ꓬꓲꓸ ꓢꓯꓸ ꓠ ꓠꓹ ꓓꓴ(ꓮꓴꓓꓲꓳ)

ꓧꓳꓑꓰ ꓞꓳ ꓠꓻ ꓚꓰꓹ ꓟꓳ-ꓓꓳ ꓬꓥ-ꓖꓳꓥ ꓗꓪ ꓐꓰ ꓑꓴ-ꓔ-ꓳ ꓗꓪ ꓛꓲ ꓬꓰꓳ

April 15, 2022TheLisuTimes

ꓥꓳ ꓡꓳꓸ ꓓꓴ ꓜꓴ ꓞꓳ ꓠꓻ ꓚꓰꓹ ꓟꓳ-ꓓꓳ (ꓧꓳꓑꓰ ꓰꓟꓐꓴꓡꓮꓠꓚꓰ) ꓕꓲ ꓦꓲ ꓠꓬꓲꓸ ꓠꓬꓲ 2022 ꓘꓳꓼ 4 ꓦ 15 ꓠꓬꓲ ꓕꓯꓽ ꓑꓴ-ꓔ-ꓳ ꓟꓵꓽ꓾ ‘ꓟꓶ-ꓡ-ꓫꓵ-ꓓꓰ ꓠꓯ ꓞꓲꓼ ꓦꓲ (Mulashidi Clinic)” ꓗꓪ ꓫꓵꓸ ꓛꓲ ꓬꓰꓳ꓿

ꓬꓥ-ꓖꓳꓥ ꓗꓪ ꓐꓰ 2022 ꓘꓳꓼ 4 ꓦ 12 ꓠꓬꓲ ꓕꓯꓽ ꓬꓥ-ꓖꓳ ꓗꓪ ꓐꓰ ꓔꓴ ꓙꓰˍ ꓟ ꓥ ꓢꓲ꓾ ꓠꓬꓲꓸ ꓠꓬꓲ ꓑꓴ-ꓔ-ꓳ ꓗꓪ ꓧꓪꓸ ꓧꓪꓸꓼ ꓛꓲ ꓬꓰˍ ꓟ ꓥ ꓡꓳ꓿

“ꓕꓲ ꓙ ꓖꓴ ꓗꓽ ꓔꓶꓸ ꓮ ꓙꓵꓽ ꓗꓪ ꓖꓶ ꓮ ꓫꓵꓽ ꓟꓽ ꓛꓲ꓾ ꓟꓳ-ꓓꓳ ꓖꓶ ꓟꓽ ꓙꓬ ꓡ꓿ ꓣꓳ ꓘꓹ ꓣꓳ ꓟꓵꓽ ꓟꓶ-ꓡ-ꓫꓵ-ꓓꓰ ꓗꓪ ꓛꓲ ꓡ ꓕꓽ ꓢꓲꓸ ꓓꓽ ꓖꓴ ꓑꓶꓸ ꓗꓪ ꓟꓯꓼ ꓠꓰ ꓚꓲꓸ ꓚ ꓗꓹ ꓓꓴ ꓟ ꓮ ꓟꓶꓹ ꓟꓶ ꓡꓳꓸ ꓠ ꓗ ꓬꓰꓳ꓿ ꓮ ꓡꓲ ꓐꓯ ꓡꓲꓸ ꓐꓯ ꓬꓥ-ꓖꓳꓥ ꓗꓪ ꓚꓳꓸ ꓑꓴ-ꓔ-ꓳ ꓗꓪ ꓛꓲ ꓧꓪꓸ ꓧꓪꓸꓼ ꓛꓲ ꓬꓰꓳ ꓟꓽ” ꓐꓰ ꓟꓳ-ꓓꓳ ꓫꓵꓸ ꓓꓯꓻ ꓙꓰ ꓗꓪ ꓛꓳ ꓙꓰ ꓢꓴ ꓟꓸ ꓒ ꓮ-ꓞꓲ-ꓓꓱꓼ ꓡꓰꓽ ꓐꓯˍ ꓡꓳ꓿

ꓠꓻ ꓢꓴ ꓐꓴ ꓔꓯ ꓖꓳ ꓑꓳꓸ ꓕ ꓑꓳꓸ ꓚꓰꓹ ꓙ ꓟꓬꓱꓽ ꓗꓪ ꓣꓱꓽ ꓓꓴ ꓐꓱ ꓶ꓾ ꓡꓮꓮ ꓐꓰ ꓠꓱꓸ ꓐꓯꓼ ꓛꓳ ꓒꓯꓹ ꓜꓴ ꓐꓴ ꓡꓰ ꓔꓲꓺ ꓖꓶꓽ ꓡ ꓟ ꓗꓪ ꓐꓰ ꓪꓴ ꓪ ꓔꓸ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ꓿

ꓧꓳꓑꓰ ꓜꓴ ꓠꓬ ꓟꓶ-ꓡ-ꓫꓵ-ꓓꓰ ꓗꓪ ꓬꓲꓸ ꓚꓰ ꓔꓶ ꓢꓲꓸ ꓠꓻ ꓒꓬꓽ ꓙꓳ ꓢꓴ꓾ ꓬꓯꓻ ꓠꓽ ꓔꓬ ꓢꓴ꓾ ꓫꓸ ꓢꓴ ꓟꓷꓼ ꓢꓴ ꓔꓯ ꓬꓰ ꓙ ꓔꓳꓹ ꓙ ꓟꓬꓱꓽ ꓬꓰ ꓔꓬ ꓟ ꓫꓱꓸ ꓤꓼ ꓟꓬꓱꓽ ꓬꓰ ꓜꓴ ꓕꓲ ꓜꓴ ꓥ ꓡꓳ꓿

Video

ꓟꓶ-ꓚꓲ-ꓠ ꓙ ꓖꓴ ꓫꓱꓽ ꓬꓲ ꓙꓬ ꓕꓲꓽ ꓑꓮꓲ ꓗꓪ ꓡ ꓛꓴꓸ ꓐꓶ ꓡ

April 15, 2022TheLisuTimes

2022 ꓘꓳꓼ 4 ꓦ 15 ꓠꓬꓲ꓾ ꓟꓶꓼ ꓘꓶꓼ 5 ꓙꓵꓹ ꓛꓲ ꓕꓯꓽ ꓟꓶ-ꓚꓲ-ꓠ ꓘꓳꓼ ꓫꓵꓼ ꓙ ꓖꓴ ꓫꓱꓽ ꓬꓲ ꓙꓬ ꓕꓲꓽ ꓑꓮꓲ ꓬꓰ ꓔꓬ ꓟ ꓗꓪ ꓡ ꓛꓴꓸ ꓐꓶ ꓡ ꓢꓲꓸ ꓡ ꓞꓳ ꓮ ꓟꓬꓹ ꓔꓷꓹ ꓛꓰꓹ ꓠ ꓗꓷ ꓡꓰꓳ꓾ ꓐꓰ ꓓꓳꓽ ꓜꓳˍ ꓡꓳ꓿“ꓟꓳꓻ ꓢꓴ ꓠꓰ ꓐꓯ ꓕꓽ ꓠꓽ ꓠꓰ ꓡ ꓛꓴꓸ ꓔꓯꓹ ꓔꓸ ꓢꓴ ꓟ ꓟꓳ-ꓓꓳ ꓗꓪ ꓚꓳꓸ ꓡ ꓢꓲꓸ ꓐꓶ ꓡꓻꓳ ꓙꓳꓽ꓿ ꓮ ꓡꓲ ꓕꓲ ꓜꓴ ꓥ ꓡꓲꓸ ꓟꓽ ꓢꓷꓸ” ꓐꓰ ꓟꓶ-ꓚꓲ-ꓠ ꓢꓴ ꓕꓲ ꓣꓳ ꓡꓰꓽ ꓐꓯ ꓡꓳ꓿

ꓟꓶ-ꓚꓲ-ꓠ ꓗꓪ ꓟꓲꓸ ꓟꓲ ꓠꓬ ꓙ ꓖꓴ ꓢꓲꓸ ꓬꓲ ꓙꓬ ꓕꓲꓽ ꓳꓮꓲ ꓗꓪ ꓙꓰ ꓔꓬ ꓢꓴ ꓮ ꓟꓬꓹ ꓡꓳꓸ ꓟꓳˍ ꓟ ꓕꓲ ꓠꓬꓲ ꓥ ꓡꓳ꓿

ꓟꓬꓼ ꓓꓳꓽ ꓙꓳˍ ꓟ ꓟꓴ ꓖꓪ ꓖꓪ ꓒꓽ ꓠꓳꓹ-ꓠꓳꓽ ꓐꓴ ꓥ ꓟꓲ ꓟꓶ-ꓚꓲ-ꓠ ꓬꓲꓐꓙꓬ ꓕꓲꓽ ꓑꓮꓲ ꓗꓪ ꓟꓴ ꓖꓪ ꓖꓪ ꓔꓬ ꓟ ꓡꓳꓸ ꓟꓳ ꓡꓳ꓿ ꓖꓳ ꓟ ꓑꓶꓸ ꓓꓴ ꓮ-ꓒꓴ ꓫꓵꓽ ꓐꓴ ꓥ ꓟꓲ ꓬꓲꓸ ꓔꓯ ꓔꓳꓹ ꓢꓴ ꓙꓳˍ ꓡꓳ꓿ꓟꓬ-ꓟ ꓕꓲ ꓗꓴꓷꓼ ꓡꓱꓸꓼ ꓗꓪ ꓠꓬ ꓐꓱ ꓓꓴꓽ ꓗꓪ ꓔꓬ ꓢꓴ꓾ ꓦꓲ ꓟꓽ ꓙꓳ ꓬꓰ ꓢꓴ꓾ ꓫꓵꓻ ꓢꓴ ꓐꓴ ꓐꓱ ꓶꓽ ꓠꓲꓹ ꓙ ꓙꓽ ꓗꓳ ꓟ ꓢꓷꓸ ꓡꓰ ꓓꓴ ꓐꓯ ꓢꓲ꓾ ꓧꓶꓸ ꓕꓯꓽ ꓡꓰ ꓐꓰ ꓬꓲ ꓙꓬ ꓟꓽ ꓕꓲꓽ ꓕꓲꓽ ꓦꓲ ꓗꓪ ꓟꓽ ꓪꓳꓹ ꓔꓬ ꓢꓴ ꓟꓬꓽ ꓡꓳ꓿