ꓟꓲ ꓠꓯ ꓡꓴꓸ ꓡꓴꓸ ꓟ ꓕꓯ ꓢꓲ
ꓢꓯꓸ ꓔꓬ ꓪ ꓟ ꓕꓲ ꓤꓶ ꓗꓪ꓾ ꓙꓳ ꓔꓬ ꓪ ꓕꓲ ꓑ ꓗꓪ
ꓒꓵꓽ ꓟ ꓮ ꓫꓵꓽ ꓢꓪꓼ ꓔꓸ ꓥ꓾ ꓜꓳꓽ ꓟ ꓮ ꓡꓲ ꓣꓴ ꓔꓸ ꓥ
ꓠꓬꓲꓸ ꓠꓬꓲ ꓐꓯ ꓡꓯ ꓘꓳ ꓗꓹ ꓡꓯ꓾ ꓠꓬꓲꓸ ꓠꓬꓲ ꓓꓵ ꓙ ꓠꓬꓲ ꓗꓹ ꓡꓯ
ꓕꓲ ꓣꓳ ꓕꓲ ꓖ ꓔꓬ ꓙꓰ ꓢꓲ꓾ ꓕꓲ ꓣꓳ ꓕꓲ ꓫꓵꓽ ꓓꓵꓽ ꓙ ꓙꓰ
ꓡꓲ-ꓢꓴ ꓓꓵꓽ ꓙ ꓚꓱꓹ ꓟ ꓗꓪ꓾ ꓡꓲ-ꓢꓴ ꓒꓵꓽ ꓒꓽ ꓚꓱꓹ ꓟ ꓗꓪ
ꓙꓲˍ ꓟ ꓮ ꓫꓵꓽ ꓢꓪꓼ ꓔꓸ ꓥꓻꓰꓸꓸꓸꓸ ꓒꓵꓽ ꓟ ꓮ ꓫꓵꓽ ꓚꓬ ꓔꓸ ꓥꓻꓰ?
ꓓꓵꓽ ꓙ ꓐꓯ ꓗꓸ ꓠꓬꓲ ꓡꓯ ꓟꓽ꓾ ꓫꓸ ꓕꓱ ꓢꓷꓸ ꓡꓯ ꓘꓳ ꓡꓯ ꓟꓽ ꓸꓸꓸ
1ꓸ ꓖꓳ ꓓꓱꓽ ꓔꓬ ꓢ ꓚꓱꓹ (ꓣꓳ ꓖꓳ ꓓꓱꓽ ꓔꓯ ꓣꓳ ꓫ ꓒꓵꓽ ꓠꓯ ꓡꓳ= ꓟꓶ ꓤ ꓣꓱꓽ ꓐ ꓡ ꓠꓹ ꓟ꓾ ꓢꓯꓸ ꓔꓬ ꓐ ꓡ ꓠꓹ ꓟ ꓥ ꓡꓳ)
2ꓸ ꓪꓽ ꓡꓯ ꓘꓳ ꓢꓴ ꓛꓳ ꓒꓯꓹ ꓐꓴ= (ꓪꓽ ꓡꓯ ꓘꓳ ꓢꓴ ꓛꓳ ꓒꓯꓹ ꓙꓳ ꓕꓯ ꓢꓲ ꓟꓲ ꓠꓯ ꓗꓪ ꓔꓬ ꓗꓹ ꓛꓲ ꓥ=)
3ꓸ ꓫꓸ ꓟꓳ ꓠꓲꓹ= (ꓟꓲ ꓠꓯ ꓗꓪ ꓢꓯꓸ ꓔꓬ ꓪ ꓟ ꓠꓬ ꓣꓳ ꓓ ꓣꓳ ꓐ ꓡ ꓟ ꓟꓽ ꓥ= ꓕꓱ ꓟ ꓒꓬꓱꓼ ꓡ ꓝꓲ ꓢꓴ ꓔꓯ ꓫꓸ ꓟꓳ ꓙꓲꓽ ꓙꓳ ꓡꓳ=)
4ꓸ ꓙꓲˍ ꓟ ꓞꓼ ꓓꓳꓽ ꓟꓬꓱꓺ ꓓꓳꓽ= (ꓙꓲ ꓟ ꓟꓬꓱꓽ ꓓꓳ ꓠꓬ ꓮ ꓘꓶꓸ ꓒꓵꓽ ꓡꓳ=)
5ꓸ ꓠꓲꓹ ꓠꓵ ꓟ ꓦꓲ ꓘꓴ ꓡ ꓞꓳ ꓐꓴ= (ꓕꓲ ꓦꓲ ꓡ ꓞꓳ ꓮ ꓐꓲ ꓮꓸ ꓟꓲꓽ ꓐꓴ ꓠꓬ ꓒꓵꓽ ꓡꓳ)
6ꓸ ꓢꓷꓸ ꓠꓲꓹ ꓚꓱꓹ= (ꓢꓳ ꓣꓴ ꓟ ꓚꓱꓹ ꓮ ꓙꓵꓽ ꓠꓬ ꓢꓷꓸ ꓠꓲꓹ ꓚꓱꓹ ꓥ ꓡꓳ= ꓜꓽ ꓪ ꓓꓳ ꓪ ꓗꓪ ꓛꓲ ꓕꓲ ꓫꓵꓽ ꓫꓵꓽ ꓔꓯ ꓢꓳ ꓠ ꓗ ꓡꓳ)
7ꓸ ꓣꓱꓽ ꓛ ꓢꓴ ꓔꓯ ꓖꓶꓽ ꓟ= (ꓢꓴ ꓔꓯ ꓬꓰ ꓙ ꓟ ꓠꓬ ꓠꓲꓹ ꓟ ꓗꓹ ꓛꓲ ꓓꓴ ꓕꓲ ꓫꓵꓽ ꓥꓳ= ꓢꓯꓸ ꓔꓬ ꓟ ꓙꓲ ꓖꓴ ꓕꓲ ꓟ ꓥꓳ= ꓫꓵꓻ ꓠꓬ ꓬꓰ ꓙ ꓙꓲꓽ ꓙꓳ ꓢꓴ ꓔꓯ ꓬꓰ ꓙ ꓟꓽ ꓐ ꓡ)
8ꓸ ꓓꓵ ꓙ ꓛꓲ ꓡ ꓓꓴ ꓬꓰ= (ꓛꓳ ꓒꓯꓹ ꓐꓴ ꓐꓰ꓾ ꓙ ꓫꓱꓽ ꓓꓵꓽ ꓓꓳ ꓟꓬꓱꓽ ꓬꓰ ꓗꓹ ꓟ ꓮ ꓙꓵꓽ ꓠꓬ ꓗꓸ ꓠꓯꓸ ꓟꓳꓽ ꓡ ꓕꓯ ꓓꓵꓽ ꓙ ꓛꓲ ꓡ ꓓꓴ ꓥ ꓡꓳ= ꓙꓲ ꓟ ꓚꓱꓹ ꓗꓪ ꓮ ꓘꓶꓸ ꓬꓰ ꓢꓲꓸ ꓠꓲꓹ ꓘꓪ ꓫꓵ ꓓꓴ ꓒꓬꓱꓼ ꓡ ꓝꓲ=)
9ꓸ ꓦ ꓡꓱ ꓚꓱꓹ= (ꓦ ꓡꓱ ꓚꓱꓹ ꓠꓬ ꓕꓱ ꓕꓲ ꓤꓶ ꓐꓰ ꓗꓸ ꓠꓯꓸ ꓕꓲ ꓤꓶ ꓗꓪ ꓛꓲ ꓓꓽ ꓖꓴꓽ ꓗꓳ ꓟ ꓡꓰ ꓐꓰ ꓥꓳ= ꓦ ꓡꓱ ꓚꓱꓹ ꓙꓳ ꓢꓲ꓾ ꓥꓳ ꓡꓳꓸ ꓓꓴ ꓙꓳ ꓢꓴ ꓒꓬꓱꓼ ꓡ ꓝꓲ)
10ꓸ ꓣꓳ ꓫꓵꓽ꓾ ꓣꓳ ꓘꓹ꓾ ꓣꓳ ꓟꓵꓽ ꓐꓱ ꓶ ꓟꓬꓱꓽ ꓬꓰ= (ꓡ ꓞꓳ ꓕꓲ ꓣꓳ ꓒꓬꓱꓼ ꓡ ꓕꓯ ꓞꓳ ꓫꓵꓽ꓾ ꓞꓳ ꓘꓹ꓾ ꓔꓬ ꓟꓵꓽ ꓙꓳ ꓡꓳ= ꓖꓳ ꓟ ꓗꓪ ꓣꓳ ꓥ ꓟꓲ ꓟꓬꓱꓽ ꓬꓰ ꓔꓺ ꓠꓯ ꓡꓳ)
ꓡ ꓞꓳ ꓒꓬꓱꓼ ꓡ ꓢꓴ ꓮ ꓙꓵꓽ ꓓꓵꓽ ꓙ ꓠꓬꓲ ꓢꓲꓸ ꓔꓬ ꓗꓹ ꓛꓲ ꓟ ꓤꓶ ꓕꓲ ꓟ ꓒꓬꓱꓼ ꓡ ꓝꓲ= ꓬꓰ ꓙꓲꓽ ꓙꓳ ꓟ ꓬꓰ ꓪ ꓡꓰ ꓢꓲꓸ ꓠꓲꓹ ꓘꓪ ꓫꓵ ꓓꓴ ꓤꓶ ꓙ ꓖꓴ ꓫꓱꓽ ꓪ ꓝꓲ=
