ꓢꓰ-ꓖ-ꓑꓳ ꓗꓴꓷꓼ ꓡ ꓞꓳ ꓐꓴ ꓮ ꓘꓶꓸ ꓠꓵˍ ꓟ ꓮ ꓭꓸ ꓧꓪꓽ ꓔꓯ ꓟꓶ-ꓡꓯ-ꓫ ꓗꓴꓷꓼ ꓗꓪ ꓐꓰ 2022 ꓘꓳꓼ 6 ꓦ 1 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓔꓱꓽ ꓠꓽ ꓡꓰˍ ꓠꓬꓲ꓾ ꓢꓰ-ꓖ-ꓑꓳ ꓗꓪ ꓮ ꓭꓸ ꓧꓪꓽ ꓧꓪ ꓫꓸ ꓡ꓾ ꓬꓲꓸ ꓒꓵꓽ ꓠꓯꓸ ꓡ ꓔꓬ ꓡꓳ꓿
“ꓮ ꓭꓸ ꓫꓳ ꓢꓴ ꓮ ꓟꓬꓹ ꓠꓬ ꓮ ꓭꓸ ꓜꓻ ꓒꓵꓽ ꓔꓳꓹ ꓟꓽ ꓘꓴ ꓠꓰ ꓠꓽ ꓙꓰ ꓖꓴꓳ꓿ ꓕꓱ ꓟ ꓑꓶꓸ ꓓꓴ ꓫꓳ ꓔꓸ ꓟ ꓮ ꓭꓸ ꓔꓯ ꓗꓴꓷꓼ ꓗꓪ ꓐꓰ ꓟꓽ ꓓꓳ ꓙꓰ ꓝꓲˍ ꓟ ꓥ ꓡꓳ꓿ ꓗꓴꓷꓼ ꓘꓴꓽ ꓗꓪ ꓜꓽ ꓓꓴ ꓙꓳ ꓠꓸ ꓟ ꓗꓴꓷꓼ ꓙꓵꓽ ꓢꓴ ꓐꓴ ꓡꓰ ꓙ ꓖꓶˍ ꓟ ꓥꓳ” ꓐꓰ ꓟꓶ-ꓡꓯ-ꓫꓸ ꓢꓲꓽ ꓒꓽ ꓐꓴ ꓡꓰ ꓐꓯˍ ꓡꓳ꓿
ꓕꓱ ꓟ ꓠꓬ ꓣ-ꓫꓸ ꓐꓰ ꓬꓴ-ꓗ-ꓣꓲꓸ ꓟꓯꓼ ꓢꓰꓼ ꓡꓯ ꓘꓳˍ ꓟ ꓑꓶꓸ ꓓꓴ ꓬꓲꓻ ꓒꓻ ꓙꓶꓼ ꓡ ꓟ ꓡꓰ ꓐꓰ ꓗꓴꓷꓼ ꓮ ꓟꓬꓹ ꓗꓪ ꓶ ꓡꓯꓼ ꓚꓱꓹ ꓜꓽ ꓓꓴ ꓓꓳ ꓓꓴ ꓚꓱꓹ ꓬꓰ ꓫꓸ ꓡ ꓔꓬ ꓟ ꓢꓷꓸ ꓡꓰ ꓓꓴ ꓥ ꓡꓳ꓾ ꓐꓯ ꓡꓳ꓿
ꓡ ꓞꓳ 55 ꓢꓯꓹ ꓛꓲ ꓔꓬ ꓟ ꓢꓰ-ꓖ-ꓑꓳ ꓗꓴꓷꓼ ꓠꓬ ꓬꓲ ꓙꓬ꓾ ꓜꓽ ꓓꓴ ꓓꓳ ꓓꓴ꓾ ꓣꓱꓽ ꓫꓵ ꓣꓱ ꓙꓲꓽ ꓮ ꓟꓬꓹ ꓔꓯ ꓢꓴ ꓗꓴꓷꓼ ꓐꓴ ꓗꓪ ꓐꓰ ꓔꓱꓽ ꓓꓵꓽ ꓔꓬ ꓟ ꓥ ꓡꓳ꓿
ꓗꓴꓷꓼ ꓞꓳ ꓤ ꓐꓴ ꓮ ꓘꓶꓸ ꓠꓵˍ ꓟ꓾ ꓮ ꓭꓸ ꓞꓶꓻ ꓡꓰ ꓚꓸ ꓔꓸ ꓟ ꓜꓻ ꓐꓰ꓾ ꓮ ꓭꓸ ꓧꓪꓽ ꓕꓲ ꓕꓱꓹ ꓠꓬ ꓢꓰ-ꓖ-ꓑꓳ 5 ꓓꓳ-ꓡ ꓪꓴꓽ ꓔꓬ ꓡꓳ꓿ ꓮ ꓟꓶ ꓪꓴꓻ ꓠꓲꓹ ꓫꓵ ꓡꓲꓸ ꓪꓴꓻ ꓪ ꓟꓽ ꓓ ꓦꓬꓼ ꓠꓬꓲ ꓛꓲ ꓡ ꓔꓬ ꓡꓳ꓿
ꓗꓴꓷꓼ ꓡ ꓞꓳ ꓐꓴ ꓜꓽ ꓓꓴ ꓙꓳ ꓠꓹ ꓟ ꓮ ꓭꓸ ꓧꓪꓽ 34% ꓔꓯ ꓟꓶ-ꓡꓯ-ꓫꓸ꓾ 49% ꓔꓯ ꓐꓶ-ꓬ-ꓜꓰꓸ꓾ 12% ꓔꓯ ꓴꓢꓮ ꓗꓪ ꓐꓰ ꓪꓴꓻ ꓔꓱꓽ ꓓꓵꓽ ꓩꓴ ꓡ ꓔꓬ ꓟ ꓥ ꓡꓳ ꓐꓰ Singapore Food Agency (SFA) ꓗꓪ ꓐꓳ ꓔꓸ ꓡꓳ꓿
ꓬꓲꓸ ꓚꓰ꓾ Reuters
