ꓮ-ꓢꓰ-ꓬ ~ ꓲ-ꓓꓲ-ꓬ ꓐꓶꓽ ꓗꓴꓷꓼ ꓔꓯ ꓟꓳꓸ ꓢꓲꓽ ꓒꓽ ꓐꓴ ꓜꓲꓼ ꓓꓴ ꓗꓪ ꓟꓬ-ꓟ ꓟꓽ ꓔꓺ ꓝꓲ

ꓮ-ꓢꓰ-ꓬ ꓜꓴ ~ ꓲ-ꓓꓲ-ꓬ ꓗꓴꓷꓼ ꓐꓶꓽ ꓗꓴꓷꓼ ꓔꓯ ꓟꓳꓸ ꓢꓲꓽ ꓒꓽ ꓐꓴ ꓜꓲꓼ ꓓꓴ ꓔꓯ ꓠꓬꓲꓸ ꓠꓬꓲ 2022 ꓘꓳꓼ 6 ꓦ 16 ꓠꓬꓲ ꓕꓯꓽ ꓲ-ꓓꓲ-ꓬ ꓗꓴꓷꓼ ꓠꓰ-ꓬꓴ-ꓓꓯ-ꓡꓲ ꓡꓳ ꓒꓱ ꓗꓪ ꓬꓰ ꓪꓴꓸ ꓔꓴ ꓔꓬ ꓟ ꓥ ꓢꓲꓸ ꓖꓳ ꓗꓪ ꓟꓬ-ꓟ ꓔꓯ ꓟꓽ ꓔꓺ ꓝꓲ ꓔꓬ꓾ ꓐꓰ ꓓꓳꓽ ꓜꓳ ꓡ ꓡꓳ꓿

ꓕꓱ ꓟ ꓠꓬ ꓮ-ꓢꓰ-ꓬ ꓐꓰ ꓲ-ꓓꓲ-ꓬ ꓗꓴꓷꓼ ꓙ ꓡꓯ ꓘꓳ ꓟ (30) ꓘꓳꓼ ꓐꓲ ꓡ ꓟ ꓚꓲꓸ ꓟꓶ ꓓꓴ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓥ ꓢꓲ꓾ ꓮ-ꓢꓰ-ꓬ ꓐꓶ ꓗꓴꓷꓼ ꓢꓲꓽ ꓒꓽ ꓐꓴ ꓜꓲꓼ ꓔꓬ ꓥ ꓟꓲ꓾ ꓟꓬ-ꓟ ꓟꓯꓼ ꓕꓲ ꓒꓳꓹ ꓗꓪ ꓟ ꓐꓶꓽ ꓗꓴꓷꓼ ꓢꓲꓽ ꓒꓽ ꓪꓳ-ꓠꓼ-ꓟꓮꓳꓽ-ꓡꓱꓽ ꓔꓯ ꓟꓽ ꓘꓴ ꓡ ꓟ ꓥ ꓡꓳ꓿ 

ꓟꓵ ꓗꓳꓹ ꓓꓵ ꓓꓵ ꓗꓴꓷꓼ ꓜꓴ ꓕꓲꓽ ꓙꓶ ꓗꓪ ꓠꓬ ꓟꓬ-ꓟ ꓟꓯꓼ ꓡꓰ ꓗꓴꓷꓼ ꓙꓵꓽ ꓪ ꓦꓴ ꓔꓸ ꓟ ꓔꓯ ꓮ ꓡꓲ ꓡꓲꓸ ꓟꓽ ꓘꓳ ꓣꓴ ꓔꓬ꓿ ꓲ-ꓓꓲ-ꓬ ꓥ ꓟꓲ ꓟꓬ-ꓟ ꓟꓯꓼ ꓔꓯ ꓔꓺ ꓟꓽ ꓑꓶꓸ ꓬꓰˍ ꓟ ꓢꓷꓸ ꓡꓰ ꓓꓴ ꓒꓬꓱꓼ ꓡ ꓔꓬ ꓡꓳ꓿
ꓐꓬꓱ: Ministry of External Affairs, Government of India

ꓣ-ꓫꓸ ꓚꓳꓹ ꓘꓶꓽ ꓔꓯ ꓟꓽ ꓘꓳ ꓣꓴ꓾ ꓴꓢꓮ ꓡꓰ ꓬꓴ-ꓗ-ꓣꓲꓸ ꓔꓯ $ 10000 ꓢꓯꓹ ꓐꓰ ꓓꓳꓹ ꓐꓶ ꓓꓴ ꓶ ꓤ ꓖꓶ ꓓꓴ ꓥꓳ

2022 ꓘꓳꓼ 6 ꓦ 15 ꓠꓬꓲ꓾ ꓐꓯ-ꓡ-ꓙꓰ-ꓬ ꓗꓴꓷꓼ, ꓐ-ꓣ-ꓢꓯꓸ ꓡꓳ ꓒꓱ ꓗꓪ ꓬꓴ-ꓗ-ꓣꓲꓸ ꓔꓯ ꓬꓰ ꓙ ꓔꓳꓹ ꓙ ꓢꓴ ꓗꓴꓷꓼ ꓐꓴ ꓜꓲꓼ ꓓꓴ ꓗꓪ ꓴꓢꓮ ꓡꓰ ꓒꓴ ꓐꓰ ꓟꓯꓼ ꓢꓰꓼ ꓶ ꓤ ꓬꓰ ꓙ ꓓꓴ ꓥꓳ ꓐꓯ ꓡꓳ꓿

ꓣ-ꓫꓸ ꓚꓳꓹ ꓘꓶꓽ ꓔꓯ ꓟꓽ ꓘꓳ ꓣꓴ꓾ ꓴꓢꓮ ꓡꓰ ꓬꓴ-ꓗ-ꓣꓲꓸ ꓔꓯ $ 10000 ꓢꓯꓹ ꓐꓰ ꓟꓲꓺ 50 ꓕꓷꓹ ꓗꓪ ꓛꓲ ꓐꓶ ꓩꓴꓺ ꓟꓽ ꓙꓳ ꓬꓰ ꓐꓶ ꓜꓯꓼ ꓐ ꓡ ꓟ ꓓꓳꓹ ꓐꓶ ꓓꓴ ꓶ ꓤ ꓖꓶ ꓓꓴ ꓥꓳ ꓐꓰ ꓴꓢꓮ ꓟꓯꓼ ꓙꓵꓽ ꓢꓲꓽ ꓒꓽ ꓓꓽ ꓟ Lloyd J. Austin ꓡꓰ ꓐꓯ ꓡꓳ꓿

ꓣꓴ-ꓗ-ꓣꓲꓸ ꓔꓯ ꓕꓱ ꓡꓱꓳ ꓫꓵꓽ ꓓꓳꓹ ꓐꓶ ꓓꓴ ꓶ ꓤ ꓖꓶꓽ ꓐꓷˍ ꓠꓬ꓾ ꓬꓲꓸ ꓐꓶꓹ ꓪꓽ ꓠꓬꓲ ꓠꓬꓲ ꓢꓰꓼ ꓓꓴ ꓥꓳ꓾ ꓐꓰ ꓣ-ꓫꓸ ꓡꓰ ꓙꓳꓺ ꓗꓽ ꓔꓸ ꓟ ꓙꓳˍ ꓡꓳ꓿

ꓣ-ꓫꓸ ꓐꓰ ꓣꓴ-ꓗ-ꓣꓲꓸ ꓟꓯꓼ ꓘꓶꓽ ꓑꓶꓸ ꓓꓴ ꓟꓲ ꓠꓯ ꓗꓪ ꓜꓽ ꓓꓴ ꓓꓳ ꓓꓴ ꓒꓵꓽ꓾ ꓙꓼ ꓞꓶ ꓒꓵꓽ ꓐꓰ ꓶ ꓡꓯꓼ ꓚꓱꓹ ꓗꓪ ꓫꓸ ꓓꓴ ꓔꓳꓹ ꓜꓳꓽ ꓡ ꓔꓬ ꓡꓳ꓿