Audio News

ꓢꓲ-ꓣꓲ-ꓡꓲ-ꓖ ꓗꓴꓷꓼ ꓗꓪ ꓙꓼ ꓞꓶ ꓔꓯ ꓕꓲ ꓫꓵꓽ ꓠꓽ ꓕꓲꓽ ꓧꓪꓹ ꓪꓴꓽ ꓖꓶ ꓓꓴ ꓥꓳ

ꓙꓼ ꓞꓶ ꓪꓴꓻ ꓠꓲꓹ ꓫꓵ ꓢꓴ ꓐꓴ ꓟꓬꓱꓺ ꓐꓳ ꓚꓲꓸ ꓔꓸ ꓢꓲꓸ ꓕꓲꓽ ꓫꓵꓽ ꓠꓽ ꓗꓪ ꓢꓲꓸ ꓕꓲ ꓧꓪꓹ ꓒꓯꓽ ꓪꓴꓽ ꓖꓶ ꓓꓴ ꓥꓳ꓾ ꓐꓰ ꓢꓲ-ꓣꓲ-ꓡꓲ-ꓖ ꓗꓴꓷꓼ ꓮ ꓔꓳꓸ ꓙꓼ ꓢꓯꓼ ꓔꓯ ꓟꓳꓸ ꓢꓲꓽ ꓒ Kanchana Wijesekera ꓡꓰ 2022 ꓘꓳꓼ 6 ꓦ 12 ꓠꓬꓲ ꓕꓯꓽ ꓕꓵꓼ ꓪ ꓓꓳ ꓩꓴ ꓡ ꓡꓳ꓿

“ꓕꓱ ꓡꓱ ꓟꓽ ꓥ ꓐꓯ ꓠꓽ ꓕꓲ ꓠꓬꓲ ꓡꓲꓸ ꓕꓲ ꓠꓬꓲ ꓝꓯꓸ ꓠꓬꓹ ꓢꓴ ꓮ ꓙꓵꓽ ꓔꓯ ꓪꓴꓽ ꓖꓶ ꓓꓴ ꓟꓽ ꓙꓳ ꓡꓰꓳ꓿ ꓗꓴꓷꓼꓦꓙꓵꓽ ꓜꓴ ꓠꓬ ꓒꓴ ꓫꓸ ꓡꓰ ꓠꓬꓲ ꓙꓼ ꓞꓶ ꓚꓰꓹ ꓪꓴꓽ ꓚꓱꓹ ꓗꓪ ꓫꓸ ꓡꓰꓳ” ꓐꓰ ꓢꓲꓽ ꓒ ꓖꓳ ꓟ ꓡꓰ ꓐꓯ ꓡꓳ꓿

ꓙꓼ ꓞꓶ ꓬꓲ ꓫꓵ ꓬꓲ ꓙꓰ ꓔꓯ ꓐꓶꓽ ꓗꓴꓷꓼ ꓗꓪ ꓐꓰ ꓢꓲ-ꓣꓲ-ꓡꓲ-ꓖ ꓗꓴꓷꓼ ꓙꓵꓽ ꓜꓴ ꓡꓯ ꓒꓯꓹ ꓗꓪ ꓟ Ceylon Petrolem Coporation ꓡꓰ ꓚꓰꓹ ꓓꓵꓽ ꓔꓬ ꓟ ꓥ ꓢꓲ꓾ ꓒꓴ ꓟꓽ ꓙꓳ ꓡꓰˍ ꓠꓬꓲ ꓢꓴ ꓗꓴꓷꓼ ꓗꓪ ꓐꓰ ꓥ ꓟꓲ ꓟꓽ ꓛꓵꓽ꓾ꓟꓽ ꓙꓶ ꓖꓶ ꓡ ꓠꓬꓲ ꓬꓰ ꓫꓸ ꓡꓰ ꓔꓬ ꓟ ꓥ ꓡꓳ꓿

ꓗꓳꓸ ꓗꓷ ꓟ 3 ꓦ ꓟ ꓘꓴꓽ ꓗꓪ ꓢ-ꓗꓯ ꓕꓲꓽ ꓢꓶ ꓔꓯ 3 ꓡꓲ-ꓔ꓾ ꓔꓳꓹ-ꓐꓲꓹ ꓕꓲ ꓢꓶꓽ ꓔꓯ 5 ꓡꓲ-ꓔ꓾ ꓢꓴꓦ ꓟꓳ ꓓꓳ ꓕꓲꓽ ꓢꓶꓽ ꓔꓯ 19.5 ꓡꓲ-ꓔ ꓕꓯꓽ ꓢꓲ ꓪꓴꓽ ꓖꓶꓽ ꓟꓽ ꓓ ꓐꓯˍ ꓟ ꓕꓵꓼ ꓪ ꓓꓳ ꓡ ꓗꓸ ꓠꓯꓸꓮ ꓟꓶ ꓠꓬ ꓕꓲꓽ ꓫꓵꓽ ꓠꓽ ꓗꓪ ꓢꓲꓸ ꓕꓲ ꓧꓪꓹ ꓪꓴꓽ ꓖꓶ ꓓꓴ ꓕꓵꓼ ꓪ ꓓꓳ ꓡ ꓟ ꓥ ꓡꓳ꓿

ꓗꓴꓷꓼ ꓶ ꓡꓯꓼ ꓚꓱꓹ ꓬꓲꓸ ꓥꓳꓽ ꓟꓽ ꓜꓯꓼ ꓞꓳꓸ ꓡꓰ ꓠꓬꓲ꓾ ꓢꓲ-ꓣꓲ-ꓡꓲ-ꓖ ꓗꓴꓷꓼ ꓠꓬ ꓫꓬꓹ ꓑꓱ ꓫꓬꓹ ꓡꓶꓸ ꓟꓽ ꓐ ꓡ ꓗꓪ ꓛꓲ ꓫꓸ ꓡꓰ ꓔꓬ ꓟ ꓥ ꓡꓳ꓿ 

ꓢꓲ-ꓣꓲ-ꓣꓲ-ꓗ ꓗꓴꓷꓼ ꓠꓬ 1948 ꓘꓳꓼ ꓕ ꓑꓳꓸ ꓫꓸ ꓓꓰꓼ ꓡꓰˍ ꓟ ꓦꓬꓼ ꓠꓬꓲ ꓔꓳꓹ ꓜꓳꓽ ꓪ ꓔꓬ ꓟ ꓥ ꓡꓳ꓿ꓬꓲꓸ ꓚꓰ꓾ AFP

ꓪꓳꓹ-ꓡꓯꓽ ꓑꓳ-ꓡꓲ ꓟꓯꓼ ꓦꓲ ꓔꓯ ꓗꓠꓓꓳ ꓡꓰ ꓓꓶꓽ ꓧꓪꓸ ꓡꓰ꓾ ꓟꓯꓼ 3 ꓣꓳ ꓢꓯꓸ ꓢꓯꓸ ꓣꓴ ꓟꓶ꓾ ꓟꓯꓼ ꓡ ꓛꓴꓸ ꓫꓺ ꓪ

ꓗ-ꓬꓲ ꓟꓵꓽ꓾ ꓪꓳꓹ-ꓡꓯꓽ ꓡꓳ ꓒꓱ ꓑꓳ-ꓡꓲ ꓟꓯꓼ ꓦꓲ ꓔꓯ ꓗꓠꓓꓳ ꓐꓰ ꓑꓓꓝ ꓐꓴ ꓡꓰ ꓠꓬꓲꓸ ꓠꓬꓲ 2022 ꓘꓳꓼ 6 ꓦ 13 ꓠꓬꓲ ꓠꓯꓼ ꓠꓯꓼ ꓓꓶꓽ ꓧꓪꓸ ꓡꓰ ꓢꓲ꓾ ꓑꓳ-ꓡꓲ ꓟꓯꓼ 3 ꓣꓳ ꓢꓯꓸ ꓢꓯꓸ ꓣꓴ ꓟꓶ꓾ ꓟꓯꓼ ꓡ ꓛꓴꓸ 3 ꓗꓸ ꓫꓺ ꓪ ꓡꓰꓳ꓿

ꓐꓶ ꓢꓰꓼ ꓢꓴ ꓥ ꓟꓲ ꓙꓳ ꓢꓲꓸ ꓢꓯꓸ ꓢꓯꓸ ꓣꓴ ꓟꓶ ꓢꓴ 3 ꓣꓳ ꓔꓯ ꓧꓳꓽ ꓔꓯꓹ ꓡ ꓡꓳ꓾ ꓐꓰ ꓗꓠꓓꓳ ꓟꓯꓼ ꓡꓰ ꓢꓷ ꓙ ꓟꓴ ꓙ ꓔꓸ ꓡꓳ꓿

ꓪꓳꓹ-ꓡꓯꓽ ꓡꓳ ꓒꓱ ꓠꓬ ꓗ-ꓬꓲ ꓟꓵꓽ꓾ ꓟꓬ-ꓟ ~ ꓕꓮꓲꓹ ꓟꓵꓽ ꓫꓸ ꓗ ꓒ ꓕꓲ ꓗꓪ ꓙꓳˍ ꓟ ꓡꓳ ꓒꓱ ꓕꓲꓽ ꓟ ꓥ ꓡꓳ꓿ 

ꓕꓱ ꓕꓲ ꓧꓪꓹ ꓟꓬ-ꓟ ꓟꓯꓼ ꓠꓬ ꓑꓓꓝ ꓔꓯ ꓧꓪꓸ ꓟꓽ ꓖꓰꓼ ꓠ ꓔꓸ ꓐꓰ ꓴꓢꓮ ꓐꓶ ꓗꓴꓷꓼ ꓝꓲ ꓓꓴ ꓓꓯꓹ-ꓬꓯꓼ ꓛꓳ-ꓡꓯꓼ ꓡꓰ 2022 ꓘꓳꓼ 6 ꓦ 11 ꓠꓬꓲ ꓕꓯꓽ ꓐꓯ ꓔꓸ ꓟ ꓙꓳˍ ꓡꓳ꓿

ꓬꓲ ꓚꓰ꓾ ꓗꓠꓓꓳ, ꓗꓲꓚ

Video News