2021 ꓘꓳꓼ 7 ꓦ 1 ꓠꓬꓲ꓾ ꓠꓬꓲꓸ ꓠꓬꓲ ꓠꓯꓼ ꓠꓯꓼ ꓙꓼ ꓫꓸ ꓕꓱ ꓓꓴ ꓗꓪ ꓐꓰ ꓥꓪ ꓔꓯ ꓓꓳꓽ ꓕꓲ ꓟ ꓛꓲ ꓡ ꓡꓳ= ꓑꓴ-ꓔ-ꓳ ꓗꓪ ꓔꓬ ꓟ ꓮꓽ ꓐꓽ ꓠꓬ ꓢꓲꓽ ꓛꓲ ꓐꓰ ꓐꓽ ꓪꓴꓽ ꓘꓳꓼ ꓠꓻ ꓢꓲꓸ ꓕꓲ ꓢ ꓘꓪ ꓬꓲꓼ ꓟꓶ ꓟꓽ ꓪ ꓐꓰ ꓓꓳꓽ ꓜꓳ ꓡ ꓡꓳ= ꓥꓪ ꓡꓰ꓾ “ꓮ ꓡꓲꓳ ꓫꓵꓽ ꓐꓶ ꓓꓲ ꓓꓵꓽ ꓬꓰ ꓥ ꓢꓶ” ꓐꓰ ꓐꓯ ꓗꓷ ꓠꓬ꓾ “ꓐꓶꓽ ꓓꓲ ꓠꓽ ꓟꓽ ꓥ ꓡꓲꓸ ꓟꓽ ꓢꓷꓸ꓾ ꓮ ꓐꓽ ꓔꓯ ꓠꓲꓽ ꓐꓶꓼ ꓘꓳꓼ ꓓꓴ ꓟ ꓕꓱ ꓡꓱ ꓬꓲꓸ ꓫꓶꓹ ꓔꓸꓳ ꓫꓵꓽ ꓥ= ꓣꓳ ꓒ ꓕꓲ ꓒ ꓠꓶꓽ ꓗꓪ ꓠꓲꓹ ꓠꓵ ꓢꓴ ꓕꓲ ꓣꓳ ꓣꓳ ꓫꓵꓻ ꓡ ꓡꓲꓸ ꓟꓽ ꓢꓷꓸ” ꓐꓰ ꓐꓯ ꓡ ꓡꓳ= ꓮ ꓐꓽ ꓬꓲꓸ ꓕꓲ ꓤꓶ ꓗꓪ ꓔꓳꓹ ꓜꓳ ꓟ ꓥ ꓠꓬꓲ꓾ ꓟꓽ ꓥ ꓐꓰ ꓟꓽ ꓓ ꓟꓽ ꓢ ꓐꓯ ꓧꓳꓻ ꓗꓸ ꓟꓽ ꓘꓳ ꓬꓰꓳ= ꓖꓳ ꓟ ꓐꓰ ꓗꓴꓸ ꓙꓲꓽ ꓙꓳ ꓢꓲ꓾ ꓑꓴ-ꓔ-ꓳ ꓡꓲ-ꓢꓴ ꓐꓴ ꓢꓷꓸ ꓟ ꓠꓲꓽ ꓐꓶꓼ ꓟꓸ ꓟꓲꓽ ꓕꓱ ꓟ ꓐꓳ ꓟꓸ ꓖꓶ ꓓꓴ ꓥ ꓡꓳ= ꓗꓸ ꓠꓯꓸ ꓟ ꓤꓶ ꓦꓬꓼ ꓠꓬꓲ ꓗꓪ ꓒꓵꓽ ꓒ ꓐꓴ ꓙꓵꓻ ꓚꓱꓹ ꓐꓰ ꓡꓲ ꓒꓰꓼ ꓚꓱꓹ ꓚ ꓟꓲꓽ ꓒꓬꓱꓼ ꓡ ꓗꓴ ꓡꓳ=
ꓑꓴ-ꓔ-ꓳ ꓡꓲ-ꓢꓴ ꓡꓲ ꓒꓰꓼ ꓐꓰ ꓙꓵꓻ ꓚꓱꓹ ꓗꓪ ꓠꓲꓽ ꓐꓶꓼ ꓐꓯ ꓟ ꓕꓲ ꓫꓵꓽ ꓙꓳ ꓡꓳ=
ꓠꓲꓽ ꓐꓶꓼ ꓠꓬ ꓫꓵꓻ ꓗꓴꓸ ꓫꓵꓻ ꓦ ꓥ ꓢꓲ꓾ ꓫꓵꓻ ꓠ ꓗꓹ ꓢꓴ ꓡ ꓞꓳ ꓖꓳ ꓕꓲ ꓣꓳ ꓟꓽ ꓫꓵꓻ ꓢꓰꓽ ꓕꓯ ꓬꓲꓸ ꓦ ꓠꓬ ꓠꓱꓸ ꓐꓯꓼ ꓕꓲ ꓣꓳ ꓣꓳ ꓔꓯ ꓘꓶ ꓡꓶꓽ ꓙꓰ ꓟ (ꓥ ꓠꓬ) ꓛꓲ ꓓꓴ ꓫꓶ ꓙꓰ ꓟ (ꓥ ꓠꓬ) ꓕꓲ ꓫꓵꓽ ꓫꓵꓽ ꓗꓪ ꓐꓰ ꓢꓷꓸ ꓡꓰ ꓓꓴ ꓖꓶ ꓡ ꓗꓴꓸ ꓟ ꓫꓵꓻ ꓦ ꓥ ꓡꓳ ꓐꓯ ꓡꓳ= ꓡꓲ-ꓢꓴ ꓐꓴ ꓠꓲꓽ ꓐꓶꓼ ꓔꓯ ꓟꓳꓸ ꓟꓬꓽ ꓠꓬꓲ ꓔꓳꓹ ꓜꓳ ꓝꓳ ꓟ (7) ꓫꓵꓽ ꓙꓳ ꓡꓳ=
ꓬꓲꓸ ꓪꓴꓸ ꓕꓲ ꓫꓵꓽ ꓠꓬ꓾ ꓧꓪꓽ ꓧꓪ ꓢꓴ꓾ ꓫꓵꓺ ꓚꓴꓸ ꓢꓴ ꓐꓴ ꓶꓽ ꓤ ꓟꓵꓽ ꓗꓪ ꓙꓰ ꓕꓯ ꓦꓲ ꓗꓪ ꓕꓲ ꓣꓳ ꓣꓳ ꓫꓵꓻ ꓡ ꓔꓳꓼ ꓠꓬ꓾ ꓧꓪꓽ ꓧꓪ ꓧꓪꓽ ꓟꓼ ꓪ꓾ ꓫꓵꓺ ꓚꓴꓸ ꓫꓵꓻ ꓟꓽ ꓟꓳ ꓗꓷ ꓡꓰ ꓗꓴꓸ ꓡꓳ= ꓫꓵꓻ ꓓꓳꓽ ꓟꓽ ꓑ ꓙ ꓕ ꓑꓳꓸ ꓕꓱ ꓡꓱ ꓘꓶ ꓡꓶꓽ ꓡ ꓗꓴ ꓡꓳ=
ꓠꓬꓲꓽ ꓫꓵꓽ ꓕꓲ ꓫꓵꓽ ꓠꓬ ꓦꓯꓹ ꓑꓶꓼ ꓡꓰ ꓖꓪꓽ ꓓꓴ ꓐꓵ ꓞꓲꓽ ꓐꓰ ꓶ ꓤ ꓔꓯ ꓜꓰꓼ ꓡ ꓟ ꓥ ꓡꓳ= ꓗꓹ (ꓔꓸ) ꓮ ꓡꓲꓳ ꓫꓵꓽ ꓗꓪ ꓗꓶ ꓔꓸ ꓥ ꓟꓲ ꓟꓽ ꓡꓲꓹ ꓙꓰ= ꓮ ꓡꓲꓳ ꓫꓵꓽ ꓦꓯꓹ ꓑꓶꓼ ꓥ ꓟꓽ ꓢꓷꓸ= ꓠꓲꓽ ꓐꓶꓼ ꓡꓰ ꓜꓰꓼ ꓡ ꓠꓬ ꓮ ꓘꓶꓸ ꓙꓲ ꓟ ꓖꓪ ꓓꓴ ꓶ ꓤꓼ ꓔꓯ ꓜꓰꓼ ꓡ ꓗꓴ ꓡꓳ=
ꓢ ꓫꓵꓽ ꓕꓲ ꓫꓵꓽ ꓠꓬ ꓠꓸ ꓡꓳ ꓜꓶꓸ ꓜꓶꓸ ꓬꓲꓸ ꓢꓯꓼ ꓕꓲ ꓫꓵꓽ ꓑ ꓙ ꓡ ꓟ ꓥ ꓡꓳ= ꓕꓱ ꓟ ꓑ ꓙ ꓡ ꓕꓯ ꓣꓳ ꓔꓯ ꓢꓷꓸ ꓢꓴ꓾ ꓠꓲꓹ ꓠꓵ ꓢꓴ ꓕꓲ ꓣꓳ ꓣꓳ ꓫꓵꓻ ꓓꓳꓽ ꓜꓳ ꓡ ꓡꓳ ꓐꓯ ꓡꓳ=
ꓡꓲ ꓫꓵꓽ ꓕꓲ ꓫꓵꓽ ꓠꓬ ꓢꓲꓽ ꓛꓲ ꓘꓳꓼ ꓡ ꓟ= ꓕꓲ ꓢ ꓘꓪ ꓢꓲꓽ ꓛꓲ ꓘꓳꓼ ꓡ꓾ ꓐꓽ ꓪꓴꓽ ꓘꓳꓼ ꓡ ꓢꓲꓸ ꓟꓶ ꓤ ꓟꓽ ꓥ ꓕꓯ ꓠꓲꓹ ꓠꓵ ꓢꓴ ꓕꓳ ꓣꓳ ꓣꓳ ꓫꓵꓻ ꓓꓳꓽ ꓜꓳ ꓡ ꓚꓰꓼ ꓡꓳ ꓐꓯ ꓡꓳ=
ꓥꓪꓽ ꓫꓵꓽ ꓕꓲ ꓫꓵꓽ ꓠꓬ ꓬꓲꓼ ꓟꓬ ꓗꓪ ꓐꓰ ꓫꓵꓻ ꓠ ꓗꓹ ꓢꓴ ꓟꓸ ꓟꓲꓽ ꓟꓳꓸ ꓖꓶ ꓡ ꓟ= ꓫꓵꓻ ꓠ ꓗꓹ ꓢꓴ ꓐꓰ ꓗꓳꓸ ꓙꓲꓽ ꓙꓳ ꓢꓲ꓾ ꓬꓲꓼ ꓟꓬ ꓗꓪ ꓮ ꓟꓬꓹ ꓫꓵꓽ ꓟꓳꓸ ꓖꓶ ꓡ ꓗꓴ ꓡꓳ=
ꓛꓳꓼ ꓫꓵꓽ ꓕꓲ ꓫꓵꓽ ꓠꓬ ꓦ ꓐꓬꓱꓽ ꓟꓳˍ ꓟ = ꓫꓵꓻ ꓢꓴ ꓐꓰ ꓗꓳꓸ ꓙꓲꓽ ꓙꓳ ꓢꓲ꓾ ꓬꓲꓸ ꓢꓯꓼ ꓟꓲ ꓑ ꓙ꓾ ꓬꓲꓸ ꓒꓬꓱꓽ ꓥ ꓟꓲ ꓟꓳ ꓪ ꓟ ꓦ ꓐꓬꓱꓽ ꓕꓲ ꓫꓵꓽ ꓙꓳ ꓢꓰꓽ ꓡꓳ= ꓬꓲꓸ ꓒꓬꓱꓽ ꓔꓯ ꓡꓳꓸ ꓠꓬꓲ ꓕꓯ ꓕꓲ ꓐꓶꓽ ꓠꓯꓺ ꓠꓯꓺ ꓟꓴ ꓗꓹ ꓟ꓾ ꓪꓴꓸ ꓓꓵ ꓣꓳ ꓣꓳ ꓤꓼ ꓗꓷ ꓡꓰ ꓟ꓾ ꓝꓮꓲ ꓦ ꓟꓲ ꓗꓪ ꓐꓰ ꓡꓽ ꓡ ꓟ ꓢꓯꓼ ꓕꓱ ꓡꓱꓳ ꓫꓵꓽ ꓑ ꓙ ꓪ ꓟ꓾ ꓟꓬ ꓢꓶꓽ ꓡꓰ ꓡꓳꓸ ꓟꓳ ꓟ ꓙꓳ ꓚꓰꓼ ꓡꓳ=
ꓬꓲꓸ ꓟꓶꓽ ꓕꓲ ꓫꓵꓽ ꓠꓬ꓾ ꓫꓵꓻ ꓓꓳ ꓡꓰ ꓕꓯ ꓬꓲꓸ ꓠꓲꓹ ꓠꓵ ꓢꓴ ꓐꓴ ꓔꓯ ꓙ ꓡꓯ ꓘꓳ ꓗꓴꓸ ꓟ ꓚꓱꓹ ꓕꓲ ꓟ ꓥ ꓡꓳ= ꓕꓱ ꓟ ꓠꓬ ꓟꓸ ꓟꓲ ꓢꓴ ꓟꓬ ꓐꓲ ꓥ ꓡꓳ= ꓕꓱ ꓟ ꓠꓬ ꓫꓵꓻ ꓢꓴ ꓡꓱ ꓜꓳ ꓓꓰ ꓗꓪ ꓬꓲꓸ ꓔꓯ ꓠꓲꓹ ꓠꓵ ꓢꓴ ꓐꓴ ꓡꓳꓸ ꓙꓰ ꓕꓯꓽ ꓟꓶ ꓦ ꓦ ꓡ ꓚꓰꓼ ꓡꓳ= ꓠꓲꓹ ꓠꓵ ꓢꓴ ꓐꓴ ꓔꓯ ꓟꓶꓽ ꓦ ꓗꓪ ꓐꓰ ꓬꓲꓸ ꓔꓬ ꓟ ꓟꓳꓸ ꓖꓶ ꓡ ꓟ ꓥ ꓢꓲ꓾ “ꓟꓸ ꓟꓲ ꓢꓴ ꓟꓬ ꓐꓲ” ꓐꓯ ꓡꓳ= ]
ꓕꓱ ꓡꓱꓳ ꓫꓵꓽ ꓠꓬ ꓡꓯꓼ ꓕꓲ ꓢꓪꓼ ꓠꓬꓲ ꓟꓰꓹ ꓠꓬꓲ ꓟꓬꓱꓽ (Science) ꓗꓪ ꓐꓰ ꓡꓯꓼ ꓕꓲ ꓢꓪꓼ ꓟꓽ ꓙꓲ ꓥ ꓟꓲ꓾ ꓚꓵ ꓚꓵ ꓡꓲ-ꓢꓴ ꓐꓴ ꓔꓳꓹ ꓜꓳ ꓗꓷ ꓟ ꓡꓲ ꓒꓰꓼ ꓚꓱꓹ ꓐꓰ꓾ ꓙꓵꓻ ꓠꓲꓹ ꓚꓱꓹ ꓐꓴ ꓥ ꓡꓳ= (ꓗꓙ)
