ꓟꓬ-ꓟ ꓟꓯꓼ ꓜꓲꓽ ꓟꓰꓹ-ꓮꓳꓽ-ꓡꓮꓲꓽ ꓠꓰ ꓗꓴꓷꓼ ꓢꓲ ꓡꓲꓹ ꓡ ꓚꓱꓹ ꓖꓪ ꓙꓱ ꓡꓯ ꓘꓳ ꓡꓯ ꓐꓰ 2022 ꓘꓳꓼ 4 ꓦ 22 ꓠꓬꓲ ꓕꓯꓽ ꓑꓳꓺ ꓔꓯꓹ ꓟꓯꓼ ꓐꓴ ꓔꓯ ꓘꓴ ꓩꓴ ꓡ ꓡꓳ꓿
“2022 ꓘꓳꓼ ꓗꓪ ꓑꓳꓺ ꓔꓯꓹ ꓢꓴ ꓔꓴˍ ꓟ ꓮ ꓙꓵꓽ ꓠꓽ ꓡꓰ ꓠꓹ ꓟ ꓖꓪ ꓙꓱ ꓓꓴ꓾ ꓑꓳ ꓔꓯꓹ ꓟꓯꓼ ꓧꓳꓽ ꓢꓴ ꓐꓴ ꓔꓯ ꓥꓪ ꓚꓲ ꓛꓬ ꓜꓲ ꓓꓴ ꓥꓳ” ꓐꓰ ꓟꓬ-ꓟ ꓟꓯꓼ ꓜꓲꓽ ꓟꓰꓹ-ꓮꓳꓽ ꓡꓮꓲꓽ ꓡꓰ ꓐꓯ ꓡꓳ꓿
2022 ꓘꓳꓼ ꓠꓬ ꓟꓬ-ꓟ ꓗꓴꓷꓼ ꓢꓲ ꓡꓲꓹ ꓡ ꓠꓹ ꓟ ꓘꓳꓼ ꓒꓬꓱꓼ ꓡ ꓠꓹ ꓟ ꓖꓪ ꓙꓱ ꓡꓯ ꓘꓳ ꓡꓯ ꓐꓰ ꓘꓴ ꓩꓴ ꓡ ꓟ ꓗꓪ ꓑ ꓫꓬ ꓟꓯꓼ ꓑꓓꓝ ꓟꓽ ꓔꓺ ꓔꓬ꓿
“ꓕꓱ ꓕꓲ ꓜꓴ ꓔꓯ ꓟꓽ ꓫꓸ ꓕꓱ꓾ ꓟꓽ ꓖꓪ ꓙꓱ ꓐꓯ ꓟ ꓠꓬ꓾ ꓠꓱꓸ ꓐꓯꓼ ꓑꓳꓺ ꓔꓯꓹ ꓟꓯꓼ ꓐꓴ ꓔꓯ ꓶ ꓡꓯꓼ ꓚꓱꓹ ꓐꓰ ꓙꓵꓽ ꓪ ꓐꓹ ꓖꓶꓽ ꓢꓲꓸ ꓪꓽ ꓞꓳꓹ ꓔꓸ ꓢꓲꓸ ꓑꓓꓝ ꓔꓯ ꓬꓲꓸ ꓧꓶꓽ ꓢꓰꓼ ꓠꓹ ꓟ ꓟꓬ-ꓟ ꓟꓯꓼ ꓚꓴ ꓬꓲꓹ ꓓꓶꓽ ꓔꓬꓳ” ꓐꓰ ꓟꓯꓼ ꓔꓯ ꓟꓳꓸ ꓧꓪ ꓟꓰꓹ ꓔꓬ ꓢꓴ ꓕꓲ ꓣꓳ ꓡꓰ ꓐꓯˍ ꓡꓳ꓿
ꓑꓳꓺ ꓔꓯꓹ ꓟꓯꓼ ꓕꓲ ꓜꓴ ꓡꓲꓸ ꓕꓲ ꓜꓴ ꓗꓪ ꓐꓰ ꓧꓳꓽ ꓪꓴꓸ ꓟꓴ ꓢꓴ ꓚꓲꓸ ꓛꓬ ꓐꓰ ꓛꓳ ꓢꓴ (2) ꓣꓳ ꓜꓲꓼ ꓡ ꓠꓹ ꓟ꓾ ꓜꓲꓼ ꓡ ꓔꓳꓼ ꓢꓴ ꓟꓬꓱꓺ ꓔꓯ ꓡ ꓠꓹ ꓟ 5 ꓦ 9 ꓠꓬꓲ ꓕꓯꓽ ꓬꓲꓸ ꓟꓶꓽ ꓢꓷꓸ ꓡ ꓝꓲ ꓠꓹ ꓟ ꓐꓯ ꓩꓴ ꓡ ꓡꓳ꓿
ꓟꓬ-ꓟ ꓗꓴꓷꓼ ꓗꓪ ꓟꓬ-ꓟ ꓟꓯꓼ ꓔꓯ ꓔꓳꓹ ꓡꓯ ꓘꓳ ꓔꓬ ꓟ ꓑꓳꓺ ꓔꓯꓹ ꓟꓯꓼ ꓮ ꓟꓬꓹ ꓜꓴ ꓙꓳ ꓔꓬ ꓥ ꓟꓲ꓾ ꓬꓲꓸ ꓪ ꓮ ꓙꓵꓽ 70 ꓘꓳꓼ ꓛꓲ ꓔꓳꓼ ꓡꓯ ꓘꓳ ꓡ ꓥ ꓟꓲ ꓮ ꓫꓵꓽ ꓡꓲꓸ ꓗ ꓬꓰ ꓟꓽ ꓖꓰꓼ ꓟ ꓥꓳ꓿
ꓖꓳ ꓡꓱ ꓥ ꓟꓲ ꓟꓬ-ꓟ ꓟꓯꓼ ꓔꓯ ꓘꓶ ꓡꓶꓽ ꓐ ꓡ ꓟ꓾ ꓟꓯꓼ ꓜꓲꓽ ꓮ ꓟꓬꓹ ꓔꓯ ꓢꓰꓼ ꓪ ꓖꓰꓼ ꓟ ꓐꓰ꓾ ꓡꓳ ꓒꓱ ꓗꓪ ꓛꓲ ꓟꓬ-ꓟ ꓟꓯꓼ ꓔꓯ ꓔꓺ ꓢꓴ ꓐꓴ ꓔꓯ ꓢꓰꓼ ꓪ ꓖꓰꓼ ꓟ ꓠꓬ 2021 ꓘꓳꓼ ꓕꓯ ꓓꓳ ꓡ ꓟ ꓑ ꓫꓬ ꓟꓯꓼ ꓜꓴ ꓑꓓꓝ ꓥ ꓡꓳ꓿
