ꓟꓬ-ꓟ ꓗꓴꓷꓼ ꓡꓳ ꓪꓴꓸ ꓗꓪ ꓙꓳ_ ꓟ ꓘꓳ-ꓡ-ꓒꓶꓸ ꓡꓳ ꓒꓱ꓾ ꓡꓯ-ꓟꓯ-ꓛꓲꓽ ꓡꓳꓺ ꓗꓪ ꓔꓬ ꓢꓴ ꓑ ꓫꓬ 2896 ꓣꓳ ꓠꓬ ꓞꓲ ꓠꓲꓹ 2022 ꓘꓳꓼ ꓗꓪ ꓜꓽ ꓓꓴ ꓟꓽ ꓡꓳꓼ ꓢꓲꓸ ꓦꓰꓼ ꓟꓷꓼ ꓫꓸ ꓙꓵ ꓔꓬ ꓡꓳ ꓐꓰ ꓖꓳ ꓕꓲ ꓡꓳ ꓕꓲ ꓟꓵꓽ ꓗꓪ ꓟ ꓞꓳ ꓪꓴꓽ ꓡꓰ ꓓꓳꓽ ꓜꓳ ꓩꓴ ꓡ ꓡꓳ=
ꓔꓶ ꓜꓽ ꓟꓽ ꓪ ꓟ ꓑꓶꓸ ꓫꓴꓸ ꓟꓲ
“ꓡꓯ-ꓟꓯ-ꓛꓲꓽ ꓡꓳ ꓗꓪ ꓞꓳ ꓘꓹ 19 ꓘꓹ꓾ ꓦꓲ ꓘꓴ 1135 ꓦꓲ꓾ ꓤ ꓑꓸ ꓤꓼ 1430 ꓣꓳ ꓐꓰ꓾ ꓤ ꓟꓶꓼ ꓤ 1466 ꓣꓳ ꓠꓬ ꓜꓽ ꓓꓴ ꓣꓱꓽ ꓬꓯꓼ ꓔꓬꓳ” ꓐꓰ ꓡ ꓞꓳ ꓢꓯꓼ ꓟꓬ ꓚꓬꓴꓹ ꓙ ꓡ ꓠꓹ ꓟ ꓓꓰꓽ ꓕꓳ ꓶ ꓗꓪ ꓐꓳ ꓔ ꓡꓳ=
ꓟꓽ ꓙꓲ ꓟ ꓔꓯꓸ ꓟꓳꓸ ꓖꓶ ꓔꓬ ꓟ
ꓕꓱ ꓡꓱ ꓜꓽ ꓓꓴ ꓦꓰꓼ ꓟꓷꓼ ꓡ ꓟ ꓬꓲꓸ ꓑꓶꓸ ꓠꓬ 2021 ꓘꓳꓼ ꓑꓶꓸ ꓫꓴꓸ ꓐꓰ ꓮ ꓖꓻ ꓟꓲ ꓬꓰ ꓝꓲꓸ ꓗꓪ ꓟꓶꓽ ꓦ ꓟꓽ ꓦ ꓡ ꓢꓲꓸ ꓔꓶ ꓜꓽ ꓔꓶ ꓓꓳ ꓬꓰ ꓫꓸ ꓡꓰ ꓟ_ ꓐꓰ꓾ ꓗꓳ-ꓪꓰꓼ ꓑꓶꓸ ꓓꓴ ꓧꓶꓽ ꓒꓽ ꓟꓵꓽ ꓫꓸ ꓗꓺ ꓙꓲ ꓔꓲꓺ ꓪꓴꓻ ꓚꓱꓹ ꓑꓲꓸ ꓞꓲꓽ ꓩꓴ ꓡ ꓟ ꓑꓶꓸ ꓓꓴ ꓥ ꓡꓳ ꓐꓰ ꓢꓷꓸ ꓪ ꓡꓳ=
“ꓡꓯ-ꓟꓯ-ꓛꓲ ꓡꓳ ꓢꓴ ꓠꓬ ꓮ ꓠꓲꓹ ꓮ ꓙꓬ ꓟꓽ ꓪ ꓢꓲꓸ ꓟꓽ ꓔꓶ ꓜꓽ ꓪ= ꓸꓸꓸ ꓜꓽ ꓓꓴ ꓓꓳ ꓓꓴ ꓔꓯ ꓢꓲꓸ ꓮ ꓘꓶꓸ ꓫꓸ ꓔꓬ ꓥ” ꓐꓰ ꓞꓳ ꓪꓴꓽ ꓕꓲ ꓣꓳ ꓡꓰ ꓐꓬꓱꓽ ꓢꓯꓸ ꓗꓪ ꓐꓰ ꓚꓺ ꓟꓸ ꓖꓶ ꓡ_ ꓡꓳ=
(#ꓢꓷꓸ ꓡꓰ ꓝꓲ ꓓꓴ꓾ ꓜꓽ ꓓꓴ ꓬꓰ ꓙ ꓠꓲꓹ ꓫꓵ ꓢꓴ ꓐꓴ ꓔꓯ the Lisu Times ꓡꓰꓽ ꓡꓯ-ꓟꓯ-ꓛꓲ ꓡꓳ ꓗꓪ ꓟ ꓞꓳ ꓪꓴꓽ ꓞꓳ ꓟ ꓐꓴ ꓔꓯ ꓠꓶꓽ ꓝꓸ ꓖꓶ ꓐ ꓡˍ ꓡꓳ꓿ ꓕꓱ ꓟ ꓔꓯ ꓟꓳꓸ ꓬꓲꓸ ꓐꓶꓹ ꓢꓷꓸ ꓠꓲꓹ ꓫꓵ ꓥ ꓟꓲ message ꓗꓪ ꓐꓰ ꓠ ꓠꓬꓲ ꓡ ꓓ ꓡꓳ꓿)
