2022 ꓘꓳꓼ 4 ꓦ 5 ꓠꓬꓲ꓾ ꓟꓲ ꓠꓯ ꓗꓴꓷꓼ ꓜꓴ ꓢꓲ ꓡꓲꓹ ꓡ ꓠ ꓡꓳꓸ ꓙ ꓗꓽ ꓙ ꓜꓴ ꓗꓳ-ꓢꓰ (ꓴꓠꓢꓚ- United Nations Security Council) ꓖꓪ ꓙꓱ ꓜꓲꓼ ꓓꓴ ꓗꓪ ꓬꓴ-ꓗ-ꓣꓲꓸ ꓗꓴꓷꓼ ꓙꓵꓽ ꓢꓴ ꓜ-ꓡꓯ ꓢꓲ-ꓗꓲ ꓫꓸ ꓕꓱ ꓗꓷ ꓡꓳ꓿
ꓣ-ꓫꓸ ꓡꓰ ꓬꓲꓸ ꓗꓴꓷꓼ ꓔꓯ ꓦꓴ ꓢꓰꓼ ꓡ ꓟ ꓔꓯ ꓕꓼ ꓢꓲ꓾ ꓠꓲꓹ ꓞ ꓗꓽ ꓙ ꓓꓴ ꓟꓽ ꓬꓰ ꓡ ꓟ ꓟꓲ ꓠꓯ ꓗꓴꓷꓼ ꓜꓴ ꓔꓯˍ ꓟꓲ ꓕꓼ ꓩꓴ ꓡ ꓡꓳ꓿ ꓬꓲꓸ ꓫꓸ ꓕꓱ ꓘꓶꓽ ꓬꓲꓸ ꓝꓲꓸ ꓓꓽ ꓟ ꓠꓬ ꓕꓱ ꓡꓱ ꓥꓳ꓿
💥 ꓴꓠꓢꓚ ꓡꓰ ꓟꓲ ꓠꓯ ꓔꓯ ꓖꓶꓽ ꓐ ꓡ ꓟ ꓡꓳꓸ ꓙ ꓗꓽ ꓙ ꓓꓴ ꓮ ꓗꓪ ꓙꓳˍ ꓡ? ꓮ ꓟꓶ ꓮ ꓫꓵꓽ ꓡꓲꓸ ꓙꓲ ꓖꓴ ꓟꓽ ꓙꓳ꓾ ꓟꓬꓱꓽ ꓟꓽ ꓬꓰ ꓔꓬ ꓟ ꓟꓲ ꓠꓯ ꓗꓴꓷꓼ ꓜꓴ ꓔꓯ ꓑꓲꓸ ꓩꓴ ꓓꓴ ꓕꓵꓼ ꓡꓵꓸ ꓔꓲꓸ ꓥ ꓪꓻꓰ? ꓟꓲ ꓠꓯ ꓗꓴꓷꓼ ꓐꓴ ꓛꓳ ꓫꓱꓽ ꓓꓴ ꓙꓵꓽ ꓗ ꓟꓽ ꓙꓳ ꓡꓰ ꓪꓻꓰ? ꓟꓲꓸ ꓟꓲ ꓠꓴ ꓪ ꓠꓰ “ꓟꓽ ꓙꓳ ꓬꓰꓳ” ꓐꓯ ꓡ ꓥꓳ ꓐꓯ ꓟꓲ ꓠꓯ ꓗꓴꓷꓼ ꓜꓴ ꓔꓯ ꓠꓽ ꓩꓴ꓾ ꓑꓲꓸ ꓩꓴ ꓗꓷ ꓓꓰꓼ ꓖꓼ ꓥꓳ꓿
💥 ꓞꓳ ꓪꓴ ꓞꓳ ꓟ ꓠꓴ ꓪ ꓕꓲ ꓜꓴ ꓟꓲ ꓠꓯ ꓗꓴꓷꓼ ꓜꓴ ꓘꓶꓽ ꓫꓵꓽ 1꓾ ꓬꓲꓸ ꓤꓽ 1 ꓔꓯ ꓓꓵꓽ ꓙ ꓠꓬꓲ꓿ ꓟꓲ ꓠꓯ ꓗꓴꓷꓼ ꓜꓴ ꓠꓬ ꓟꓲ ꓠꓯ ꓗꓪ ꓢꓲ ꓡꓲꓹ ꓟ ꓔꓯ ꓫꓺ ꓒꓵꓽ ꓓꓴ꓾ ꓢꓲ ꓡꓲꓹ ꓟ ꓙꓳ ꓡ ꓓꓴ ꓐꓱ ꓶ ꓔꓶ ꓔꓸ ꓟ ꓥꓳ꓿ ꓕꓱ ꓟ ꓔꓯ ꓡꓲꓸ ꓬꓰ ꓟꓽ ꓐ ꓡ ꓠꓬ ꓠꓱꓸ ꓐꓯꓼ ꓘꓶ ꓫꓵꓽ ꓬꓲꓸ ꓝꓲꓸ ꓬꓲ ꓟꓲ ꓐꓴ ꓔꓯ ꓮ ꓡꓲ ꓬꓰ ꓐ ꓡ?
💥 ꓮ ꓟꓶ ꓠꓬ ꓐꓴ-ꓛ ꓡꓳ ꓒꓱ ꓔꓯ ꓣ-ꓫꓸ ꓐꓴ ꓙꓵꓽ ꓔꓬ ꓕꓯꓽ ꓮ ꓡꓲꓳ ꓫꓵꓽ ꓬꓰ ꓗꓷ ꓟ ꓚꓲꓸ ꓛꓬ ꓟꓬ ꓢꓶꓽ ꓡꓰꓽ ꓡꓳꓸ ꓟꓳ ꓗꓷꓳ꓿ ꓠꓱꓸ ꓐꓯꓼ ꓬꓴ-ꓗ-ꓣꓲꓸ ꓡꓳ ꓒꓱ ꓮ ꓟꓬꓹ ꓔꓯ ꓟꓽ ꓡꓳꓸ ꓠꓬꓲ ꓙꓰ ꓢꓰꓽ꓿ ꓬꓲꓸ ꓪ ꓮ ꓡꓲ ꓫꓸ ꓟꓴ ꓫꓸ ꓚꓬ꓾ ꓥꓶꓸˍ ꓟ ꓬꓰ ꓗꓷ ꓟ ꓮ ꓙꓵꓽ ꓗꓸ ꓚꓵ ꓧꓪ ꓟꓰꓹ ꓩꓴ ꓡ ꓓꓴ ꓥꓳ꓿ ꓙꓼ ꓪꓴꓸ ꓠꓷꓸ ꓗꓪ ꓐꓰ ꓬꓲꓸ ꓐꓬꓱꓽ ꓮ ꓙꓵꓽ ꓧꓪ ꓟꓰꓹ ꓙꓲ ꓡꓳ꓿ꓮ ꓟꓶ ꓠꓬ 2022 ꓘꓳꓼ ꓥꓳ꓿
💥 ꓟꓲ ꓠꓯ ꓗꓴꓷꓼ ꓜꓴ ꓔꓶ ꓚꓱꓹ꓾ ꓙꓵꓽ ꓚꓱꓹ ꓔꓯ ꓠꓲꓹ ꓞ ꓫꓬꓹ ꓔꓱꓹ ꓠ ꓔꓸꓳ꓿ ꓦꓰꓔꓳ (ꓪꓰ-ꓔꓳ ꓙꓵꓽ ꓪ ꓕꓱ ꓟ ꓖꓶꓽ ꓔꓸ ꓟ ꓗꓴꓷꓼ ꓕꓲ ꓟ ꓡꓰꓽ ꓬꓰ ꓟꓽ ꓓ ꓐꓰ ꓐꓯ ꓡ ꓠꓬ ꓠꓱꓸ ꓐꓯꓼ ꓢꓴ ꓮ ꓟꓬ ꓪꓽ ꓡꓲꓸ ꓬꓰ ꓟꓽ ꓓ ꓟ ꓙꓵꓽ ꓪ) ꓙꓵꓽ ꓪ ꓐꓯˍ ꓟ ꓠꓬ ꓞꓳ ꓤ ꓢꓰꓼ ꓓꓴ ꓙꓵꓽ ꓪ ꓗ ꓬꓰ ꓝꓲ ꓟꓽ ꓓ꓿ ꓗꓴꓷꓼ ꓜꓴ ꓗꓪ ꓔꓺ ꓔꓬ ꓢꓴ ꓮ ꓡꓲ ꓕꓲ ꓗꓴꓷꓼ ꓥ ꓟꓲ ꓕꓲ ꓫꓵꓽ ꓕꓲ ꓙꓶ ꓗꓪ ꓙꓵꓽ ꓪ ꓙꓳ ꓠ ꓔꓸ ꓥ꓿ ꓟꓲ ꓠꓯ ꓗꓪ ꓟꓯꓼ ꓘꓶꓽ ꓐꓴ ꓔꓯ ꓠꓽ ꓡꓰ ꓝꓲ ꓐ ꓡ ꓟ ꓙꓵꓽ ꓪ ꓙꓳ ꓠ ꓗ ꓡꓳ꓿
💥 ꓬꓲꓸ ꓜꓲ ꓬꓲꓸ ꓥꓳꓹ ꓙꓵꓽ ꓢꓴ꓾ ꓢꓴ ꓔꓯ ꓛꓲꓸ ꓢꓴ ꓐꓴ ꓔꓯ ꓮ ꓡꓲ ꓗꓽ ꓔꓸ ꓡꓯ ꓐꓯ? ꓬꓴ-ꓗ-ꓣꓲꓸ ꓟꓯꓼ ꓢꓰꓼ ꓠꓹ ꓟ ꓕꓵꓼ ꓪ ꓖꓶꓽ ꓢꓴ ꓐꓴ ꓮ ꓙꓵꓽ ꓔꓯ ꓐꓯ ꓟꓴ ꓕꓲꓺ ꓗꓪ ꓧꓳꓽ ꓛꓲ ꓡ ꓠ ꓔꓸ ꓡꓳ꓿ ꓣ-ꓫꓸ ꓗꓴꓷꓼ ꓝꓲ ꓓꓴ von Ribbentrop ꓐꓰ꓾ ꓟꓯꓼ ꓢꓰꓼ ꓠꓹ ꓟ ꓓꓵꓽ ꓙ ꓚꓴ ꓬꓲꓹ ꓓꓶꓽ ꓢꓴ Adolf Eichmann ꓐꓴ ꓮ ꓡꓲ ꓕꓲ ꓣꓳ ꓡꓲꓸ ꓟꓽ ꓡꓲꓹ ꓙꓰ ꓠ ꓬꓰ ꓠ ꓔꓸ ꓥ꓿
💥 ꓬꓲꓸ ꓔꓲꓸ ꓬꓲꓸ ꓢꓴ ꓗꓴꓷꓼ ꓔꓯ ꓦꓴ ꓢꓰꓼ ꓡ ꓢꓲꓸ ꓬꓲꓸ ꓔꓲꓸ ꓴꓠꓢꓚ ꓗꓪ ꓦꓰꓔꓳ ꓙꓵꓽ ꓪ ꓣꓱꓽ ꓔꓬ ꓟ ꓣ-ꓫꓸ ꓔꓯ ꓖꓳ ꓗꓪ ꓐꓰ ꓠꓲꓹ ꓞ ꓣꓴ ꓞꓰ ꓩꓴ ꓗꓷ꓿ ꓴꓠꓢꓚ ꓙꓲ ꓙꓲ ꓟꓬꓱꓽ ꓬꓰ ꓡ ꓠꓹ ꓟ ꓫꓬꓹ ꓑꓱ ꓫꓬꓹ ꓡꓲꓸ ꓓꓴ ꓬꓰ ꓡꓯ꓿ ꓕꓱ ꓡꓱ ꓬꓰ ꓟꓽ ꓐ ꓡ ꓐꓯ ꓴꓠꓢꓚ ꓔꓯ ꓑꓲꓸ ꓩꓴ꓾ ꓠꓽ ꓩꓴ ꓗꓷ꓿
💥 3 ꓫꓵꓽ ꓕꓲ ꓫꓵꓽ ꓟ ꓬꓰ ꓟꓽ ꓛꓲ ꓛꓲ ꓠꓴ ꓪ ꓜꓴ ꓕꓲ ꓫꓵꓽ ꓔꓲꓸ ꓠꓽ ꓬꓰ ꓐ ꓡ ꓥꓳ ꓐꓰ ꓙꓵˍ ꓡꓳ꓿ ꓬꓴ-ꓗ-ꓣꓲꓸ ꓗꓪ꓾ ꓬꓴ-ꓬꓳꓼ ꓗꓪ꓾ ꓕꓲ ꓟꓲ ꓠꓯ ꓗꓪ ꓢꓲ ꓡꓲꓹ ꓟ ꓣꓱꓽ ꓬꓯꓼ ꓔꓬ ꓡꓳ꓿ ꓬꓲꓸ ꓟꓶ ꓗꓪ ꓐꓬꓱꓽ ꓢꓯꓸ ꓕꓲ ꓟ ꓟꓳꓸ ꓖꓶ ꓓꓴ ꓥꓳ꓿ ꓮ ꓙꓵꓽ ꓢꓴ ꓬꓴ-ꓗ-ꓣꓲꓸ ꓗꓪ ꓡ ꓢꓲ꓾ ꓖꓳ ꓗꓪ ꓙꓰ ꓛꓳꓽ ꓬꓰ ꓟꓽ ꓐ ꓡ ꓠꓬꓲ ꓕꓱ ꓟ ꓔꓯ ꓛꓳꓽ ꓠꓬꓲ ꓓꓴ ꓬꓰ꓿ ꓫꓸ ꓟꓳ ꓪ꓿
💥 ꓜ-ꓡꓯ ꓢꓲ-ꓗꓲ ꓫꓸ ꓕꓱ ꓓꓳ ꓡꓰ ꓟꓶ ꓕꓱꓼ ꓐꓴ-ꓛ ꓡꓳ ꓒꓱ ꓗꓪ ꓢꓰꓼ ꓔꓵꓸ ꓔꓸ ꓢꓴ ꓤ ꓠꓱ꓾ ꓡꓯ ꓟꓰꓹ ꓞꓳꓹ ꓢꓲꓸ ꓳꓸ ꓓꓵ ꓗꓪ ꓐꓶ ꓢꓰꓼ ꓔꓸ ꓢꓴ ꓐꓴ ꓐꓰ꓾ ꓕꓲ ꓡꓳ ꓒꓱ ꓬꓲꓸ ꓧꓶꓽ ꓬꓰ ꓔꓸ ꓟ ꓐꓬꓱꓽ ꓢꓯꓸ ꓟꓳꓸ ꓖꓶˍ ꓕꓯꓽ ꓴꓠꓢꓚ ꓠꓬ ꓛꓱꓼ ꓡꓱꓼ ꓗꓼ ꓡꓼ ꓟꓽ ꓔꓸ ꓢꓲ ꓡꓲꓹ ꓗꓷ ꓡꓰꓳ꓿
(ꓬꓲꓸ ꓚꓰ꓾ PRESIDENT OF UKRAINE – VOLODYMYR ZELENSKYYOfficial website – April 5, 2022 – Speech by the President of Ukraine at a meeting of the UN Security Council. Photos – from The New York Times, and CNN, April 5, 2022)