Video News
ꓴꓢꓮ ꓟꓴ ꓡꓳꓹ ꓬꓰˍ ꓟ ꓫꓵꓽ ꓘꓶꓽ ꓔꓶꓸ (Supreme Court) ꓗꓪ ꓞꓳ ꓠꓯꓺ ꓫꓵꓽ ꓘꓶꓽ ꓟ ꓕꓲ ꓣꓳ ꓔꓯ ꓬꓲꓸ ꓪꓴꓸ ꓕꓲ ꓧꓪꓹ ꓢꓲꓻ ꓪ ꓡꓰꓳ
ꓴꓢꓮ ꓟꓴ ꓡꓳꓹ ꓬꓰˍ ꓟ ꓫꓵꓽ ꓘꓶꓽ ꓔꓶꓸ ꓗꓪ ꓠꓬꓹ ꓠꓹ ꓟ ꓞꓳ ꓠꓯꓺ ꓫꓵꓽ ꓘꓶꓽ ꓟ ꓗꓯꓼ-ꓔ-ꓙꓲ ꓐ-ꓣꓳ ꓙꓼ-ꓢꓰ (Ketaji Brown Jackson) ꓔꓯ ꓢꓰ-ꓠꓰꓼ ꓗꓴꓷꓼ ꓜꓲꓼ ꓓꓴ ꓗꓪ 53 ꓟꓯꓹ 47 ꓟꓯꓹ ꓗꓪ ꓐꓰ ꓞꓳ ꓠꓯꓺ ꓫꓵꓽ ꓘꓶꓽ ꓟ ꓕꓲ ꓣꓳ ꓔꓯ ꓚ ꓟꓲꓽ ꓗꓪ ꓬꓲꓸ ꓪꓴꓸ ꓕꓲ ꓧꓪꓹ ꓢꓲꓻ ꓪ ꓡꓰꓳ꓿
ꓬꓲꓸ ꓞꓲꓼ 53 ꓘꓳꓼ ꓙꓳˍ ꓟ ꓞꓳ ꓠꓯꓺ ꓫꓵꓽ ꓘꓶꓽ ꓟ ꓠꓬ꓾ ꓬꓲꓸ ꓞꓲꓼ 83 ꓘꓳꓼ ꓙꓳ ꓢꓲꓸ ꓟꓬꓱꓽ ꓗꓪ ꓐꓰ ꓠꓽ ꓙꓰ ꓢꓴ ꓫꓵꓽ ꓘꓶꓽ ꓒꓽ ꓐ-ꓬꓯ-ꓬ (Stephen Breyer) ꓠꓬꓲ ꓖꓴ ꓗꓪ ꓓꓵꓽ ꓡ ꓟ ꓥ ꓡꓳ꓿
ꓕꓱ ꓡꓱ ꓞꓳ ꓠꓯ ꓕꓲ ꓣꓳ ꓫꓵꓽ ꓘꓶꓽ ꓟ ꓓꓽ ꓟ ꓒꓬꓱꓼ ꓡ ꓟ ꓔꓯ “ꓞꓳ ꓠꓯꓺ ꓤ ꓟꓶꓼ ꓡꓯꓸ ꓐꓴ ꓐꓱ ꓶ ꓦ ꓐꓬꓱꓽ ꓙꓳ ꓠꓯˍ ꓟ ꓔꓶ ꓙꓱꓼ ꓬꓲꓸ ꓫꓵꓼ (a new dream to dream)” ꓟꓲ-ꓫꓬꓸ ꓳ-ꓐ-ꓟ ꓡꓰ ꓐꓯˍ ꓡꓳ꓿ ꓝꓮꓲ ꓳ-ꓐ-ꓟ ꓡꓰ ꓥ ꓟꓲ ꓫꓱꓸ ꓖꓶ ꓔꓸ ꓡꓳ꓿
ꓕꓱ ꓡꓱ ꓒꓬꓱꓼ ꓡ ꓟ ꓠꓬ ꓟꓴ ꓡꓳꓹ ꓬꓰ ꓟ ꓫꓵꓽ ꓘꓶꓽ ꓔꓶꓸ ꓗꓪ ꓞꓳ ꓠꓯꓺ ꓤ ꓟꓶ ꓤꓼ ꓕꓲ ꓣꓳ ꓙꓵꓽ ꓪ ꓣꓴ ꓟꓶˍ ꓟ ꓴꓢꓮ ꓚꓺ ꓟꓲꓽ ꓗꓪ ꓬꓲꓸ ꓪꓴꓸ ꓕꓲ ꓧꓪꓹ ꓥ ꓡꓳ꓿
ꓴꓢꓮ Supreme Court ꓔꓯ 1789 ꓘꓳꓼ ꓗꓪ ꓔꓶ ꓪꓴꓸ ꓔꓴ ꓔꓸ ꓢꓲꓸ ꓫꓵꓽ ꓘꓶꓽ ꓒꓽ/ ꓟ 115 ꓣꓳ ꓔꓬ ꓠꓬꓲˍ ꓡꓳ꓿ ꓖꓳ ꓗꓪ ꓛꓲ ꓬꓰ ꓢꓴ ꓠꓬ ꓟꓽ ꓫꓵꓻ ꓕꓲꓽ ꓟꓳꓽ ꓬꓰ ꓖꓰꓼ ꓕ ꓑꓳꓸ ꓬꓰ ꓠꓹ ꓟ ꓥ ꓡꓳ꓿ ꓕꓲ ꓧꓪꓹ ꓗꓪ ꓟꓴ ꓡꓳꓹ ꓬꓰˍ ꓟ ꓫꓵꓽ ꓘꓶꓽ ꓒꓽ/ꓟ 9 ꓣꓳ ꓒ ꓐꓲ ꓟꓬꓱꓽ ꓟꓯꓻ ꓔꓬ ꓟ ꓥ ꓡꓳ꓿
Audio News(ꓠ ꓠꓹ ꓓꓴ )
3 ꓘꓳꓼ ꓤ ꓠꓱ ꓕꓲ ꓣꓳ ꓔꓯ ꓟꓬ-ꓟ ꓟꓯꓼ ꓡꓰ ꓣꓴ ꓧꓳꓽ ꓙꓰꓳ
3 ꓘꓳꓼ ꓤ ꓠꓱ ꓤꓹ ꓤꓼ ꓟꓮꓳ-ꓔꓼ-ꓐꓳꓹ- ꓪꓯꓽ-ꓬꓽ ꓔꓯ 2022 ꓘꓳꓼ 4 ꓦ 5 ꓠꓬꓲ ꓕꓯꓽ ꓬꓥ-ꓖꓳ ꓗꓪ ꓟ ꓮ-ꓡꓳ ꓡꓳ ꓒꓱ꓾ ꓢꓰ-ꓟꓰꓹ ꓘꓹ ꓒꓱ꓾ ꓐꓚ Preschool ꓗꓪ ꓟꓬ-ꓟ ꓟꓯꓼ 20 ꓛꓲ ꓡ ꓢꓲꓸ ꓣꓴ ꓧꓳꓽ ꓙꓰꓳ꓿
ꓬꓲꓸ ꓮ ꓐ ꓮ ꓟ ꓐꓴ ꓠꓬ ꓑꓓꓝ ꓟꓯꓼ ꓬꓰ ꓢꓴ ꓐꓴ ꓔꓯ ꓔꓳꓹ ꓙ ꓢꓴ ꓥ ꓡꓳ꓾ ꓐꓯ ꓢꓲꓸ ꓣꓴ ꓟꓽ ꓪ ꓠꓬꓲ꓾ ꓤ ꓠꓱ ꓔꓯ ꓬꓲꓸ ꓕꓳ ꓶ ꓢꓳ ꓖꓴ ꓗꓪ ꓐꓰ ꓣꓴ ꓧꓳꓽ ꓙꓰˍ ꓟ ꓥ ꓡꓳ꓿
“ꓢꓳ ꓦꓲ ꓗꓪ ꓡ ꓢꓲꓸ ꓤ ꓠꓱ ꓤꓼ ꓔꓯ ꓧꓪ ꓡ ꓕꓯꓽ ꓥ ꓠꓰ ꓟꓽ ꓖꓶ꓿ ꓬꓲ ꓔꓯ ꓥ ꓟꓯꓸ ꓤꓼ ꓓꓴ ꓥ꓿ ꓤ ꓠꓱ ꓤꓹ ꓤꓼ ꓔꓯ ꓠꓴ ꓪ ꓧꓳꓽ ꓙꓰ ꓟꓽ ꓓ꓾ ꓐꓯ ꓢꓲꓸ ꓗꓽ ꓥ ꓟꓲ ꓟꓽ ꓓ ꓟꓽ ꓢ ꓣꓴ ꓧꓳꓽ ꓙꓰꓳ” ꓐꓰ ꓢꓳ ꓦꓲ ꓗꓪ ꓟ ꓟꓸ ꓟ ꓡꓰ ꓐꓯ ꓡꓳ꓿
ꓝꓮꓲ ꓬꓲꓸ ꓟꓹ ꓟ ꓔꓯ ꓥ ꓟꓲ ꓖꓳ ꓕꓲ ꓠꓬꓲ ꓠꓯꓼ ꓝꓲꓸ ꓗꓪ ꓡ ꓛꓴꓸ ꓠꓰ ꓐꓶ ꓢꓲꓸ ꓣꓴ ꓟꓶ ꓔꓸ ꓡꓳ꓿
“ꓮ ꓫꓵꓽ ꓟꓽ ꓚ ꓜꓲ ꓜꓲ ꓑꓰꓹ ꓳꓰꓹ ꓬꓰ ꓚꓽ ꓢꓴ ꓟꓯꓼ ꓡꓯ ꓒꓯꓹ ꓗꓪ ꓤ ꓠꓱ ꓤꓼ ꓐꓰ ꓟꓹ ꓟ ꓢꓯꓼ ꓟꓬ ꓐꓱ ꓶ ꓙꓲ ꓣꓴ ꓓꓴ ꓙꓳˍ ꓡꓳ” ꓐꓰ ꓬꓥ-ꓖꓳꓥ ꓑ ꓫꓬ ꓒꓳꓹ ꓔꓳꓹ ꓜꓴ ꓗꓪ ꓐꓰ 2022 ꓘꓳꓼ 4 ꓦ 8 ꓠꓬꓲ ꓕꓯꓽ ꓢꓷ ꓙ ꓟꓴ ꓙ ꓡꓳ꓿
ꓤ ꓠꓱ ꓤꓼ ꓔꓯ ꓕꓱ ꓡꓱ ꓣꓴ ꓧꓳꓽ ꓙꓰˍ ꓟ ꓔꓯ ꓠꓴꓖ ꓡꓰ ꓗꓴꓷꓼ ꓜꓴ ꓗꓪ ꓗꓳꓹ ꓔꓸ ꓡꓳ꓾ ꓐꓰ ꓢꓲꓽ ꓟ ꓰꓼ-ꓔꓲ-ꓜ-ꓟꓮꓳꓽ ꓡꓰ ꓐꓯ ꓡꓳ꓿
ꓟꓬ-ꓟ ꓗꓪ ꓟꓯꓼ ꓶ ꓤ ꓗꓴ ꓗꓴ ꓢꓲ ꓦ ꓠꓹ ꓟ ꓐꓰ꓾ ꓬꓲꓼ ꓡ ꓠꓯ ꓞꓲꓼ ꓶ ꓡꓯꓼ ꓬꓰ ꓠꓹ ꓟ ꓢꓯꓼ ꓕꓵꓼ ꓢꓴ ꓙ-ꓑ ꓬ-ꓗꓴ-ꓜ ꓜꓴ ꓧꓳꓽ ꓢꓴ ꓕꓲ ꓣꓳ ꓴꓢꓮ ꓗꓪ ꓣꓴ ꓟꓶ ꓡꓰꓳ
ꓟꓬ-ꓟ ꓗꓪ ꓟꓯꓼ ꓶ ꓤ ꓗꓴ ꓗꓴ ꓢꓲ ꓦ ꓩꓴ ꓠꓹ ꓟ ꓐꓰ꓾ ꓬꓲꓼ ꓡ ꓠꓯ ꓞꓲꓼ ꓶ ꓡꓯꓼ ꓚꓰꓹ ꓠꓹ ꓟ ꓢꓯꓼ ꓕꓵꓼ ꓢꓴ ꓙ-ꓑ ꓬ-ꓗꓴ-ꓜ ꓜꓴ ꓧꓳꓽ ꓢꓴ ꓕꓲ ꓣꓳ ꓴꓢꓮ ꓗꓪ ꓣꓴ ꓟꓶ ꓡꓰꓳ꓾ ꓐꓰ Reuters ꓡꓰ 2022 ꓘꓳꓼ 4 ꓦ 7 ꓠꓬꓲ ꓕꓯꓽ ꓓꓳꓽ ꓐꓳˍ ꓡꓳ꓿
ꓬꓲꓸ ꓠꓬ ꓬ-ꓗꓴ-ꓜ ꓜꓴ ꓧꓳꓽ ꓢꓴ ꓕꓲ ꓣꓳ꓾ 57 ꓘꓳꓼ ꓙꓳˍ ꓟ Takeshi Ebisawa ꓥ ꓡꓳ꓿ ꓬꓲꓸ ꓠꓬ ꓙꓱ ꓦꓲ ꓐꓶ ꓓꓴ missile ꓐꓰ ꓬꓯ ꓶ ꓡꓯꓼ ꓑꓶꓸ ꓓꓴ ꓣꓴ ꓟꓶ ꓡꓰˍ ꓟ ꓥ ꓡꓳ꓿
ꓬꓲ ꓔꓯ ꓟꓯꓼ ꓶ ꓤ ꓘꓴꓽ ꓪꓴꓽ ꓟ ꓐꓰ ꓬꓲꓼ ꓡ ꓟ ꓠꓯ ꓞꓲꓼ ꓚꓱꓹ ꓗꓪ ꓐꓰ ꓴꓢꓮ ꓗꓴꓷꓼ ꓙꓵꓽ ꓜꓴ ꓡꓰ ꓐꓯ ꓟꓴ ꓩꓴ ꓔꓸ ꓡꓳ꓾ ꓐꓯ ꓡꓳ꓿
