ꓴꓢꓮ꓾ ꓔꓮꓫꓮꓢ꓾ ꓝꓳꓣꓔꓧꓪꓳꓣꓔꓧ ꓗꓪ ꓟ ꓔꓡꓚꓚ ꓘꓴ ꓜꓲꓼ ꓞꓳ ꓟꓸ ꓒꓽ ꓬꓲ-ꓓꓰ-ꓛ ꓐꓰ ꓟꓸ ꓟ ꓡꓲ-ꓬ-ꓛ ꓐꓴ ꓕꓲ ꓦꓲ ꓠꓬ꓾ ꓦꓲ ꓫꓵꓼ ꓕꓲ ꓟ ꓪꓴꓻ ꓟꓶ ꓡꓰ ꓢꓲꓸ 2021 ꓘꓳꓼ 8 ꓦ 29 ꓠꓬꓲ ꓟꓶ ꓘꓶꓼ 6-8 ꓙꓵꓹ ꓗꓪ ꓛꓲ ꓦꓲ ꓫꓵꓼ ꓓꓵꓽ ꓪ ꓘꓴ ꓜꓲꓼ ꓓꓴꓣꓱꓽ ꓬꓰ ꓗꓷꓳ=
ꓦꓲ ꓫꓵꓼ ꓓꓵꓽ ꓪ ꓘꓴ ꓜꓲꓼ ꓓꓴ ꓗꓪ ꓟꓸ ꓒ ꓤ-ꓗꓳ ꓡꓰ ꓟꓸ ꓖꓶ ꓗꓪ ꓐꓰ ꓢꓯꓼ ꓖꓶ ꓡ ꓢꓲ꓾ ꓟꓬꓱꓽ ꓡꓳꓸ ꓮ-ꓓꓶꓸ-ꓙꓬ ꓠꓬ ꓐꓲ ꓜꓲꓼ ꓪ ꓘꓴ ꓢꓴ꓾ ꓧ-ꓠ ꓡꓲ-ꓢꓴ ꓠꓬ ꓫꓱꓸ ꓖꓶ ꓟꓴ ꓖꓪ ꓖꓪ ꓢꓴ ꓬꓰ ꓗꓷ ꓢꓲ꓾ ꓜꓲꓼ ꓛꓲ ꓡ ꓢꓴ ꓤ ꓠꓱ ꓞꓳ ꓟꓳꓽ ꓮ ꓙꓵꓽ (50) ꓣꓳ ꓛꓲ ꓙꓳ ꓡꓳ=
” ꓧꓳꓽ ꓪꓴꓸ ꓟꓴ ꓙ ꓡ ꓟ ꓟꓸ ꓒ ꓐꓰ꓾ ꓟꓬꓱꓽ ꓡꓳ ꓟꓬꓱ ꓙ ꓢꓴ ꓐꓴ꓾ ꓔꓡꓚꓚ ꓗꓪ ꓟ ꓦꓲ ꓘꓴ ꓡ ꓞꓳ ꓮ ꓙꓵꓽ ꓔꓯ ꓮ ꓘꓶꓸ ꓫꓸ ꓟꓳ ꓐꓰ ꓐꓳ ꓚꓲꓸ ꓔꓸ ꓥꓳ= ꓪꓴ-ꓢ ꓗꓪ ꓐꓰ ꓶ ꓤ ꓫꓱ ꓤ ꓘꓳ ꓣꓴ ꓟꓶ ꓝꓲ (ဦးဆောင် ပေးသောဆရာ နှင့် သင်းထောက်များ TLCC အသင်းတော် ရှိ မိသားစုများအားလုံးကို အထူးကျေးဇူးတင် ကြောင်း မှတ်တမ်းပြုလျက် ဘုရားရှင်ထံတော်ပါးမှ ကောင်းကြီး မင်္ဂလာခံစားရရှိကြပါစေ) ” ꓐꓰ ꓟꓸ ꓒ ꓬꓲ-ꓓꓰ-ꓛ ꓡꓰ ꓬꓲꓸ ꓝꓮꓚꓰꓐꓳꓳꓗ ꓗꓪ ꓐꓳ ꓔꓸ ꓡꓳ=
ꓴꓢꓮ ꓗꓪ ꓦꓲ ꓒꓵꓽ ꓠꓬ ꓙꓳꓥꓽ ꓦꓲ ꓐꓰ ꓬꓲꓸ ꓔꓶꓸ ꓬꓲꓸ ꓖꓻ ꓔꓯ ꓛꓳꓽ ꓢꓲꓸ ꓬꓲꓸ ꓒꓵꓽ ꓟꓽ ꓫꓱꓸ ꓡꓯ ꓘꓳ= ꓥꓪꓸ ꓓꓴ ꓔꓯ ꓟꓳꓸ ꓐꓯ ꓠꓬ꓾ ꓬꓲꓼ ꓔꓸ ꓖꓴ ꓕꓲ ꓗꓳꓹ ꓙꓳ ꓟ ꓦꓲ ꓕꓲ ꓟ ꓥꓪꓸ ꓒꓵꓽ ꓠꓬ ꓦ ꓐ ꓕꓲ ꓟ ꓴꓢꓮ $700 ꓛꓲ ꓙꓳ ꓡꓳ= ꓖꓳ ꓗꓪ ꓬꓲ ꓙꓬ ꓒꓵꓽ ꓮ ꓔꓳꓸ ꓒꓵꓽ ꓟꓽ ꓐ ꓢꓰ=
“ꓮ ꓟ ꓶ ꓟꓸ ꓒ ꓬꓲ-ꓓꓰ-ꓛ ꓡꓰ ꓪꓴ ꓟꓶ ꓡꓰ ꓟ ꓦꓲ ꓒꓽ ꓬꓲꓸ ꓫꓵꓼ (Brand new) ꓕꓱ ꓡꓱꓳ ꓫꓵꓽ ꓠꓬ 300000-350000 ꓛꓲ ꓙꓳ ꓡꓳ= ꓣꓳ ꓡꓲ-ꓢꓴ ꓐꓴ 6 ꓦꓲ ꓛꓲ ꓪꓴ ꓪ ꓡꓰ ꓔꓬ ꓡꓳ= ꓗꓳꓸ ꓗꓷ ꓟ ꓗꓪ ꓦꓲ ꓫꓵꓼ ꓓꓵꓽ ꓑꓮꓲ 1 ꓦꓲ ꓬꓰ ꓓꓳ ꓡꓰꓳ= ꓮ ꓟꓶ ꓕꓱ ꓟ ꓠꓬ ꓟꓸ ꓒ ꓬꓲ-ꓓꓰ-ꓛ ꓐꓴ ꓕꓲ ꓦꓲ ꓥꓳ= ꓡ ꓠꓹ ꓟ 9-10 ꓦ ꓗꓪ ꓥ ꓟꓲ ꓡꓲ-ꓢꓴ ꓐꓴ ꓦꓲ ꓫꓵꓼ ꓓꓵꓽ ꓑꓮꓲ ꓙꓳ ꓡꓳ= ꓕꓱ ꓕꓲ ꓧꓪꓹ ꓥꓪ ꓠꓴ ꓠꓬ ꓥꓪ ꓠꓴ ꓟꓸ ꓒ ꓦꓲ ꓫꓵꓼ ꓓꓵꓽ ꓑꓮꓲ ꓗꓪ ꓘꓴ ꓜꓲꓼ ꓞꓳ ꓡꓰ ꓜꓽ ꓓꓴ ꓮ ꓙꓵꓽ ꓙ ꓖꓶꓽ ꓢꓲ꓾ ꓮꓸ ꓠꓬꓲꓽ ꓕꓲ ꓘꓹ ꓢꓰꓼ ꓢꓲꓸ ꓑꓮꓲ ꓬꓰ ꓔꓬ ꓟ ꓥ ꓡꓳ=” ꓐꓰ ꓟꓬꓱꓽ ꓡꓳꓸ ꓮ-ꓓꓶꓸ-ꓙꓬ ꓡꓰ ꓐꓯ ꓟꓳꓸ ꓖꓶ ꓩꓴ ꓡ ꓡꓳ=
ꓓꓳꓽ ꓕꓱ ꓟ ꓔꓯ ꓡꓳꓸ ꓟꓳ ꓢꓴ ꓐꓴ ꓮ ꓙꓵꓽ ꓗꓹ ꓛꓲ ꓠꓲꓹ ꓒꓴ ꓙ ꓔꓬ ꓡꓳ= ꓐꓶꓽ ꓟꓵ ꓗꓴꓷꓼ ꓓꓽ ꓟ ꓗꓪ ꓛꓲ ꓬꓰ ꓢꓴ ꓡꓲ-ꓢꓴ ꓤ ꓐꓴ ꓟꓬꓱꓽ ꓬꓰ ꓚꓱꓹ ꓮ ꓙꓵꓽ ꓗꓪ ꓮ ꓘꓶꓸ ꓢꓯꓼ ꓕꓵꓼ ꓔꓬ ꓟ ꓥ ꓡꓳ=
ꓒꓵꓽ ꓟ ꓟꓽ ꓛꓲ ꓟ ꓟꓵꓽ ꓗꓪ꓾ ꓒꓵꓽ ꓒ ꓟꓽ ꓔꓬ ꓟ ꓟꓵꓽ ꓗꓪ꓾ ꓡꓲ-ꓢꓴ ꓤꓽ ꓐꓴ ꓛꓲ ꓬꓰ ꓢꓲ꓾ ꓡꓲ-ꓢꓴ ꓟꓶꓼ ꓓꓴ ꓓꓳ ꓙꓰ ꓢꓲ꓾ ꓗꓴꓷꓼ ꓓꓽ ꓟ ꓗꓪ ꓔꓬ ꓖꓴ ꓙꓰ ꓖꓴꓳ꓾ ꓦꓲ ꓫꓵꓼ ꓓꓵꓽ ꓑꓮꓲ ꓬꓰ ꓔꓬ ꓖꓴꓳ꓾ ꓑꓶꓸ ꓒꓽ ꓓ ꓒꓽ ꓬꓰ ꓔꓬ ꓖꓴꓳ=
