ꓕꓱ ꓕꓲ ꓤꓶ Facebook ꓐꓰ Microsoft ꓙꓼ ꓢꓷꓸ ꓠꓲꓹ ꓶ ꓡꓯꓼ ꓜꓴ ꓐꓴ ꓠꓬ ꓬꓲꓸ ꓚꓵꓺ ꓟ ꓟꓲ ꓠꓯ (Real World) ꓗꓪ ꓟꓳꓻ ꓟꓽ ꓓ꓾ ꓪ ꓟꓽ ꓓ ꓡꓳ ꓫꓵꓽ ꓔꓯ ꓬꓲꓸ ꓶꓻ ꓐꓬꓱꓽ/ ꓬꓲꓸ ꓦ ꓐꓬꓱꓽ ꓟꓲ ꓠꓯ (Virtual World) ꓗꓪ ꓧꓪ ꓟꓶ ꓠꓹ ꓟ ꓚꓰꓼ ꓔꓯꓺ ꓡꓯ ꓘꓳ ꓔꓬ ꓡꓳ꓿
ꓡ ꓞꓳ ꓠꓲꓹ ꓟ ꓗꓪ ꓓꓵꓽ ꓙ ꓚꓴ ꓬꓲꓹ ꓓꓶꓽˍ ꓟ ꓐꓰ꓾ ꓟꓳꓻ ꓠꓲꓹ ꓫꓵ꓾ ꓬꓰ ꓠꓲꓹ ꓫꓵˍ ꓟ ꓠꓲꓹ ꓟ ꓦ ꓐꓬꓱꓽ ꓮ ꓙꓵꓽ ꓔꓯ ꓚꓵꓺ ꓚꓵꓺ ꓗꓹ ꓟ꓾ ꓙꓳˍ ꓟ ꓡꓰ ꓐꓰ ꓟꓳꓻ ꓪ꓾ ꓫꓱꓹ (ꓫꓷꓹ) ꓪ꓾ ꓑ ꓙ ꓪ ꓓꓴ ꓢꓯꓼ ꓕꓵꓼ ꓔꓬ ꓟ ꓥ ꓡꓳ꓿ ꓡꓲ-ꓢꓴ ꓓꓵꓽ ꓙ ꓚꓱꓹ ꓡꓳ ꓚ ꓐꓯˍ ꓠꓬ꓾ ꓥꓳꓹ ꓒꓽ ꓢꓷꓸ ꓠꓲꓹ꓾ ꓠꓲꓽ ꓒꓽ ꓢꓷꓸ ꓠꓲꓹ ꓐꓰ꓾ ꓟꓲꓺ ꓢꓲꓺ (ꓟꓶ ꓢꓲꓺ) ꓢꓷ ꓠꓲꓹ ꓢꓳ ꓚꓰꓼ ꓓꓳ ꓡ ꓔꓬ ꓟ ꓥꓳ ꓐꓰ꓾ ꓐꓯ ꓙꓲˍ ꓡꓳ꓿
ꓧꓶꓸ ꓕꓯꓽ ꓟ ꓤꓶ ꓗꓪ ꓠꓬ꓾ ꓮ ꓟꓶ Facebook ꓐꓯˍ ꓟ ꓠꓬ ꓕꓳ ꓶꓽ ꓡꓰ ꓐꓰ ꓥꓳ꓿ ꓕꓳ ꓶ ꓮ ꓘꓶꓸ ꓵꓺ ꓢꓴ ꓠꓬ ꓮ ꓒꓳ ꓒꓳ ꓗꓪ ꓮ ꓘꓶꓸ ꓢꓷꓸ ꓡ ꓟ ꓡꓰ ꓐꓰ꓾ ꓾ Facebook, YouTube ꓡꓳꓸ ꓢꓴ ꓠꓬ ꓢꓴ ꓮ ꓫꓵꓽ ꓮ ꓡꓲ ꓬꓰ ꓟ ꓚꓱꓹ ꓟꓳꓻ ꓡ꓾ ꓢꓷꓸ ꓡ ꓡꓳ꓿ ꓮ ꓟꓶ ꓖꓳ ꓗꓪ ꓐꓰ ꓕꓲ ꓝꓸ ꓙꓰˍ ꓟ ꓠꓬ Metaverse ꓥ ꓡꓳ꓿
ꓔꓯꓺ ꓥꓳ ꓐꓯˍ ꓠꓬ ꓡ ꓞꓳ ꓐꓴ ꓢꓷꓸ ꓠꓲꓹ ꓪꓴꓽ ꓡ ꓢꓲꓸ ꓕꓳ ꓶ ꓑꓷꓠ ꓵꓺ ꓛꓳ ꓗꓴꓸ ꓡ ꓟ ꓐꓰ꓾ ꓔꓦ ꓐꓬꓱꓽ ꓢꓯꓸ ꓗꓪ ꓕꓲ ꓝꓸ ꓓꓯꓻ ꓙꓰˍ ꓟ ꓡꓰ ꓐꓰ ꓥꓳ꓿
ꓬꓲꓸ ꓐꓽ ꓗꓪ ꓚꓵ ꓚꓵ ꓟꓽ ꓥ ꓟꓲ꓾ ꓦꓣ- Virtual Reality ꓟꓬ ꓢꓶꓽ ꓛꓻ ꓓꓴ ꓛꓻ ꓗꓷ ꓠꓬ ꓚꓵ ꓚꓵ ꓡꓰ ꓐꓰ ꓑ ꓙ ꓪ꓾ ꓟꓳꓻ ꓪ꓾ ꓫꓱꓹ ꓪ ꓓ ꓗꓪ ꓛꓲ ꓗꓪ ꓚꓰꓼ ꓓꓳ ꓡ ꓟ ꓥ ꓡꓳ꓿
ꓦꓣ ꓟꓬ ꓢꓶꓽ ꓛ ꓓꓴ ꓗꓪ ꓐꓰ ꓕꓲ ꓟꓲ ꓠꓯ ꓗꓪ ꓟ ꓡꓳ ꓒꓱ ꓮ ꓡꓲ ꓕꓲ ꓡꓳ ꓒꓱ ꓗꓪ ꓙꓰ ꓠꓲꓹ ꓫꓵ꓾ ꓮ ꓡꓲ ꓕꓲ ꓦꓲ ꓗꓪ꓾ ꓮ ꓡꓲ ꓕꓲ ꓣꓳ ꓔꓯ ꓟꓳꓻ ꓠꓲꓹ ꓫꓵ ꓥ ꓟꓲ ꓜꓲ ꓡꓯ ꓘꓳ ꓓ ꓗꓪ ꓛꓲ ꓬꓰ ꓔꓬ ꓡꓳ꓿ ꓕꓱ ꓟ ꓠꓬ ꓧꓶꓸ ꓕꓯꓽ ꓦ ꓐꓬꓱꓽ ꓥ ꓢꓲ꓾ ꓮ ꓟꓶ ꓠꓬ ꓬꓲꓸ ꓚꓵ ꓒꓬꓱꓼ ꓡ ꓔꓬ ꓡꓳ꓿
ꓦ ꓐꓬꓱꓽ ꓟꓲ ꓠꓯ ꓘꓴꓽ ꓗꓪ꓾ ꓙꓲ ꓔꓲ ꓔꓲꓺ ꓖꓴ꓾ ꓟꓵꓽ ꓪꓴꓽ ꓔꓶ,꓾ ꓡꓳ ꓖꓪ ꓓꓴ ꓬꓲ ꓫꓵꓽ ꓬꓲ ꓙꓰ ꓐꓯ ꓖꓴ ꓟꓽ ꓓ ꓙꓳˍ ꓡꓳ꓿ ꓡꓯꓽ ꓫꓵ ꓥ ꓟꓲ ꓚꓰꓼ ꓝꓸ ꓔꓬ ꓢꓰꓽ ꓡꓳ꓿
ꓦ ꓐꓬꓱꓽ ꓟꓲ ꓠꓯ ꓗꓪ ꓚꓲꓸ ꓛꓬ ꓦꓲ ꓘꓴ꓾ ꓐꓬꓱꓻ ꓘꓴꓽ ꓙ ꓖꓶꓽ ꓢꓲꓸ ꓚꓲ ꓛꓬ ꓠꓲꓹ ꓫꓵˍ ꓟ ꓡꓰ ꓐꓰ ꓫꓬꓹ ꓜꓶ ꓐ ꓡ ꓡꓳ꓿ ꓢꓴ ꓡꓰ ꓫꓬꓹ ꓔꓸ ꓟ ꓗꓪˍ ꓟꓲ ꓗꓹ ꓚꓳ꓾ ꓡꓳꓸ ꓚꓳ ꓙꓰ ꓐ ꓡ ꓡꓳ꓿ ꓬꓲꓸ ꓐꓽ ꓢꓲ ꓗꓪ ꓠꓽ ꓫꓸ ꓢꓴ ꓥ ꓟꓲ꓾ ꓦ ꓐꓬꓱꓽ ꓟꓲ ꓠꓯ ꓗꓪ ꓠꓽ ꓞꓳ ꓐꓳ ꓬꓰ ꓪ ꓓˍ ꓡꓳ꓿
ꓮ ꓘꓶꓸ ꓙꓲˍ ꓟ ꓟꓵꓽ ꓕꓲ ꓔꓳꓸ ꓐꓰ꓾ ꓮ ꓘꓶꓸ ꓗꓹ ꓛꓲˍ ꓟ ꓦꓲ ꓔꓯ ꓫꓬꓹ ꓓꓳ ꓡꓰ ꓠꓬ crypto ꓒꓴ ꓕꓲ ꓫꓵꓽ ꓗꓪ ꓐꓰ ꓪꓴꓽ ꓠꓬꓲ/ꓪꓴꓻ ꓠꓬꓲ ꓬꓰ ꓐ ꓡ ꓡꓳ꓿ ꓒꓴ ꓖꓳ ꓟ ꓥ ꓟꓲ꓾ ꓬꓲꓸ ꓚꓵ ꓬꓲꓸ ꓒꓵꓽ ꓙꓳˍ ꓟ ꓒꓬꓱꓼ ꓡ ꓡꓳ꓿ ꓬꓲꓸ ꓐꓬꓱ꓾ ꓔꓦ ꓓꓳꓽ ꓐꓯ ꓖꓴ꓾ ꓦꓲ ꓐꓰ ꓟꓵꓽ꓾ ꓢꓷꓸ ꓠꓲꓹ ꓢꓳ ꓚꓱꓹ꓾ ꓶ ꓤ ꓶ ꓟꓲ ꓮ ꓙꓵꓽ ꓪꓴꓽ/ꓪꓴꓻ ꓐ ꓡ ꓟ ꓑꓶꓸ ꓓꓴ ꓕꓱ ꓟ ꓗꓪ ꓡꓱꓼ ꓙꓰ꓾ ꓓꓵꓽ ꓙꓰ ꓢꓲꓸ ꓶ ꓡꓯꓼ ꓬꓰ ꓠꓹ ꓟ ꓟꓲ ꓠꓯ ꓗꓪ ꓟ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓐꓰ꓾ ꓡꓳ ꓑ ꓐꓴ ꓢꓯꓼ ꓕꓵꓼ ꓡ ꓔꓬ ꓡꓳ꓿
ꓟꓽ ꓟꓶ ꓫꓵˍ ꓟ ꓦꓬꓼ ꓠꓬꓲ ꓗꓪ ꓦ ꓐꓬꓱꓽ ꓟꓲ ꓠꓯ ꓗꓪ ꓡ ꓞꓳ ꓮ ꓙꓵꓽ ꓟꓬꓱꓽ ꓬꓰ꓾ ꓶ ꓡꓯꓼ ꓬꓰ꓾ ꓢꓷꓸ ꓠꓲꓹ ꓢꓳ ꓓꓴ ꓒꓬꓱꓼ ꓡ ꓥꓳ꓿ ꓕꓱ ꓟ ꓔꓯ ꓡꓲ-ꓢꓴ ꓥꓳꓽ ꓗꓪ “ꓟꓲꓺ ꓢꓲꓺ ꓟꓵꓽ” ꓐꓯ ꓙꓲ ꓥꓳ꓾ ꓐꓰ ꓓꓵꓽ ꓙ ꓡꓳ꓿ ꓧꓶꓸ ꓕꓯꓽ ꓟꓽ ꓢꓷꓸ꓾ ꓟꓽ ꓟꓳꓻ꓾ ꓟꓽ ꓫꓷꓹ ꓠꓬꓲ꓾ ꓟꓽ ꓑ ꓙ ꓠꓬꓲˍ ꓟ ꓮ ꓟꓶ ꓒꓬꓱꓼ ꓡ ꓔꓬꓳ꓿
ꓕꓱ ꓡꓱꓳ ꓫꓵꓽ ꓔꓯ ꓙ ꓜꓲꓼ ꓡꓰ ꓠꓹ ꓟ Google ꓗꓪ open sea ꓕꓳꓹ ꓗꓶ ꓢꓲꓸ ꓧꓪ ꓠꓬꓲ꓿ ꓖꓳ ꓗꓪ ꓐꓬꓱꓽ ꓪꓴꓽ ꓔꓶꓸ ꓬꓰ ꓔꓸ ꓡꓳ꓿ ꓖꓳ ꓡꓱ ꓥ ꓟꓲ ꓖꓳ ꓗꓪ ꓙꓳˍ ꓟ ꓐꓬꓱꓽ ꓐꓴ ꓠꓬ ꓬꓲꓸ ꓢꓲꓺ ꓒꓽ ꓙꓳ ꓢꓲꓸ ꓪꓴꓽ/ꓪꓴꓻ ꓡꓯ ꓘꓳ ꓔꓬ ꓡꓳ꓿ ꓐꓬꓱꓽ ꓖꓳ ꓔꓶ ꓔꓯ ꓬꓳꓸ ꓐꓽ ꓗꓪ ꓡꓯꓽ ꓒꓯꓹ ꓡꓰ ꓠꓶꓽ ꓟꓽ ꓙꓲ ꓥ ꓟꓲ꓾ ꓙꓼ ꓪꓴꓸ ꓠꓷꓸ ꓗꓪ ꓫꓺ ꓔꓸ ꓢꓲꓸ ꓬꓲꓸ ꓒꓵꓽ ꓬꓲ ꓦ ꓬꓲꓸ ꓔꓴ ꓢꓯꓹ ꓒꓵꓽˍ ꓟ digital arts ꓥ ꓡꓳ꓿
ꓞꓲꓼ ꓣꓳ ꓢꓴ ꓡꓲ-ꓢꓴ ꓐꓴ ꓙꓼ ꓪꓴꓸ ꓠꓷꓸ ꓢꓷꓸ ꓠꓲꓹ ꓐꓰ꓾ ꓬꓲꓸ ꓫꓵꓼ ꓚꓰꓼ ꓓꓳ ꓡ ꓔꓬ ꓟ ꓦ ꓐꓬꓱꓽ ꓟꓲ ꓠꓯ ꓗꓪ ꓧꓪ ꓟꓰꓹ ꓠꓬꓲ ꓢꓲꓸ ꓶ ꓡꓯꓼ ꓬꓰ ꓠꓹ ꓟ ꓢꓯꓼ ꓕꓵꓼ ꓝꓲꓸ ꓛꓲꓳ꓿ metaverse ꓗꓪ ꓕꓲ ꓫꓵꓽ ꓫꓵꓽ ꓪꓴꓽ ꓪ ꓠꓹ ꓟ ꓬꓲꓸ ꓚꓱꓹ ꓧꓪ ꓡꓯ꓿ ꓕꓽ ꓬꓲꓼ ꓟꓶ ꓔꓬ꓿