ꓐꓴ-ꓓꓼ ꓦ ꓡꓱ ꓚꓱꓹ ꓗꓪ 7 ꓦ ꓦ ꓡꓴ ꓕꓲ ꓠꓬꓲ ꓠꓬ ꓮ ꓘꓶꓸ ꓒꓵꓽ ꓟ ꓕꓲ ꓠꓬꓲ ꓥ ꓡꓳ= ꓕꓱ ꓕꓲ ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓦ ꓐ ꓢꓽ ꓟ ꓦ ꓡꓴ ꓗꓪ ꓛꓲ (10 ꓦ ꓦ ꓡꓴ) ꓐꓴꓼ-ꓓꓼ ꓢꓳ ꓤ ꓐꓴ ꓐꓱ ꓶ ꓢꓲꓽ ꓫꓬ ꓟ ꓦ ꓐ (3) ꓟ ꓠꓽ ꓦꓬꓼ ꓠꓬꓲ ꓥ ꓡꓳ=ꓗꓳꓸ ꓡꓳꓹ ꓡ ꓟ 2500 ꓘꓳꓼ ꓕꓯ ꓟꓲ ꓠꓯ ꓕꓱ ꓟ ꓗꓪ ꓔꓬ ꓗꓷ ꓢꓴ ꓐꓴ-ꓓꓼ ꓓꓲ-ꓕꓲ-ꓕꓼ ꓕꓲ ꓣꓳ ꓙꓳ ꓡꓳ= ꓬꓲꓸ ꓠꓬ ꓙꓳ ꓟ ꓥ ꓕ ꓑꓳꓸ ꓔꓯ ꓫꓬꓽ ꓫꓬꓽ ꓡꓰ ꓚꓹ ꓠꓬꓲ ꓟꓰꓹ ꓠꓬꓲ ꓓꓳ ꓡ ꓖꓴ ꓢꓲ꓾ ꓢꓷꓸ ꓙꓲꓽ ꓙꓳ ꓟ ꓮ ꓙꓵꓽ ꓢꓷꓸ ꓖꓴ ꓢꓴ ꓕꓲ ꓣꓳ ꓒꓬꓱꓼ ꓡ ꓡꓳ= ꓖꓳ ꓡꓱ ꓢꓲꓸ ꓗꓳꓸ ꓗꓷ ꓟ 2500 ꓘꓳꓼ 7 ꓦ ꓦ ꓡꓴ ꓕꓲ ꓠꓬꓲ ꓗꓪ꓾ ꓮ ꓟꓶ ꓲ-ꓓꓲ-ꓬ ꓟꓵꓽ ꓕꓲ ꓔꓳꓸ꓾ ꓞꓰꓹ-ꓡ ꓘꓳ ꓗꓪ (Deer Park) ꓬꓲꓸ ꓛꓳ ꓒꓯꓹ 5 ꓣꓳ ꓔꓯ ꓮ ꓘꓶꓸ ꓬꓳꓹ ꓚꓵ ꓟ ꓐꓰ꓾ ꓮ ꓘꓶꓸ ꓙ ꓜꓲꓼ ꓫꓸ ꓟ ꓔꓱꓹ ꓚꓵ ꓟ ꓟꓸ ꓟꓲꓽ ꓪꓴꓸ ꓔꓯ ꓚꓺ ꓟꓸ ꓖꓶ ꓗꓷꓳ= ꓬꓲꓸ ꓮ ꓘꓶꓸ ꓚ ꓗꓴꓸ ꓟ ꓐꓰ꓾ ꓠ ꓠꓹ ꓢꓴ (5) ꓣꓳ ꓥ ꓟꓲ ꓮ ꓘꓶꓸ ꓠꓲꓹ ꓡꓱ ꓪꓴꓸ ꓠꓷꓸ ꓙꓲ ꓢꓴ ꓥ ꓠꓬꓲ꓾ ꓟꓸ ꓟꓲ ꓕꓱ ꓟ ꓔꓯ ꓙ ꓜꓲꓼ ꓡꓰ ꓢꓲꓸ ꓮ ꓙꓵꓽ ꓢꓴ ꓠꓬ ꓡꓲꓹ ꓗꓷ ꓟꓶ ꓢꓴ ꓒꓬꓱꓼ ꓡ ꓡꓳ= ꓟꓲ ꓠꓯ ꓐꓰ ꓟꓲ ꓠꓯ ꓗꓪ ꓟ ꓦꓯꓸ ꓠꓲꓹ ꓙꓲꓽ ꓓꓴ꓾ ꓟꓽ ꓢꓷꓸ ꓟꓽ ꓗꓴꓸ ꓓꓴ ꓐꓰ꓾ ꓠꓲꓹ ꓢꓲꓼ ꓠꓲꓹ ꓞꓲꓹ ꓓꓴ ꓮ ꓙꓵꓽ ꓗꓪ ꓐꓰ ꓡꓲꓹ ꓙꓰ ꓟꓶ ꓢꓴ ꓒꓬꓱꓼ ꓡ ꓡꓳ=
ꓟꓸ ꓟꓲꓽ ꓚꓱꓹ ꓕꓱ ꓟ ꓔꓯ ꓓꓴ-ꓓꓼ ꓬꓲꓸ ꓚꓲ ꓛꓬ ꓡꓰ ꓧꓪ ꓟꓳ ꓡꓰ ꓢꓲ꓾ ꓬꓲꓸ ꓚꓲ ꓛꓬ ꓠꓬ ꓮ ꓘꓶꓸ ꓠꓲꓹ ꓘꓪ ꓫꓵ ꓡꓰꓳ= ꓖꓳ ꓡꓱ ꓥ ꓟꓲ ꓠꓱꓸ ꓐꓯꓼ ꓢꓴ ꓐꓴ ꓙ ꓜꓲꓼ ꓐ ꓡ ꓥ ꓢꓶ ꓐꓰ ꓮ ꓘꓶꓸ ꓓꓵꓽ ꓙ ꓫꓸ ꓡꓰꓳ= ꓮ ꓡꓲ ꓥ ꓟꓲ ꓔꓱꓹ ꓚꓵ ꓟ ꓟꓸ ꓟꓲꓽ ꓓꓽ ꓪꓴꓸ ꓕꓱ ꓟ ꓔꓯ ꓟꓽ ꓚ ꓟꓸ ꓠꓬ ꓟꓽ ꓓ ꓐꓰ ꓢꓪꓼ ꓢꓲ꓾ ꓬꓲꓸ ꓛꓳ ꓒꓯꓹ (5) ꓣꓳ ꓔꓯ ꓚ ꓟꓸ ꓖꓶ ꓗꓷꓳ= 7 ꓦ ꓦ ꓡꓴ ꓗꓪ ꓬꓲꓸ ꓡꓰ ꓚ ꓪꓴꓸ ꓔꓴ ꓗꓷ ꓟ꓾ ꓟ ꓟꓲꓽ ꓠꓬ ꓔꓱꓹ ꓚꓵ ꓟ ꓟꓸ ꓟꓲꓽ ꓓꓽ ꓪꓴꓸ ꓥ ꓢꓲ꓾ ꓗꓸ ꓠꓯꓸ ꓬꓲꓸ 40 ꓘꓳꓼ ꓛꓲ ꓟꓲ ꓠꓯ ꓗꓪ ꓢꓯꓸ ꓔꓬ ꓢꓲ ꓚꓺ ꓟꓳꓸ ꓖꓶ ꓗꓷ ꓟ ꓟꓸ ꓟꓲꓽ ꓮ ꓙꓵ ꓟ ꓬꓲꓸ ꓝꓳꓹ ꓟꓶ ꓥ ꓡꓳ= ꓟꓲ ꓠꓯ ꓗꓪ ꓟꓳ ꓓ ꓟ꓾ ꓟꓳ ꓟꓽ ꓓ ꓟ ꓮ ꓙꓵꓽ ꓟ ꓮ ꓡꓲ ꓒꓬꓱꓼ ꓔꓬ ꓡꓳ ꓫꓵꓽ ꓟ ꓬꓲ ꓚꓱꓹ ꓬꓲꓸ ꓟꓲ ꓮ ꓙꓵꓽ ꓔꓯ ꓢꓷꓸ ꓡꓰ ꓢꓲꓸ ꓕꓲ ꓟ ꓐꓰ ꓕꓲ ꓟ ꓮ ꓡꓲ ꓥꓳꓻ ꓡꓯꓽ ꓘꓳ ꓞ ꓟ꓾ ꓔꓱꓹ ꓚꓵ ꓟ ꓐꓰ ꓬꓲꓸ ꓚꓽ ꓒꓬꓱꓼ ꓔꓬ ꓟ ꓮ ꓡꓲ ꓮꓸ ꓭꓸ ꓩꓴ ꓡꓰ ꓐꓰ ꓮ ꓡꓲ ꓚꓳ ꓔꓬ ꓟ ꓔꓯ ꓒꓶꓻ ꓟꓸ ꓖꓶ ꓡꓳ= ꓖꓳ ꓗꓪ ꓔꓱꓹ ꓚꓵ ꓟ (4) ꓫꓵꓽ ꓒꓶꓻ ꓟꓸ ꓖꓶ ꓡ ꓢꓲ꓾ ꓮ ꓡꓲ ꓐꓰ ꓢꓲ ꓡꓲꓹ ꓟ ꓗꓪ ꓙꓰ ꓛꓲ ꓡꓰ ꓟ ꓚꓱꓹ (8) ꓚꓱꓹ ꓥ ꓟꓲ ꓚ ꓟꓸ ꓖꓶ ꓡꓳ= ꓕꓱ ꓟ ꓠꓬ ꓐꓴ-ꓓꓼ ꓟꓸ ꓟꓲꓽ ꓓꓽ ꓟ ꓬꓲꓸ ꓝꓳꓹ ꓟꓶ ꓥ ꓡꓳ= 7 ꓦ ꓦ ꓡꓴ ꓗꓪ ꓕꓲ ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓦ ꓐ 3 ꓟ ꓘꓴꓽ ꓟ ꓦꓬꓼ ꓠꓬꓲ ꓗꓪ ꓐꓴ-ꓓꓼ ꓡ-ꓟ ꓒꓽ ꓐꓴ ꓠꓬ ꓙꓳꓥꓽ ꓦꓲ ꓕꓲ ꓟ ꓟ ꓗꓪ ꓦ ꓐ 3 ꓟ ꓟꓽ ꓐꓲ ꓡꓰ ꓟꓽ ꓢꓽ ꓔꓬ ꓢꓲ꓾ ꓐꓴ-ꓓꓼ ꓟꓸ ꓟꓲꓽ ꓐꓰ ꓓꓵꓽ ꓙ ꓚꓱꓹ ꓔꓯ ꓢꓳ ꓣꓴ ꓖꓪꓽ ꓓꓰꓼ ꓟ ꓬꓰ ꓡꓳ= ꓐꓴ-ꓓꓼ ꓦ ꓡꓱ ꓚꓱꓹ ꓔꓯ ꓖꓼ ꓢꓴ ꓦꓴ ꓥ ꓟꓲ ꓦ ꓐ 3 ꓟ ꓠꓯꓸꓼ ꓗꓪ ꓦꓲ ꓚꓲꓸ ꓟꓽ ꓚꓰꓼ= ꓦꓲ ꓕꓴꓽ ꓗꓪ ꓔꓲꓺ ꓟꓽ ꓬꓰ= ꓶꓽ ꓤ ꓗꓪ ꓓꓵꓽ ꓓꓳ ꓟꓽ ꓚꓰꓼ= ꓬꓲꓼ ꓡ ꓟ ꓜꓽ ꓫꓵꓽ ꓟꓽ ꓜꓽ ꓟꓽ ꓓꓳ ꓔꓬ ꓟ ꓢꓲꓽ ꓫꓬ ꓟ ꓬꓲꓸ ꓡꓲꓽ ꓛꓳ ꓟ ꓦꓬꓼ ꓠꓬꓲ ꓥ ꓡꓳ= ꓐꓴ-ꓓꓼ ꓡ-ꓟ ꓙꓳꓥꓽ ꓦꓲ ꓗꓪ ꓙꓰ ꓢꓲ ꓢꓲꓹ ꓪꓰ ꓐꓰ ꓠꓱꓸ ꓐꓯꓼ ꓔꓲꓺ ꓓꓴ ꓔꓲꓺ ꓖꓶ ꓟ꓾ ꓝꓮꓲ ꓡ-ꓟ ꓐꓴ ꓐꓰ ꓐꓴ-ꓓꓼ ꓐꓬꓱꓽ ꓐꓱ ꓶ ꓬꓲ ꓙꓬ ꓚ ꓜꓲꓽ (Lotus) ꓗꓪ ꓐꓰ ꓐꓵ ꓞꓲꓽ ꓛꓵꓽ ꓢꓲꓸ ꓔꓲꓺ ꓖꓶ ꓟ ꓬꓰ ꓡꓳ= ꓬꓲꓸ ꓪ ꓐꓱ ꓶ ꓐꓴ-ꓓꓼ ꓡꓰ ꓚ ꓟꓸ ꓖꓶ ꓒꓰꓹ ꓟ ꓔꓱꓹ ꓚꓵ ꓟ ꓟꓸ ꓟꓲꓽ ꓓꓽ ꓪꓴꓸ ꓔꓯ ꓘꓳ ꓣꓴ ꓟ ꓦꓬꓼ ꓠꓬꓲ꓾ ꓢꓳ ꓣꓴ ꓖꓪ ꓓꓰꓼ ꓒꓳꓹ ꓟ ꓦꓬꓼ ꓠꓬꓲ꓾ ꓔꓱꓹ ꓟ ꓞꓳ ꓙꓳ ꓚꓱꓹ ꓗꓪ ꓢꓯꓼ ꓕꓵꓼ ꓟ ꓦꓬꓼ ꓠꓬꓲ꓾ ꓢꓲꓽ ꓫꓬ ꓟ ꓦꓬꓼ ꓠꓬꓲ ꓥ ꓡꓳ=