ꓔꓡꓚꓚ 10 ꓘꓳꓼ ꓐꓲ ꓬꓰ ꓟ ꓚꓲꓸ ꓟꓶ ꓓꓴ ꓫꓸ ꓟꓳ ꓑꓮꓲꓽ
ꓴꓢꓮ ꓗꓴꓷꓼ Texas Lisu Christian Church (TLCC) ꓠꓬ ꓕꓱ 7 ꓦ ꓟ ꓘꓴꓽ ꓗꓪ 10 ꓘꓳꓼ ꓐꓲ ꓡꓰ ꓟ ꓫꓸ ꓟꓳ ꓪ ꓘꓴ ꓜꓲꓼ ꓓꓴ ꓑꓮꓲꓽ ꓕꓲꓽ ꓟ ꓔꓯ 2022 ꓘꓳꓼ 7 ꓦ 10 ꓠꓬꓲ ꓕꓯꓽ ꓬꓰ ꓓꓳ ꓡꓰꓳ꓿
“Texas ꓗꓪ ꓡꓲ-ꓢꓴ ꓐꓴ ꓬꓲꓸ ꓪꓴꓸ ꓚꓲꓸ ꓛꓲ ꓡ ꓟ ꓠꓬ 2010 ꓘꓳꓼ ꓖꓼ ꓡꓯꓼ ꓖ ꓙꓲ ꓗꓪ ꓥꓳ꓿ ꓖꓳ ꓡꓱ ꓥ ꓟꓲ 2012 ꓗꓪ ꓠꓬ ꓘꓴ ꓜꓲꓼ ꓞꓳ ꓔꓶ ꓪꓴꓸ ꓔꓴˍ ꓟ ꓥ ꓡꓳ” ꓐꓰ ꓟꓬꓱꓽ ꓡꓳꓸ ꓙꓬ-ꓡꓲ-ꓪꓴꓽ ꓡꓰ ꓚ ꓟꓸ ꓖꓶ ꓡ ꓡꓳ꓿
ꓔꓡꓚꓚ ꓘꓴ ꓜꓲꓼ ꓞꓳ 10 ꓘꓳꓼ ꓐꓲ ꓡꓰˍ ꓟ ꓚꓲꓸ ꓟꓶ ꓓꓴ ꓪ ꓘꓴ ꓜꓲꓼ ꓓꓴˍ ꓐꓰ꓾ ꓧꓳꓽ ꓪꓴꓸ ꓟꓴ ꓓꓴ ꓢꓳ ꓜꓲꓼ ꓓꓴ ꓥ ꓟꓲꓬꓰ ꓪ ꓡꓰꓳ ꓐꓰ ꓢꓷꓸ ꓡ ꓡꓳ꓿
“ꓑꓮꓲꓽ ꓗꓪ ꓠꓬ ꓴꓢꓮ ꓡꓲꓢꓴ ꓚꓧꓴꓣꓚꓧꓰꓢ ꓜꓴ ꓧꓳꓽ ꓢꓴ꓾ ꓟꓠ ꓡꓲ-ꓢꓴ ꓘꓜꓞ ꓗꓪ ꓟ ꓧꓳꓽ ꓢꓴ ꓣꓰꓦꓸ ꓓꓣꓸ ꓡ-ꓪꓴꓽ ꓗꓪ ꓐꓰ ꓪꓴ-ꓢ ꓐꓯ ꓘꓶ ꓢꓯꓼ ꓖꓶ ꓡ ꓡꓳ= ꓜꓲꓼ ꓓꓴ ꓧꓳꓽ ꓢꓴ ꓠꓬ ꓔꓡꓚꓚ ꓞꓳ ꓡꓱ ꓧꓳꓽ ꓮ-ꓓꓶ ꓥꓪ ꓥ ꓢꓲꓸ꓾ ꓫ ꓟꓳ ꓘꓶꓽꓐꓰ ꓠꓶ ꓝ ꓧꓪ ꓜ ꓖꓶ ꓢꓴ ꓔꓡꓚꓚ ꓟꓸ ꓒ ꓰꓓꓰꓠ ꓗꓪ ꓐꓰ ꓧꓳꓽ ꓣꓱꓽ ꓡꓳ=ꓝꓮꓲ ꓠꓬ ꓘꓴ ꓜꓲꓼ ꓞꓳ ꓚ ꓟꓲ ꓔꓯ ꓔꓡꓚꓚ ꓟꓬꓱꓽ ꓙ ꓧꓳꓽ ꓮ-ꓓꓶ-ꓙꓬ ꓥꓪ ꓗꓪ ꓐꓰ ꓐꓯ ꓟꓸ ꓖꓶ ꓪ ꓡꓰꓳ꓿
ꓜꓲꓼ ꓓꓴ ꓗꓪ ꓠꓬ ꓢꓲꓸꓸ ꓒꓽ ꓘꓶ ꓫꓵꓼ ꓥ_ ꓟꓲ ꓬꓰ ꓪ ꓡꓰꓳ=ꓝꓮꓲ ꓠꓬ ꓪꓴ-ꓢ ꓐꓯ ꓘꓶ ꓢꓯꓼ ꓖꓶ ꓡ ꓢꓴ ꓔꓯ 10 ꓘꓳꓼ ꓐꓲ_ ꓟ ꓚꓲ ꓟꓶ ꓓꓴ ꓗꓸ ꓚꓵ ꓡꓯ ꓫꓴ ꓥ ꓟꓲ ꓣꓰꓦꓸ ꓓꓣꓸ ꓡ-ꓪꓴ ꓔꓯ ꓖꓶ ꓡꓳ=ꓐꓖꓚꓔ ꓜꓴ ꓚꓰ ꓗꓪ ꓐꓰ ꓥ_ ꓟꓲ 10 ꓘꓳꓼ ꓐꓲ ꓟ ꓚꓲ ꓟꓶ ꓓꓴ ꓓꓳ ꓟꓴ ꓡꓯ ꓫꓴ ꓖꓶ ꓡ ꓡꓳ=
ꓑꓮꓲ ꓗꓪ ꓔꓡꓚꓚ ꓖꓪ ꓜꓴ ꓓ ꓟ ꓗꓪ ꓐꓰ ꓪꓴ-ꓢ ꓔꓯ ꓫꓱꓸ ꓖꓶ ꓪ ꓡꓰ ꓡꓳ=ꓝꓮꓲ ꓠꓬ ꓐꓖꓚꓔ ꓗꓪ ꓐꓰ ꓡ ꓢꓴ ꓟꓸ ꓟꓡꓲꓠꓓꓮ ꓔꓯ ꓥ_ ꓟꓲ ꓚꓲꓸ ꓟꓶ ꓓꓴ ꓡꓯ ꓫꓴ ꓡꓲ-ꓢꓴ ꓐꓵ ꓞꓲ ꓕꓲ ꓘꓱ ꓖꓶ ꓡꓳ=ꓑꓮꓲ ꓬꓰ ꓓꓳ ꓡꓰ ꓗꓸ ꓠꓯꓸ ꓮ ꓙꓵ ꓢꓴ ꓚꓲ ꓟꓶ ꓓꓴ ꓑꓧꓳꓔꓳ ꓓꓱꓽ ꓢꓲꓸ ꓠꓬꓲ ꓑꓮꓲ ꓜ ꓔꓯ ꓕꓲ ꓠꓲꓹ ꓕꓲ ꓪꓸꓼ ꓜ ꓓꓳ ꓡꓳ= ꓜ ꓓꓴ ꓓꓳ ꓓꓴ ꓠꓬ ꓙ-ꓑ ꓜ ꓫꓵꓽ ꓢꓧꓴꓢꓧꓲ ꓜ ꓓꓳ ꓢꓲꓸ ꓑꓮꓲ ꓔꓯ ꓗ ꓛꓲ ꓛꓲ ꓬꓰ ꓓꓳ ꓡꓰꓳ= 10 ꓘꓳꓼ ꓗꓪ ꓛꓲ ꓕꓱ ꓡꓱ ꓗꓳꓸ ꓪ ꓡ ꓟ ꓠꓬ ꓪꓴ-ꓢ ꓗꓪ ꓐꓰ ꓥ ꓡꓳ꓿ ꓝꓸ ꓢꓲꓸ ꓥ ꓟꓲ ꓪꓴ-ꓢ ꓠꓰ ꓡꓳꓸ ꓙ ꓙꓰ ꓡ ꓥꓳ ꓐꓰ ꓥꓳ ꓡꓳꓸ ꓔꓬ ꓥꓳ꓿” ꓐꓰ ꓟꓬꓱꓽ ꓡꓳꓸꓙꓬ-ꓡꓲ-ꓪꓴꓽ ꓡꓰ ꓑꓮꓲꓽ ꓙ ꓖꓴ ꓜꓲ ꓜꓲ ꓟꓴ ꓟꓴ ꓚ ꓟꓸ ꓖꓶ ꓡ ꓡꓳ꓿2012 ꓘꓳꓼ ꓗꓪ ꓪꓴꓸ ꓔꓴˍ ꓕꓯꓽ 13 ꓣꓳˍ ꓡꓰꓽ ꓥ ꓟꓲ 10 ꓘꓳꓼ ꓟ ꓘꓴꓽ ꓗꓪ ꓘꓴ ꓜꓲꓼ ꓞꓳ ꓠꓬ 150 ꓣꓳ ꓛꓲ ꓙꓳ ꓡ ꓡꓳ꓿
7 ꓦ 22 ꓠꓬꓲ ꓕꓯꓽ ꓲꓚꓙ ꓗꓪ ꓐꓰ ꓫꓵꓽ ꓘꓶꓽ ꓓꓴ ꓥꓳ
ꓲꓚꓙ ꓗꓪ ꓖ-ꓐꓲ-ꓬ ꓗꓴꓷꓼ ꓡꓰ ꓣꓳ-ꓦꓲ-ꓙ ꓫꓵꓽ ꓐꓴ ꓐꓱ ꓶ ꓗꓳꓹ ꓩꓴ ꓡ ꓟ ꓔꓯ ꓟꓬ-ꓟ ꓟꓯꓼ ꓗꓳ-ꓢꓰ ꓡꓰꓽ ꓖꓳ ꓡꓱ ꓬꓰ ꓡꓲꓽ ꓬꓰ ꓒꓰꓼ ꓟꓽ ꓙꓳ ꓐꓰ ꓐꓯ ꓟꓴ ꓔꓳꓹ ꓡꓽ ꓔꓸ ꓟ ꓔꓯ ꓡ ꓠꓹ ꓟ 7 ꓦ 22 ꓠꓬꓲ ꓕꓯꓽ ꓐꓯ ꓟꓴ ꓘꓶꓽ ꓓꓴ ꓙꓳˍ ꓡꓳ꓾ ꓐꓰ ꓲꓚꓙ ꓗꓪ ꓐꓰ 7 ꓦ 11 ꓠꓬꓲ ꓕꓯꓽ ꓢꓷ ꓙ ꓟꓴ ꓙ ꓔꓸ ꓡꓳ꓿
ꓫꓵꓽ ꓘꓶꓽ ꓖꓴ ꓐꓰ ꓬꓲꓸ ꓙꓵꓹ ꓠꓬ꓾ ꓠꓯ-ꓔ-ꓡ ꓗꓴꓷꓼ꓾ ꓓꓰꓽ-ꓦꓰꓼ ꓡꓳ ꓒꓱ꓾ ꓢꓲ ꓡꓲꓹ ꓟ ꓙꓵꓽ ꓦꓲ (Peace Palace) ꓗꓪ꓾ 2022 ꓘꓳꓼ 7 ꓦ 22 ꓠꓬꓲ꓾ ꓟꓶ ꓘꓶꓼ 3 ꓙꓵꓹ ꓕꓯꓽ ꓐꓯ ꓟꓴ ꓘꓶꓽ ꓢꓴ Joan Donoghue ꓡꓰ ꓫꓵꓽ ꓘꓶꓽ ꓕꓳ ꓶ ꓵꓺ ꓟꓸ ꓓꓴ ꓥ ꓡꓳ꓿
ꓖꓳ ꓗꓪ ꓙꓰ ꓢꓲꓸ ꓠ ꓠꓹ ꓐ ꓡ ꓢꓴ ꓠꓬ ꓠ ꓠꓹ꓾ ꓟꓬꓽ ꓠꓬꓲ ꓠꓬ ꓲꓚꓙ ꓪꓯꓼ-ꓢꓮꓲꓼ ꓗꓪ ꓚꓳꓸ ꓐꓬꓱꓽ ꓢꓯꓸ ꓡꓳꓸ ꓟꓳ ꓠꓹ ꓟ ꓬꓲꓸ ꓚꓱꓹ ꓝꓰꓸ ꓔꓸ ꓡꓳ꓿
ꓖ-ꓐꓲ-ꓬ ꓡꓰꓽ ꓐꓯ ꓟ ꓠꓬ ꓟꓲ ꓠꓯ ꓗꓪ ꓞꓳ ꓫꓵꓽ ꓕꓲ ꓫꓵꓽ ꓔꓯ ꓕꓱ ꓡꓱ ꓫꓸ ꓟꓴ ꓫꓸ ꓚꓬ ꓬꓰ ꓔꓬ ꓟ ꓔꓯ ꓛꓳꓽ ꓟꓽ ꓬꓯꓼ꓾ ꓖ-ꓐꓲ-ꓬ ꓠꓬ ꓗꓴꓷꓼ ꓜꓴ ꓗꓪ ꓔꓺ ꓢꓴ꓾ ꓡꓽ ꓞꓳ ꓶꓽ ꓔꓯ ꓒꓵꓽ ꓢꓴ ꓗꓴꓷꓼ ꓕꓲꓽ ꓟ ꓥ ꓟ ꓡꓰ ꓐꓰ ꓥꓰꓸ ꓜꓲ ꓟꓶ ꓢꓴ ꓣꓳ ꓓꓰꓺ ꓡꓰˍ ꓟ ꓣꓳ-ꓦꓲ-ꓙ ꓕꓲꓽ ꓛꓱꓽ ꓗꓪ ꓦꓰꓼ ꓢꓲꓸ ꓡ ꓞꓳ ꓶꓽ ꓐꓱ ꓶ ꓟꓬ-ꓟ ꓗꓴꓷꓼ ꓔꓯ ꓐꓯ ꓟꓴ ꓕꓱˍ ꓟ ꓥ ꓡꓳ꓾ ꓐꓯ ꓡꓳ꓿ 2017 ꓘꓳꓼ ꓕꓯꓽ ꓟꓬ-ꓟ ꓟꓯꓼ ꓡꓰꓽ ꓣꓳ-ꓦꓲ-ꓙ ꓞꓳ ꓫꓵꓽ ꓮ ꓟꓬꓹ ꓢꓰꓼ ꓪ ꓡꓰ ꓟ ꓐꓰ꓾ ꓜꓰ ꓞꓹ ꓢꓴ 7 ꓢꓯꓹ ꓛꓲ ꓠꓬ ꓟꓬ-ꓟ ꓟꓵꓽ ꓗꓪ ꓐꓰ ꓘꓰꓹ ꓓꓳ ꓙꓰˍ ꓟ ꓥ ꓡꓳ꓿
ꓟꓬ-ꓟ ꓕꓲꓽ ꓛꓱꓽ ꓗꓪ ꓐꓰ ꓐꓯˍ ꓟ ꓠꓬ꓾ ꓣꓳ-ꓦꓲ-ꓙ ꓐꓱ ꓶ ꓶꓽ ꓤ ꓗꓪ ꓐꓰ ꓟꓽ ꓚꓬꓼ ꓢꓴ ꓖ-ꓐꓲ-ꓬ ꓗꓴꓷꓼ ꓡꓰꓽ ꓫꓵꓽ ꓩꓴ ꓡ ꓟ ꓠꓬ ꓬꓲꓸ ꓡꓲꓽ ꓟꓽ ꓙꓳ꓾ ꓖ-ꓐꓲ-ꓬ ꓠꓬ ꓳꓲꓚ (ꓟꓵ ꓗꓳ ꓓꓵ ꓓꓵ ꓲ-ꓢꓲ-ꓡ ꓦ ꓡꓱ ꓗꓴꓷꓼ ꓜꓴ) ꓗꓪ ꓐꓰ ꓒꓴ ꓜꓽ ꓢꓲꓸ ꓢꓯꓼ ꓕꓵꓼ ꓡ ꓟ ꓠꓬ ꓬꓲꓸ ꓡꓲꓽ ꓛꓳ ꓟꓽ ꓜꓯꓼ ꓐꓰ ꓟꓬ-ꓟ ꓟꓯꓼ ꓗꓳ-ꓢꓰ ꓡꓰ ꓥꓪꓸ ꓔꓸ ꓟ ꓐꓯ ꓟꓴ ꓒꓽ Christopher Staker ꓡꓰ ꓐꓯ ꓔꓸ ꓡꓳ꓿
ꓫꓵꓽ ꓪꓴꓻ ꓚꓲꓸ ꓚ ꓓꓴ ꓗꓪ ꓟꓽ ꓛꓲˍ ꓢꓰꓽ ꓕꓯꓽ ꓟꓬ-ꓟ ꓕꓲ ꓒꓳꓹ ꓗꓪ ꓐꓰ ꓐꓯ ꓟꓴ ꓩꓴ ꓡ ꓙꓲꓽ ꓟꓽ ꓙꓳ ꓐꓰ ꓗꓽ ꓩꓴ ꓡ ꓟ ꓔꓯ ꓫꓵꓽ ꓘꓶꓽ ꓓꓴ ꓐꓯ ꓔꓬ ꓟ ꓥ ꓡꓳ꓿
2019 ꓘꓳꓼ ꓗꓪ ꓮꓳ-ꓢ-ꓢꓴ-ꓚꓰꓽ ꓥ ꓟꓲ ꓐꓯ ꓟꓴ ꓕꓲꓺ ꓕꓱ ꓟ ꓗꓪ ꓖ-ꓐꓲ-ꓬ ꓠꓬ ꓟꓬ-ꓟ ꓔꓯ ꓐꓯ ꓟꓴ ꓕꓱ ꓡ ꓙꓲꓽ ꓟꓽ ꓙꓳ ꓐꓰ ꓙꓰ ꓢꓲꓸ ꓫꓸ ꓕꓱ ꓗꓷˍ ꓠꓬꓲ꓾ ꓬꓲꓸ ꓠꓬ ꓥꓰꓸ ꓜꓲ ꓟꓶ ꓢꓴ ꓐꓱ ꓶ ꓟꓽ ꓫꓸ ꓕꓱ ꓕꓱ꓾ ꓟꓬ-ꓟ ꓟꓯꓼ ꓔꓯ ꓔꓺ ꓙꓰꓳ ꓐꓯ ꓢꓲꓸ ꓟꓵꓽ ꓗꓳ ꓓꓵ ꓓꓵ ꓗꓪ ꓬꓲꓸ ꓟꓬꓱꓺ ꓓꓳꓽ ꓞꓼ ꓓꓳꓽ ꓐꓬ ꓡꓰˍ ꓟ ꓥ ꓡꓳ꓿