ꓴꓢꓮ꓾ ꓔꓰꓫꓮꓢ ꓗꓪ ꓙꓳ ꓟ ꓔexas Lisu Christian Church ꓗꓪ English Worship Program ꓔꓯ 2022 ꓘꓳꓼ 12 ꓦ 11 ꓠꓬꓲ ꓕꓯ ꓬꓲꓸ ꓪꓴꓸ ꓕꓲ ꓧꓪꓹ ꓪꓴꓸ ꓔꓴ ꓗꓷꓳ꓾ ꓐꓰ ꓓꓳꓽ ꓜꓳ ꓡ ꓡꓳ=
“ꓕꓱ ꓗꓪ ꓫꓳ ꓪꓴꓽ ꓡ ꓢꓴ ꓡꓲ-ꓢꓴ ꓤ ꓠꓱ ꓐꓴ ꓔꓯ ꓘꓴ ꓜꓲꓼ ꓞꓳ ꓧꓳꓽ ꓚꓱꓹ ꓟꓴ ꓚꓱꓹ ꓗꓪ ꓧꓳꓽ ꓪꓴꓸ ꓟꓴ ꓐ ꓡ ꓠꓹ ꓟ ꓐꓱ ꓶ ꓓꓽ ꓪꓴꓸ ꓔꓶ ꓙꓱꓼ ꓙꓳ ꓢꓲꓸ ꓮ ꓟꓶ ꓗꓪ ꓐꓰ ꓬꓰ ꓪꓴꓸ ꓔꓴ ꓔꓬ ꓟ ꓥ ꓡꓳ= Praise and worship, prayers, short sharing ꓗꓪ ꓤ ꓠꓱ ꓐꓴ ꓔꓯ ꓧꓳꓽ ꓪꓴꓸ ꓟꓴ ꓝꓲ ꓢꓲꓸ ꓥꓪ ꓠꓴ ꓥ ꓟꓲ ꓔꓺ ꓔꓬ ꓡꓳ= ꓬꓲꓸ ꓪ ꓚꓲꓸ ꓛꓬ ꓘꓴ ꓜꓲꓼ ꓞꓳ ꓗꓪ ꓮ ꓡꓲ ꓧꓳꓽ ꓣꓱꓽ ꓠꓹ ꓟ ꓢꓷꓸ ꓡꓰ ꓠꓹ ꓟ ꓬꓰ ꓔꓬ ꓟ ꓥ ꓡꓳ= ꓴꓢꓮ ꓗꓪ ꓠꓬ ꓣꓳ ꓡꓲ-ꓢꓴ ꓞꓳ ꓫꓵꓽ꓾ ꓡꓲ-ꓢꓴ ꓥꓳꓽ ꓫꓸ ꓕꓱ ꓢꓴ ꓗꓳ ꓡꓳ ꓗꓪ_ ꓡꓰꓽ ꓟꓽ ꓥ ꓥ꓾ ꓠꓱꓸ ꓐꓯꓼ ꓞꓳ ꓫꓵꓽ ꓐꓴ ꓗꓳ ꓡꓳ ꓗꓪ ꓥ ꓟꓲ ꓣꓳ ꓡꓲ-ꓢꓴ ꓤ ꓠꓱ ꓐꓴ ꓧꓳꓽ ꓣꓱꓽ ꓢꓴ꓾ ꓶꓼ ꓓꓳ ꓟꓬꓱꓽ ꓬꓰ ꓢꓴ ꓙꓳ ꓡ ꓠꓹ ꓟ꓾ blessings to all ꓒꓬꓱꓼ ꓡ ꓠꓹ ꓟ ꓔꓶ ꓙꓱꓼ ꓕꓱ ꓡꓱ ꓮ ꓟꓬꓹ ꓙꓳ ꓡꓳ” ꓐꓰ ꓔꓡꓚꓚ ꓘꓴ ꓜꓲꓼ ꓞꓳ ꓟꓸ ꓒꓽ ꓛꓽ-ꓬꓲ-ꓓꓰ ꓡꓰ ꓐꓯ ꓟꓸ ꓖꓶ ꓡ ꓡꓳ=
“ꓡꓲ-ꓢꓴ ꓥꓳꓽ ꓕꓯꓹ ꓕꓯꓹ ꓟꓽ ꓢꓷꓸ ꓢꓴ ꓤ ꓠꓱ ꓐꓴ ꓐꓱ ꓶ ꓥ ꓟꓲ English Worship ꓠꓬ ꓙꓲ ꓖꓴ ꓙꓳˍ ꓡꓳ꓿ ꓡꓲ-ꓢꓴ ꓤ ꓠꓱ ꓥ ꓕꓯꓽ ꓡꓲ-ꓢꓴ ꓥꓳꓽ ꓢꓷꓸ ꓓꓴ ꓟ ꓠꓽ ꓙꓲ ꓡꓳꓹ ꓬꓰ ꓥꓳ꓿ ꓖꓳ ꓡꓱ ꓥ ꓟꓲ ꓦ ꓡꓱ ꓚꓱꓹ ꓟꓸ ꓖꓶ ꓠꓹ ꓟ ꓐꓱ ꓶ ꓤ ꓠꓱ ꓐꓴ ꓡꓲ-ꓢꓴ ꓥꓳꓽ ꓢꓷꓸ ꓡ ꓗꓪ ꓛꓲ ꓡꓳꓸ ꓠꓬꓹ ꓟꓽ ꓓꓻꓳ꓿ ꓬꓲꓸ ꓙꓵꓹ ꓖꓼ ꓟꓽ ꓟꓶ ꓗ ꓬꓰ ꓡ ꓥꓳ” ꓐꓰ ꓔꓡꓚꓚ ꓘꓴ ꓜꓲꓼ ꓞꓳ ꓗꓪ ꓔꓺ ꓔꓬ ꓢꓴ ꓕꓲ ꓣꓳ ꓡꓰ ꓐꓯ ꓡꓳ꓿
ꓪꓴꓽ ꓟꓴˍ ꓟ ꓗꓴꓷꓼ ꓗꓪ ꓛꓲ ꓢꓴ ꓕꓱ ꓕꓲ ꓤꓶ ꓗꓪ ꓟ ꓡꓲ-ꓢꓴ ꓐꓴ ꓠꓬ ꓚꓲꓸ ꓛꓬ ꓡꓲꓽ ꓒꓰꓼ ꓐꓰ ꓦ ꓡꓱ ꓚꓱꓹ꓾ ꓥꓳꓽ ꓫꓵꓽ ꓔꓯ ꓫꓺ ꓒꓵꓽ ꓟˍ ꓡꓰꓽ ꓟꓽ ꓞꓲ꓾ ꓢꓴ ꓫꓵꓽ ꓢꓴ ꓪꓳꓼ ꓮ ꓙꓵꓽ ꓟ ꓗꓳ ꓡꓳ ꓗꓪ ꓙ ꓡꓯ ꓘꓳ ꓢꓲꓸ ꓟꓬꓱꓽ ꓬꓰ ꓗꓴꓸ ꓠꓹ ꓟ ꓥ ꓟꓲ ꓮ ꓒꓳ ꓒꓳ ꓗꓪ ꓢꓷꓸ ꓠꓲꓹ ꓮ ꓘꓶꓸ ꓢꓯꓼ ꓕꓵꓼ ꓠ ꓗꓷ ꓡꓰ ꓔꓬ ꓡꓳ꓿