Elon Musk ꓔꓯ Twitter ꓪꓴꓽ ꓩꓴ ꓠꓹ ꓟ Twitter ꓗꓳ-ꓑꓶ-ꓠꓰ ꓔꓯ ꓟꓳꓸ ꓙꓵꓽ ꓜꓴ ꓠꓲꓹ ꓧꓳꓹ ꓗꓷꓳ ꓐꓰ 2022 ꓘꓳꓼ 4 ꓦ 25 ꓠꓬꓲ ꓗꓪ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
ꓗꓳꓸ ꓗꓷ ꓟ 2 ꓫꓵꓽ ꓠꓽ ꓗꓪ Elon Musk ꓡꓰ Twitter ꓔꓯ ꓪꓴꓻ ꓠꓲꓹ ꓫꓵˍ ꓡꓳ꓾ ꓬꓲꓸ ꓒꓵꓽ 44 Billions ꓖꓶ ꓓꓴ ꓥꓳ ꓐꓯ ꓩꓴ ꓡ ꓟ ꓥ ꓡꓳ꓿
“Twitter ꓔꓯ ꓮ ꓟꓶ ꓟ ꓕꓯꓽ ꓢꓲ ꓡꓳꓸ ꓐꓲ ꓣꓱꓽ ꓢ ꓠꓹ ꓟ ꓫꓬꓹ ꓑꓱ ꓓꓴ ꓥꓳ꓿ ꓮ ꓟˍ ꓟꓲ ꓗꓽ ꓔꓸ ꓓꓴ ꓟꓽ ꓙꓳ ꓙꓳ꓾ ꓠꓲꓹ ꓘꓪ ꓠꓲꓹ ꓫꓵ ꓣꓱꓽ ꓪ ꓝꓲ ꓓꓴ ꓥꓳ” ꓐꓰ Elon Musk ꓡꓰ ꓐꓯˍ ꓡꓳ꓿
“ꓥ ꓠꓽ Twitter ꓗꓪ ꓟꓽ ꓡꓽ ꓙꓰꓳ꓾ Truth Media ꓬꓲꓸ ꓫꓵꓼ ꓕꓲ ꓟ ꓬꓰ ꓔꓬ ꓡꓳ” ꓐꓰ ꓴꓢꓮ ꓗꓴꓷꓼ ꓙꓵꓽ ꓢꓴ ꓬꓲꓸ ꓡꓵꓺ ꓓꓳ-ꓠꓯ-ꓕ-ꓣꓼ (Donald Trump) ꓡꓰ ꓐꓯ ꓡꓳ꓿ ꓬꓲꓸ ꓠꓬ ꓟꓽ ꓔꓱꓹ ꓟ ꓓꓳꓽ ꓐꓳ ꓒꓬꓱˍ ꓡꓳ꓾ ꓐꓯ ꓢꓲꓸ Twitter ꓡꓰ ꓬꓲꓸ account ꓑꓲꓸ ꓩꓴ ꓗꓷ ꓟ ꓥ ꓡꓳ꓿
Twitter ꓔꓯ 2006 ꓘꓳꓼ ꓗꓪ ꓪꓴꓸ ꓔꓴ ꓔꓸ ꓟ ꓥ ꓢꓲ꓾ 2021 ꓕꓯꓽ ꓚꓲꓸ ꓚ ꓔꓸ ꓟ ꓠꓬ ꓖꓳ ꓗꓪ ꓟꓬꓱꓽ ꓬꓰ ꓢꓴ 7500 ꓣꓳ ꓐꓰ꓾ ꓣꓱꓽ ꓔꓬ ꓢꓴ 217 ꓪꓹ (2170 ꓢꓯꓹ) ꓙꓳ ꓡꓳ꓿
Elon Musk ꓠꓬ ꓮ ꓔꓳꓸ ꓙꓼ ꓟꓳ-ꓓꓳ (Tesla Electric Car) ꓐꓰ꓾ ꓟꓴ ꓪꓴꓽ ꓗꓪ ꓙꓰ ꓓꓵꓽ ꓓꓳ ꓚꓱꓹ (SpaceX) ꓶ ꓡꓯꓼ ꓢꓲꓺ ꓒꓽ ꓞꓳ ꓐꓳ ꓒꓽ ꓓꓽ ꓥ ꓢꓲ꓾ ꓬꓲꓸ ꓐꓳ ꓶꓽ ꓠꓬ ꓓꓳ-ꓡ 273.6 Billions ꓗꓪ ꓛꓲ ꓙꓳ ꓢꓴ ꓥ ꓡꓳ ꓐꓰ Forbes magazine ꓗꓪ ꓐꓰ ꓚꓲꓸ ꓚ ꓢꓪꓼ ꓔꓸ ꓡꓳ꓿
ꓓꓳ ꓕꓱ ꓟ ꓑꓶꓸ ꓓꓴ Twitter share ꓠꓬ 6% ꓓꓯꓻ ꓙꓰˍ ꓡꓳ꓿