ꓑ-ꓢꓲ-ꓩꓲꓼ ꓬꓲꓻ ꓗꓳ ꓡꓳ ꓗꓴꓷꓼ ꓐꓴ ꓧꓶꓽ ꓗꓴꓷꓼ ꓡꓰ ꓖꓪ ꓙꓱˍ ꓟ ꓡꓳꓸ ꓙ ꓗꓽ ꓙ ꓚꓱꓹ ꓙ ꓟꓳ ꓘꓶꓽ ꓔꓯ ꓡꓯꓼ ꓓꓴ ꓢꓽ ꓟꓽ ꓐ ꓡ

June 2, 2022TheLisuTimes

ꓑ-ꓢꓲ-ꓩꓲꓼ ꓬꓲꓻ ꓗꓳ ꓡꓳ ꓗꓴꓷꓼ ꓕꓲ ꓐꓱ ꓠꓬ ꓧꓶꓽ ꓗꓴꓷꓼ ꓡꓰ ꓖꓪ ꓙꓱˍ ꓟ ꓡꓳꓸ ꓙ ꓗꓽ ꓙ ꓚꓱꓹ ꓙ ꓟꓳ ꓘꓶꓽ ꓔꓯ ꓡꓯꓼ ꓓꓴ ꓢꓽ ꓟꓽ ꓐ ꓡ ꓐꓰ ꓪꓵꓸ ꓓꓵ ꓶꓹ ꓩꓴ ꓡ ꓡꓳ꓿

ꓧꓶꓽ ꓗꓴꓷꓼ ꓠꓬ ꓑ-ꓢꓲ-ꓩꓲꓼ ꓬꓲꓻ ꓡꓴꓽ ꓐꓱ ꓓꓽ ꓟ ꓔꓯ ꓗꓪꓼ ꓠꓹ ꓟ꓾ ꓶ ꓡꓯꓼ ꓬꓰ ꓠꓹ ꓟ ꓓꓵꓽ ꓙ ꓚꓱꓹ ꓗꓪ ꓐꓰ ꓧꓶꓽ ꓗꓴꓷꓼ ꓐꓶꓽ ꓗꓴꓷꓼ ꓙ ꓡꓯ ꓘꓳ ꓔꓯ ꓟꓳꓸ ꓢꓲꓽ ꓒꓽ ꓓꓽ ꓟ ꓪ-ꓬꓲꓼ (Wang Yi) ꓑ-ꓢꓲ-ꓩꓲꓼ ꓬꓲꓻ ꓗꓳ ꓡꓳ ꓗꓴꓷꓼ 8 ꓗꓴꓷꓽ ꓗꓪ ꓙꓰ ꓚꓳ ꓢꓲꓸ ꓖꓪ ꓙꓱ ꓚꓳ ꓔꓬ ꓟ ꓥ ꓡꓳ꓿ 

ꓑ-ꓢꓲ-ꓩꓲꓼ ꓬꓲꓻ ꓗꓳ ꓡꓳ ꓗꓴꓷꓼ 8 ꓗꓴꓷꓼ ꓠꓬ꓾ Fiji, Kiribati, Papua New Guinea, Timor-Leste, Tonga and Vanuatu ꓐꓴ ꓥ ꓡꓳ꓿

ꓖꓳ ꓡꓱ ꓥ ꓟꓲ ꓬꓲꓸ ꓟꓶꓽ ꓗꓪ ꓡꓯꓼ ꓓꓴ ꓢꓽ ꓡꓯ ꓐꓰ ꓘꓴ ꓩꓴ ꓡ ꓠꓬ꓾ ꓮ ꓙꓵꓽ ꓢꓴ ꓪꓵꓸ ꓓꓵ ꓶꓹ ꓙꓰꓳ꓿

ꓑ-ꓢꓲ-ꓩꓲꓼ ꓬꓲꓻ ꓗꓳ ꓡꓳ ꓗꓴꓷꓼ ꓐꓴ ꓔꓯ ꓧꓶꓽ ꓒ ꓗꓴꓷꓼ ꓡꓰ ꓒꓴ ꓮ ꓟꓬꓹ ꓛꓲꓽ ꓖꓶ ꓗꓷˍ ꓟ ꓙꓳ ꓡꓳ꓿ 2016-17 ꓕꓲꓽ ꓘꓳꓼ ꓟ ꓘꓴꓽ ꓗꓪ 1.5 (15000 ꓢꓯꓹ ꓓꓳ-ꓡ) ꓛꓲꓽ ꓥꓪꓸ ꓔꓸ ꓡꓳ ꓐꓰ Lowy Institute ꓡꓰ ꓚꓲꓸ ꓚ ꓟꓶ ꓔꓸ ꓡꓳ꓿

ꓧꓶꓽ ꓗꓴꓷꓼ ꓡꓰ ꓗꓴꓷꓼ ꓤꓹ ꓤꓼ ꓐꓴ ꓔꓯ ꓬꓲꓸ ꓟꓯꓼ ꓒꓬꓱꓼ ꓡ ꓠꓹ ꓟ ꓫꓺ ꓜꓲꓼ ꓔꓬ ꓟ ꓟꓬꓱꓽ ꓗꓪ ꓒꓴ ꓒꓴ ꓡꓯꓽ ꓡꓯꓽ ꓕꓲ ꓩꓴꓸ꓾ ꓗꓴ ꓗꓴ ꓢꓲ ꓕꓲ ꓩꓴꓸ ꓛꓲꓽ ꓥꓪꓸ ꓢꓯꓼ ꓖꓶꓽ ꓔꓸ ꓟ ꓮ ꓟꓬ ꓛꓲ ꓙꓳ ꓡꓳ ꓐꓯˍ ꓟ ꓔꓯ ꓬꓲꓸ ꓚꓲꓸ ꓛꓬ ꓟꓽ ꓥ ꓠꓬ ꓠꓱꓸ ꓐꓯꓼ ꓜꓲ ꓜꓲ ꓟꓴ ꓟꓴ ꓢꓷꓸ ꓢꓴ ꓟꓽ ꓙꓳ꓿ 

ꓕꓱ ꓡꓱ ꓢꓯꓼ ꓩꓴ ꓡ ꓟ ꓠꓬ꓾ ꓴꓢꓮ ꓐꓰ ꓐꓶꓽ ꓓꓵꓽ ꓗꓴꓷꓼ ꓐꓴ ꓔꓯ ꓔꓳꓼ ꓡꓯ ꓘꓳ ꓠꓹ ꓟ ꓔꓶꓺ ꓙꓱꓼ ꓓꓽ ꓟ ꓥ ꓢꓲ꓾ ꓟꓲ ꓠꓯ ꓗꓴꓷꓼ ꓜꓴ ꓖꓪ ꓙꓱ ꓜꓲꓼ ꓔꓶꓸ ꓗꓪ ꓬꓲꓸ ꓔꓯ ꓔꓺ ꓓꓴ ꓟꓯꓼ ꓟꓬꓽ ꓡ ꓝꓲ ꓠꓹ ꓟ꓾ ꓕꓮꓲ ꓪ ꓔꓯ ꓧꓶꓽ ꓗꓴꓷꓼ ꓗꓪ ꓜꓳꓼ ꓩꓴ ꓠꓹ ꓟ꓾ ꓑ-ꓢꓲ-ꓩꓲꓼ ꓗꓪ ꓐꓰ ꓓꓳˍ ꓟ ꓶ ꓤ ꓶ ꓟꓲ ꓪꓴꓻ ꓠꓹ ꓟ ꓐꓰ꓾ ꓧꓶꓽ ꓗꓴꓷꓼ ꓗꓪ ꓐꓰ ꓫꓬꓹ ꓓꓳ ꓡ ꓟ ꓶ ꓤ ꓶ ꓟꓲ ꓪꓴꓽ ꓠꓹ ꓟ꓾ ꓝꓮꓲ ꓟꓲ ꓠꓯ ꓐꓶꓽ ꓓꓳ ꓕꓲ ꓟꓵꓽ ꓡꓱꓸꓼ ꓔꓯ ꓶ ꓡꓯꓼ ꓚꓱꓹ꓾ ꓗꓴꓷꓼ ꓚꓱꓹ ꓗꓪ ꓙꓵꓽ ꓗꓪꓼ ꓠꓹ ꓟ ꓢꓯꓼ ꓕꓵꓼ ꓩꓴ ꓡ ꓡꓳ꓾ ꓐꓰ ꓢꓷꓸ ꓢꓴ ꓐꓴ ꓡꓰ ꓢꓪꓼ ꓔꓬ ꓡꓳ꓿

ꓑꓠꓖ ꓗꓴꓷꓼ ꓠꓬ ꓧꓶꓽ ꓐꓶꓽ ꓗꓴꓷꓼ ꓔꓯ ꓟꓳꓸ ꓝꓲ ꓓꓴ ꓓꓽ ꓟ Wang Yi ꓔꓯ ꓠꓬꓲꓸ ꓠꓬꓲ 2022 ꓘꓳꓼ 6 ꓦ 3 ꓠꓬꓲ ꓕꓯꓽ ꓜꓲ ꓡꓯ ꓘꓳ ꓠꓹ ꓟ ꓥ ꓡꓳ꓿ “ꓮ ꓙꓵꓽ ꓢꓴ ꓔꓯ ꓛꓳ ꓒꓯꓹ ꓬꓰ꓾ ꓛꓴꓽ ꓙꓳ ꓢꓴ ꓕꓲꓽ ꓣꓳ ꓡꓲꓸ ꓕꓽ ꓙꓳ” ꓐꓯˍ ꓟ ꓗꓴꓷꓼ ꓓꓵꓽ ꓙ ꓚꓱꓹ ꓔꓯ 1975 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓡˍ ꓟ ꓡꓰ ꓐꓰ ꓙ ꓡꓯ ꓘꓳ ꓓꓴ ꓥꓳ ꓐꓯ ꓔꓬ ꓡꓳ꓿ 

ꓮꓳ-ꓢꓲ-ꓔꓯ-ꓡꓲ-ꓬ ꓗꓴꓷꓼ ꓥ ꓟꓲ ꓑ-ꓢꓲ-ꓩꓲꓼ ꓬꓲꓻ ꓗꓳ ꓡꓳ ꓗꓴꓷꓼ ꓐꓴ ꓔꓯ ꓧꓳꓽ ꓙ ꓔꓳꓹ ꓙ ꓟꓬꓱꓽ ꓔꓯ ꓧꓶꓸ ꓕꓯꓽ ꓟ ꓕꓯ ꓢꓲ ꓬꓰ ꓩꓴ ꓡ ꓔꓬ ꓡꓳ꓿ ꓕꓱ ꓟ ꓔꓯ ꓑ-ꓢꓲ-ꓩꓲꓼ ꓫꓬꓹ ꓑꓱ ꓫꓬꓹ ꓜꓯꓻ ꓟ (Pacific Step-up) ꓓꓵꓽ ꓙ ꓚꓱꓹ ꓐꓯ ꓡꓳ꓿ ꓕꓱ ꓟ ꓡꓰ ꓐꓰ ꓴꓢꓮ ꓥ ꓟꓲ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓔꓯ ꓧꓳꓽ ꓪꓴꓸ ꓟꓴ ꓢꓴ ꓬꓰ ꓢꓲꓸ ꓟꓲ ꓠꓯ ꓗꓴꓷꓼ ꓮ ꓟꓬꓹ ꓔꓯ ꓬꓲꓸ ꓚꓱꓹ ꓖꓴ ꓟꓳꓸ ꓢꓯꓼ ꓖꓶ ꓔꓬ ꓟ ꓦꓬꓼ ꓠꓬꓲ ꓥ ꓡꓳ꓿ꓧꓶꓽ ꓗꓴꓷꓼ ꓠꓬ ꓗꓳ-ꓟꓴ-ꓠꓰꓼ ꓙꓵꓽ ꓚꓱꓹ ꓣꓱꓽ ꓔꓬ ꓡꓳ ꓐꓯ ꓥ ꓟꓲ꓾ ꓣ-ꓫꓸ ꓗꓴꓷꓼ ꓔ ꓔꓲꓺ ꓑꓵꓺ ꓢꓲꓸ ꓟꓲ ꓠꓯ ꓗꓴꓷꓼ ꓐꓴ ꓐꓱ ꓶ ꓔꓱꓹ ꓚꓵˍ ꓟ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓙꓳ ꓡ ꓠꓹ ꓟ ꓢꓯꓼ ꓩꓴ ꓙ ꓔꓬ ꓡꓳ ꓐꓰ ꓐꓯ ꓓꓳ ꓡ ꓡꓳ꓿

Audio News

ꓐꓲ-ꓔꓲ-ꓫꓵ ꓪ ꓔꓲꓸ ꓟ ꓯ-ꓡꓲ-ꓜꓲ-ꓐꓯꓼ-ꓲꓲ ꓪ ꓔꓲꓸ ꓬꓰ ꓡˍ ꓟ 70 ꓘꓳꓼ

June 2, 2022TheLisuTimes

2022 ꓘꓳꓼ 6 ꓦ ꓕꓯꓽ ꓐꓲ-ꓔꓲ-ꓫꓵ ꓗꓴꓷꓼ ꓗꓪ ꓪ ꓔꓲꓸ ꓟ ꓯ-ꓡꓲ-ꓜꓲ-ꓐꓯꓼ-ꓲꓲ ꓠꓬ ꓪ ꓔꓲꓸ ꓬꓰ ꓡ ꓟ 70 ꓘꓳꓼ ꓐꓲ ꓡꓰˍ ꓟ ꓑꓶꓸ ꓓꓴ ꓚꓲꓸ ꓟꓶ ꓓꓴ ꓑꓮꓲꓽ ꓓꓽ ꓟ ꓬꓰ ꓔꓬ ꓡꓳ꓿ 

ꓪ ꓔꓲꓸ ꓟ ꓬꓲꓸ ꓟꓬꓱꓺ ꓒ ꓐꓲ ꓠꓬ꓾ Elizabeth Alexandra Mary Windsor ꓥ ꓢꓲ꓾ (Queen Elizabeth II ꓥ ꓟꓲ ꓘꓴˍ ꓡꓳ) 1926 ꓘꓳꓼ 4 ꓦ 21 ꓠꓬꓲ ꓕꓯꓽ ꓦꓵ ꓔꓸ ꓢꓴ ꓥ ꓠꓬꓲ꓾ ꓮ ꓟꓶ ꓠꓬ ꓬꓲꓸ ꓞꓲꓼ 96 ꓘꓳꓼ ꓙꓳˍ ꓡꓳ꓿

ꓬꓲꓸ ꓞꓲꓼ 25 ꓘꓳꓼ ꓙꓳˍ ꓕꓯˍ ꓡꓰ ꓪ ꓔꓲꓸ ꓟ ꓠꓬꓲꓺ ꓖꓴ ꓪ ꓢꓴ ꓥ ꓡꓳ꓿ 1952 ꓘꓳꓼ 6 ꓦ ꓗꓪ ꓬꓲꓸ ꓐꓱ ꓶ ꓪ ꓔꓲꓸ ꓠꓬꓲ ꓖꓴ ꓓꓯꓻ ꓑꓮꓲꓽ ꓬꓰ ꓗꓷ ꓡꓳ꓿ 

ꓪ ꓔꓲꓸ ꓙꓵꓽ ꓚꓱꓹ ꓮ ꓟꓬꓹ ꓙꓳ ꓡꓳ꓿ꓐꓲ-ꓔꓲ-ꓫ ꓗꓴꓷꓼ ꓗꓪ ꓧꓶꓸ ꓕꓯꓽ ꓠꓬ ꓪ ꓔꓲꓸ ꓙꓵꓽ ꓚꓱꓹ ꓡꓰꓽ ꓙꓵꓽ ꓗꓳꓸ ꓡ ꓟ ꓥ ꓢꓲ꓾ ꓮ ꓟꓶ ꓥ ꓟꓲ ꓪ ꓔꓲꓸ ꓠꓬ ꓕꓲꓽ ꓗꓴꓷꓼ ꓡꓱꓸꓼ ꓗꓪ ꓐꓰ ꓬꓲꓸ ꓪꓵꓸ ꓓꓵ ꓢꓪꓼ ꓔꓸ ꓡꓳ꓿ ꓝꓮꓲ ꓧꓶꓸ ꓕꓯꓽ ꓐꓲ-ꓔꓲ-ꓫꓵ ꓡꓯ ꓒꓯꓹ ꓗꓪ ꓔꓬ ꓠꓬꓲ ꓢꓴ ꓗꓴꓷꓼ ꓐꓴ ꓗꓪ ꓐꓰ Commonwealth Countries ꓗꓴꓷꓼ ꓤꓹ ꓤꓽ 15 ꓟ ꓬꓲꓸ ꓪꓵꓸ ꓓꓵ ꓥ ꓟꓲ ꓥ ꓢꓰꓽ ꓡꓳ꓿

ꓖꓳ ꓡꓱ ꓥ ꓟꓲ ꓙꓵꓽ ꓗ ꓔꓶꓺ ꓟꓬꓱꓽ ꓠꓬ ꓑ ꓫꓬ ꓝꓲ ꓓꓴ ꓜꓴ (ꓑ-ꓡꓲ-ꓟ) ꓗꓪ ꓐꓰ ꓕꓲꓽ ꓝꓸ ꓔꓶˍ ꓟ ꓥ ꓠꓬꓲ꓾ ꓪ ꓔꓲꓸ ꓡꓰ ꓮ ꓡꓲ ꓓꓵꓽ ꓙ ꓮ ꓡꓲ ꓙꓵꓽˍ ꓟ ꓟꓽ ꓥ ꓥ꓾ ꓑ ꓫꓬ ꓙꓲ ꓖꓴ ꓐꓱ ꓶ ꓙꓵꓽ ꓗ ꓔꓶꓺ ꓢꓲꓸ ꓙꓵꓽˍ ꓟ ꓚꓱꓹ꓾ ꓥꓹ ꓠꓬ ꓬꓲꓸ ꓙꓵꓽ ꓗ ꓛꓳ ꓢꓲꓸ ꓪ ꓔꓲꓸ ꓙꓵꓽˍ ꓟ ꓚꓱꓹ constitutional monarchy ꓥ ꓡꓳ꓿ 

ꓐꓲ-ꓔꓲ-ꓫꓵ ꓠꓬ ꓮ ꓟꓶ ꓗꓪ ꓛꓲ ꓪ ꓔꓲꓸ ꓙꓵꓽ ꓚꓱꓹ ꓡꓲꓽ ꓒꓰꓼ ꓕꓱ ꓟ ꓔꓯ ꓫꓺ ꓒꓵꓽ ꓔꓬ ꓟ ꓥ ꓡꓳ꓿

Video News