ꓟꓬ-ꓟ ꓟꓯꓼ ꓗꓳ-ꓢꓰ ꓔꓯ ꓙ ꓡꓯ ꓘꓳ ꓠꓲꓹ ꓟꓽ ꓫꓵ ꓠꓬꓲ꓾ US Embassy Rangoon ꓢꓽ ꓡ ꓙꓵꓽ ꓠꓬ ꓡꓽ ꓙꓰ ꓓꓴ ꓥꓳ ꓐꓰ Nikkei Asia ꓡꓰ 2022 ꓘꓳꓼ 12 ꓦ 8 ꓠꓬꓲ ꓕꓯꓽ ꓓꓳꓽ ꓐꓳˍ ꓡꓳ꓿
ꓟꓯꓼ ꓗꓳ-ꓢꓰ ꓡꓰ 2023 ꓘꓳꓼ ꓗꓪ ꓗꓴꓷꓼ ꓙꓵꓽ ꓢꓴ ꓢꓲꓻ ꓣꓴ ꓑꓮꓲ ꓬꓰ ꓓꓴ ꓥꓳ ꓐꓯ ꓔꓬ ꓟ ꓗꓪ ꓴꓢꓮ ꓡꓰꓽ ꓕꓱ ꓡꓱ ꓙ ꓡꓯ ꓘꓳ ꓚꓱꓹ ꓕꓲꓽ ꓝꓸ ꓞꓰ ꓩꓴ ꓡ ꓟ ꓥ ꓡꓳ꓿
ꓗꓴꓷꓼ ꓝꓲ ꓓꓴ ꓠꓬ ꓙꓵꓽ ꓪ ꓦꓴ ꓢꓴ ꓔꓯ ꓜꓲ ꓡꓯ ꓘꓳ ꓕꓯꓽ ꓬꓲꓸ ꓔꓯ ꓞꓳ ꓒꓵꓽ ꓟ ꓟꓳꓸ ꓖꓶˍ ꓟ ꓡꓰ ꓐꓰ ꓗꓷ ꓡꓰˍ ꓠꓬꓲ꓾ ꓖꓳ ꓡꓱ ꓜꓲ ꓡꓯ ꓘꓳ ꓟꓽ ꓛꓲ ꓠꓹ ꓟ ꓙ ꓡꓯ ꓘꓳ ꓙꓶ ꓬꓲꓸ ꓕꓲꓸ ꓞꓰ ꓩꓴˍ ꓟ ꓥ ꓡꓳ꓿
“ꓟꓯꓼ ꓗꓳ-ꓢꓰ ꓡꓰ ꓬꓰˍ ꓟ ꓗꓴꓷꓼ ꓙꓵꓽ ꓢꓴ ꓢꓲꓻ ꓣꓴ ꓑꓮꓲ ꓠꓬ ꓔꓱꓹ ꓔꓱꓹ ꓜꓳꓽ ꓜꓳ ꓗ ꓡ ꓓꓴ ꓚꓱꓹ ꓟꓽ ꓙꓳ (there’s no chance it could be free and fair)” ꓐꓰ ꓴꓢꓮ ꓗꓴꓷꓼ ꓙꓵꓽ ꓜꓴ ꓡꓰ ꓐꓯ ꓔꓸ ꓡꓳ꓿
US Embassy Yangoon ꓢꓽ ꓡ ꓙꓵꓽ Thomas Vajda ꓡꓽ ꓙꓰˍ ꓠꓬ꓾ ꓟꓬꓱꓽ ꓧꓳꓽ ꓢꓴ Deputy chief of mission Deborah Lynn ꓡꓰ ꓧꓳꓽ ꓪꓴꓸ ꓟꓴ ꓔꓬ ꓓꓴ ꓥ ꓡꓳ꓿
ꓟꓯꓼ ꓗꓳ-ꓢꓰ ꓡꓰ ꓗꓴꓷꓼ ꓙꓵꓽ ꓪ ꓦꓴ ꓙꓰ ꓟ ꓐꓰ꓾ ꓑ ꓫꓬ ꓔꓯ ꓢꓰꓼ ꓔꓬ ꓟ꓾ ꓝꓮꓲ 2023 ꓘꓳꓼ ꓗꓪ ꓗꓴꓷꓼ ꓙꓵꓽ ꓢꓴ ꓢꓲꓻ ꓑꓮꓲꓽ ꓬꓰ ꓔꓳꓼ ꓟ ꓚꓱꓹ ꓔꓯ ꓠꓲꓹ ꓧꓳꓹ ꓟ ꓒꓬꓱꓽ ꓟꓳꓸ ꓖꓶ ꓠꓲꓹ ꓟꓽ ꓫꓵ ꓠꓰ ꓕꓱ ꓡꓱ ꓓꓳ ꓙꓰˍ ꓟ ꓥ ꓡꓳ꓿
ꓙ-ꓟꓶ-ꓠꓰ꓾ ꓲ-ꓔꓲ-ꓡꓲ꓾ ꓳ-ꓢꓲ-ꓔꓯ-ꓡꓲ-ꓬ꓾ ꓗ-ꓠꓯ-ꓓ꓾ ꓖꓴ ꓟꓶꓸ ꓗꓳ-ꓣꓲ-ꓬ꓾ ꓬꓴ-ꓗꓯ꓾ ꓟꓶ-ꓡꓯ-ꓫ꓾ꓒꓲ-ꓡꓲ-ꓒꓲ꓾ꓐꓶ-ꓣꓴ-ꓠꓮꓲꓹ ꓗꓴꓷꓼ ꓐꓴ ꓥ ꓟꓲ ꓟꓬ-ꓟ ꓐꓱ ꓶ ꓙ ꓡꓯ ꓘꓳ ꓦꓲ ꓝꓲ ꓓꓴ ꓓꓽ ꓟ ꓟꓽ ꓔꓬꓳ꓿
