ꓐꓶꓽ ꓗꓴꓷꓼ ꓗꓪ ꓐꓰ ꓒꓴ ꓓꓵꓽ/ꓓꓳ ꓚꓱꓹ ꓔꓯ ꓟꓬ-ꓟ ꓟꓯꓼ ꓗꓳ-ꓢꓰ ꓡꓰꓽ ꓙꓵꓽ ꓥꓰꓸ ꓓꓴ ꓐꓱ ꓶ꓾ ꓒꓴ ꓞꓳꓽ ꓦꓲ ꓚꓰꓺ(central bank) ꓗꓪ ꓐꓰ 2022 ꓘꓳꓼ 4 ꓦ 3 ꓠꓬꓲ ꓕꓯꓽ ꓕꓵꓼ ꓪ ꓕꓲ ꓟ ꓓꓳ ꓡ ꓡꓳ꓿
ꓕꓵꓼ ꓪ ꓓꓳ ꓡ ꓟ
2022 ꓘꓳꓼ 4 ꓦ 4 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓐꓶꓽ ꓗꓴꓷꓼ ꓗꓪ ꓐꓰ ꓟꓬ- ꓟ ꓗꓴꓷꓼ ꓗꓪ ꓒꓴ ꓓꓵꓽ ꓡ ꓟ ꓮ ꓙꓵꓽ 24 ꓙꓵꓹ ꓘꓴꓽ ꓗꓪ ꓟꓬ-ꓟ ꓒꓴ ꓑꓺ ꓠ ꓗ ꓡꓳ꓿ ꓑꓺ ꓙꓶ ꓠꓬ 1 ꓓꓳ-ꓡ 1850 ꓒꓯꓼ ꓑ ꓖꓶꓽ ꓠ ꓗ ꓡꓳ꓾ ꓒꓴ ꓖꓳ ꓟ ꓠꓬ Special Account ꓐꓯˍ ꓟ account ꓕꓲ ꓫꓵꓽ ꓒꓴ ꓢꓲꓸ ꓖꓳ ꓗꓪ ꓗꓶꓺ ꓔꓸ ꓖꓶꓽ ꓠꓯˍ ꓡꓳ꓾ ꓐꓰ ꓕꓵꓼ ꓪ ꓖꓳ ꓟ ꓗꓪ ꓐꓯ ꓔꓸ ꓡꓳ꓿
“ꓗꓴꓷꓼ ꓘꓴꓽ ꓗꓪ ꓓꓵꓽ ꓡ ꓟ ꓴꓢꓓ ꓓꓳ-ꓡ ꓒꓴ ꓮ ꓙꓵꓽ ꓟꓯꓼ ꓗꓳ-ꓢꓰ ꓡꓰ ꓫꓺ ꓠꓹ ꓟ ꓢꓯꓼ ꓕꓵꓼ ꓡ ꓟ ꓥꓳ꓿ ꓬꓲꓸ ꓐꓽ ꓢꓲ ꓗꓪ 2000 ꓛꓲ ꓪꓴꓽ/ꓪꓴꓻ ꓔꓬ ꓟ ꓗꓪ ꓬꓲꓸ ꓡꓰ 1850 ꓒꓯꓼ ꓥꓰꓸ ꓢꓲꓸ ꓬꓲꓸ ꓔꓯ ꓟꓽ ꓪꓴꓽ ꓟꓽ ꓓ꓾ ꓚꓲ ꓛꓬ account ꓗꓪ 24 ꓙꓵꓹ ꓫꓺ ꓟꓽ ꓓ ꓐꓯ ꓡ ꓟ ꓥꓳ꓿ ꓗꓸ ꓠꓯꓸ ꓠꓬ ꓓꓳ-ꓡ ꓔꓯꓹ ꓢꓴ ꓔꓯ ꓞꓳꓹ ꓡ ꓥꓳ꓿ ꓬꓲꓸ ꓓꓳ-ꓡ ꓫꓸ ꓔꓬ ꓠꓬꓲ ꓕꓱ ꓡꓱ ꓬꓰ ꓡ ꓟ ꓥꓳ” ꓐꓰ ꓒꓴ ꓑꓺ ꓙꓲ ꓔꓲꓺ ꓕꓲ ꓟ (Currency ꓰxchange) ꓗꓪ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓡꓰ ꓕꓵꓼ ꓪ ꓕꓱ ꓟ ꓮ ꓡꓲ ꓙꓰ ꓔꓬ ꓟ ꓙ ꓖꓴ ꓔꓯ ꓒꓶꓻ ꓟꓸ ꓖꓶ ꓡ ꓡꓳ꓿
ꓐꓶꓽ ꓗꓴꓷꓼ ꓔꓯ ꓙ ꓡꓯ ꓘꓳ ꓢꓲꓸ ꓟꓬ-ꓟ ꓗꓴꓷꓼ ꓗꓪ ꓶ ꓯꓼ ꓬꓰ ꓔꓬ ꓢꓴ ꓐꓴ꓾ ꓠꓖꓳ ꓐꓴ꓾ ꓦ ꓡꓱ ꓚꓱꓹ ꓗꓪ ꓬꓰ ꓙ ꓔꓳꓹ ꓙ ꓟ ꓙ ꓖꓴ꓾ ꓝꓮꓲ ꓐꓶꓽ ꓟꓵꓽ ꓗꓪ ꓟꓬꓱꓽ ꓬꓰ ꓔꓬ ꓢꓲꓸ ꓒꓴ ꓦ ꓠꓹ ꓟ ꓚꓱꓹ ꓮ ꓙꓵꓽ ꓗꓪ ꓘꓶ ꓡꓶꓽ ꓗꓽ ꓔꓸ ꓓꓴ ꓓꓽ ꓟ ꓒꓬꓱꓼ ꓡ ꓔꓬ ꓡꓳ꓿
“ꓚꓲꓸ ꓛꓬ ꓒꓴ ꓚꓲꓸ ꓛꓬ ꓣꓴ ꓪ ꓠꓹ ꓟ ꓒꓴ ꓞꓳꓽ ꓦꓲ ꓚꓰꓺ ꓗꓪ ꓛꓲ ꓕꓵꓼ ꓪ ꓓꓰꓽ ꓠ ꓔꓸ ꓥ ꓐꓯ ꓡ ꓪ꓿ ꓔꓸ ꓟꓼ ꓠꓻꓳ” ꓐꓰ ꓠꓖꓳ ꓟꓬꓱꓽ ꓧꓳꓽ ꓢꓴ ꓕꓲ ꓣꓳ ꓡꓰ ꓐꓯ ꓡꓳ꓿
ꓒꓴ ꓞꓳꓽ ꓦꓲ ꓗꓪ ꓐꓰ ꓕꓲ ꓝꓸ ꓒꓴ ꓒꓴ ꓡꓯꓽ ꓡꓯꓽ ꓦ ꓡꓱ ꓐꓳ ꓐꓳ ꓒꓴ ꓦ ꓟꓽ ꓙꓲˍ ꓟ ꓦꓬꓼ ꓠꓬꓲ ꓛꓲ ꓡ ꓠꓬ꓾ ꓘꓴꓽ ꓘꓴꓽ ꓠꓯ ꓠꓯ ꓒꓴ ꓦ ꓶ ꓡꓯꓼ ꓚꓱꓹ ꓪꓴꓽ ꓡ ꓢꓲ꓾ ꓗꓶꓸ ꓢꓴ/ ꓞꓳꓸ ꓡꓰ ꓢꓴ ꓮ ꓟꓬꓹ ꓙꓳ ꓡ ꓓꓴ ꓟꓳꓸ ꓙꓰ ꓔꓬ ꓡꓳ꓿
