕꓱ ꓠꓲꓹ ꓫꓵ ꓟ ꓕꓱ ꓓꓳ ꓡ ꓚꓰꓼ= ꓠꓲꓽ ꓟꓯꓹ ꓢꓴ ꓔꓯ ꓔꓳꓹ ꓜꓳ ꓗꓷ ꓟ ꓟꓸ ꓒ ꓟꓯꓼ-ꓮ-ꓢꓯꓸ ꓡꓰ ꓕꓱ ꓡꓱ ꓚ ꓟꓸ ꓖꓶ ꓡ ꓡꓳ=
[ꓬꓲꓸ ꓪꓴꓸ ꓕꓲ ꓣꓳ ꓠꓬ꓾ ꓮ ꓠꓬꓲ ꓮ-ꓥꓰ ꓧꓶꓹ-ꓮ-ꓓꓳꓽ ꓔꓯ ꓠꓲꓽ ꓟꓯꓹ ꓟꓯꓹ ꓡ ꓕꓯ ꓕꓱ ꓡꓱ ꓫꓸ ꓕꓱ ꓥ= “ꓭꓸ ꓦ ꓐ ꓮ-ꓬꓳꓹ ꓥ= ꓭꓸ ꓠꓲꓹ ꓛꓵꓼꓮ ꓬꓳꓹ-ꓚ ꓥ= ꓠꓬꓲꓽ ꓟꓶꓽ ꓚ ꓒꓽ ꓠꓬꓲ ꓚ ꓒꓽ꓾ ꓠꓬꓲꓽ ꓢꓲꓸ ꓜꓽ ꓒꓽ ꓠꓬꓲꓽ ꓜ ꓒꓽ= ꓸꓸꓸ ꓕꓱ ꓡꓱ ꓬꓲꓸ ꓐꓯ ꓠꓲꓹ ꓫꓵ ꓟ ꓬꓲ ꓫꓵ ꓬꓲ ꓙꓰ ꓐꓯ ꓓꓳ ꓡꓰ ꓗꓸ ꓠꓯꓸ “ꓭꓸ ꓦ ꓐ ꓐ ꓙꓰ ꓥꓳ꓾ ꓭꓸ ꓠꓲꓹ ꓛꓵꓼ ꓗꓪ ꓛꓵꓼ ꓙꓰ ꓥꓳ=” ꓖꓳ ꓡꓱ ꓐꓯ ꓢꓲ ꓕꓲ ꓑꓹ ꓗꓪ ꓠꓬ ꓫꓬ ꓡ ꓡꓳ= ꓮ’ ꓡꓽ ꓮ’ ꓡꓽ ꓮ’ ꓗꓹ ꓠꓲ꓾ ꓛꓬꓸ ꓥꓳ ꓛꓬꓸ ꓟ ꓡꓰ ꓐꓰ ꓔꓶꓹ ꓚꓳ ꓚꓰꓼ ꓥ= ꓝꓮꓲ ꓕꓲ ꓘꓶꓽ ꓠꓲꓽ ꓟꓯꓹ ꓢꓴ ꓮ ꓠꓬꓲ ꓮ-ꓥꓰ ꓧꓶꓹ-ꓮ-ꓓꓳꓽ ꓡꓰ ꓐꓯ ꓖꓶ ꓡ ꓟ ꓠꓬ꓾ ꓥꓪ ꓠꓴ ꓕꓲ ꓦꓲ ꓐꓱ ꓶ ꓧꓪꓽ ꓫꓵ ꓠꓲꓽ ꓬꓲꓸ ꓟꓬꓱꓺ ꓠꓬ ꓙꓽ-ꓟ-ꓫꓳꓹ ꓟꓬꓱꓺ ꓥ ꓙꓳꓽ= ꓮ ꓛꓵꓼ ꓧꓶꓸ ꓕꓯ ꓢꓲꓺ ꓩꓴ ꓡ ꓙꓳꓽ ꓐꓯ ꓡꓳ= ꓖꓳ ꓕꓯ ꓥꓪ ꓠꓴ ꓢꓲꓸ ꓢꓰꓼ ꓜ ꓟꓽ ꓗꓴꓸ ꓠꓬꓲ ꓧꓪ ꓟꓽ ꓜꓽ ꓪ= ꓮ ꓟ ꓝꓱ-ꓮ-ꓩꓴꓸ ꓬꓯꓼ ꓛꓵꓽ ꓔꓬꓹ ꓟ ꓗꓪ ꓦꓯꓽ ꓯꓯꓽ ꓟꓶ ꓡ ꓕꓯ ꓗꓸ ꓠꓯ ꓢꓲ ꓗꓪ ꓬꓯꓼ ꓡꓲꓺ ꓒꓲꓽ ꓡꓲꓺ ꓔꓸ ꓟ ꓗꓪ ꓛꓲ ꓕꓲ ꓟ ꓞꓵꓽ ꓠꓵꓺ ꓡ ꓔꓬ ꓐꓶ=
ꓠꓬꓲꓽ ꓣꓳ ꓕꓲ ꓣꓳ ꓠꓬ꓾ ꓮ ꓪꓳ ꓮ-ꓘꓰ ꓪ-ꓔꓷꓹ ꓔꓯ ꓟꓯꓹ ꓡ ꓟ ꓠꓬ꓾ “ꓟꓶ-ꓖ-ꓒꓲ ꓠ ꓮ-ꓒꓲ ꓥ= ꓕꓳ-ꓫꓸ ꓭꓸ ꓮ ꓒꓲ ꓥ꓾” ꓐꓯ ꓡ ꓡꓳ= ꓸꓸꓸꓸ ꓬꓲ ꓫꓸ ꓕꓱ ꓓꓳ ꓡꓰ ꓕꓯ ꓸꓸꓸ “ꓟꓶ-ꓖ ꓭꓸ ꓮ-ꓒꓲ ꓠꓽ ꓡꓽ ꓙꓰ ꓥꓳ=” ꓐꓯ ꓢꓲꓸ ꓠꓲꓽ ꓟꓯꓹ ꓫꓬ ꓡ ꓡꓳ=
ꓢ ꓣꓳ ꓕꓲ ꓣꓳ ꓮ ꓪꓳ ꓙꓬ-ꓓꓶꓸ ꓔꓯ ꓟꓯꓹ ꓡ ꓟ ꓠꓬ꓾ “ꓮ ꓐꓵ-ꓡ ꓭꓸ ꓮ-ꓘꓴ ꓥ ꓐꓵ-ꓫꓵꓸ ꓭꓸ ꓮ-ꓛꓲ ꓥ=” ꓐꓯ ꓢꓲ ꓟꓯꓹ ꓡ ꓡꓳ= ꓠꓲꓽ ꓠꓬ ꓬꓲꓸ ꓟꓬꓱꓺ ꓐꓰ ꓔꓬ ꓖꓴ ꓔꓯ ꓮ ꓘꓶꓸ ꓠꓶꓽ ꓝꓸ ꓖꓶ ꓠꓲꓹ ꓫꓵ ꓐꓶ=
ꓥꓪ ꓟꓳ ꓠꓬꓲ ꓟ ꓠꓲꓽ ꓟꓯꓹ ꓢꓴ ꓡꓲꓸ ꓣꓳ ꓕꓲ ꓣꓳ ꓠꓬ꓾ ꓮ ꓑ ꓧꓶꓽ-ꓚꓹ ꓥ ꓡꓳ= “ꓥ ꓠꓴ ꓭꓸ ꓪꓴꓸ ꓡꓱꓽ ꓢꓴ ꓥ꓾ ꓥ ꓠꓴ ꓭꓸ ꓘꓶꓽ ꓔꓷꓹ ꓢꓴ ꓥ” ꓐꓯ ꓢꓲꓸ ꓟꓯꓹ ꓡ ꓡꓳ=]
