ꓮ-ꓟꓯ-ꓣꓲ-ꓗ ꓗꓴꓷꓼ ꓗꓪ ꓑꓳꓡꓲꓚꓰ ꓡꓰ ꓣꓴ ꓟꓶ ꓔꓸ ꓟ ꓟꓬ-ꓟ ꓡ ꓞꓳ ꓬꓯꓹ-ꓦꓰꓸ-ꓜꓳꓽ ꓠꓔ ꓟꓲ ꓠꓯ ꓗꓴꓷꓼ ꓜꓴ ꓗꓪ ꓟ ꓟꓬ-ꓟ ꓗꓴꓷꓼ ꓝꓲ ꓓꓴ ꓓꓽ ꓟ ꓚꓳ-ꓟꓳꓹ-ꓕꓴꓸ ꓔꓯ ꓢꓰꓼ ꓠꓹ ꓟ ꓙ ꓖꓶꓽ ꓗꓷ ꓠꓬꓲ ꓝꓴꓲꓸ ꓙꓳ ꓡꓰꓳ ꓐꓰ ꓣꓷꓠꓸ ꓓꓳ ꓡ ꓡꓳ꓿
ꓕꓮꓲꓹ ꓟꓵꓽ ꓗꓪ ꓔꓬ ꓟ ꓡꓽ ꓛꓴꓸ ꓶ ꓡꓯꓼ ꓬꓰ ꓢꓴ ꓕꓲ ꓣꓳ ꓡꓰ ꓝꓲ ꓩꓴ ꓡ ꓟ ꓡꓳ ꓚꓺ ꓝꓲ ꓓꓴ ꓓꓽ ꓟ ꓚꓳ-ꓟꓳꓹ-ꓕꓴꓸ ꓔꓯ ꓟꓲ ꓠꓯ ꓗꓴꓷꓼ ꓜꓴ ꓗꓪ ꓟꓬꓱꓽ ꓬꓰ ꓔꓬ ꓟ ꓗꓪ ꓐꓰ ꓠꓽ ꓡꓰ ꓠꓹ ꓟ꓾ ꓠꓽ ꓟꓽ ꓫꓳ ꓠꓬ ꓢꓰꓼ ꓠꓹ ꓟ ꓢꓯꓼ ꓕꓵꓼ ꓗꓷꓳ ꓐꓯ ꓡꓳ꓿
ꓡ ꓞꓳ ꓢꓰꓼ ꓠꓹ ꓟ ꓙ ꓖꓶꓽ ꓟ ꓑꓶꓸ ꓓꓴ 5 ꓘꓳꓼ ꓡꓴꓽ ꓠꓹ ꓟ ꓙꓵꓽ ꓗ ꓙꓳ ꓡꓳ꓿ ꓫꓵꓽ ꓪꓴ ꓕꓱ ꓟ ꓔꓯ ꓡ ꓠꓹ ꓟ 2022 ꓘꓳꓼ 5 ꓦ ꓗꓪ ꓫꓵꓽ ꓘꓶꓽ ꓓꓴ ꓥꓳ ꓐꓯ ꓡꓳ꓿
ꓝꓲ ꓓꓴ ꓓꓽ ꓟ ꓔꓯ ꓢꓰꓼ ꓠꓹ ꓟ ꓙ ꓖꓶꓽ ꓢꓴ ꓒꓬꓳꓹ-ꓦꓰꓸ- ꓕꓴꓼ (28 ꓘꓳꓼ) ꓐꓰ꓾ ꓬꓯꓹ-ꓦꓰꓸ-ꓜꓳꓽ (20 ꓘꓳꓼ) ꓕꓱ ꓠꓬꓲꓽ ꓣꓳ ꓔꓯ ꓣꓴ ꓟꓶ ꓔꓸ ꓟ ꓗꓪ ꓐꓰ ꓬꓯꓹ-ꓦꓰꓸ-ꓜꓳꓽ ꓠꓬ ꓝꓴꓲꓸ ꓙꓳ ꓡꓳ ꓐꓰ ꓣꓷꓠꓸ ꓘꓶꓽ ꓕꓱ ꓓꓳ ꓡ ꓟ ꓥ ꓡꓳ꓿
ꓟꓬ-ꓟ ꓗꓴꓷꓼ ꓝꓲ ꓓꓴ ꓓꓽ ꓟ ꓚꓳ-ꓟꓳꓹ-ꓕꓴꓸ ꓠꓬ ꓟꓬ-ꓟ ꓑ ꓫꓬ ꓠꓲꓹ ꓡꓶꓽ ꓔꓯ ꓟꓲ ꓠꓯ ꓗꓴꓷꓼ ꓜꓴ ꓗꓪ ꓫꓸ ꓕꓱ ꓔꓬ ꓠꓬꓲ꓾ ꓬꓴ ꓔꓯ ꓟꓽ ꓠꓵ ꓢꓴ ꓕꓲ ꓛꓱꓽ ꓗꓪ ꓐꓰ ꓡ ꓞꓳ ꓝꓲꓺ ꓩꓴ ꓢꓲꓸ ꓢꓰꓼ ꓠꓹ ꓟ ꓙꓽ ꓖꓶ ꓩꓴ ꓡ ꓟ ꓗꓪ꓾ ꓝꓐꓲ ꓟꓯꓼ ꓐꓴ ꓡꓰ ꓗꓳꓸ ꓗꓷ ꓟ 8 ꓦ ꓘꓴꓽ ꓗꓪ ꓣꓴ ꓟꓶ ꓡꓰ ꓟ ꓥ ꓡꓳ꓿
