2022 ꓘꓳꓼ 10 ꓦ 23 ꓠꓬꓲ ꓟꓶ ꓘꓶꓼ꓾ ꓗꓲꓮ ꓓꓼ ꓒꓽ-9꓾ ꓗꓸꓢꓰꓸ꓾ ꓮ-ꓠ-ꓑ ꓗꓪ ꓗꓲꓳ 62 ꓘꓳꓼ ꓐꓲ ꓡˍ ꓟ ꓚꓲꓸ ꓟꓶ ꓓꓴ ꓟꓴ ꓖꓪ ꓖꓪ ꓑꓮꓲꓽ ꓬꓰ ꓔꓬ ꓟ ꓗꓪ ꓟꓬ-ꓟ ꓟꓯꓼ ꓙꓼ ꓦꓲ ꓡꓰ ꓐꓳꓽ ꓐꓶ ꓡ ꓠꓬꓲ꓾ ꓟꓴ ꓖꓪ ꓖꓪ ꓗꓪ ꓟꓬꓱ ꓓꓳꓽ ꓙꓳ ꓢꓴ ꓐꓴˍ ꓐꓰ ꓑꓮꓲ ꓗꓪ ꓜꓲꓼ ꓡ ꓢꓴ 60 ꓣꓳ ꓕꓯꓽ ꓢꓲ ꓐꓶ ꓢꓰꓼꓳ꓿
“ꓟꓬꓱ ꓓꓳꓽ ꓙꓳˍ ꓟ ꓟꓴ ꓖꓪ ꓖꓪ ꓒꓽ ꓮꓳ-ꓣ-ꓡꓲ ꓫꓵꓻꓳ꓿ ꓟꓯꓼ ꓜꓲꓽ ꓐꓴˍ ꓐꓰ ꓑꓮꓲ ꓗꓪ ꓡ ꓢꓴ 50 ꓟꓽ ꓞꓲ ꓫꓵꓻꓳ꓿ 60 ꓣꓳ ꓟꓽ ꓞꓲ ꓠꓻ ꓓꓴ ꓡꓰ ꓢꓴ ꓙꓳ ꓡꓳ ” ꓐꓰ ꓓꓳꓽ ꓜꓳ ꓢꓴ ꓡꓰ ꓐꓯ ꓡꓳ꓿
ꓟꓬ-ꓟ ꓟꓯꓼ ꓠꓬ ꓟꓯꓼ ꓙꓱ ꓦꓲ ꓚꓱꓹ ꓗꓪ ꓐꓰ ꓒꓳꓹ ꓔꓳꓹ ꓟꓯꓼ ꓐꓴ ꓔꓯ ꓓꓶꓽ ꓔꓬ ꓟ ꓥ ꓡꓳ꓿
ꓗꓲꓮ ꓡꓰ ꓕꓱ ꓟ ꓠꓬ ꓟꓯꓼ ꓘꓶꓽ ꓗꓪ ꓟꓽ ꓥ ꓥ ꓑ ꓫꓬ ꓔꓯ ꓢꓰꓼ ꓡ ꓟ ꓥ ꓡꓳ ꓐꓯ ꓢꓲ꓾ ꓫꓵꓻ ꓢꓴ ꓐꓴ ꓐꓱ ꓶ ꓠꓲꓹ ꓥꓴ ꓟꓬ ꓥꓴ ꓟ ꓢꓷꓸ ꓡꓰ ꓓꓴ ꓒꓯꓽ ꓕꓲ ꓕꓱ ꓞꓰ ꓢꓲꓸ ꓔꓶꓸ ꓔꓸ ꓡꓳ꓿
“ꓑꓮꓲ ꓗꓪ ꓡ ꓢꓴ ꓙꓳꓸ ꓙꓳꓽ ꓥ ꓠꓰ ꓠꓯꓺ ꓞꓲꓼ ꓠꓯ ꓟꓲ ꓟꓽ ꓙꓳ ꓟ ꓑꓶꓸ ꓓꓴ ꓫꓵꓽ (ꓢꓲꓽ) ꓓꓳ ꓠꓬꓽ ꓡꓰ ꓢꓲꓸ ꓫꓵꓻ ꓢꓴ ꓙꓳ ꓡꓳ” ꓐꓰ ꓖꓳ ꓗꓪ ꓔꓬ ꓢꓴ ꓡꓰ ꓐꓯ ꓡꓳ꓿
ꓕꓱ ꓟ ꓔꓯ ꓒ-ꓗꓸ ꓗꓪ ꓞꓳ ꓜꓴ ꓞꓳ ꓟꓯꓼ ꓢꓰꓼ ꓪ ꓡꓰ ꓟ (Hphakant Massacre) ꓐꓯ ꓢꓲꓸ ꓚꓺ ꓟꓲꓽ ꓐꓳ ꓠꓹ ꓟ ꓙ ꓖꓶ ꓔꓬ ꓢꓴ ꓙꓳ ꓡꓳ꓿