10 ꓔꓸ (ꓟꓴ ꓕꓲꓸ ꓙꓳꓥꓽ ꓓꓵꓽ ꓕꓲ ꓕꓲꓸ) ꓔꓯ ꓢꓼ ꓗꓼ ꓢꓼ ꓟꓯꓼ ꓡꓰ ꓟꓽ ꓓ ꓟꓽ ꓢ ꓝꓲ ꓢꓲꓸ ꓘꓳꓽ ꓝꓲˍ ꓟ ꓑꓶꓸ ꓓꓴ ꓠꓲꓹ ꓟ ꓙ ꓫꓸ ꓟꓽ ꓛꓲ꓾ ꓟꓯꓼ ꓡꓰ ꓬꓰ ꓩꓴ ꓡ ꓟ ꓔꓯ ꓝꓯ-ꓓ-ꓬꓯ ꓢꓷ ꓠꓲꓹ ꓢꓳ ꓚꓱꓹ ꓗꓳ-ꓡꓲꓼ꓾ ꓔꓯ-ꓖꓶ-ꓓꓴ ꓗꓪ ꓟꓽ ꓘꓳ ꓣꓴ ꓐꓰ ꓠꓴꓖ ꓢꓷ ꓠꓲꓹ ꓜꓴ ꓗꓪ ꓐꓰ ꓠꓬꓲꓸ ꓠꓬꓲ 2021 ꓘꓳꓼ 11 ꓦ 15 ꓠꓬꓲ ꓕꓯꓽ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
“ꓗꓴꓷꓼ ꓬꓲꓸ ꓘꓴ ꓐꓰ ꓬꓲꓸ ꓐꓽ ꓢꓲ ꓗꓪ ꓘꓳ ꓣꓴ ꓢꓴ ꓟꓽ ꓙꓳˍ ꓟ ꓟꓬ-ꓟ ꓟꓯꓼ ꓡꓰ ꓧꓳꓽ ꓣꓱꓽ ꓔꓬ ꓟ ꓚꓱꓹ ꓔꓯ ꓛꓳ ꓢꓲꓸ ꓬꓰ ꓓꓳ ꓡ ꓟ ꓢꓷ ꓠꓲꓹ ꓢꓳ ꓚꓱꓹ ꓮ ꓙꓵꓽ ꓔꓯ ꓟꓽ ꓘꓳ ꓣꓴ꓿” ꓐꓯ ꓔ ꓡꓳ꓿
ꓠꓴꓖ ꓡꓰ ꓳꓠꓡꓲꓠꓰ ꓗꓪ ꓢꓳ ꓚꓱꓹ ꓙ ꓖꓶ ꓔꓸ ꓟ ꓐꓰ꓾ ꓳꓠꓡꓲꓠꓰ ꓟꓽ ꓙꓳ ꓟ ꓟꓵꓽ ꓘꓶꓽ ꓟꓵ ꓡꓯꓼ ꓗꓪ ꓥ ꓟꓲ ꓢꓳ ꓐ ꓡ ꓠꓹ ꓟ ꓬꓲ ꓚꓱꓹ ꓙ ꓖꓶ ꓔꓬ ꓡꓳ꓿
ꓠꓴꓖ ꓗꓴꓷꓼ ꓙꓵꓽ ꓜꓴ ꓠꓬ ꓮ ꓙꓵꓽ ꓢꓴ ꓪꓽ ꓓˍ ꓟ ꓝꓯ-ꓓ-ꓬꓯ ꓢꓷ ꓠꓲꓹ ꓢꓳ ꓚꓱꓹ ꓬꓰ ꓓꓴ ꓥ ꓠꓬꓲ꓾ ꓞꓲ ꓠꓲꓹ 10 ꓔꓸ ꓟꓽ ꓘꓳ ꓢꓴ ꓔꓯ 3 ꓘꓳꓼ ꓗꓪ ꓛꓲ ꓕꓳ ꓶ ꓟꓽ ꓘꓳꓽ ꓝꓲ ꓐꓰ ꓟꓯꓼ ꓐꓴ ꓚꓳꓹ ꓘꓶꓽ ꓔꓯ ꓙꓳꓺ ꓟꓽ ꓛꓲ꓾ ꓙꓽ ꓫꓸ ꓟꓽ ꓛꓲ꓾ ꓐꓯ ꓔ ꓡꓳ꓿
ꓟꓬ-ꓟ ꓟꓯꓼ ꓐꓴ ꓡꓰ 11 ꓦ 1 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ ꓢꓳ ꓦꓲ ꓒꓴ ꓩꓴ ꓡ ꓢꓲ꓾ ꓢꓳ ꓒ ꓢꓳ ꓟ ꓐꓴ ꓔꓯ ꓗꓳ-ꓪꓰꓼ ꓗꓽ ꓠꓯ ꓞꓲꓼ ꓥ ꓟꓲ ꓗꓸ ꓖꓶ ꓔꓬ ꓡꓳ꓿ ꓢꓳ ꓦꓲ ꓮ ꓙꓵꓽ ꓗꓪ ꓡꓽ ꓛꓴꓸ ꓔꓯꓹ ꓢꓴ ꓟꓯꓼ ꓐꓴ ꓡꓳꓸ ꓔꓬ ꓡꓳ꓿ ꓖꓳ ꓡꓱ ꓥ ꓟꓲ ꓢꓳ ꓡ ꓢꓴ ꓮ ꓘꓶꓸ ꓟꓽ ꓙꓳ꓿ 46 ꓡꓳ ꓒꓱ ꓗꓪ ꓠꓬ ꓗꓳ-ꓪꓰꓼ ꓑꓶꓸ ꓓꓴ ꓒꓴ ꓟꓽ ꓪ ꓢꓰ꓿
ꓟꓯꓼ ꓐꓴ ꓡꓰ 10 ꓔꓸ ꓘꓳꓽ ꓢꓴ ꓐꓴ 12 ꓦ 31 ꓠꓬꓲ ꓗꓪ ꓛꓲꓽ ꓘꓳꓽ ꓙꓵꓽ ꓪ ꓓꓰꓽ ꓡꓯ ꓐꓰ ꓘꓴ ꓔꓬ ꓡꓳ꓿ ꓮ ꓟꓶ ꓕꓳ ꓶ ꓟꓽ ꓢꓳ ꓡ꓾ ꓟꓽ ꓘꓳ ꓡ ꓠꓬ ꓗꓸ ꓠꓯꓸ ꓫꓸ ꓡ ꓦ ꓐꓰ ꓚꓳꓹ ꓘꓶꓽ ꓮ ꓟꓬꓹ ꓕꓱ ꓔꓬ ꓡꓳ꓿
ꓢꓳ ꓦꓲ ꓗꓪ ꓡ ꓢꓲ ꓟꓽ ꓢꓳ ꓢꓴ ꓢꓳ ꓒ ꓢꓳ ꓟ ꓐꓴ ꓟꓬꓽ ꓠꓬꓲ ꓟ ꓢꓳ ꓒ ꓢꓳ ꓟ ꓐꓰ ꓐꓹ ꓐ ꓟꓹ ꓟ ꓐꓴ ꓡꓰ ꓒꓳꓹ ꓖꓶ ꓡ ꓟ ꓠꓬ꓾ (1) ꓡ ꓛꓴꓸ ꓐꓶ꓾ ꓐꓳꓽ ꓐꓶꓽ ꓔꓬ ꓟ꓾ (2) ꓗꓳ-ꓪꓰꓼ ꓠꓻ ꓔꓬ ꓟ (3) ꓟꓯꓼ ꓙꓵꓽ ꓚꓱꓹ ꓔꓯ ꓠꓲꓹ ꓜꓳ ꓔꓬ ꓟ ꓑꓶꓸ ꓓꓴ ꓥ ꓡꓳ꓾ ꓐꓯ ꓡꓳ꓿
