ꓟꓬ-ꓟ ꓑ ꓫꓬ ꓢꓯꓼ ꓟꓬ ꓚꓬꓴꓹ ꓠꓹ ꓟ ꓐꓱ ꓶ ꓑ ꓫꓬ ꓔꓯ ꓢꓰꓼ ꓔꓬ ꓟ ꓟꓬ-ꓟ ꓟꓯꓼ ꓙꓱ ꓦꓲ꓾ ꓞꓽ ꓒꓳ꓾ ꓐꓰ ꓟꓳ ꓓꓳ ꓔꓯ ꓒꓬꓹ ꓐ ꓡ ꓢꓴ ꓔꓯ ꓒꓴ ꓡꓯꓼ ꓫꓴ ꓖꓶꓽ ꓓꓴ ꓥꓳ ꓐꓰ ꓠꓴꓖ ꓡꓰ ꓠꓬꓲꓸ ꓠꓬꓲ 2022 ꓘꓳꓼ 4 ꓦ 7 ꓠꓬꓲ ꓕꓯꓽ ꓢꓷꓸ ꓙ ꓟꓴ ꓙ ꓩꓴ ꓡ ꓡꓳ꓿
ꓠꓴꓖ ꓢꓷ ꓙ ꓟꓴ ꓙ ꓕꓳ ꓶ 6/2022 ꓗꓪ꓾ ꓐꓳ ꓔꓸ ꓟ ꓠꓬ꓾
(1) ꓜꓲ ꓜꓲ ꓑꓰꓹ ꓑꓰꓹ ꓬꓲꓸ ꓜꓲꓽ ꓬꓲ ꓥꓳꓸ ꓙꓵꓽ ꓢꓴ ꓟꓬ-ꓟ ꓟꓯꓼ ꓗꓳ-ꓢꓰ ꓔꓯ ꓬꓲꓸ ꓚꓱꓹ ꓮ ꓟꓬꓹ ꓗꓪ ꓐꓰ ꓒꓳꓹ ꓔꓳꓹ ꓔꓬ ꓟ ꓟꓬ-ꓟ ꓑ ꓫꓬꓽ ꓐꓴ ꓔꓯ ꓟꓬ-ꓟ ꓟꓯꓼ ꓡꓰ ꓬꓲ ꓙꓬ ꓚꓱꓹ꓾ ꓙꓱ ꓦꓲ ꓚꓱꓹ ꓐꓰ ꓟꓵꓽ ꓛꓱꓹ ꓗꓪ ꓐꓰ ꓕꓲ ꓠꓬꓲ ꓡꓲꓸ ꓕꓲ ꓠꓬꓲ ꓓꓵꓽ ꓙ ꓟꓽ ꓗꓴꓸ ꓗꓪ ꓛꓲ ꓟꓯꓼ ꓢꓰꓼ ꓔꓬ ꓟ ꓥ ꓡꓳ꓿
(2) ꓝꓴꓲꓸ ꓟꓽ ꓙꓳ ꓢꓴ ꓑ ꓫꓬꓽ ꓐꓴ ꓔꓯ ꓢꓰꓼ ꓠꓹ ꓟ ꓟꓬ-ꓟ ꓟꓯꓼ ꓡꓰ ꓣꓱꓽ ꓔꓬ ꓟ ꓙꓱ ꓦꓲ꓾ ꓙꓱ ꓦꓲ ꓑꓳꓼ ꓡꓳꓼ꓾ ꓞꓽ ꓒꓳꓽ꓾ ꓔꓲꓼ ꓟꓳ-ꓓꓳ꓾ ꓧꓳꓽ ꓕꓴꓽ ꓔꓸ ꓟ ꓟꓳ-ꓓꓳ ꓐꓴ ꓠꓬ ꓑ ꓫꓬ ꓶ ꓤ ꓶ ꓟꓲ ꓐꓰ ꓢꓯꓼ ꓟ ꓔꓯ ꓗꓽ ꓙ ꓡꓳꓸ ꓙ ꓠꓹ ꓟ ꓑ ꓫꓬ ꓒꓴ ꓡꓰꓽ ꓪꓴꓻ ꓔꓸ ꓟ ꓶ ꓤ ꓶ ꓟꓲ ꓥ ꓡꓳ꓿
(3) ꓮ ꓟꓶ ꓠꓬ ꓑ ꓫꓬ ꓶ ꓤ ꓶ ꓟꓲ ꓐꓰ ꓢꓯꓼ ꓟꓬ ꓔꓯ ꓡꓳꓸ ꓙ ꓗꓽ ꓙ ꓓꓴ ꓟꓽ ꓬꓰˍ ꓟ ꓡꓰꓽ ꓟꓽ ꓞꓲ꓾ ꓑ ꓫꓬ ꓦꓲ ꓒꓬꓹ꓾ ꓢꓯꓼ ꓟꓬ ꓔꓯ ꓢꓰꓼ ꓔꓬ ꓟ ꓠꓬ ꓮ ꓡꓲ ꓥ ꓟꓲ ꓖꓽ ꓖꓶ ꓟꓽ ꓐ ꓡꓻꓳ ꓫꓵꓽ ꓝꓴꓲꓸ ꓟꓬꓱꓽ ꓬꓰ ꓔꓬ ꓟ ꓥ ꓡꓳ꓿
(4) ꓜꓲ ꓜꓲ ꓑꓰꓹ ꓑꓰꓹ ꓬꓰ ꓢꓴ ꓟꓬ-ꓟ ꓟꓯꓼ ꓡꓰ ꓢꓰꓼ ꓡ ꓟ ꓗꓪ ꓐꓰ ꓑ ꓫꓬ ꓶ ꓤ ꓶ ꓟꓲ ꓐꓰ ꓢꓯꓼ ꓟꓬ ꓔꓯ ꓗꓽ ꓙ ꓡꓳꓸ ꓙ ꓠꓹ ꓟ ꓐꓱ ꓶ ꓠꓯꓸ ꓘꓪ ꓗꓪ ꓟ ꓡꓯꓼ ꓫꓴ ꓒꓴ ꓖꓶꓽ ꓓꓴ ꓥꓳ ꓐꓰ ꓢꓷ ꓙ ꓟꓴ ꓙ ꓡꓳ꓿
ꓮ ꓟ ꓥ ꓟꓲ꓾
(1) ꓑ ꓫꓬ ꓔꓯ ꓟꓽ ꓢꓰꓼ ꓟꓽ ꓐꓶ꓾ ꓟꓯꓼ ꓙꓱ ꓦꓲ꓾ ꓙꓱ ꓦꓲ ꓑꓳꓼ ꓡꓳꓼ꓾ ꓞꓽ ꓒꓳ ꓐꓰ ꓕꓲ ꓛꓳ ꓑ ꓫꓬ ꓳ ꓟꓶꓽ ꓗꓪ ꓘꓰꓹ ꓡꓱꓼ ꓡ ꓠꓬ꓾ ꓓꓳ-ꓡ (5) ꓢꓯꓹ (ꓟꓬ-ꓟ ꓒꓴ 10000 ꓢꓯꓹ) ꓡꓯꓼ ꓫꓴ ꓖꓶꓽ ꓓꓴ ꓥꓳ꓿
(ꓐ) ꓟꓯꓼ ꓙꓱ ꓦꓲ꓾ ꓙꓱ ꓦꓲ ꓑꓳꓼ ꓡꓳꓼ꓾ ꓞꓽ ꓒꓳ ꓐꓴ ꓔꓯ ꓠꓽ ꓔꓸ ꓟ ꓗꓪ ꓣꓱꓽ ꓟꓽ ꓙꓲ ꓗꓪ ꓛꓲ ꓐꓬ ꓡꓰ ꓠ ꓬꓰ ꓐ ꓡ ꓠꓬ꓾ ꓓꓳ-ꓡ (3) ꓢꓯꓹ (ꓟꓬ-ꓟ ꓒꓴ 6000 ꓢꓯꓹ) ꓡꓯꓼ ꓫꓴ ꓖꓶꓽ ꓓꓴ ꓥꓳ꓿
(ꓒ) ꓑ ꓫꓬ ꓔꓯ ꓢꓰꓼ ꓠꓹ ꓟ ꓙꓱ ꓦꓲ ꓑꓳꓼ ꓡꓳꓼ꓾ ꓞꓽ ꓒꓳ ꓐꓴ ꓓꓳ ꓡ ꓕꓯꓽ ꓙ ꓖꓴ ꓗꓪ ꓐꓬ ꓡꓰ ꓠꓹ ꓟ ꓬꓰ ꓐ ꓡ ꓠꓬ꓾ ꓓꓳ-ꓡ (3) ꓢꓯꓹ (ꓟꓬ-ꓟ ꓒꓴ 6000 ꓢꓯꓹ) ꓡꓯꓼ ꓫꓴ ꓖꓶꓽ ꓓꓴ ꓥꓳ꓿
(ꓓ) ꓢꓰꓼ ꓠꓹ ꓟ ꓡ ꓢꓲꓸ ꓑ ꓫꓬ ꓔꓯ ꓟꓽ ꓢꓰꓼ ꓢꓰꓼ꓾ ꓟꓵꓽ ꓕꓲ ꓖ ꓖ ꓗꓪ ꓟꓵꓽ ꓕꓲ ꓖ ꓖ ꓗꓪ ꓖꓽ ꓟꓶ ꓫꓵꓸ ꓫꓵꓸ ꓙꓲꓽ ꓩꓴ ꓐꓬ ꓡꓰ ꓝꓲˍ ꓠꓬ꓾ ꓓꓳ-ꓡ (3) ꓢꓯꓹ (ꓟꓬ-ꓟ ꓒꓴ 6000 ꓢꓯꓹ) ꓡꓯꓼ ꓫꓴ ꓖꓶꓽ ꓓꓴ ꓥꓳ꓿
(ꓔ) ꓙꓱ ꓦꓲ꓾ ꓙꓱ ꓦꓲ ꓑꓳꓼ ꓡꓳꓼ꓾ ꓞꓽ ꓒꓳ ꓐꓴ ꓔꓯ ꓐꓬ ꓡꓰ ꓗꓪ ꓛꓲ ꓐꓶ ꓐ ꓡ ꓠꓬ꓾ 1 ꓢꓶꓽ ꓐꓱ ꓶ ꓓꓳ-ꓡ (3) ꓢꓯꓹ (ꓟꓬ-ꓟ ꓒꓴ 6000 ꓢꓯꓹ) ꓡꓯꓼ ꓫꓴ ꓖꓶꓽ ꓓꓴ ꓥꓳ꓿
(ꓕ) ꓟꓯꓼ ꓙꓱ ꓦꓲ ꓧꓪꓽ ꓞꓶ ꓐꓱꓻ ꓔꓯ ꓬꓲꓻ ꓧꓳꓸ ꓡꓰ ꓝꓲ꓾ ꓥ ꓠꓬ ꓒꓬꓹ ꓐ ꓡ ꓠꓬ꓾ ꓓꓳ-ꓡ (1) ꓢꓯꓹ (ꓟꓬ-ꓟ ꓒꓴ 2000 ꓢꓯꓹ) ꓡꓯꓼ ꓫꓴ ꓖꓶꓽ ꓓꓴ ꓥꓳ꓿
(ꓖ) ꓜꓲ ꓜꓲ ꓑꓰꓹ ꓑꓰꓹ ꓬꓰ ꓢꓴ ꓟꓬ-ꓟ ꓟꓯꓼ ꓶ ꓤ ꓞꓳꓽ ꓦꓲ꓾ ꓟꓯꓼ ꓶ ꓤ ꓫꓬꓹ ꓖꓴ ꓔꓯ ꓒꓬꓹ ꓐ ꓡ ꓠꓬ꓾ ꓓꓳ-ꓡ (1) ꓢꓯꓹ (ꓟꓬ-ꓟ ꓒꓴ 2000 ꓢꓯꓹ) ꓡꓯꓼ ꓫꓴ ꓖꓶꓽ ꓓꓴ ꓥꓳ꓿
(ꓗ) ꓟꓵꓽ ꓗꓪ ꓢꓰꓼ ꓕꓯꓽ ꓣꓱˍ ꓟ ꓡ ꓔꓲꓼ ꓟꓳ-ꓓꓳ꓾ ꓧꓳꓺ ꓕꓴꓽ ꓔꓸ ꓟ ꓟꓳ-ꓓꓳ ꓫꓵꓸ ꓢꓲꓸ ꓑ ꓫꓬ ꓳ ꓟꓶꓽ ꓗꓪ ꓘꓰꓹ ꓡꓱꓼ ꓡ ꓠꓬ ꓓꓳ-ꓡ (1) ꓢꓯꓹ (ꓟꓬ-ꓟ ꓒꓴ 2000 ꓢꓯꓹ) ꓡꓯꓼ ꓫꓴ ꓖꓶꓽ ꓓꓴ ꓥꓳ꓿
(ꓘ) ꓔꓲꓼ ꓟꓳ-ꓓꓳ꓾ ꓧꓳꓺ ꓕꓴꓽ ꓔꓸ ꓟ ꓟꓳ-ꓓꓳ ꓔꓯ ꓣꓱꓽ ꓟꓽ ꓙꓲ ꓗꓪ ꓛꓲ ꓒꓬꓹ ꓐ ꓡ ꓠꓬ꓾ ꓓꓳ-ꓡ (1) ꓢꓯꓹ (ꓟꓬ-ꓟ ꓒꓴ 2000 ꓢꓯꓹ) ꓡꓯꓼ ꓫꓴ ꓖꓶꓽ ꓓꓴ ꓥꓳ꓿
(5) ꓡꓯꓼ ꓫꓴ ꓒꓴ ꓔꓯ ꓗꓸ ꓚꓵ ꓟꓳꓸ ꓖꓶꓽ ꓐ ꓡ ꓟ ꓕꓲ ꓣꓳ꓾ ꓕꓲ ꓜꓴ ꓮ ꓡꓲ ꓟ ꓟꓲ ꓪ ꓙꓲꓽ ꓙꓳˍ ꓡꓳ꓿
(6) ꓕꓵꓼ ꓪ ꓕꓱ ꓟ ꓡꓳ ꓚ ꓡꓯꓼ ꓫꓴ ꓒꓴ ꓖꓶˍ ꓟ ꓔꓯ ꓾ The Public Property Protection Act-1947 ꓙꓵꓽ ꓗ ꓡꓳ ꓚ ꓐꓯ ꓟꓴ ꓩꓴ ꓟꓽ ꓓ꓿
(7) ꓕꓵꓼ ꓪ ꓕꓱ ꓟ ꓠꓬ꓾ The Public Property Protection Act-1947, Section 3(b) ꓡꓳ ꓚ ꓥ ꓡꓳ꓿
ꓓꓴ-ꓪ ꓡ-ꓫꓲꓸ-ꓡꓼ
ꓠꓴꓖ ꓗꓴꓷꓼ ꓙꓵꓽ ꓜꓴ ꓧꓳꓽ ꓢꓴ
