ꓟꓬ-ꓟ ꓗꓴꓷꓼ ꓘꓴꓽ ꓗꓪ ꓒꓴ ꓦ ꓚꓱꓹ ꓮ ꓙꓵꓽ ꓔꓯ ꓗꓪꓼ ꓢꓲꓸ ꓒꓴ ꓦ ꓩꓴ/ ꓒꓴ ꓘꓳ ꓣꓴ ꓢꓴ ꓮ ꓙꓵꓽ ꓔꓯ ꓬꓲꓸ ꓐꓬꓱꓽ ꓓꓱꓽ ꓢꓲꓸ ꓗꓸ ꓚꓵ ꓣꓴ ꓔꓸ ꓠꓹ ꓟ꓾ ꓟꓸ ꓐꓳ ꓔꓲ ꓐꓬꓱꓽ ꓓꓱꓽ ꓔꓸ ꓠꓹ ꓟ ꓟꓬ-ꓟ ꓟꓯꓼ ꓗꓳ-ꓢꓰ ꓡꓰ ꓗꓴ ꓗꓴ ꓢꓲꓺ ꓕꓵꓼ ꓪ ꓓꓳ ꓩꓴ ꓡ ꓡꓳ꓿
ꓕꓱ ꓟ ꓠꓬ ꓟꓬ-ꓟ ꓟꓯꓼ ꓗꓳ-ꓢꓰ ꓔꓯ ꓔꓳꓹ ꓢꓴ ꓐꓴ ꓒꓴ ꓓꓵ/ꓓꓳ ꓚꓱꓹ ꓮ ꓙꓵꓽ ꓚꓲꓸ ꓚ ꓑꓲꓸ ꓞꓲꓽ ꓠꓹ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ꓿
ꓖꓳ ꓡꓱ ꓥ ꓟꓲ ꓕꓱ ꓡꓱ ꓬꓰˍ ꓟ ꓗꓪ ꓐꓰ ꓟꓽ ꓚꓬꓼ ꓢꓴ ꓔꓯ ꓮ ꓔꓳ ꓔꓳ ꓡꓲꓺ ꓢꓲꓸ ꓞꓳ ꓢꓰꓼ ꓪꓽ ꓢꓰꓼ ꓟ ꓙꓳ ꓡ ꓠ ꓔꓸ ꓡꓳ꓾ ꓐꓰ ꓑ ꓫꓬ ꓐꓴ ꓙ ꓫꓸ ꓔꓬ ꓡꓳ꓿
“ꓣꓳ ꓠꓽ ꓮ ꓫꓵꓽ ꓟꓽ ꓬꓰ ꓖꓶ꓾ ꓮ ꓔꓳ ꓔꓳ ꓗꓸ ꓧꓪ ꓢꓲꓸ ꓢꓰꓼ ꓡ ꓚꓱꓹ ꓗꓪ ꓛꓲ ꓬꓰꓳ꓿ ꓣꓳ ꓒꓴ ꓣꓳ ꓣꓱꓽ ꓟꓽ ꓙꓲ ꓟ ꓦꓬꓼ ꓠꓬꓲ ꓗꓪ ꓓꓵꓽ ꓙꓰ ꓡ ꓔꓬꓳ” ꓐꓰ ꓑ ꓫꓬ ꓕꓲ ꓣꓳ ꓡꓰ ꓐꓯ ꓡꓳ꓿
ꓟꓬ-ꓟ ꓗꓴꓷꓼ ꓗꓪ ꓒꓴ ꓞꓳ ꓦꓲ ꓮ ꓙꓵꓽ ꓠꓬ ꓒꓴ ꓦ ꓚꓱꓹ Apps ꓬꓰ ꓔꓸ ꓢꓲ꓾ ꓩꓴꓸ ꓗꓳ-ꓑꓶ-ꓠꓲ ꓐꓰ꓾ ꓶ ꓡꓯꓼ ꓚꓱꓹ ꓗꓳ-ꓑꓶ-ꓠꓲ ꓐꓴ ꓥ ꓟꓲ ꓒꓴ ꓦ ꓚꓱꓹ/ ꓘꓳ ꓣꓴ ꓚꓱꓹ ꓙꓽ ꓖꓶ ꓔꓸ ꓡꓳ꓿ ꓖꓳ ꓟ ꓮ ꓙꓵꓽ ꓠꓬ꓾ ꓣꓱꓽ ꓢꓴ ꓐꓴ ꓐꓱ ꓶ ꓗꓸ ꓗꓸ ꓘꓳꓽ ꓘꓳꓽ ꓣꓱꓽ ꓟꓽ ꓙꓲˍ ꓟ ꓦꓬꓼ ꓠꓬꓲ ꓛꓲ ꓡ ꓡꓳ꓿
