Audio News

ꓡꓲ-ꓢꓴ ꓡꓲꓽ ꓒꓰꓼ ꓞꓳ ꓪꓴꓽ ꓔꓯ ꓢꓰꓼ ꓡ ꓟ ꓠꓬ ꓡꓲ-ꓢꓴ ꓫꓵꓽ ꓮ ꓙꓵꓽ ꓔꓯ ꓢꓰꓼ ꓡ ꓟ ꓥꓳ

ꓟꓬ-ꓟ ꓗꓴꓷꓼ ꓡꓲ-ꓢꓴ ꓕꓳ ꓶ ꓐꓰ ꓡꓲꓽ ꓒꓰꓼ ꓜꓴ ꓚꓰꓺ ꓢꓽ ꓡ ꓙꓵꓽ ꓞꓳ ꓪꓴꓽ ꓮ-ꓞꓲ ꓔꓯ ꓢꓰꓼ ꓡ ꓟ ꓔꓯ ꓟꓳꓸ ꓗꓴꓸ ꓙꓲꓽ ꓙꓳ ꓢꓲꓸ ꓡꓲꓽ ꓒꓰꓼ ꓜꓴ ꓚꓰꓺ ꓗꓪ ꓐꓰ 2022 ꓘꓳꓼ 7 ꓦ 31 ꓠꓬꓲ ꓟꓶ ꓘꓶꓼ ꓗꓪ ꓕꓳ ꓶ ꓕꓲ ꓚꓴꓸ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿

ꓢꓷ ꓙ ꓟꓴ ꓙ ꓕꓳ ꓶ ꓗꓪ ꓬꓲꓸ ꓝꓲꓸ ꓓꓽ ꓟ ꓠꓬ꓾ 2022 ꓘꓳꓼ 7 ꓦ 30 ꓠꓬꓲ ꓟꓶ ꓘꓶꓼ 8 ꓙꓵꓹ ꓕꓯꓽ ꓡ ꓛꓴꓸ ꓐꓶ ꓜꓯꓼ ꓡꓰ ꓢꓲꓸ ꓮ ꓟꓶ ꓠꓻ ꓫꓬꓹ ꓔꓬ ꓡꓳ꓿ ꓡꓲ-ꓢꓴ ꓡꓲꓽ ꓒꓰꓼ ꓞꓳ ꓪꓴꓽ ꓔꓯ ꓢꓰꓼ ꓡ ꓟ ꓠꓬ ꓡꓲ-ꓢꓴ ꓫꓵꓽ ꓮ ꓙꓵꓽ ꓔꓯ ꓢꓰꓼ ꓡ ꓟ ꓥꓳ ꓐꓰ ꓘꓳ ꓣꓴ ꓡꓳ꓾ ꓕꓱ ꓟ ꓮ ꓡꓲ ꓕꓲ ꓣꓳ ꓕꓲ ꓜꓴ ꓡꓰ ꓬꓰ ꓥ ꓟꓲ ꓕꓱ ꓟ ꓔꓯ ꓡꓲꓽ ꓒꓰꓼ ꓜꓴ ꓠꓬ ꓘꓳ ꓣꓴ ꓟꓽ ꓐ ꓡ ꓐꓰ ꓐꓯ ꓔꓸ ꓡꓳ꓿

ꓢꓷ ꓙ ꓟꓴ ꓙ ꓕꓳ ꓶ ꓗꓪ ꓕꓲ ꓣꓳ ꓣꓳ ꓡꓰꓽ ꓡꓯꓼ ꓓꓴ ꓢꓽ ꓔꓸ ꓢꓴ ꓟꓽ ꓙꓳ꓿ ꓟꓬ-ꓟ ꓗꓴꓷꓼ ꓡꓲ-ꓢꓴ ꓕꓳ ꓶ ꓐꓰ ꓡꓲꓽ ꓒꓰꓼ ꓜꓴ ꓚꓰꓺ ꓐꓰ ꓐꓳ ꓔꓸ ꓡꓳ꓿

ꓞꓳ ꓪꓴꓽ ꓮ-ꓞꓲ ꓔꓯ ꓗꓺ ꓠꓯꓺ ꓗꓪ ꓕꓲ ꓕꓶꓹ ꓐꓶ ꓜꓯꓼ ꓡꓰ ꓢꓲꓸ ꓠꓯ ꓞꓲꓼ ꓫꓬꓹ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ꓿

ꓟꓬ-ꓟ ꓗꓴꓷꓼ ꓚꓲꓸ ꓚꓲꓸ ꓑꓶꓸ ꓑꓶꓸ ꓦꓬꓼ ꓠꓬꓲ ꓦ ꓐ 6 ꓟ ꓫꓵꓺ ꓩꓴꓳ

ꓟꓬ-ꓟ ꓗꓴꓷꓼ ꓚꓲꓸ ꓚꓲꓸ ꓑꓶꓸ ꓑꓶꓸ ꓦꓬꓼ ꓠꓬꓲ ꓔꓯ 2022 ꓘꓳꓼ 8 ꓦ 1 ꓠꓬꓲ ꓗꓪ ꓐꓰ 2023 ꓘꓳꓼ 1 ꓦ 31 ꓠꓬꓲ ꓗꓪ ꓛꓲ  ꓦ ꓐ 6 ꓟ ꓫꓵꓺ ꓩꓴꓳ꓾ ꓐꓰ ꓟꓣꓔꓦ/ꓟꓪꓓ ꓗꓪ ꓠꓬꓲꓸ ꓠꓬꓲ 2022 ꓘꓳꓼ 7 ꓦ 31 ꓠꓬꓲ ꓟꓶ ꓘꓶꓼ 8 ꓙꓵꓹ ꓗꓪ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿

2020 ꓘꓳꓼ ꓟꓯꓹ ꓢꓲꓻ ꓣꓴ ꓟ ꓗꓪ ꓟꓽ ꓔꓱꓹ ꓟꓽ ꓜꓳ ꓟ ꓙꓳˍ ꓡꓳ ꓐꓯ ꓢꓲꓸ 2021 ꓘꓳꓼ 2 ꓦ 1 ꓠꓬꓲ ꓕꓯꓽ ꓟꓯꓼ ꓡꓰ ꓑ ꓫꓬ ꓙꓵꓽ ꓪ ꓣꓴ ꓔꓯꓹ ꓙꓰ ꓗꓷ ꓟ ꓠꓬꓲꓸ ꓠꓬꓲ ꓠꓬ 1 ꓘꓳꓼ ꓠꓰ ꓦ ꓐ 6 ꓟ ꓙꓳ ꓡꓰꓳ꓿ ꓕꓱ ꓡꓱ ꓙꓵꓽ ꓪ ꓣꓴ ꓠꓹ ꓟ ꓗꓴꓷꓼ ꓪꓴꓸ ꓓꓵ 2 ꓣꓳ ꓕꓲꓽ ꓣꓳ ꓟꓰꓼ-ꓢꓱꓽ ꓡꓰ ꓟꓯꓼ ꓜꓲꓽ ꓟꓰꓹ ꓮꓳ-ꓡꓮꓲꓽ ꓔꓯ ꓡꓯꓼ ꓙꓱ ꓔꓸ ꓟ ꓥ ꓡꓳ꓿

ꓟꓯꓼ ꓗꓳ-ꓢꓰ ꓠꓬ 2008 ꓗꓴꓷꓼ ꓙꓵꓽ ꓗ ꓚꓰꓺ ꓔꓯ ꓛꓳ ꓔꓬ ꓡꓳ꓾ ꓐꓯ ꓡꓳ꓿2008 ꓗꓴꓷꓼ ꓙꓵꓽ ꓗ ꓚꓰꓺ ꓗꓪ ꓚꓲꓸ ꓚꓲꓸ ꓑꓶꓸ ꓑꓶꓸ ꓟꓬꓱꓽ ꓙꓳ ꓡ ꓠꓬ ꓟꓯꓼ ꓠꓰ 1 ꓘꓳꓼ ꓙꓵꓽ ꓪ ꓣꓱꓽ꓾ ꓝꓮꓲ ꓦ ꓐ 6 ꓟ 2 ꓧꓪꓹ ꓦꓬꓼ ꓠꓬꓲ ꓫꓵꓺ ꓠ ꓗ ꓡꓳ꓾ ꓐꓯ ꓔ ꓡꓳ꓿ ꓟꓯꓼ ꓡꓰ ꓙꓵꓽ ꓗ ꓡꓳ ꓚ 2 ꓘꓳꓼ ꓙꓵꓽ ꓪ ꓓˍ ꓡꓳ꓾ ꓐꓯ ꓟ ꓥ ꓡꓳ꓿

ꓖꓳ ꓟ ꓑꓶꓸ ꓓꓴ ꓟꓯꓼ ꓙꓵꓽˍ ꓟ ꓦꓬꓼ ꓠꓬꓲ ꓔꓯ ꓬꓲꓸ ꓙꓵꓹ ꓫꓵꓺ ꓩꓴ ꓡ ꓟ ꓕꓱ ꓕꓲ ꓧꓪꓹ ꓠꓬ ꓠꓬꓲꓽ ꓧꓪꓸ ꓕꓲꓽ ꓧꓪꓹ ꓐꓰ ꓬꓲꓸ ꓟꓶꓽ ꓕꓲ ꓧꓪꓹ ꓥ ꓡꓳ꓿

ꓡ ꓠꓹ ꓟ 2023 ꓘꓳꓼ 8 ꓦ ꓗꓪ ꓢꓲꓻ ꓣꓴ ꓑꓮꓲ ꓬꓰ ꓓꓴ ꓥꓳ ꓐꓰ ꓟꓬ-ꓟ ꓟꓯꓼ ꓗꓳ ꓢꓰ ꓡꓰ ꓢꓷ ꓙ ꓟꓴ ꓙ ꓔ ꓡꓳ꓿

ꓖꓳ ꓡꓱ ꓥ ꓟꓲ ꓑ ꓫꓬ ꓡꓰ ꓢꓲꓻ ꓔꓸ ꓟ ꓗꓴꓷꓼ ꓪꓴꓸ ꓓꓵ ꓪꓰꓹ-ꓟꓰꓼ ꓔꓯ ꓣꓴ ꓡꓴꓽ ꓔꓸ ꓢꓲ꓾ ꓟꓯꓼ ꓗꓪ ꓐꓰ ꓡ ꓢꓴ ꓗꓴꓷꓼ ꓪꓴꓸ ꓓꓵ 2 ꓡꓰ ꓕꓱ ꓡꓱ ꓙꓵꓽ ꓪ ꓡꓯꓼ ꓙꓱ ꓟ ꓠꓬ 2008 ꓗꓴꓷꓼ ꓙꓵꓽ ꓗ ꓚꓰꓺ ꓔꓯ ꓟꓽ ꓧꓳꓹ ꓐꓰ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓢꓯꓼ ꓕꓵꓼ ꓢꓴ ꓐꓴ ꓡꓰ ꓐꓯ ꓔꓸ ꓡꓳ꓿

Video News